LUKE 8
8
Jisü Gholo Kichemi Totimi
1Tithiu Jisü no Alhou yekipe tsakiviu sheshusü mishighüna eno aphuqo lo wu. Akhopemi chighikini no pa gholo wu, 2eno totimi khami khuno philono aghawu lhoksa haphetsü, eno küsükini no tsügha püa kelo pa no shipivitsü keno, panoqo ghi cheke: Magdalene ipi chekeu Mary, khuu philono tüghami tsüni haphe keno; 3Chuza nipu Joanna, Herod kibo jukükütsüu; eno Susanna ishi, tinguno alau kütami kutomo no pano u ghi lono ipeghi keu pesü panoqo kuphu tsüe.
Apitikiveu Kimghikipiye
(Mt 13:1-9; Mk 4:1-9)
4Kughou aqokitikhi kije no mishiphu lakhi shelo lakhi lono ighi kumqope akeno, Jisü no kimghikipiye lono pithuve, 5“Apitikiveu no pa piti pesü veniye wu. Pa no veche kelo, hami no ala lo ikiqive no neda qodave, eno aghauqo no yewo mighive. 6Hami no atuqu shou vepukulu, tino thuikughi kelo thoni-tsanyi ke-a lo kumo kehu thizümüi ilove. 7Apiti hami no asahuli lo ikiqi ilove, eno asahubo no tipa gholono thuikughi no ghüsüve. 8Ikemu hami ye ayeghi kivi lo ilolu no thuikughi püzü aqhe piqi pithilu.” Jisü no atsa hipaqo pi akelo ighamku asheshu, “Khukhumu chikulupu kini pu akeu no chilulo.”
Kimghikipiye Kimji
(Mt 13:10-17; Mk 4:10-12)
9Kughou akhopemi no kimghikipiye hipau kiqi pa vilo ighiju keno, 10pa no pi, “Nongu ye Alhou yekipe tuqhou ithi penike tsüvae, ikemu kütami ghengu ye kimghikipiye lono ke, tishianguno ‘panongu no ithulu animu ithikuthu monani, eno chilu animu vethamla nani.’#Isa 6:9,10; Mt 13:13 11Kimghikipiye kimji ye hike: Apiti ye Alhou Tsa ke. 12Ala lo ikiqive keqo ye Atsa chiluve keqoe; tileno tüghami no ighi no pano mlo lono Atsa hu ikhi süwuve tsü cheni, tishikeu lono panongu pelo pülülu no xalu pemo niye ke. 13Khikhi atuqu shou iku keno tipaqo ye, Atsa chilu kelo alokivishi ikhilu chekeqoe. Ikemu panongu ye akuhu küha kehu ado kitila ghenguno pülü cheni, eno peju keu do ighike lono idewove cheni. 14Asahuli lo ikiqi keqo ye Atsa chiluve kemi, ikemu ayeghi xülou azüvü keu, küakini kimne eno ashi ghakiqipu küxü huno panongu no wuche keu la lono ghüsüve, eno pano xathi ye nimove cheni. 15Ikemu khikhi ayeghi kivi lo ilolu keno, tipaqo ye Atsa chilu püzü panow kuchou eno akivi mlo lo tsatsai qhiluve chekemi, ikehu pano ye kheakulu shikeu lono axathi pithilu cheni.
Akulu Küqüpe Qho Kevilo
(Mk 4:21-25)
16“Khunomu akulu küqüpe ali no qhove chemo momu alüpa qhou qhive chemoe, ikemu akibepu shou qhi cheni, tishikeu lono aki lo iloghi kemi no aküvü ithulu cheni. 17Kughengu itehi küsü püakeu kiumu pephemo nikeu ye kühae, tike kumono tuqhou vehu kiumu ithi move eno aküvü lo saipeghi moveni keu kühae. 18Tighenguno nongu ye kishi chilu cheni keno tsaqüi shilo, kughengu khuu no aghini keno alau shi tsü nani, eno khuu no aghi moni keno, pa no kiu anie pi kümsü cheni keno, tiu ghi luve tsü nani.”
Jisü Paza eno Athiküzümi
(Mt 12:46-50; Mk 3:31-35)
19Tithiu Jisü paza ngo athiküzümi no pa lau ighi, ikemu aqokitikhi ghenguno ilo pa kupunu mlano ae. 20Pa vilo ishi pi, “O za ngo o thiküzümi ye o sasü kusholu nishi kehu hule khalau puthugho ani.” 21Ikemu pa no khochile, “Khunono Alhou tsa chilu no ti pecheni keno, pano no I za eno I thiküzümie.”
Jisü no Pasapagha Ghasü
(Mt 8:23-27; Mk 4:35-41)
22Ghulo lakhi Jisü no pa khopemi sasü ashuka lo ikuno panoqo vilo pi, “Ningu azü kathasü tüxau ikuni shilo.” Panongu no wuche 23kelo pa ye züuve. Tile pasapagha mülhü kuloghi no azü lo fuchighi iloghi, azü no panongu shuka chili ikughiuve no akümsapu lo ilove. 24Panongu no wu püzü Jisü küda puthu no pi, “Ampeu, Ampeu, ningu ye pühauve cheae!” Pa no ithu amülhü ngo azü fukukucho lomipi, ikelo tipaqo no tave, eno tile iqüghaive. 25Pa no panongu vilo pi, “Nongu küpülü khile ani kea?” Panongu ye msaichi eno akümzaqhiyi lakhi no lakhi vilo piae, “Timi hipa ye khuu keno amülhü eno azü kutolo azah tsü, eno tipaqo no pa gholu kea?”
