युहान्ना 1
1
चोला आपिना रिङ्
1उटुम्ङि रिङ् डाना, हिट्ना रिङ् माङ्हाङ्लोक् डाना हिट्नुङ् रिङ् डोक् माङ्हाङ् डाना॥ 2रिङ् उटुम्ङि माङ्हाङ्लोक् डाना॥
3ख्वाप्पा थोक् रिङ्लाम्मा डोक् माङ्हाङ्ङा चोगुए, हिट्नुङ् चोक्बालाक् खोना थोक् चा ना रिङ् माले लिनेट्नि॥ 4उन्ङि चोला डाना, हिट्नुङ् हिट्ना चोलाम्बाक् याप्मिचि लाउङ्सा व्हाङ् लिसे॥ 5हिट्ना व्हाङ् डुम्बारिक् डुम्ङि ओम्युक्, हिट्नुङ् डुम्बारिक् डुम्नाङा खोना बेला चा व्हाङ् टेप्मा हिडुवाट्टुन्॥
6माङ्हाङ्ङा युहान्ना#१:६ ना यापमिम्बाक् बाप्टिस्मा कापिबा युहान्ना, ना छाप्ला काछेप्बा युहान्नाम्बाक् माखाक्॥ निङ् लिसाना ठिबाङ् याप्मि पाङ्सुए॥#मात्ति ३:१; मारकुस १:४; लुका ३:१-२ 7उन्लाम्मा सोब्बे याप्मिचिङा बिस्वास ओचोगु नुङ् हिट्ना व्हाङ्ङाना बारेङि माप्मा साँचि लिसाउङ् उन् टाए॥ 8युहान्ना आप्पेम्बाक् हिट्ना व्हाङ् माखाक् डाना, टरो हिट्ना व्हाङ्ङाना बारेङि याप्मिचि लोमाचि लोङ्सा एरोक् टायाना डाना॥ 9हिट्ना छेम्बाना व्हाङ्म्बाक् ख्वाप्पा याप्मिचि छेम्बाना रिङ् निमेट्माचि लोङ्सा नाराङि टायागेट्टाना डाना॥
10उन् नाराङि डाना, हिट्नुङ् उन्ङा डोक् नारा चोगुए, टरो चा नाराङिगा याप्मिचिङा उन् मिसेन् उनिस्वाट्टुन्॥ 11उन् आप्पे ओयाप्मिचि सोरि टाए, टरो हिट्नागा आप्पे ओयाप्मिचिङा उन् ओलाडुवाट्टुन्॥ 12टरो आम्टेप्माङा उन् ओलाडुए, हिट्नुङ् उनिङ्ङि बिस्वास ओचोगुए, उन्ङा हिट्नागा माङ्हाङ्ङाना छालेट्चि लिमाना आधिकार पिडुचे॥ 13हिट्नागा पाबा-मामालाम्मा हिट्नुङ् याप्मिचिगा निङ्ग्वालाम्मा ओपोङ्सागा माखाक्, टरो माङ्हाङ्ङा डोक् हिट्नागा ओछालेट्चि चोगुचिगा॥
14माङ्हाङ्ङाना रिङ् याप्मि उरुपङि लिसे हिट्नुङ् आनि माझाङि मायादाया लोक् छेम्बाना रिङ्ङा इप्टुङ् हेन्से॥ हिट्नुङ् उन्ङाना माहिमा आन्याँ निसुम्मे, हिट्ना माहिमा माङ्हाङ् पाबालाम्मा उङ्साना ठिबाङ् एना छाङाना गाड्डेना डाना॥
