Luk 17
17
Jisɔs ateb abangɛ ɔtum ɔkarɛ na ntamɛ
Matiyu 18.6-7,21-22; Mak 9.42
1Jisɔs abong atɔg batɔnanjim abɛ arɛ, “Nsɔl yi ɛla lem anɛ alem abeɔfɛm ɛla teg ɛba, ɛla jɔl ɛbe ɛjom ɛkarɛ nɛ yɔ ala lem nsɔl yifɔ ɛba. 2Ɛlaga nɔb arɛ akunɛ ntakpa lital na ɛmɛl arɔ akag na aya, arɛ alem nkrikri alem abeɔfɛm. 3Kone ɛkpo!
“Mɔnyɛn ɔwa yɔ lom afi yɔ kal alɔ lem abeɔfɛm abangɛ wa, tobɛ ɛgan, alɔ gbɔ ndɔn, tum karɛ. 4Alɔ fɛngɛ alem abeɔfɛm abangɛ wa nkpɛlɛ arima na ɔfo, atore afɛngɛ njim nkpɛlɛ arima aba arɛ, ‘Wɛ agba gbɔ ndɔn,’ tum fɔ karɛ.”
5Arɔb ayɛ abong atɔgɛ arɛ, Tata, “Kpɛlɛ wur ntamɛ!”
6Tata afanga abɔ, “Ɔlɔ bɛl nsusuga ntamɛ mɔng mug a mɔstadi ɔmal ɔtɔg ntakpa ɔte yifa arɛ, ‘Yub ɛla ɔji bim ɛla na aya,’ ɛla teg ɛyoga.
7“Ɔlɔ bɛl ndɔgalitom yɔ mbima afi abri ɔjɔra, alɔ fɛngɛ njim akuri na ɛmɛ agbɛlɛ wɔ ɔlɛ tɔg arɛ, ‘Ba kakab jɔl ɔli nsɔl ɛ?’ 8Anɔ ɛnim jɔl ɔla bong ɔtɔgɛ arɛ, ‘Lam nsɔl kam, tore biji wɔ ɔrɔgɛmam naji niga nwɔga. Mɛ nɔ mal wɔ ɔtɔb ɔli ɔwɔ’ 9Wɛ ala kakag ndɔgalitom sam ateb arɛ agba lem ji ɛfomɔnɔ arɛ wɛ alem ɛ? 10Ɛtɔb ɛreanɔ, wun ɔlem ji atɔgɔ wun arɛ wun ɔlem, Ba bong arɛ, ‘Wur ɛfomam barɔgantom, wur ɛgba lem litom ɛlira lili.’ ”
Jisɔs atore anɛ woba ba ayama abele
11Naji Jisɔs ajɔl ji Jɛrusɛlɛm, aseng na nkɔn a Sameriya na Galili. 12Naji ajɔl ji na ɛjiba jirang abalom woba ba ayama abele akɔn wɛ, ayema dagdagɛ 13akog wɛ gbo gbo, “Jisɔs, Nsɔjira njo, bɛl ndɔn na nira!”
14Naji ayɛnɔ abɔ abong atɔg abɔ, “Ba sɔng, teb ɛlina naji balemanjɔm Ɔsɔwɔ.” Naji ajilɔ, abɔ kpakpa anɔb.
15Nɛ wurang, naji ayɛnɔ arɛ agba nɔb afɛngɛ njim atiga Ɔsɔwɔ na nyura lilom. 16Aba gbɔ na ata Jisɔs akagɛ sam. Ajɔl nɛ a Sameriya.
17Jisɔs abibɛ, “Anɛ woba arig anɔbɔ ɛ? Anɛ bangɔ arim woba mɛn? 18Nɛ sang yɔ afɛngɔ aba jege Ɔsɔwɔ ndɛg njɛn anɛ ɛ?” 19Jisɔs abong atɔgɛ, “Tum yema wɔ sɔng. Ntamɛ ɛya agba wa lem ɔnɔb.”
Ɛbabaga ji ɔtol Ɔsɔwɔ
Matiyu 24.23-28-37-41
20Ɔfo brang anɛ ba Farasi abib Jisɔs, ba ngara yi Ɔtol Ɔsɔwɔ ɛla ba? Jisɔs afanga abɔ, “Ɔtol Ɔsɔwɔ ɛnim baga mɔng ɔla yɛn. 21Nɛ sang yɔ amal abong arɛ, ‘Nga bibi,’ afi ‘Ngɛlɛ bibi,’ ateba arɛ ɔtol Ɔsɔwɔ ɛre na nina.”
22Abong atɔg batɔnanjim abɛ arɛ, “Ngara ayɔ bak yi wun ɔla sɛb arɛ ɔyɛn ɔfo birang na agbem afo ya Mɔn a Nɛnom, wun ɔnim yɛn. 23Anɛ ala wun tɔg, ‘Ngɛlɛ wɛ’ afi ‘Nga wɛ!’ Ɔdɛ teg ɔbɛna ɔtɔna abɔ. 24Mɔng nwangdo anwangɛ liro ɛyaga na libo na ɛja jirang ɛrir na jingɔ ɛla jɔl anɔ na ɔfo bi Mɔn a Nɛnom ala ba. 25Na ngbɔgamba Mɔn a Nɛnom ateg ayɛn ɛriga na ɛgbem nsɔl anɛ ba ɛyeng jifa ɛlɛ tɛn.
26“Mɔng ɛjɔlɔ na afo a Nowa anɔ yɔ ɛla tɔb ɛjɔl na afo a Mɔn a Nɛnom alɔ fɛngɛ aba. 27Anɛ ajɔl li, awɔga, afɛnga ajɔ kɔ mbal bandɛga akarɛ abɔ na mbal tɛtɛ ɔfo bi Nowa ayɛlɔ na ɛgba. Nyɛl aba rungi abɔ fɛb.
28“Ɛtɔb ɛjɔl anɔ mɔng afo ya Lɔt. Anɛ ajɔl li, afɛngɛ awɔga, agore, agona, abima nsɔl na ɛgbɛ, asiga bitɛk. 29Ɔfo bi Lɔt atumɔ na ɛjiba Sodɔm bibi ngon na atal agon analɔ na libo ayol abɔ fɛb.
30“Ɛla tɔb ɛjɔl anɔ na ɔfo bi Mɔn a Nɛnom ala teb ɛlɛ. 31Na ɔfo bifɔ nɛ yɔ akonɔ na libole ɛtɛk adɛ teg abudi aji tab nsɔl ɛyɛ. Nɛ yɔ arenɔ na ɛgbɛ adɛ kur na ɛtɛk. 32Gbɔ nter ji ɛlemɔ nkala Lɔt! 33Nɛ awiawi yɔ agara arɛ anyangɛ likpen ɛlɛ ala tatanɛ, nɛ awiawi yɔ ala tanɛ likpen ɛlɛ ala bɛl ɔnyangɛ. 34Mɛ ntɔga wun, alagtu afɔ anɛ abal ala nɔnga ɛgbenga jirang, ala tab wurang nɛ wurang asa. 35Abakal abal ajɔ gɔg agubakpa mfom yirang ala tab wurang yɔngɔ asa. 36[Abalom abal ala jɔl na ɛgbɛ ala tab wurang wurang asa.]”
37Batɔnanjim abibɛ, “Tata, ngan yɔ nsɔl yifa ɛla lem?”
Jisɔs afanga “Mfom ayiayi yi akuanɛ arenɔ atɛrɛ ajɔga agba ɛkun.”
ที่ได้เลือกล่าสุด:
Luk 17: ABM
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©️2022 Luke Initiative for Scripture Translation
