ဒေါ ဂုဝ် 20
20
လွင် အာဘြာဟမ် ကွယ် ခဲင် မိူင် ဂီရာတ်
1အာဘြာဟမ် တွိုန် ယီ လေး ဒူင် ကွယ် အန်၊ ဟာဝ် ဇမ် ခဲင် မိူင် နာ တေတ့်။ အန် ဝီ ကွယ် ဒီ ကာတဲ မိူင် ဆာဒေတ် ဂါယ် မိူင် ဆူရာ။ အန် ဘဲန် ခဲတ့် ခဲင် ကာဒါယ် မိူင် အီ စိူဝ် မိူင် ဂီရာတ်။ 2ဒေါ ကွယ် အန် ခဲင် မိူင် တီ၊ အန် ကာလာင် လွင် အီဘိုန့် အန် တဝ်း၊ “အန် မုး ဝါ အုဝ်။” ပန် တီ န့ မိုဝ်း ခုန်ဒီခမ် ခဲင် မိူင် ဂီရာတ် တွိုန်၊ အန် စိူဝ် အာဘီမေန်။ အန် ဝီ ဒဲ့ နာင် ဆာရာ တး ဒူင် ကွယ် အန်။
3ခဲင် မှိုဝ် ဒေါ မ့ဘာဝ် အန် ဇဝ်ဖြာ ဝီ တး ကာလာင် ဂြုဝ်း ဒီ ခုန်ဒီခမ် တဝ်း၊ “မဲ ဒီ ယမ်၊ မဲ ဟဲ့ ဒိုဝ်း အီဘိုန့် အီ။”
4ခုန်ဒီခမ် အာဘီမေန် ယီ ညှမ် လာယ် အန်။ အန် တဝ်း၊ “မဲ ဇဝ်၊ မဲ ဒီ ဘော ငဝ်း ဝဲန် ဒူအီ ဆေ အန် တူ ဘူင် မှာပ် မာဆေ။း 5မဲ တူ နပ်၊ အန် ဟဲ့ တဝ်း ဒီ အုဝ်၊ ‘အီဘိုန့် တီ မုး ဝါ အုဝ်။း’ ဘော အီဘိုန့် ဟဲ့ ကာလာင် ဒီ အုဝ် တဝ်း၊ ‘အန် မုး အီကတ် အုဝ်။’ အုဝ် ဟဲ့ မိုဝ်း နဝ်း မှာန် ဒေါ ဒဲ့ အုဝ် အီဘိုန့် တီ တး ဒီ အုဝ်။ အုဝ် မိူဝ် တူ မိုဝ်း ဒီ ဘူင် မှာပ် မာဆေ။”
6အန် ဇဝ် ဝီ တဝ်း ဒေါ မ့ဘာဝ် အန်၊ “အုဝ် ဟဲ့ နပ်၊ မဲ မိုဝ်း နဝ်း မှာန် ဒေါ ဒဲ့ မဲ နာင် တီ။ ခုဝ်၊ အုဝ် ဟဲ့ ရဲ မဲ ဘူင် မှာပ် ဒီ အာတ့် အုဝ်။ အုဝ် တူ တဲး မဲ လာယ် အန်။ 7ဒေါ တီ နီ၊ တဲး မဲ ယီ ဝီ ဒွါ အီဘိုန့် ဝေန့် ဒူင် ကွယ် အီမာယ် အန်။ အန် မုး ဒူအီ အီ ဘျာန် ဂြုဝ်း အုဝ်။ အန် လုဝ် ဆာခိုဝ် ဒါင် မဲ၊ တဲး မဲ မိုဝ်း အာဆာက်၊ ကွဲ့ တဲး မဲ ယမ်။ ဆေ မဲ တူ ဒွါ ဝိဝ် အန် ဒီ အီမာယ် အန်၊ မဲ လုဝ် နပ်၊ ဘော မဲ ဘော ဂေ အီ ကွယ် ရိုမ် ဒူပ် မဲ၊ ဘေ ဒီ ယမ် တူတ့်။”
8ပါ ခဲညှာ ဆိန့်ဝး စေဝ်၊ ခုန်ဒီခမ် အာဘီမေန် တွိုန် ဝီ ဒဲ့ ဒဲစေန့် အန် ဒွန် အီ တး ဒူင် ကွယ် အန်။ အန် ဝီ ကာလာင် တူတ့် လွင် အန် တီ၊ တဲး ဂေ ဘော နပ်။ ဂေ ယီ ယုဝ် ကာဆဝ်။ 9ပန် တီ အန် ဘော ဒဲ့ အာဘြာဟမ် တဝ်း၊ “မာဆေ ပီ ဘူင် မဲ ဒီ ယေ။း မှာပ် မာဆေ ပီ ဘူင် အုဝ် ဒီ မဲ၊ တဲး ပီ ဘူင် မဲ ဘဲန် မှာပ် ဒီ အုဝ် ဘော ဒီ မာန် မိူင် အုဝ်။း ပီ တူ ပွိုန် ဘူင်၊ မဲ ဟဲ့ ဘူင် ဒီ အုဝ်။” 10ခုန်ဒီခမ် အာဘီမေန် ဝီ တဝ်း၊ “မာဆေ ပီ ခြာမ် မဲ ခဲင် နဝ်း မဲ ဒေါ ဘူင် မဲ ပါယ် တီ။း”
