Luc 1
1
Dibandu di gilombi
1Tate Tyofile, mbili batu bemange gurende gilombi gi mambu me monyu ne dufu du Sesu nevu givyogile vegari awu. 2Batu bane berende neve begyulilu ne mbeyi tsilabe ne misu pakile ve dibandu. Yawu botsu bekukaluge bedyanzitsi be Nyambi. 3Re dibandu menu gwandi nzeronde kebe dikengi nevu divyogile pakile ve dibandu di gilombi gi duburu du Sesu. Nzekurendile gilombi gine dikengi nevu mambu mane mevyogile. 4Nonge wukuyabe re mambu me ndyayu wuse nenzu mambu me ngenze.
Tsangu yi duburu du Sambatisete
5Gigumbi gi Erode abile kanangu gu bulongu bu Sudé, gubange muvegitsi pagu wunengungu re Sakari wu dibundu di gidyanzu di Abya. Mugatsi andi gwandi ayibange mwisi tsapele yi Aron dine di andi Elisabete. 6Yawu botsu babeyi babange besungeme ve wusu Nyambi begobisange migage myotsu mi Fumu. 7Tumbe besabange ne bane mbare Elisabete yibange gingume yawu botsu babeyi mbere banune. 8Wisi mosi Sakari vagange gidyanzu gi andi gu ndagu Nyambi. Mbare gigumbi gi dibundu di andi. 9Sakari salu ne gingane nevu bevagilange ne mbetsi gu mugulu awu, gu gwingene gu ndagu yi rereri gu mbure yi nyenzilungu make me gigagange. 10Gigondu gyotsu gi batu gibange gukane mu dulembu gigumbi gi Sakari nyenzilange make me gigagange. 11Vane, Sakari yingene gu ndagu Nyambi yanze yi Fumu muvudugile tsutsudu meteli ve mebagele me gitale gyanyenzilu make me gigagange. 12Sakari negulabe yanze, negutsyemugilu pikile agangu ne wome. 13Tumbe yanze mwambile re «Sakari, wuyadume. Nyambi magwagule ndembu agu, mugatsi agu Elisabete gukuburile mwane dibagele wugumuvege dine di San. 14Agube gumbu gi agu dibandu di mugangu neni. Mbili batu gwandi begube ne mugangu ve aguburilu. 15Mbare agube mutu muneni ve wusu Fumu. Asemuvege mugage re asagunu melamu magotsu. Agube abase ne Dinyuni diboti nesi aguburu. 16Agugabuse mbili bane be Iserayel gu Fumu Nyambi awu. 17Aguruge gere gilumbi gi Nyambi ne dinyuni ne ndure mubigitsi Eli. Gere Eli, mwane agu agubege polu ve gari biburu ne bane be awu. Agukalule mirime mi bisi besagobisi Nyambi, sige begube ne pikile gere batu besungeme. Nane begube gukyelu Fumu bumongu bukike.» 18Sakari negwambile re «Menu, nyanune. Mugatsi ami gwandi, gigumbi gi gubure gyavyoge. Avane niguyabile re diwanyambile dine dyambu dingenze?» 19Yanze negumwagule re «Dine di ami Gabireyel, ni meteli ve wusu Nyambi gu mudyanzile, nzerumu gusekubegile tsangu boti. 20Yulu, wugube dibabe kwange ne wisi mambu mane megulabene. Mbare wusasinge dimenu nzekwambile, mbare digulabene gigumbi gi Nyambi yandi beni tsonzige.» 21Gigumbi gine, gukane, bumongu bevingilange Sakari, bemamange dibandu di agatsingili gu gari. 22Neguvuduge, asekunde rungule bambile. Batu neguyabe re aselabe gimage gu gari ndagu yi rereri. Akubambilange kane bingane mba mbe ake dibabe.
23Ve tsufu tsi andi tsi gundyanze gu gari ndagu Nyambi tsivilu, akugabuge gu mbu gi andi. 24Mwe gigumbi neguvyoge, mugatsi andi Elisabete negube ne dimi, akwekuswegange ne dimi di migweli miranu. Akekwekwambilange re 25«Labe, di Fumu mapage, nzibange ne gisoni vegari batu bami mbare nzaburange, gere Fumu ma kengise amagusule gisoni gi ami.»
