Genesis 9
9
Elob ge Noaxi ǀkha dī ǃgaeǀhaos
1Elob ge Noaxi tsî ǁîb ôagu tsîga ǀkhae tsî ge mî: “Ôananôagu, ǃgôab ǃnâ ǂguiǂguisen î ǃhūbaiba ǀoaǀoa re.”#Gen. 1:28 2Hoaraga xamarin, ǀgurun, anin tsî ǁaun tsîn ge sago nî ǃao. ǁÎn hoan ge sago di ǀgaib ǃnaka hâ. 3Hoaraga ûitsama xūn, gon ran ge sado ǂûse nî ība, ǃam haiǂûn tsî ǀgâna ta ge ǂûxūse mā du hâ is ǁkhās khami. 4Xawe du ge noxopa ǀaoxaǃnâ ǁgan-e ǂû tide. Nēsa ta ge ûib ǀaob ǃnâ hâ xui-ao ra ǃkhâi du.#Lev. 7:26-27; 17:10-14; 19:26; Deu. 12:16, 23; 15:23 5ǀGuru-i hîa ga sadu ǀaoba ǂnâxū-e ta ge sadu ûib ǃereamsa nî ǂgaoǀkhā tsî mâ khoe-i hîa ǁî-i ǀgūkhoe-i di ǀaoba ga ǂnâxū-i hoa-e ta ǁnā khoe-i ûib di ǃereamsa nî ǂgaoǀkhā. 6Elob ge khoesiba ǁîb īb ǃoa kuru xui-ao i ge mâ khoe-i hîa nau-e ga ǃgam-i hoa-e nî ǃgamhe.#Gen. 1:26; Eks. 20:13
7“Ôananôagu tsî du ge ǃgôab ǃnâ nî ǂguiǂguisen, sadu surib nî hoaraga ǃhūbaib ai ǁanse.”#Gen. 1:28
8Elob ge Noaxi tsî ǁîb di ôagu tsîga ge mîba: 9“Nēsi ta ge ǃgaeǀhaosa ra dī sago tsî sago khaoǃgâ nî hā surib âgo, 10hoaraga ûitsama kurusaben ǃhūbaib ai hân; hoa anin tsî xamarin; hoan hîa ge sago ǀkha arka xu ǂoaxan ǀkha. 11Sao ra mîdi ǀkha ta ge ti ǃgaeǀhaosa ra dī: Tita ge ǁkhawas tsîna ta ûitsama kurusabena ǁgammi dâus ǀkha hîkākā tide ǃkhaisa ra mîmâi; ǁkhawas tsînab ge ǃhūbaiba ǁgammi dâu-i xa hîkākāhe tide. 12Tsî nē hâhâ nî ǃgaeǀhaos sadu tsî hoaraga ûitsama kurusaben ǀkha ta ra dīs di saos ase ta ge 13ǃâudi ǃnâ ǀapiǃhanaba ra dī. ǁÎb ge tita ǃhūbaib ǀkha ūhâ ǃgaeǀhaos di saos ase nî ī. 14Mâ ta ga ǃāǂuisaba ǃâudi ǀkha ǃgū-ai tsîb ga ǀapiǃhanaba ǂhai 15ǃnās hoasa ta ge ti mîmâis, sadu tsî xamarin tsî ǀgurun ǀkha ta ge dīs, tātsē-i ǁkhawa ǁgammi dâu-e sado hîkākā tides disa nî ǂâihō. 16ǀApiǃhanab ga ǃâudi ǁaegu ǂhai, o ta ge hâhâ ra ǃgaeǀhaos tita tsî hoaraga ûitsama kurusaben ǃhūbaib ai ǁan hân tsîn ǁaegu hâsa nî ǂâihō. 17Nēs ge hoaraga ûitsama kurusaben ǃoa ta ra dī mîmâis di saosa.”
Noaxi tsî ǁîb ôagu
18Noaxi ôagu, arka xu ge ǂoaxa gu ge Semmi, Xammi tsî Jafet hâga. Xammi ge Kanaani îba. 19Nēgu ge Noaxi di ǃnona ǀgôagu, ǃhūbaib ai hâ hoaraga khoen di aboxaga.
20Noaxi ge ge ǂguro ǃhanasîsenao i tsîb ge draibeǃhanaba ge ǂgā. 21Tsî ǂauxûi-eb ge ātoas khaoǃgâb ge Noaxa kaise ǀhoro, saran âba ǂgaeǂui tsî ǀōǀkhāse tentoms âb ǃnâ ge ǁgoe i. 22Tsî Xammi, Kanaanni di îb ge ǁgûb ǀōǀkhā hâ ǃkhaisa mû, ob ge ǂoa tsî ǃgâsakha sī ge mîba. 23O kha ge Semmi tsî Jafet hâkha anaǂamsaraba ū, ǃhōdi âkha ai ǁgui tsî khaoduruǂgâ tsî ǁgûb di ǀōǀkhāsiba ge ǃgū-ai, ǁgûb di ǀōǀkhāsiba kha mû tidese, aidi âkha ǀnî ǀkhab ǁga daba hâse. 24Tsî ǃgā tsîb ge ǁîb ǀgôab ǂkhammi go tare-e ǁîba dī ǃkhaisa ǁnâu 25ob ge ǁîb ǃoa ge mî:
“ǀÂxareheb ge hâ Kanaanna!
ǁÎb ǃgâsagu di khobon ǃgâ-aib nî khobo.
26ǀKhaeheb ge hâ Semmi di ǃKhū tsî Eloba!
Kanaanni ge nî Semmi di khobo.
27Ab Eloba ǁnāti dī, îb Jafeta#9:27 Jafeta: Nēs ge Hebregowab di ǀarosens khami ra ǀō. ǀarosen.
Ab ǁîb di ôananôaguba Semmi khoen ǀkha ǁanǀhao.
Kanaanni ge nî Jafeti di khobo.”
28Kai ǁgammi dâus khaoǃgâb ge Noaxa noxopa ǃnonakaidisikorodisi kuriga ûi 29tsî khoesekaidisi korodisi kurigu ǀkha ge ǁō.
ที่ได้เลือกล่าสุด:
Genesis 9: KKG20
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Khoekhoegowab Elobmîs © Bible Society in Namibia, 2020.