15युहान्नाङा उन्ङाना बारेङि साँचि माट्सा ठेना ओसोरा चोगुङ् माट्टुए, “आङा लोनानिगा हिट्ना याप्मि बारेङि नाड्डे माट्टुङे, ‘आङा नुङ् एङ्स्वा टाना आङा नुङ्ना माङ्ठेना ए, पोङ्भोने उन् आङा नुङ्ना पाइले डोक् डाना॥’”
16उन्ङि लिसाना जोम् मायादायालाम्मा आनि सोब्बेङा याप्मा आसिक् ए आसिक् टोगुएसुम्मे॥ 17पोङ्भोने मोसालाम्मा आन्याँ धारमाबिधि टोगुम्मे, टरो मायादाया हिट्नुङ् छेम्बाना रिङ्उम्बाक् येसु खिरिस्टलाम्मा टाए॥ 18माङ्हाङ् साङा चा खोना बेला चा उनिसुन्गेट्टुन्ना, टरो माङ्हाङ् पाबालोक् लिसाना ठिबाङ् एना, उन् आप्पे माङ्हाङ्, हिट्नुङ् उन्ङा डोक् आनिलाउङ्सा माङ्हाङ् आनिमेट्टाइसे॥
बाप्टिस्मा कापि युहान्नाङाना साँचि
(मात्ति ३:१-१२; मारकुस १:१-८; लुका ३:१-१८)
19हिट्नुङ् यरुसलेम्ङिगा याहुदि ओठेडोङ्चिङा पुजारिचि हिट्नुङ् लेबि याप्मिचिलोङ्सा उन् सोरि “खान् साइना?” नुङ् रिङ् सिलाप्मा ओपाङ्सुचे, हिट्नुङ् युहान्नाङाना रिङ्उम्बाक् नाट्डेना डाना॥ 20उन्ङा छेम्बाना रिङ् मिठोप्मे सिधा डोक् नाड्डे लोडुचे, “आङा खिरिस्ट माखाक्॥”
21हिट्नागाँ उसिलाप्टुए, “हिड्डे भोने खान् साइना टे? पाक् खान् एलिया इ?”
उन्ङा लोडुचे, “आङा माखाक्॥”
हिट्नागाँ उसिलाप्टुए, “पाक् खान् माङ्काटा इ टे?”
उन्ङा लोडुचे, “माखाक्॥”#धारमाबिधि १८:१५,१८; मालाकि ४:५
22हिट्नागाँ फेरि उसिलाप्टुए, “खान् साइना टे? आन्याँ याप्मिलोडा, पोङ्भोने आन्याँ कापाङ्बाचि आन्याँ लोमाचि कोन्युक्॥ खान् आप्पेम्बाक् आङा साइना नुङ् आपिग्युक्ना?”
23युहान्नाङा माट्टुए, “यासैया माङ्काटाङा माट्टु गाड्डे डोक् ‘टाङ्बा टायुगेट्ना लाम्बो टेयार चोगु’ पिक्सा साक्चा उयुङ्निना डेन्ङि राट्ना ठिबाङ् याप्मिङाना साब्दा आङा ए॥”#यासैया ४०:३
24हिट्नागा माड्डेङि आम्टेप्मा फारिसि याप्मिचि चा हिट्नागाँ युहान्नाङि ओपाङ्सुचे॥ 25हिट्नुङ् हिट्नागाँ युहान्ना उसिलाप्टुए, “खान् खिरिस्ट चा माखाक्, एलिया चा माखाक्, माङ्काटा चा माखाक् भोने, पोङ् बाप्टिस्मा आपिडुचिचिगा टे?”
