LUKE 20
20
Jisüw Kükagha Khü
(Mt 21:23-27; Mk 11:27-33)
1Ghulo lakhi lo Jisü no achineki lono timiqo shika eno atsakiviu sheshu akelo achinetomi, Ayezah shikükami eno layemi no ighi, 2eno pa vilo pi, “No ye kiu kükagha pesü, momu khuu no ti o tsüno thime hipaqo shicheni keno ningu vilo pilo.” 3Pa no khochile, “Ni ghi ighikuju lakhi nongu vilo iniju nike I vilo pilo, 4John no baptiz shitsü keu küka ye kungugha lono keo ayeghi lono kea?” 5Panongu no lakhi no lakhi vilo pikile, “Tsala ningu no, ‘Kungugha lonoe’ ipi aye, pa no, ‘Maye nongu ye kushiye pa pülümo kea?’ ipini cheni. 6Ikemu ningu no, ‘Timi launoe’ ipi aye, timi hipaqo no John ye tungkupmie piche kehu atu pesü ningu veqhiveni cheni.” 7Ikehu panongu no khilau no ighi keno mthae pi khochileve. 8Tile Jisü no panongu vilo pi, “Imaye Ni ghi kiu kükagha pesü thime hipaqo shicheni keno nongu vilo pimoae.”
Alu Mishikulumi Kimghikipiye
(Mt 21:33-46; Mk 12:1-12)
9Jisü no kimghikipiye hipau pesü timiqo vilo pithuve: “Timi lakhi no atsailu chini ke shosü eno mishipe timi tsüve no ampe hami ghenguno aghakhu kütau lo wuve. 10Kughou no ado kupuve keno, pa no aqeu lakhi hape mishikulumi lau axathi hami pa tsü peniye puwu. Ikemu panongu no aqeu heqhi püzü au kümsa puwo. 11Tithiu aqeu lakhiu puwu, ikemu panongu no tiu ghi heqhi no akiphikumoshi peitha no au kümsa puwo. 12Tishimu pa no itaghi aqeu aküthüu puwu kelo tiu ye aghüzaku ghi pipe heqhi no khalau vepheve. 13Tile ampeu no ishi kümsü, ‘Ni ye kiu shiveni kela? I no I qhuu I nu puwuni, panongu ghi pa gihu kepuke.’ 14Ikemu kughou mishikulumi no pa ithulu keno, panongu no pikile, ‘Hi no amheghi kiyighiue. Amheghi niw shiveni ke ningu pa pithivenie.’ 15Panongu no alu khalau vepheve no pithive. Tishi aye, atsailu mpeu ye panongu lau kiu shinani kea? 16Pa no ighi no mishikulumi hupaqo pithive no alu pesü kütami tsüve nani.” Kughou timiqo no chilu keno ishi pi, “Tishimo nani!” 17Ikemu pa no tsaqüi panongu gi lo jupuku no pi, “Imaye hitoi yepüa keu ye kiu kea?:
“‘Aki kishimi no atu kileqhive
keu no atsüghi tuqu shivae.’#Lesh 118:22; 1Pe 2:7
18Khukhumu küpxape atuqu tipa shou ikiqi ikulu keu ye hephopinyive nani, eno tino khuu shou ikiqi ikuni keno, tino pa chisheve nani.”
Caesar lau Zame Tsü
(Mt 22:15-22; Mk 12:13-17)
19Ayezah shikükami ngo achinetomi no Jisü ye panoqo küla ghi kimghikipiye hipau pie pi vethalu keu lono tipa tüqhüdo lono pa küghaluve niye shiju kemu aqokitikhi msave. 20Ikehu panongu no tsaqüi pa jukuto akelo timi khami pelo amlo tsüqhiyi kemi toi pa tsa ini penike puwu, tishianguno pa no kiuala pikeu lono pa mepe angh qholo yepemi tsüve niye ke. 21Ikehu tipaqo no pa vilo pi, “Shikükau, no ye achipi lono pi eno shika cheni püzü agijumo no mtsüqhei Alhou laghi pesü shika cheni kepi nino ithi ani. 22Ike Ayezah kiqilo ningu ye Caesar lau zame tsü kelau keo mokea?” 23Ikemu Jisü no panongu mqükini kiqikuto luve no pi, 24“Ghükayi lakhi I piyelo. Khuu julho eno tsathi chishida püani kea?” Panongu no pi, “Caesarw.” 25Pa no pi, “Tishi aye Caesarw no Caesar tsülo, eno Alhouw no Alhou tsülo.” 26Panongu ye timiqo zülo pa no pive keu pesü anepa shino pa melu kepu shimlave, eno paw khokichile no akichiqhi auve no inaqhoive.