Tsangu duburu du Sesu
26Dimi di Elisabete negube ne migweli misyamenu, Nyambi kurume yanze Gabireyel, gu dimbu di Nasarete di yadi Galile. 27Gumbu numbe yise betsi yabe bebagele yabandu gu dionge ne mutu wanengu re Sosefe. Wu tsapele yi Kanangu Davide. Dine dinumbe eni Mari. 28Yanze yine negwingene gumbu gi andi, negumwambile re «Nyakuvegi mbulu Mari, yibe ne mugangu, ndiayu wutse vegu gyesi. Fumu ayi nagu.» 29Mari akutsyemugilu pikile gukyelu dyambu di mwambile yanze. Negu kwekwivule re «A dibandu gye agapegili mbulu munongu wune?» 30Yanze ne gumwambile re «Wuyadume, Mari, mba wadile gyesi ve wusu Nyambi. 31Yulu wugube ne dimi, wugubure mwane dibagele wugumuvege dine di Sesu. 32Agube mundumbe. Agunengu re Mwane Nyambi Yulu. Nyambi gumuvege gipu gi budumbe bu Davide mukoku andi. 33Agube kanangu gitsapele gi Iserayel mwendu ne mwendu. Bundumbe bu andi bugube peke peke.» 34Mari negwambile yanze re «Niguyabile re nine dimi tsye? Nzebetsi yabe bebagele.» 35Yanze negumwagule re «Dinyuni diboti diguruge gu ndyayu, ne ndure yi Nyambi Yulu yi gukufugemine ne gidunze gi andi. Re dibandu mwane wu rereri wu ndyayu gubure agunengu re mwane Nyambi.» 36Yulu, Elisabete giburu gi agu, yandi gwandi ake ne dimi. Agubure mwane dibagele gu bununu bu andi awuse nengungu re gingume. Ayibili ne dimi ake ne migweli misyamenu. 37Mba Nyambi asa ne dyambu di yandi galembu. 38Mari negwambile re «Ni mudyanzitsi Fumu. Nyambi a pagi nevu wusegwambilile.» Yanze musise.
Mari magwende gwelabe Elisabete
39Gigumbi gine gyamosi, Mari negurambuge negwende mbangu mbangu gu gyari gi mikongu, mi dimbu digu gari yadi Sudé. 40Neguvuduge, Mari kwingene gu ndagu Sakari, neguvege Elisabete mbulu. 41Elisabete negulu mbulu yi Mari, mwane wugu difumu negukognuge. Elisabete negubegisu ne Dinyuni diboti. 42Akwamuge veveni re «Mari, wavegu mule vegari begetu botsu. Mwane wu gu difumu di agu gwandi a ne mule. 43Adise pakile re tsye di nguye Fumu ami arugi kwange gu menu? 44Ne gungenze nyayabe re wu nguye Fumu ami, mbare gigumbi gi nzegulilu mbulu agu, mwane gu difumu sekognuge ne mugangu. 45Yibe ne mugangu mba wutsibe ne gitu, re Fumu gudyanze motsu me yandi tsekwambile.»
Dumbu du Mari
46Mari negwambile re
«Fumu, nyakugobisi ne murime ami wotsu.
47Nine mugangu gukyelu Nyambi mwobutsi ami.
48Mbare amagengise mudyanzitsi andi wusa ne musumbu mu bulongu.
Melale me guruge gu nzime ami me gukobise.
49Mbare Givange vange amavage mambu meneni gu menu,
dine di andi di rereri.
50Gigebe gi andi gi gunege mu melale motsu me batu ba mudumi.
51Nyambi ne ngudu andi arinise mu mbure tsyotsu
batu babange ne pikile tsibi tsi gukwe rigitse,
gu mirime mi awu.
52Amabonduse batu babe ne menyange meneni.
Apandise batu bakwesunzi.
53Nyambi abungule batu babe ne nzale.
Bisine asebevege ke pagere givave. 54-55Nyambi maruge guse gwamuse batu bandi be Iserayel.