26युहान्नाङा हिट्नागा नाड्डे लोडुचे, “आङाम्टे चुवाङा बाप्टिस्मा पिडुङ्चिङ्चिङ्, टरो खानि माझाङि ठिबाङ् वाहेट्, उन् खानिङा मिसेन् आनिनिम्ना॥ 27आङा नुङ्ना एङ्स्वा टायुगेट्ना उन् डोक् ए॥ आङा उन्ङाना ओलाङ्सुप्ङाना उरिप्मा फेम्माबिमा चा याङ्खान्ना नुना याप्मि माखाक्॥”
28नागा सोब्बे रिङ् यारदान होङ् याहाँपारा बेथानिया डेन्ङि लिसाना डाना, हिट्नि डोक् युहान्नाङा बाप्टिस्मा पिडुएट्टुचिगा डागा॥
माङ्हाङ्ङाना थुमा
29हान्डेङ्लेङ् युहान्नाङा येसु उन्लेङ् आबागेट्टाना निसुङ् लोडुचे, “पुयानुम्, नाराङिगा याप्मिचिगा पाप काटुक्बा माङ्हाङ्ङाना थुमा! 30आङा उन्ङाना बारेङि माट्टुङ्ना हिट्ना उन् डोक् ए, ‘आङा नुङ् एङ्स्वा टाना आङा नुङ्ना माङ्ठेना ए, पोङ्भोने उन् आङा नुङ्ना पाइले डोक् डाना॥’ 31आङा आप्पेङा उन् मिसेन् निनिङ्गेट्निङ्ना डाना, टरो इस्राएलि याप्मिचि माझाङि उन् ओठेट्याक् नुङ् डोक् आङा चुवाङा बाप्टिस्मा पिसा टायाङे॥”
32हिट्नुङ् युहान्नाङा नाट्डे पिक्सा साँचि पिडुचे, “आङा सेङ्सेङ्ना हाङ्सा टोनालोग्लाम्मा ढुकुरङाना उरुप्ङि ठाया उङ्साउङ् उन् उठुङ्ङि युङाना निसुङे॥ 33आङा उन् मिसेन् डोक् निनिङ्गेट्निङ्ना डाना, टरो चुवाङाना बाप्टिस्मा पिडुचि नुङ् आङा याङ्पाङ्साङ्नाँ नाट्डे याङ्लोडे, ‘जुन् याप्मि उठुङ्ङि खान्ङा सेङ्सेङ्ना हाङ्सा ठायाउङ् युङाना आनिसुटु, उन् डोक् सेङ्सेङ्ना हाङ्साङा बाप्टिस्मा कापिबा ए॥’ 34हिट्नुङ् ना रिङ् उन्ङि लिसाना निसुङे, हिट्नुङ् उन् डोक् माङ्हाङ् छा नुङ् साँचि खानि पिनाँनि॥”
पाइलेगा येसुङा ओचेलाचि
35फेरि आरको लेम्बा युहान्ना इप्पाङ् ओचेलाचिलोक् येबाइसाना॥ 36उन्ङा येसु खाडागेट्टाना निसुङ् माट्टुए, “पुयानुम्, माङ्हाङ्ङाना थुमा!” 37युहान्नाङा माट्टुना रिङ् खेम्साचुङ् हिट्नागाचि इप्पाङ् चेलाचि येसु रोक् रिक्टाचुए॥ 38येसुङा नोक्टाउङ् पुयुनाँ हिट्नागाचि ओएङ्-ओएङ् आबागेट्टाचिगा निसुचिउङ् सिलाप्टुचे, “खान्चिङा पाक् आकोलाचुएना?”
हिट्नागाचिङा लोडाचुए, “राब्बि (ना रिङ्ङाना उटुप् काहिसिक्बा लियुक्), खान् खोनि आयुङ्ना?”