Sadduceemi eno Xüchilekulu
(Mt 22:23-33; Mk 12:18-27)
27Sadduceemi, khunoqo xüchilekulu kühae piche keno, khami Jisü lau ighi, 28eno pa vilo ighikuju tsa lakhi iniju, “Shikükau, Moses no ni ghenguno yetsüe, timi lakhi no atianuli küha no thive aye, pa thiküzüu no pa chikishiu valuve no pa mu ghenguno atianuli shitsü masae. 29Ike ghuthu lakhi athiazü pano tsüni ache, atüghüu no anipu lu püzü atianuli küha no thive. 30Akiniu ghi titoi shi 31aküthüu no li luve, eno titoi shi pano tsüni kümtsü atianuli küha no thive. 32Ashekha lo anipu ghi thive. 33Tishiaye, totimi huye pano tsüni nipu shipüani kehu xüchilekulu tsala lo li ye khuu nipue pini kea?”
34Jisü no panongu vilo pi, “Hipa tiqhelimi no lukile eno wokile acheni, 35ikemu khuno pesü ighini keu tiqheli lo iloküzü eno akithi lono xüchilethu küzü ipini keno, panongu ye lukile momu wokile monani. 36Kughengu panongu ye xüchilekulu tianuli akeke kungumi eno Alhou nuliqo sasü aphiphiae, ikehu panongu ye thimoae. 37Ikemu kithimi xüputhu keu vehu ye Moses ghi yepüani, asüminipho ghili yekeu tsamqo lo pa no Ampeu ye Abraham Lhou, Isaac Lhou, eno Jacob Lhou kepi kutsüe. 38Tishiaye Alhou ye kithimi Lhou ke kumoe, ikemu küxümi Lhoue, kughengu Pa lau ye kümtsü xüanie.” 39Tile Ayezah shikükami khami no pi, “Shikükau, no ye aghileshi pivae.” 40Kughengu pa no hi kümtsü pive kethiu panongu ye itaghi mtotoi ighijulu kepu shimlave.
Messiah ye Khuu Nu Kea?
(Mt 22:41-46; Mk 12:35-37)
41Jisü no panongu vilo pi, “Kishino Messiah ye David Nu ipi luni kea? 42-43Kughengu David ampi no Leshele kaku lo ishi pi püanie,
“‘Ampeu no I Mpeu vilo pi,
“I no o ghümi pesü o pukhu
kinepu-a shitsü moke kutolo Iw ajeu iqalo.”’#Lesh 110:1; Apo 2:34,35; Ibr 1:13
44Ikehu David no Ampeu ipi pa kuche pülaghi kishino pa ye David Nu ipini kea?”
Ayezah Shikükami Jukutolo
(Mt 23:1-36; Mk 12:38-40)
45Timi kümtsü no ini ake lono Jisü no pa khopemi vilo pi, 46“Ayezah shikükami jukuto lo, panongu ye chijeboike phi pusü itsü iqhoiqi chenishi, alhikishi-a lo agigihu tsü, sinagog lo ghi a-a akiviu pükha, eno aghulhu-a lo agigihupu lakhü lo iqanishi cheni. 47Panongu no chimemi kiqo lo ilo pishiqhi luve tsüno kuchou toi akighini kushuo shi cheni. Panongu ye aghimepu alau ithulu nani.”
ที่ได้เลือกล่าสุด:
LUKE 20: SUMRVBSI
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
The Bible Society of India
© 2023, Used by permission. All rights reserved. More
