Luk 7
7
Ntama ntakpa nnɛ Ɔsɔja
(Mat 8:5-13)
1Ngara yi Jisɔs akan naragha ano ya atɔ anɛ wɔɔ ba ajɔ ayog, atam fa amo ka kafɛnum. 2Fa ka Kafɛnum mmɔanju ntakpa nnɛ ɔsɔja, ya ajɔ nsɛnju ka nete, ajɔ ayaya ɛsa kɛm ka akpɔ. 3Ntakpa nnɛ ɔsɔja ayog ateb Jisɔs ka ato abokogho Jus sa abengɛ aba ama tab mmɔanju ɛwɛ. 4Ngara sa asi ka mfo a Jisɔs, agɔrɛ ka etingitingi, “Ɛnɔnɔb ɔnagha ntakpa nnɛ ɔsɔja yɔ, 5atebsi anɛ ɛbrɛ akɔrɛkɔr afɛnɛ asi nju a mfa Jus ɛyɛrɛ.” 6Ka Jisɔs amo na mbɔ.
Ka ngara yi Jisɔs ame kpere etek, Ntakpa nnɛ ɔsɔja ato atɛ bɛ sa ama atɔɛ: “Ntaa, kifeghe nana ayɔ, mmɛ ndisi yi ɔnam ka nju ɛyaa. 7Yɛyɛyi ɛsɛrɛ ka ndi ba nkɔra atebsi mmɛ yɛ nanaa si ndisi. Ka yimi ka mfo bi ore, wɔ ɔrag nono si mmɔanju ɛwaa anɔnɔb. 8Ka mmɛfɔnɔ nde ka nɔyɔ nnɛ, na ɔsɔja ka nɔyɔ ɛnaa. Ntɔ yɔfa, ‘Sɔng,’ amo; ntɔ yɔfa, ‘Ba,’ aba. Ka ntɔ mmɔanju ɛwaa, ‘Ne jifa,’ ane na.” 9Ngara yi Jisɔs ayog ano ya ɛkɔmɛ, ka amanga abri ɛbɔngɔ ji ɛjɔ ɛtɔɔngɛ, arag, “Ntɔ war, nkagha tɔgɔyɛ njɛn a ntakpa ntama yifa araggasi ka Isɛrɛl.” 10Ka abunu ba ato akru ka etek ama yɛ mmɔanju amɔnɔb.
Jisɔs Atab Mmɔ a Manka yi nnu Akpɔ Asighɛ
11Njam ofo, Jisɔs amo ka ɛjɛbɛ ja abeng si Nen, ka asɔgba ɛyɛ na ntakpa ɛbɔngɔ atɔɔngɛ. 12Sa akpere esingiɛja, asɔn iku nnɛ aru naji mmɔannu wiwiwiwi yi nnyɛ awɛnɛ, ka ajɔ manka yi nnu akpɔ asighɛ. Ka ntakpa ɛbɔngɔ ka ɛjɛbɛ ajɔ fa nanɛ. 13Ngara si Ntaa ayiɛ, ɛkpɔ isi ka atɔɛ, “Ki nan.” 14Ka ajɛn ama kɔmɔ nokono, anɛ ba asɔn nokono asa ayimi. Jisɔs arag, “Nsɔbanɛ, ntɔa wɔ, tam!” 15Iku anɛ atam ajɔ nji ajam nono naragha, ka Jisɔs atɔnɛ akɛ nnyɛ. 16Ɔbɔn ene mbɔ wɔɔ afɛnɛ atig Ɔsɔwɔ, arag, “Ntakpa mbono Ɔsɔwɔ ama nam ka ɛbɔngɔ ɛjɛrɛɛ, Ɔsɔwɔ ama ba ama anagha anɛ ɛbɛ.” 17Ɔka bi ateb Jisɔs ɛkɔnɔ Judia wɔɔ na bɛjɛbɛ bi ere ka ekpeghe Judia.
Jisɔs na Jɔn Nwura alab
(Mat 11:2-19)
18Asɔgba Jɔn Nwura Alab atɔɛ mbe wɔɔ bi Jisɔs ame ne. Abeng mbɔ anɛ aba, 19ato mbɔ sa ama bɔmmɔ Ntaa, “Wɔ yɔ yi ore anɛ yi ebri sa aba, fasɛ ebri nnɛ yɔntingi?” 20Ngara yi anɛ aba atɔb Jisɔs, arag, “Jɔn Nwura alab ato warr si ɛmɛ bɔmma ‘Wɔ yɔ yi ore nnɛ yi ebri sa aba, fasɛ ebri nnɛ yɔntingi?’ ” 21Ka ngara yi Jisɔs atab anɛ ba aya, ayighi anɛ abibi atughu, bɛnagga amar ayɛ mfo. 22Ka akpɛ bɛrɔghanto Jɔn, “Fɛnɛ njam ɛmɛ tɔ Jɔn ji war ɛmɛ yɛ ɛfɛnɛ eyog: Bɛnagga amar ayɛ mfo, abɛnnɛ ajɛn, anɛ ba abini anɔb bɛnagha atɔng ayog, ba kpɔkpɔ anyimi, ka arag nyɛbɛ ɔka Ɔsɔwɔ atɔ akpak. 23Ɛnara ɛjɔ ɛkɛ anɛ ba arighigbɔ atebem.” 24Ngara yi bɛrɔghanto Jɔn atam, Jisɔs ajam naragha na ɛbɔngɔ ateb Jɔn: “Omo ka eyomo ɔmɔyɛ jɛ? Ɛkpab a nanyan ni mfɛb afɛb ɛfaggha? 25Erina jɔna, omo ɔmɔyɛ jɛ? Munnu ya alebe atighi abɔ́? Eˈe, ba ayɔbɔ abɔ́ ya akora asɛ afɛnɛ anɛ nekpen ka etek aton. 26Ka omo ɔmɔyɛ jɛ? Mbono Ɔsɔwɔ? Ee, nɔngɔ mmɛ ntɔa, Jɔn aga Mbono Ɔsɔwɔ. 27Nnɛ yɔna ya ayɛnɛ ateb:
“ ‘Nto nrɔghanoto ɛwaa agbɔmba,
Ya atongo mba ɛya.’