39उन्ङा हिट्नागाचि लोडुचे, “आबाचि, हिट्नुङ् खान्चिङा आनिचुचु॥” हिट्ना बेला हाले डोक् लेम्बाङाना लेम्बोक् बाजाँ लिसाइसाना, हिट्डेउङ् हिट्नागाचि उन्लोक् खाडा चे हिट्नुङ् उन् युङ्ना ठोङ् निसाचुए॥ हिट्नुङ् हिट्नागाचि युसा मिले सोम्मा हिट्नि डोक् युङाचे॥
40युहान्नाङा लोडुना रिङ् काखेम्बा हिट्नुङ् येसु रोक् कारिक्बा हिट्नागाचि इप्पाङ् माड्डेङि ठिबाङ् सिमोन पाटरुसङा उन्झा आन्दरियास डाना॥ 41छोप्मोङ्ङा आन्दरियासङा उम्भु सिमोन टुबुङ् लोडुए, “आन्याँ मासिहा (ना रिङ्ङाना उटुप् खिरिस्ट लियुक्) टुबुम्मे॥” 42हिट्नुङ् उन्ङा सिमोन येसु सोरि खाट्टुए॥ येसुङा सिमोन पुयुए हिट्नुङ् लोडुए, “खान् योआनेसङा उइछा सिमोन ए, खान् केफास चा मालोयुक्” (केफासङाना उटुप् चाट्टान लियुक्)॥#१:४२ केफासम्बाक् आरामिक् रिङ्ङि हिट्नुङ् पाटरुसउम्बाक् गिरिक् रिङ्ङि, इप्पोक्ङाना उटुप्बाक् लुङ्गेॽवा आथाबा चाटान लियुक्॥
येसुङा फिलिप लोक् नाथानेल छेम्डुचिगा
43आरको लेम्बा येसु गालिल छेट्राङि खाप्माना निङ्ग्वा चोगुए॥ हिट्नुङ् फिलिप टुबुङ् उन्ङा हिट्ना लोडुए, “आङाना आएङ् आबा॥” 44हिट्नुङ् फिलिप बेथसेदा डेन्ङिना याप्मि डाना, हिट्ना ठोङ्ङिना डोक् आन्दरियास लोक् पाटरुस चा डाचिगा॥ 45हिट्नुङ्ना फिलिपङा नाथानेल टुबुङ् लोडुए, “जुन्ङाना बारेङि मोसाङा धारमाबिधिङि छेप्टुएसुना हिट्नुङ् माङ्काटाचिङा चा ओछेप्टुएसुना, उन् आन्याँ टुबुम्मे॥ हिट्नाउम् योसेफङा उइछा नासारातङिना येसु गोलो रैछो॥”
46ना रिङ् खेम्सुङ् नाथानेलङा लोडुए, “पाक् नासारातलाम्मा नुना रिङ् टामा हियुक्नि टे?”
फिलिपङा लोडुए, “आबाउङ् पुयु॥”
47येसुङा नाथानेल उन्लेङ् आबागेट्टाना निसुङ् हिट्नाङाना बारेङि माट्टुए, “ठिबाङ् छेम्बाना इस्राइलि याप्मि पुयानुम्, उनिङ्ग्वाङि पाक्चा ओचाफेन्मा वाइना॥”
48नाथानेलङा सिलाप्टुए, “खान्ङा आङा खोड्डेउङ् मिसेन् आनिसाङेना?”
येसुङा हिट्ना लोडुए, “फिलिपङा खान् माछेम्डाना नुङ्ना पाइले डोक् खान् वामाखोक्पोङाना उभुङ्मा उछिक्ङि आवासेट्टाना आङा निनाना॥”
49नाथानेलङा लोडुए, “काहिसिक्बा, खान्उम्टे माङ्हाङ् छा रैछो, खान् इस्राएलङिना हाङ्बा ए॥”
50येसुङा हिट्ना लोडुए, “पाक् आङा खान् वामाखोक्पोङाना सिङ् उभुङ्मा उछिक्ङि निने लोने नुङ् डोक् खान्ङा बिस्वास आचोगुए नि? खान्ङा नागा नुङ्ना चा ठेगा रिङ् आनिसुटु॥” 51येसुङा हिट्ना लोडुए, “छेम्बा डोक्, आङा खानि लोनाँनि, खानिङा टोनालोग् ओङ्साना हिट्नुङ् माङ्हाङ् रिङ् काउग्बाचि याप्मि छा उठुङ्ङि उठाङागेट्टागा हिट्नुङ् ओठायागेट्टागा आनिसुम्टुम्॥”#उत्पति २८:१२
ที่ได้เลือกล่าสุด:
युहान्ना 1: APH
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2023, Wycliffe Bible Translators, Inc. and Nepal Bible Society
