Luc 3
3
Ginenzitsi gi Sambatisete gi musamu Nyambi
1Gigumbi gi Tibere yibange kanangu yi Rom gu digumi di mipume ne mipume miranu mi gubyale gu andi, Pose Pilate yibange ngowu yi Sudé, Erode ngowu yi Galile, mwane taye andi Filip ngowu yi Iture ne Tarekonite, Lisanyas ngowu yi Abilene. 2Ane ne Kayife babange bivunde bi bevegitsi be pagu. Musamu Nyambi wu kwambilu San mwane Sakari gu kumu. 3San akwene nangange musyengi wotsu wu mugogu wu Surede, gwene gwambilange re «Kalulanu mutsageninu, putigwane gu mambe nonge Nyambi kubunzule bitsimbu bi enu.» 4Neve direndilu mu gisangumu gi mubigitsi Esayi:
Dyufi di mutu wa gwamugi gu kumu:
«Kinzanu mirime mi enu kalulanu mutsageninu.
5Mudongemine wotsu wugubasisu,
mikongu myotsu migubwayimisu.
Nzile tsi rekeme, tsi ne meroku tsi gusungeme,
nzile tsi yunge tsi gunonzu.
Munongumosi pasi dwavingili kanangu dwakinzi dikengi nzile yi aguvyogile nesi aguruge.
6Mutu yandi wotsu agulabe mukani warugili gu Nyambi.»
7San akwambilange batu botsu berugange guse batisu nandi re «Dibure mbisi, nyese nulonge gurine kabu Nyambi ya rugi ne wusu ne bateme? 8Dyanzanu mambu ma labisi re mutsageninu wenu wakaluge, nevu muri wa buri milunde miboti. Nuyakwekukokisange yenu beni re “mukoku wetu Aberam.” Mbare nyanwambile re nesi memani mame Nyambi benze mekaluse bane be Aberam. 9Yabanu ngenze re pivi ya tabuli panzigu yike ve dibandu di muri. Muri wotsu wusaburi milunde miboti wugutabulu wukoku gu ruvi.»
10Batu bivule San re: «A yetu duvagi tsye?» 11Abagule re: «Mutu wune bidwaru bibeyi avegi gimosi mutu sandi. Awune biguye avagi munongumosi gwandi.»
12Bebolitsi be lepu gwandi beruge gutsebatisu, bekwivule San re «Mulonzi, a yetu duvagi tsye?» 13Negubagule re «Nuya vyosisile durangu dunwavegu dinyange di gwivule.»
14Gori gwandi beku mwivule re «A yetu duvagi tsye?» Abambile re «Nuyapatule batu doli ne ngudu, ne gufure tumbe labanu mugangu doli tsi banuvegi.»
15Bumongu bubange gu givivu ne gitu bepikilange re mandi San re Kirisete mukani wu bevingilange. 16San negubambile re «Menu nyanubatisi mu mambe. Tumbe agaruge wakibi menu ngudu. Nzabenze gube nesi muvige andi wu gunyangule mukudu pondu tsi andi. Yandi re guse nubatise mu Dinyuni Diboti negu ruvi. 17A ne gyevi gi andi ve dikake gu gupasule biriri ne milunde miboti. Tumbe agunyenze biriri gu ruvi dusatsimi.»
18Are nane San longilange musamu boti mu bulongu ne mbili ndongi tsimosi. 19Gube gigumbi gi Erode ngowu yi Galile ne gusyembu ne San gukyelu Erodyas mugatsi mwane taye andi wu yandi bonge gu dyonge ne gukyelu mbili mambu mabi me yandi kinzange. 20Erode kekunde vage dyambu dibi di gwingise San gu nzugu.
Bateme yi Sesu
21Bumongu bwotsu ne gubatisu, Sesu gwandi ne gubatisu. Gigumbi gi yandi lembilange Nyambi, nzambi ne gutsibuge. 22Dinyuni diboti dikumusundile ne gidimu gi bongene ne dibembi. Dyufi di Nyambi dikulunu gu nzambi re «Ndyayu wu mwane murime, gu ndyayu nyaveri girondu gi ami gyotsu.»
Bukulu bu Sesu
23Sesu mbere ke gotsu ne megumi mereru me mipume ve yandi pakilile gidyanzu gi gwene nenze musamu boti. Ayibange neve dupikilange re mwane wu Sosef. Sosef mwane wu Eli. 24Eli mwane wu Metat. Metat mwane wu Levi. Levi mwane wu Melesi. Melesi mwane wu Sanayi. Sanayi mwane wu Sosef. 25Sosef mwane wu Matesyas. Matesyas mwane wu Amos. Amos mwane wu Nawum. Nawum mwane wu Eseli. Eseli mwane wu Nagayi. 26Nagayi mwane wu Mate. Mate mwane wu Matesyas. Matesyas mwane wu Semeye. Semeye mwane wu Soseke. Soseke mwane wu Soda. 27Soda mwane wu Yonan. Yonan mwane wu Resa. Resa mwane wu Sorubabel. Sorubabel mwane wu Salasyel. Salatyel mwane wu Neri. 28Neri mwane wu Melesi. Melesi mwane wu Adi. Adi mwane wu Kosam. Kosam mwane wu Elemadam. Elemadam mwane wu Ere. 29Ere mwane wu Sesu. Sesu mwane wu Elyesere. Elyeser mwane wu Sorim. Sorim mwane wu Metat. Metat mwane wu Levi. 30Levi mwane wu Simewu. Simewu mwane wu Suda. Suda mwane wu Sosef. Sosef mwane wu Sonam. Sonam mwane wu Elyakim. 31Elyakim mwane wu Meleya. Meleya mwane wu Mena. Mena mwane wu Metate. Metate mwane wu Natan. Natan mwane wu Davide. 32Davide mwane wu Sese. Sese mwane wu Obede. Obede mwane wu Bowas. Bowas mwane wu Sala. Sala mwane wu Nason. 33Nason mwane wu Aminadab. Aminadab mwane wu Ademin. Ademin mwane wu Areni. Areni mwane wu Ereson. Ereson mwane wu Perese. Perese mwane wu Suda. 34Suda mwane wu Sakob. Sakob mwane wu Isak. Isak mwane wu Aberam. Aberam mwane wu Tera. Tera mwane wu Nawore. 35Nawore mwane wu Seruk. Seruge mwane Rewu. Rewu mwane wu Pelege. Pelege mwane wu Ebere. Ebere mwane wu Kela. 36Kele mwane wu Kenan. Kenan mwane wu Arepasad. Arepasad mwane wu Seme. Sem mwane wu Nowe. Nowe mwane wu Lemek. 37Lemek mwane wu Matusalem. Matusalem mwane wu Enok. Enok mwane wu Yerede. Yerede mwane wu Malalel. Malalel mwane wu Kenan. 38Kenan mwane wu Enos. Enos mwane wu Sete. Sete mwane wu Adame. Adame mwane wu Nyambi.
ที่ได้เลือกล่าสุด:
Luc 3: SWJ
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
