Luka 6

Jesu a Gwoohyon kaah Puus Nookdyi

Mat 12:1-8; Mar 2:23-28

1P'ar m'ee Puus Nookdyi shi, bhi kaarooh Jesu kihh zheppkamm keeniy mwopp kaah mwaan, bhi mwopp waa arr dhighin m'ee bhokk dhebhenn mwopp. Zheppkamm khinyi mwopp y'aa challang pakk segher dhebhenn ni mwopp kihh nwakhas sarr ruh mwopp shumm.#WSW 23:25 2Bhi pakk Farisiiy mwopp nang phi mwopp le, “A mihyeh l'e bhi wu kihh sh'in bii w'u waar'shin p'ar Puus Nookdyi ayeh?”

3Jesu lapp mwopp le, “Kan wu khi cham t'ang bii w'u Dauda gyet sh'in kaarooh kussum laah nyi kihhsheh kihh mwooh dang nyi zag maah?#1Sam 21:1-6 4Dhel dhighin Luhfwaat khi Naan#6:4 Luhfwaat khi Naan sh'i Pwoo khi Naad a “Tabernacle.” Nyi a gag w'u mwopp dhakk sh'i fwaat w'u gyet Zhepp Isra'ila mwopp kihh mw'aan kihh nyi dh'em p'ee soyill Naan. bhi kok gihkhill gutt w'u mwopp kihh angg l'e kihkyeen Naan so; w'u a gihkhill gutt w'u w'aar s'o kakhar gurum mwopp, seeh a prist mwopp kyekk kihh so. Weett kihhsheh bhi Dauda so yakhal pihh pakk mwooh dang niy zag.”#1Sam 21:1-6; Lev 24:9 5Bhi Jesu satt le, “Ai a'n L'aa khi Gurum a Gwoohyon kaah Puus Nookdyi.”

6P'ar m'ee Puus Nookdyi wu'zeh zag bhi Jesu dhel dhighin m'ee Luh'kang bhi y'aa sh'in kamm nhighin. M'ee gurum nhighin w'u sarr nyi w'u dihsoh a w'u shishwaa. 7Farisiiy mwopp kihh Mhikamm-w'aar w'u gyet mwopp nhighin mwopp phi lyap kaah bii w'u tihh mwopp y'aa Jesu diy kihh shig tep w'aar. A kihhsheh bhi mwopp kihh lang'bhongg nyi nyakk tihh mwopp naah diy kooh kyed diy bar gurum p'ar Puus Nookdyi oh. 8Jesu man p'an khimwopp, bhi satt gwooh sarr nyi a w'u shishwaa seh le, “Ghi yakhal, taah ghi dharr se kihnaar.” Bhi gwoh ni yakhal taah dharr.

9Bhi Jesu satt mwopp le, “A kihh nang pwoo wu, a meehrangg a bii w'u W'aar khi Naan kihh mak yet tihh gurum sh'in p'ar Puus Nookdyi: a sh'in khi bii wu'rett aa'h, h'aa kooh a sh'in khi bii wu'bis ayeh? A bar seen gurum aa'h, h'aa kooh a t'u gurum ayeh?”

10Bhi kaarooh Jesu naah mwopp weett shikhir kaat, bhi satt gwooh sarr nyi a w'u shishwaa seh le, “Ghi zan sarr gha ni.” Bhi gwoh ni sh'in kihhsheh, bhi sarr nyi ni kakhamm baa'ji kop sat. 11Bhi tukhup Farisiiy kihh tukhup Mhikamm-w'aar ni mwopp shaan pwetd, bhi mwopp y'aa bheett bii w'u runn p'ee sh'in nyi Jesu.

Jesu blihp zhepp'lop kaghapaad baa'vel

Mat 10:1-4; Mar 3:13-19

12Dhighin shiiy'teer mhizeh ni mwopp, bhi Jesu k'aa dum sh'i m'ee bwumm p'ee dhangNaan mhishin. Bhi teer dhangNaan khipar kihhdihng'dihng. 13Kaarooh byitt m'ang bhi peet mhi-dumdang niy mwopp lhija kihpee niy diy, bhi blihp kaghapaad baa'vel dhighin mwopp peet wu'mwopp a zhepp'lop. 14Shumm mwopp se: Siman, w'u Jesu ni gyet l'e shumm w'u a Bitrus nyi. Kihh Andrawus, em'nhikhin Siman ni; kihh Yakub mwopp kihh Yohanna; Filip kihh Batalomi; 15Matiw mwopp kihh Tomas; kihh Yakub em Alfawus, kihh Siman w'u gyet mwopp kihh peet Zhikhir'yill; 16kihh Yahuda Em Yakub, kihh Yahuda Iskaryoti, w'u gyet yakhal dheeh a g'u seett kihh Jesu seh.