11အာဘြာဟမ် ဝီ တဝ်း၊ “အုဝ် ဟဲ့ ထာင်၊ ခဲင် မိူင် နီ၊ န့ တူ မိုဝ်း အာဆေ အီ ယုဝ် အီ ရုဝ်ဆေ ဇဝ်ဖြာ။ အုဝ် ဘော ထာင်၊ ကူပ် မိုဝ်း အုဝ် အီဘိုန့် တီ၊ ဂေ ဒီ ငဝ်း ဝဲန် အုဝ်။ 12ဒဲင် နီ၊ န့ ဟဲ့ မှာန်၊ အန် မုး ဝါ အုဝ်။ အန် မုး ဂွန် ဂုန့် အုဝ်။ အန် ယီ တူ မုး ဂွန် မာ အုဝ်။ ခုဝ် အန် တီ၊ အန် ဟဲ့ ပွိုန် ဘဲန် ဘော အီဘိုန့် အုဝ်။ 13ဒေါ ဟဲ့ စ်ု ဇဝ်ဖြာ အုဝ် လေး ခဲင် ဒူင် ကွယ် ဘြိမ် အုဝ်၊ တဲး အုဝ် ဟာဝ် ဇမ် ခဲင် မိူင် အီ ဟဝ်၊ အုဝ် ဟဲ့ မှာန့် ဒီ အီဘိုန့် အုဝ် တဝ်း၊ ‘ဆေ မဲ ရွက့် အုဝ်၊ အာယ် ဘော ဟာဝ် နာ မှဝ်၊ တဲး မဲ တဝ်း၊ အုဝ် မုး အီကတ် မဲ။’”
14ပန် တီ ခုန်ဒီခမ် အာဘီမေန် ဝီ ဒိုဝ်း မာဘူ ဂေ မာမက် ဘဲန် ဒုဝ် ဘဲန် ဒုဝ်၊ ဒွါ ဒီ အန်။ ဘော မှာယ်၊ အီ မုး ဘော အီမာယ် ဘော အီဘိုန့်၊ အန် ဒိုဝ်း ဒွါ ဒီ အာဘြာဟမ်။ ဘော နာင် ဆာရာ အီ မုး အီဘိုန့် အာဘြာဟမ်၊ အန် ဝီ ဒွါ။ 15ခုန်ဒီခမ် ဝီ ကာလာင် ဒီ အန် တဝ်း၊ “မဲ ယိုဝ် မာန် မိူင် အုဝ် ဂေ တီ။ တဲး မဲ ကွယ် ဒူင် အိုင် မဲ ဒီ ကွယ်။”
16အန် ဝီ တဝ်း ဒီ နာင် ဆာရာ၊ “အုဝ် ဘော ဒွါ ရွိုန် အူ ဟြဲန့် ဘူင့် ဒီ အီကတ် မဲ၊ တဲး ရွိုန် တီ ဘဲန် ရွိုန် ဒမ် ဒါင် ပီ ဘူင် အုဝ်။ ဆေ မဲ ဟဲ့ စှိုမ် ဆာရေ၊ အာတီ ဝီ တဲး ဒွန် အီ နပ်၊ မဲ တူ ဘူင် မာဆေ အီ တူ မွှိုမ်။”
17ပန် တီ အာဘြာဟမ် ဆာခိုဝ် ဒီ ဇဝ်ဖြာ။ ဇဝ်ဖြာ မိူဝ် ဘူင် တဲး ဘော အာဘီမေန် ဘော အီဘိုန့် အန် ဘော ဒဲစေန့် အန် ဝီ ကဲန်၊ တဲး ဂေ ဝီ မိုဝ်း ဂွန်။ 18ခါ အာတ့် အန် ဇဝ် ဟဲ့ တဲး အီဘိုန့် ဒွန် ဝီ အီ ကွယ် ခဲင် ကာင် ခုန်ဒီခမ် တွိုန် ဘဲန် မှန် ကူပ် ဟဲ့ ဒွိုမ် ကွယ် နာင် ဆာရာ အီ မုး အီဘိုန့် အာဘြာဟမ် ခဲင် ကာင် ခုန်ဒီခမ် အာဘီမေန် တွိုန်။
ที่ได้เลือกล่าสุด:
ဒေါ ဂုဝ် 20: pce
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2023, Wycliffe Bible Translators, Inc. All rights reserved.