28Nɔngɔ ntɔa, ka ɛbɔngɔ anɛ ba abaka awɛnɛ wawi arem ya afang aga Jɔn; araggasi nnɛ yi agasɛnɛ ka Oton Ɔsɔwɔ afang aga Jɔn.”
29Anɛ wɔɔ, araggasi ba ɛkia taksi, ngara ya ayogho ano a Jisɔs, atama si mba Ɔsɔwɔ ya are ɛdɛdɛghɛ, atebsi Jɔn ya awuru mbɔ alab. 30Ka bafarisi na bekpena ejighi atɛn nkana yi Ɔsɔwɔ ane akɛ mbɔ, atebsi Jɔn arimbɔ wuru alab.
31“Ngara anɛ ba ɛnɛji na jɛ? Are nasi jɛ? 32Are si abɛnsɛ ba ajig ka ɛkan asɛ ya abeng atɛ:
“ ‘Ɛyɔr ofere ɛkia,
oriban;
ɛtak ɛnan ɛkia,
orinan.’
33Ka Jɔn nwura alab aba brɛk arinɛ kafana awɔ amam, ka ɛragsi, ‘Akpe ebibi etughu.’ 34Mmɔ a munnu aba anɛghɛ awɔghɔ, ka ɛragsi, ‘Fa mbara nkɔng na nwɔgha amam, ntɛ a ba ɛkia taksi na ba enea abibi afɛ.’ 35Ka ɛwag Ɔsɔwɔ ɛtɔngɔ ka biji anɛ ba atama nanɛ ka ɛdɛdɛghɛ.”
Jisɔs atamasighi manka nne a abibi afɛ
36Ka nnɛ a Farisi wiwi abeng Jisɔs sa ama anɛ ejonɛnɛghɛ ka nju ɛyɛ, ka amo ka nju a nnɛ Farisi ama jɔ nji ka okpokoro. 37Ngara yi nne a abibi afɛ manka ayog si Jisɔs are ka ɛjɛbɛ ji anɛghɛ ejonɛnɛghɛ ka nju a Farisi aba na ekpoma akuu a mfɔm ya akora asɛ, 38Ka akɛmɛ agba ka njam awuru amibi, amibi ɛyɛ anyɔghɔ ajaa Jisɔs. Ka akɔ nnu ɛyɛ asɛnnɛ ajaa Jisɔs, asɔr ajaa ɛyɛ akɔ akuu a mfɔm ya akora asɛ awurɛ.
39Ngara yi nnɛ a Farisi ya abeng Jisɔs amo a nju ɛyɛ ayɛ ji manka yɔ ane, arag ka nete ɛnɛ, “Nasi munnu yɔ are mbono Ɔsɔwɔ, ka agbɛrɛgbɛrɛ nagana manka ya akɔmɛ, are nne a abibi afɛ!”
40Jisɔs akpɛɛ, “Simɔn, mkpe ejo ji ntɔa.”
“Tɔm, nkpekpene,” Simɔn arag.
41“Abunu aba afɔ mkpɛnnɛ akpugha ḿbɔ. Wiwi afɔɛ ḿbɔ a dinarus ɛgɔr baba na atanarɔn, ka nnɛ yɔga atanaba na wobo. 42Ngara yi mbɔ anɛ ababa arifɔ akpugha ya aganɛ ḿbɔ, atɔ mbɔ sa akiɛkpɛgan. Ka anɛ ba aba yɛnnɛ aga afɔ nɔkɔrɔ akiɛ?”
43Simɔn akpɛ, “Nnɔngɔ si nnɛ yi ḿbɔ ɛyɛ aga fang.
“Ɔmɛkɛbɛ ɛnaa ji nnɔbɔnnɔbɔ.” Jisɔs arag.
44Ka akpeghe abri manka yɔ atɔ Simɔn.
“Ɔmɛyɛ manka yɔ? Mba ka nju ɛya. Alab yayi orimkɛ nsu ajaa ɛyaa, ka yɛ anyɔghɔ ajaa ɛyaa na amibi ɛyɛ akɔ nnu ɛyɛ asɛnnɛ. 45Wɔ orimsɔr, ka manka yɔ jam ka ngara si nnama, akagha gɔ nɔsɔrɔ ajaa ɛya. 46Wɔ orim kag akuu kisi ɛjaa, ka yɛ amim wuru akuu a mfɔm ka ajaa ɛya. 47Yɛyɛyi, yi ntɔa, ebe abibi afɛ ɛyɛ mmatamnsighɛ ɛtɔngɔ si nkɔrɛ nsing ka nnɛ yi abibi afɛ ɛyɛ aritu ka atamasighɛ nɔkɔrɔ ɛnɛ ɛtam ɛjɔ tinim.”
48Jisɔs atɔ manka yɔ, “Mmatamnsigha ka abibi afɛ ɛya.” 49Ajɛnanɛ baga akana ka nte mbɔ, “Yɛnnɛ yɔna ya atamasighi anɛ ka abibi afɛ?”
50Jisɔs atɔ manka yɔ “Ntama ɛya amanagha; sɔng na nanaa.”
ที่ได้เลือกล่าสุด:
Luk 7: NDD Nta
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©️2022 Luke Initiative for Scripture Translation