Le'wurett kihh tu'pangg

Mat 4:23-25

17Bhi Daah Jesu tong sam kihh mwopp dang shin, sam dharr kihh mwopp kih m'ee tihleng, dang dw'uu kakhar mhi-dumdang niy mwopp, kihh dw'uu gurum w'u gyet mwopp tong pwat gaar'yill Yahudiya, kihh Urshalima, kihh v'ur yill w'u pwoo'am w'u Sidoniya kihh Taaya zag. 18Dw'uu gurum ni mwopp a mwooh gyet mwopp pwat ja p'ee klihng kamm khi Jesu, yakhal tihh bar mwopp diy pwoo v'ur shw'al khimwopp, kihhsheh kihh mwooh v'ur riin wu'bis gyet kihh le'ann mwopp, bhi Jesu bar mwopp kwellelleh. 19Koohweeh dhighin dw'uu gurum ni mwopp kihh tosspee dum tihh g'ung bwum Jesu diy, p'ee bhall mhi bar shw'al kihh put shoopshik nyi dum bar mwopp diy.

20Bhi Jesu eep yit niy naah zheppkamm keeniy mwopp diy, bhi satt le,

“Wu'rett khi Naan kaah wuh,

wunn mhipyaah,

p'ee dhenglong khi Naan a mug'wuh!

21Wu'rett khi Naan kaah wuh,

wunn mhi shwaa kussum mwasseh,

p'ee wunn p'ee p'ar abbhal!

Wu'rett khi Naan kaah wuh,

wunn mhi wall mwasseh,

p'ee wunn p'ee p'ar pyan shw'ar!

22Wu'rett khi Naan kaah wuh,

kadmihh gurum mwopp kihh shiih kihh wunn,

yakhal mwopp kihh gab wunn,

mwopp fullup wunn,

mwopp kihh wad shumm wuh

lhiwaa L'aa khi Gurum.#1Bit 4:14

23“Mihh bii mhize mwopp taah kaah wuh, bhi wu sh'in rettyit, wu merrep zhullakk sh'i rettyit, p'ee ih kihh satt wunn, lebhed keewu dhess pwetd dhighin dhengNaan; p'ee a bii w'u gyet kum-puup khimwopp sh'in kihh Mhi-wanggshiiy mwopp seh.

24“Dhangg mak kihh wunn dihkhillihkk,

wunn mhilong mwopp,

p'ee baa w'u lapp bii ten'kihr keewu shi a pwetd seh!

25Mak kihh wunn dihkhillihkk,

wunn mhi so abbhal mwasseh,

p'ee wunn kudyi p'ee p'ar shwaa kussum.

Mak kihh wunn dihkhillihkk,

wunn mhi pyan shw'ar mwasseh,

p'ee wunn kudyi p'ee p'ar maab,

wu dheer wall pwetd.

26Mak kihh wunn dihkhillihkk,

kadmihh gurum weett kihh nhighil wunn,

p'ee a bii w'u gyet kumm-puup khimwopp

sh'in kihh mhi-wanggshiiy mhidwungg mwopp seh.

Wu wall shaar'lek keewu mwopp

Mat 5:38-48; 7:12

27“Ih kihh satt wunn, wunn mhi klihng a'n; wu wall shaar'lek keewu mwopp, yakhal wu kihh sh'in wu'rett mwooh kihh shiih kihh wunn. 28Wu kihh le'wurett mwooh kihh le'wubis kaah wuh, yakhal wu kihh dhangNaan p'ee mwooh kihh sh'in wu'bis wunn. 29Mihh menguh diy mwod gihnn gha mhize, bhi ghi shikhir kihh wu'zeh nyi zag. Gwooh y'aa bh'aar keegha lapp kih bhall, bhi tapp ghi shiih kih lhir keegha nyi mou. 30Wu kihh pihh zhukhum koohweeh w'u dhang bii pwoo wu. Yakhal mihh menguh diy m'ang mee'bii keewu kih bhall, bhi tapp wu le'ching nyi tihh baa'ji kihh nyi wunn mou. 31Bii w'u wu kihh dh'om tihh mwoohzeh mwopp sh'in wunn, bhi wu sh'in a kihhsheh wu'mwopp zag.#Mat 7:12

32“Mihh wu kihh wall a mwooh kihh wall wunn kyekk, bhi Naan diy le'wurett wunn p'ee nyi aa'? Ai kooh mhi-shigbis maah mwopp kihh wall mwooh kihh wall runn zag. 33Yakhal mihh wu kihh sh'in wu'rett a mwooh kihh sh'in wu'rett wunn kyekk, bhi Naan diy le'wurett wunn p'ee nyi aa'? Ai kooh mhi-shigbis maah mwopp kihh sh'in a kihhsheh zag. 34Yakhal mihh wu kihh pihh kaatt a mwooh kihh bhall mhi kwat ni wunn kyekk, bhi Naan diy le'wurett wunn p'ee nyi aa'? Ai kooh mhi-shigbis maah mwopp kih pihh kaatt mhinut mhi-shigbis kihh p'an mhi waa lapp bii ru dyi. 35Kop kihhsheh bhi wu wall shaar'lek keewu mwopp, wu kihh sh'in wu'rett mwopp, yakhal wu kihh pihh kaatt mwopp baah kihshag kihh le'pan mhi waa lapp nyi dyi mou. A kihhsheh bhi wunn p'ee kad lebhed dhess, yakhal wunn p'ee kwed a zhepp khi puup wu Naan W'u Mettweett, w'u mwopp kihh sh'in a bii w'u wu'nyi kihh sh'in zag. P'ee Naan kihh sh'in wu'rett mhishiin-plangg kihh mhi sh'in wu'bis mwopp zag. 36Pee'mhinyi, bhi wu dhen a mhi-kaahdhoonn kaa Puup wu a Gu-kaahdhoonn se zag.