Tüghami no Sa-akeu Shipivi
(Mt 8:28-34; Mk 5:1-20)
26Panongu no Galilee ghüngü lo a-a lakhi Gerasenes lo wuve. 27Kughou Jisü no ashuka lono ipeghi keno, mishighüna lono timi lakhi, khuu tüghami no sa-ache keno, ighi no pa sasü kusholu. Pa ye ado kushuo lono aphimini pumo, eno aki lo kumono akumo kilive lo ache. 28Pa no Jisü ithulu püzü ighamku pa zülo ikiqive no asütsa kuloghi lono pi, “O Shishe Akiqheu Alhou Nu Jisü, no ye I lau kiu shikepu ani kea? I no o qhüiniju anike I shikughuju kevilo.” 29Kughengu Jisü no mithekumo ghawu vilo timi launo ipeghive lopi azah tsüae. (Ghuthu kutomo hi no timi hu tsüqü luve che kehu timiqo no ayikichhe no tshüpe apukhu lo ayikha süve tsüno kheche, ikemu pa no süthave tsü, eno tüghami no pa hape yenguyi ke-a lo puwuve cheke.) 30Jisü no pa vilo pi, “O je khuu kea?” Pa no pi, “Legion,” kughengu aghawu kutomo no pa philo ake. 31Tüghamiqo no Jisü vilo panoqo hape ayeghi qhou aqo lo puwu pemoni ke qhüinijua. 32Tipa tüqhüdo lo naghuto qhau awo loji kije no achu mzasü cheghi kehu panoqo no pa vilo awoqo philo ilove penike qhüiniju. Ikehu pa no pulove tsü. 33Tüghamiqo no timi hu philono ipeghi no awoqo philo ilove, eno awo loji ye atuxu lo kohasü iqive püzü tilau no azüghi lo ikiqi ilo pütsüqhi khave.
34Kiu shive keno awo khemi no qhoi ithuluve no powo aphughi eno acheaxü lo pikülhave tsü. 35Timiqo no ti juniye wu, eno panongu no Jisü lau ighi kelo khuu philono tüghamiqo haphe keno, timi hu Jisü pukhu philo iqa no aphimini pepusü akükümsü ghi achipilo aghi keu ithulu, panongu ye msave. 36Thopimi no ighi akemi vilo kishi timi hu tüghami u lono xaphetsü keno aboake shi lhepiye. 37Gerasenes ngo tipa cheaxü lo küxümi ye akümsa no chhitoive kehu kümtsü no Jisü vilo pano launo wuve tsülopi qhüiniju. Tighenguno pa no idewove niye ashuka lo ikuve. 38Eno khuu philono tüghamiqo haphetsü keno, timi huno Jisü vilo pa gholo wulu pelo pi qhüiniju, ikemu pa no ishi pino pa puwove, 39“O kilo idewo lo eno Alhou no khipa qhemi o ghenguno mlave tsü akeno shuphe tsülo.” Ikehu pa ye aphughi kuchopu khipa qhemi Jisü no pa ghenguno mlatsü keno sheshusü wove.
Totimi Lakhi ngo Jairus Nga
(Mt 9:18-26; Mk 5:21-43)
40Kughou Jisü no ideighi keno, aqokitikhi kümtsü no pa khelho akehu alokivi shi pa sasülu. 41Tile timi lakhi khuu sinagog lo yepemi keno, Jairus ipikeu no ighi. Pa no Jisü pukhu philo ikiqi ngono mlominyi pa kilo ighitsü penike qhüiniju. 42Kughengu pa nga lakhi likhi achekeu, ampe chighikini qhalo shi akeu, ye thiveni keshi ae.
Jisü no wuche kelo timiqo no tsatsai pa lau kuko iloghi. 43Totimi lakhi khuu ampe chighikini kutolo aji poche keno tile che. Li no akini qhoi shikipivimi launo puwove keghi khunomu li shipivi mlave. 44Li no Jisü thiu no hasü ighi no pa phi kighikipili bulu, paikhavi no chiji akeu hu tave. 45Tile Jisü no pi, “Khuu no I bu kea?” Timi kümtsü no milive kelo, Peter no pi, “Ampeu, aqokitikhi hijeje no sühope kukokile o gholo cheni kehu!” 46Ikemu Jisü no pi, “Khuana no I buvapi, kughengu I launo aküka ipeve keu I no pimhe luvae.” 47Kughou totimi huno küzükugho shi khamlave keno, li no thüthüshi ighi no pa zülo itsaqipe ngono aqha nhethe lono kushiye pa bu, eno kishi paikhavi no li shipivive tsü keno shuphe tsü. 48Jisü no li vilo pi, “Angao, o küpülü no o shipivivae; aloino wolo.”
49Pa no atsa pi aphi lono timi khami yepeu ki lono ighi no pi, “O nga ye thive ake Akükütsüu püna akevilo.” 50Jisü no ti chilu kelo yepeu vilo pi, “Msa kevilo, pülüke likhi shilo, eno li ye alove nani.” 51Pa no aki lo ighi no pa gholo Peter, John ngo James, eno anga puaza likhi thono khumu alou ilo pemove. 52Kümtsü no li ghenguno mloqa akemu pa no pi, “Mloqa kevilo, kughengu li ye züani thono thive mphie.” 53Li ye thivae pi panoqo no ithi akehu numighei shi pa jukünatha. 54Ikemu Jisü no li u tsüqüpe li vilo pi, “Angao, ithulo.” 55Tipamtsa li ghungu ideighive no li no ithughive. Jisü no kiuala chukepu pesü li tsü penike mijetsü. 56Li puaza no akümza qhiyive, ikemu kiu shive keno khuu vilomu pipemo nike pa no ghutuve.
ที่ได้เลือกล่าสุด:
LUKE 8: SUMRVBSI
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
The Bible Society of India
© 2023, Used by permission. All rights reserved. More