Atunge pangeni ne mikoku mi etu,
ne Aberam ne melale mandi motsu,
re aguruge guse gwamuse bedyanzitsi bandi bane be Iserayel.
Aselibegene pangeni andi,
yi gigebe gi mwendu ne mwendu.»
56Migweli mireru mi Mari mane gumbu Elisabete negusuke, Mari kugabuge gumbu gi andi gu Nasarete.
Duburu du Sambatisete
57Gigumbi gi Elisabete gi gubure ne guduke, akubure mwane dibagele. 58Batu be dukeseni nandi ne biburu bi andi bekulu re «Fumu mamurigitse gigebe gi andi.» Yawu botsu babe ne mugangu neni. 59Mwane negudugise tsufu yine ne guyireru, mutsufu ginane, batu beruge guselabe neve batabulili mwane purenziye. Biburu bimosi beronde muvege nduge yi Sakari dine di taye andi. 60Tumbe nguye mwane negwambile re «Nesi agunengu re San.» 61Bemwambile re «Gu gitsapele gi agu gusa mutu ne nduge yine.» 62Bevagange bingane gu gyari gi Sakari, bekuyabe nduge yandi garondi vege mwane. 63Sakari negwivule ne gingane girini gi timbi ne musunde pembi negurende re «Dine di andi San.» Batu botsu negumame. 64Vane ne vane, munu andi negutsibuge dulimi du andi negunamuge sige ayambile dikengi. Akokisange dine di Nyambi. 65Vane, batu botsu betsagenange beli nandi bekugangu ne wome Nyambi, ne betsagenange gwandi gu mikongu myotsu mi Sudé, bekwambesenange mambu motsu neve metsevyogile. 66Tumbe botsu bulu mutangu wune, bekupikilange gu mirime mi awu re «Mwane wune agube tsye?» Negungenze ngudu Fumu yi nandi.
Dumbu du Sakari
67Sakari taye andi negubegisu ne Dinyuni Diboti nonge akuyabange mambu ma rugili gu Nyambi negwambile re
68«Didume gu Fumu Nyambi yi Iserayel
mba amabambene ne bane bandi gusebobule.
69Nyambi amadutindile mwobutsi guse gobule bane be Iserayel,
be gitsapele gi kanangu Davide mudyanzitsi andi.
70Nyambi yambile bebigitsi bandi mbetsi,
bebigitsi gwandi bekwene nenze musamu wune gu batu botsu re
71Mugobutsi wuguse dwobule gu batu babi,
ne botsu baduvini.
72Nyambi vage motsu mane gu gurigitse gigebe gi andi
gu taye tsi etu,
aselibegene pangeni yi atunge nawu.
73Neve atunge pangeni ne Aberam mukoku etu.
74Aleve re pasi amadwobule mu mekake me bevinitsi betu,
dusakunde gube ne wome gudyanzile Nyambi.
75Tsufu tsyotsu tsi monyu etu gutsi,
durigitsi anu wuboti wu Nyambi garondi,
dugugobise migage mi andi.
76Mwane ami, batu be gukunenge re mubigitsi wu Nyambi Yulu.
Mba wugwendange ve wusu Fumu
gwetsonzige mirime mi batu nonge bekusinge Fumu.
77Wugutsonzige mirime mi batu
nonge bekuyabange re Nyambi gubobule,
agubunzule bitsimbu bi awu.
78Nyambi etu abase ne gigebe ne girondu.
Agudubangisile giyalele gi Nyambi,
munongu mosi ne giyalele gi dyumbi gu yulu.
79Neve dyumbi ve dyavudugili dyasanzi diviseme.
Mugobutsi gwandi ve agurugile agusegwamuse batu
batsageni gu diviseme, bagulu wome gufu,
gu guberigitse neve begubegilange monyu yi pembi ne polu.»
80Gigumbi neguvyoge, mwane negukubuge akudyolange mu dinyuni. Atsagenange kagu kumu kwange ne wisi wu yandi beni akwerigitse ve wusu bane be Iserayel.
ที่ได้เลือกล่าสุด:
Luc 1: SWJ
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