Wu nook bheez gurum mwopp

Mat 7:1-5

37“Tapp wu kihh bheez menguh mou, bhi baah Naan p'ee bheez wu'wunn zag mou. Tapp wu kihh le'shig phi menguh mou, bhi baah Naan p'ee le'shig phi wu'wunn zag mou. Wu kihh fwa gurum mwopp, bhi Naan p'ee fwa nyi wu'wunn zag. 38Wu kihh pihh bii, bhi Naan p'ee pihh nyi wunn zag: Naan p'ee pihh nyi wunn dhighin zhangg'kamm wu'rett, a w'u dih'dal, a w'u sihsihkhin, a w'u gihgam bhikhitt harr kihh kor yill, harr wu lapp kakharr phitukhurr wuh. P'ee zhangg'kamm w'u wu kamm dhighin bhi Naan p'ee kamm nyi wu'wunn a dhighin zag.”

39Bhi Jesu satt m'ee shumpwoo le, “Guvughum kihh y'aa sarr m'ee wu'nin guvughum a'ng? Mihh sh'in kihhsheh, bhi mwopp weett vel p'ee pal kw'al s'ang?#Mat 15:14 40Laa'kamm kihh mett Gukamm keeniy mou. Weett kihhsheh mihh gukamm ni katt laa'kamm ni rih-rett, bhi laa'kamm ni kihh mak wull kaa Gukamm keeniy zag.”#Mat 10:24,25; Yoh 13:16; 15:20

41“A mihyeh l'e bhi ghi kihh naah reb chidyillipp w'u yit em'nangg, dhangg baah wu'gha ghi naah gag gwallang-yokhomm w'u yit mag mou ayeh? 42Diy shitt a rangg bhi ghi satt em'nangg ghi le, ‘Em'naa, yet tihh ih m'ang reb chidyillipp w'u yit gha diy seh,’ dhangg baah wu'gha ghi naah gag gwallang-yokhomm w'u yit mag mou ayeh? Gu-raanaan wu'baan! Bii w'u rett tihh ghi sh'in sh'ee, bhi ghi m'ang a gag gwallang-yokhomm w'u yit mag seh lhi'baa dhangg, a kihhsheh bhi gha p'ee naahpee dhak rih-rett ser'seh p'ee m'ang reb chidyillipp w'u yit em'nangg seh.

Tihngsheep kihh zheppsheep keera

Mat 7:16-20; 12:33-35

43“Tihngsheep wu'rett kihh la zheppsheep wu'bis mou, kooh tihngsheep wu'bis la zhepp wu'rett mou. 44Mwopp kihh man kooh a tihngsheep wu'rangg a sh'i zhepp khinyi. Gurum mwopp kihh cham yak koon tihng ghir mou, kooh mwopp yak zhepp'anab tihngg mong'mongg mou.#Mat 12:33 45Gurum wu'rett kihh put kihh bii wu'rett a dhighin wu'rett w'u kihh akk dharr phitukhup niy. A kihhsheh zag, gurum wu'bis zag kihh put kihh bii wu'bis a dhighin wu'bis w'u kihh akk dharr phitukhup niy zag. Bii w'u gurum kihh satt weett, kihh put a dhighin bii w'u gam phitukhup gwoh ni.#Mat 12:35

Shumpwoo kaah mhi-dyikluh mwopp vel

Mat 7:24-27

46“A mihyeh l'e bhi wu kihh peet a'n, ‘Gwoohyon, Gwoohyon,’ dhangg baah wu kihh kyeer pwoo keena mou ayeh? 47Koohweeh w'u kihh ji kihpee na diy, yakhal kihh klihng kamm keena harr kyeer, bhi gwoh ni a kaa kihhshe se. 48Nyi a kaa m'ee gudyik-luh w'u sak pee zhurruk-zhurruk bhi shee kugluh ni bhakk kih laar. Kaarooh chlim'am put, pwas luh ni pwetd, weett kihhsheh bhi baah luh ni shoghon mou, p'ee mwopp dyik luh ni rih-rett. 49Dhangg gwooh kihh klihng kamm keena dhangg kyeer mou, bhi nyi a kaa m'ee gurum w'u dyik luh keeniy a kih loonyill noott kug. Kaarooh chlim'am pwas luh ni pwetd, bhi abet, luh ni rumm rhighib n'ook wu'khimhi!”

ที่ได้เลือกล่าสุด:

Luka 6: Chakfem

เน้นข้อความ

แบ่งปัน

คัดลอก