JOHN 11
11
Lazarus Kithi
1Timi lakhi Lazarus ipikeu ye süae, pa ye Bethany noghami, ti ye Mary ngo li tsünipu Martha pama phuke. 2Mary hipau ye tsüngqüikeu thazü pesü Jisü nu püzü li sa pesü pa pukhu isütsü keu, eno sü akeu Lazarus ye li peuke. 3Ikehu pama atsünipu no Jisü lau pi puwu, “Ampeu, nono kimiye chekeu ye sü anie.” 4Ikemu ti chilu kelo Jisü no pi, “Aküsü hi ye akithipu kumoe. Hi ye Alhou jekipipu ghenguno ke, eno hipau vecheo Alhou Nu jekipipu shiniye ke.”
5Jisü ye Martha eno li tsünipu ngo Lazarus kimiye che. 6Kughou Lazarus ye sü anie pi Jisü no chilu keno, pa no khile akeno tile ghulo kini ngo kitheve. 7Tithiu no pa no akhopemi vilo pi, “Ningu itaghi Judea lo wuni nolo.” 8Akhopemi no pa vilo pi, “Rabbi, Jewmi no atu pesü o veqhi niye shikeu kushuo kumphi püzü no ye itaghi tilau wuni keshea?” 9Jisü no khochile, “Tsüküvü do ayikihedo chighikini acheni ke kumo? Khuana no puchou no cheche aye pa ye küpxalu monani kughengu pa ye hipa yeghi lo küvü ithulu anie. 10Ikemu khuu no putho lono checheni keno pa ye küpxalu cheni, kughengu pa lolo aküvü kühake.” 11Pa no pive kethiu panoqo vilo pi, “Ningu küsau Lazarus ye zühuvae, ikemu ni ye pa küdani ke wuni.” 12Akhopemi no pa vilo pi, “Ampeu, pa no züaghi aye ithughive nani.” 13Jisü ye Lazarus kithi pi akemu panongu no kümsü keu no pa ye akulhoqhi zü akeu ghili piani küghashi ae. 14Tileno Jisü no shoboi panongu vilo pi, “Lazarus ye thivae, 15eno nongu ghenguno I no tilau aghimo keu pavivae, tishianguno nongu no pülülu nani. Itehi ningu pa lau wunie.” 16Ikehu Thomas, khuu Didymus ipiche keno pa no aküsami akhopemi vilo pi: “Ningu ghi pa gholono thive kepushi wuni nolo.”
Ni ye Xüchilekuluu eno Aküxüpu
17Kughou Jisü no ighi keno, Lazarus ye akümoki lo atsala bidi ngovae pi chilu. 18Bethany ye Jerusalem lono kilometer küthüa ke, 19eno Jewmi kutomo no Martha ngo Mary pama peu ghenguno pama lokughuno tsüniye ighi ae. 20Kughou Jisü chenie pi chilu keno Martha ye wuno pa sasü kusho, ikemu Mary ye aki lo iqa ae. 21Martha no Jisü vilo pi, “Ampeu, nono hilau aghike aye I peu ye thimoni cheke. 22Ikemu itehimu I no ithi anike nono Alhou vilo kiu kiumu khuaye Pa no o tsü nani.” 23Jisü no li vilo pi, “O peu ye ithughive nani.” 24Li no pa vilo pi: “I no ithi anike pa ye ashekha tsala xüchilekulu lo ithughive nani.” 25Jisü no li vilo pi, “Ni ye Xüchilekulu eno aküxüpu ke, khunono I shou pülübeni keno, pa ye thive namu xüluve nani, 26eno khunono I gholo xüani eno I shou pülübe ani keno, pa ye khilemu thimo nani. No ye hi pülü anima?” 27Li no pa vilo pi: “Iyei, Ampeu; no ye Alhou Nu, Khristo, ayeghi lo chekeu kepi I no pülü ani.”
