LUKE 15
15
Pühave keu Mbe
(Mt 18:12-14)
1Ghuthu lakhi zame küqhami ngo Ayezah heküxami kümtsü no Jisü kupunu ighia. 2Phariseemi ngo Ayezah shikükami no nhenheshi pi thuve, “Timi hipau ye küsaküghami ikhilu no pano sasü chusho chenie.”
3Jisü no panongu vilo kimghikipiye hipau pi: 4“Nongu dolo khuu no ambe aqhe akelo, lakhi pühave aye, lhotoku-toku ye achu kümzape qhive no lakhi pühave keu ithulu moke kutolo apashe wumoni keshea? 5Kughou ti phuluni keno, pa no alokivi shi pa bighi lono xapusü 6aki lo ighi no pa küsami ngo akisüghümi kukütsü püzü panoqo vilo pi cheni, ‘I gholo alovi küqha lo, kughengu ni ye I mbe pühave keu hu phuluvae.’ 7Tihutoi I no nongu vilo piani, kungugha lo amikuchomi lhotoku-toku khuno müzülo xaidekulu avehupu shimoa keno, tipaqo ghenguno alovi keu nguno axinemi lakhi xaidelu keu lokiviu paje nani.
Pühave keu Pisa Muno
8“Momu totimi khuu no pisa muno chighi akelo lakhi pühave aye, ti ithulu moke kutolo akulu küqüpe aki khu no chixechilei phujumo nani kea? 9Kughou ti phuluni keno, li no aküsami ngo akisüghümi kukütsü no picheni, ‘I gholo alovi küqhalo, kughengu ni ye Iw pisa muno pühave keu phuluvae.’ 10Tihutoi I no nongu vilo piani, axinemi lakhi no xaidelu keu lo Alhouw kungumi gholo ghi alokivi kije acheni.”
Pühave keu Nu
11Jisü no pi, “Timi lakhi no anu kini ache. 12Ayitiu no papu vilo pi, ‘I pu, amheghi lo I saje akeu ye I tsüve lo.’ Apu no anu pama dolo amheghi hu kijeve tsü. 13Kushuo kumo lo anu ayitiu no pa saje qhoi kimje pesü a-a kushuo lo wuve, eno tilau no pa kini kümtsü kuthole peitha khave. 14Kughou pa no qhoi peitha khave keno, tipa ghakhu lo püqümiye kije ipeghive no pa ye thokha avehupu shiuve. 15Ikehu pa no tipa ghakhumi lakhi lau wuno akümla ighiju kelo, awoqo loji penike pa lu lo puwuve. 16Tilau pa ye awoqo no chuche keu axa kolamu chunishi kütü lajuche namu khunomu kiumu pe pa tsümoe.
17“Ikemu kughou pa no atsüveshe kümsülu keno, pa no pi, ‘I puw qekuchumi khije no chukepu kupukuno shi ani püzü ni ye hilau akhüava no thiu chea kelae! 18Ni ye ithu no I pu lau woni, eno pa vilo ishi pini, “I pu, I no Alhou eno o zülo ghi axine shivae. 19Itehi ni ye o nue pi kuni keu aküzüpu kumovae. Ikehu o qemi kiqi lono I peitha tsülo.”’ 20Pa no ithu papu lau idewo. Ikemu pa no putou chephi lono papu no ithuluve no pa mlo saqhiyive, eno pa no anu lau posü wuno pa khadape müma. 21Anu no pa vilo pi, ‘I puo, I no Alhou eno o zülo axine shivae. Itehi ni ye o nue pi kuni keu aküzüpu kumovae.’ 22Ikemu apu no pa qemiqo vilo pi, ‘Mtazü aphimini akiviu süghi no pa pipelo, pa u lo anguthi sütsü lo, eno pa pukhu lo apukhuqho süpipe lo. 23Amshiti athakupuu sawo heqhilo, eno ningu aghulhu shi alovini. 24Kughengu I nu hipau ye thive, ikemu itehi ye xüluvae; pa ye pühave kemu phuluvae.’ Tile kümtsü no alovi küqhauve.
25“Ikemu anu akichiu ye alu lo akehu, pa no aki kupunu ighi kelo, ale kiphe eno akighilhe sütsa chilu. 26Pa no aqemi lakhi ku püzü kiu ghenguno tishi ani keno ighiju. 27Aqeu no pa vilo pi, ‘O thiküzüu ye ighivae, eno pa no kütüsü mono ighilu kehu o pu no amshiti athakupuu heqhivae.’ 28Ikemu pa ye amloideve no aki aloumu ilo move. Apu no ipeghi no pa ghozü, 29ikemu pa no papu vilo pi, ‘Julepi, ni ye ampe hijejehi o huthu ighiva, eno ni ye khilemu o zakütsü hebide mphi, ikeghi I küsami sasü alokivi shi aghulhu shilu penike no ye aneti mu khilemu I tsüju mphie. 30Ikemu kughou o nu khuu o mheghi kuchopu pesü kütüqhalimi gholono kuthole khave tsü keno, hipau no ighi kelaye nono pa ghenguno amshiti athakupuu heqhi tsüe!’ 31Apu no pa vilo pi, ‘I nu, no ye alhokuthu I gholo acheni, eno I no aghi keu thime kümtsü ow ke. 32O thiküzüu hipau ye thive kemu xüluvae; pa ye pühave no phuluvae, tighenguno aghulhu shi alovi akeu ye achipie.’”
ที่ได้เลือกล่าสุด:
LUKE 15: SUMRVBSI
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
The Bible Society of India
© 2023, Used by permission. All rights reserved. More