Jisü no Qa
28Li no hi pive no wuve eno li tsünipu Mary ku püzü lomoshi pi, “Shikükau ighi no o ku ani.” 29Kughou Mary no ti chilu keno, li no mtazü ithuve no pa lau wu. 30Jisü ye aphu lo ilomo no khile Martha no pa sasü kusho keno tile ngoae. 31Kughou aki lo Mary lokughuno tsü akeqo Jewmi no li no mtazü ithu khalau ipeve keu ithulu keno, panongu no li ye akumoki lono qaniye wucheni küghashi kümsüve no li papewu. 32Jisü no khile akeno Mary no tile ighi no pa ithulu kelo li no Jisü pukhu philo itsaqi no pi: “Ampeu, nono hilau aghike aye I peu ye thimoni cheke.” 33Kughou li no qa keu eno li gholo Jewmi ighi keqo no qa keu Jisü no ithulu keno, pa ye ighono pa mlo kighishi shive eno kütakihive. 34Pa no pi, “Nongu ye khile pa qhopüani kea?” Panongu no pi, “Ampeu, ighi no julo.” 35Jisü no qa. 36Ikehu Jewmi no pi, “Pa ye kishi Lazarus kimiye chekeno julo!” 37Ikemu panongu khami no pi, “Khuu anhethi kighicheu nhethi xükhove tsü keno, pa ye timi hipau ghi akithi lono püxü luve kepu shiake kumo keshea?”
Jisü no Lazarus Xüputhu
38Tishino Jisü ye itaghi pa lo khümüi kitheve no akumoki lo ighi. Ti ye atuki eno atuqu no nha püaghi. 39Jisü no panoqo vilo pi, “Atuqu ikhivelo!” Akithiu Lazarus pafo Martha no pi, “Ampeu, pa qhokeu atsala bidi shive ake itehi ye münashuive aghi niae.” 40Jisü no li vilo pi, “Nono pülü aye Alhou juküvü ithulu nanie pi ni ye o vilo pike kumo?” 41Ikehu panongu no atuqu ikhive. Eno Jisü no kunguu jupuku no pi, “Apu, Nono I tsa chilu tsüke ghenguno I no O shikimthi ani. 42No ye alhokuthu I tsa initsü cheni kepi I no ithi ani, ikemu I no hi pi akeu ye timi hile puthugho akeqo pelo Nono I puwue pi pülülu peniye ke.” 43Pa no hi pive no asütsa kuloghi lono ighamku pi, “Lazarus, ipeghilo” 44Thive keu timi huno aphi no pa u ngo pa pukhu eno pa gi chijepe khalau ipeghi. Jisü no panoqo vilo pi, “Pa kuqhophe puwuve lo.”
Jisü Pithiveni ke Kuchughu
(Mt 26:1-5; Mk 14:1-2; Lk 22:1-2)
45Mary papesü ighi kemi Jewmi kutomo no Jisü no kiu shi keno ithulu püzü pa shou pülübe luve. 46Ikemu panoqo gholo khami no Phariseemi lau wuno Jisü no kiu shikeno pive. 47Ikehu Achinetomi ngo Phariseemi hoho no kumqo no pi, “Ningu ye kiu shikepu kea? Kughengu timi hipau no amchipu kümla kutomo shi auvae. 48Ningu no pa pelo hitoi shiauvepe aye, timi kümtsü no pa pülüveni cheni, eno Rommi no ighi no ni kimthe-a eno ni shiye leluve tsüni cheni.” 49Ikemu panoqo gholo Caiaphas, tipa mpe lo achinetou shi akeu no pi, “Nongu ye kiumu ithiamoe. 50Shiye qhoi pühave kepu ye milakhi no timi züqhushi thive keu pavie pi nongu ye vethalu amoe.” 51Hi ye pa kutoshino pike kumoe, ikemu tipa mpe lo achinetou shi akehu pa no Jisü ye shiye ghenguno thive nani kepi tungkuptsa pi, 52eno shiye ghengu likhi kumono Alhou nuli apanagha akeqo kumqo sawo lakhi shini keu ghengu ghike. 53Ikehu tipani no panongu ye Jisü pithiveni ke kuchughu thuve.
54Tighenguno Jisü ye Jewmi gholo pekipheshi iqhoiqi move ikemu chesü asayeqha cheaxü phivilo Ephraim ipikeu phughi lo wuno akhopemi sasü tile ngove.
55Jewmiw Hechekulu kupunuve eno timi kutomo no Aghulhu züuno pano ampi shikimthe niye aphu lono Jerusalem lo iqho. 56Panongu ye Jisü phuche eno achineki lo puthugho ghi lakhino lakhi vilo piae, “Nongu ye kiu kümsü ania? Pa ye mtsüqheino Aghulhu lo ighimo nanio?” 57Achinetomi ngo Phariseemi no Jisü kügha luveni ke ghenguno khukhumu pa no khile ani keno ithi aye panoqo pithi penike azah tsüve.
ที่ได้เลือกล่าสุด:
JOHN 11: SUMRVBSI
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
The Bible Society of India
© 2023, Used by permission. All rights reserved. More
