Luc 21
21
Muensili umukuili
(Marc 12.41-44)
1Jesus anobuaga misu amalaba bisina abimapodula miensili miogu mu yisuegulu yimbongu. 2Amalaba yijaga yimukuili wandi ayimasunsa mikuti mibeji. 3Kabogu amavosa rie: Ngensa nyidutsinguli rie: Yijaga yieyiyi yimukuili atsipodula uviolila botsu basusu. 4Botsu bana batsivega atsitsisialulu banomana nsala tsiogu tumba jandi atsivega tsiotsu atsibetsi nandi.
Jesus ubiga ebiyi nana Ndagu Nsambi jiupansiyila
(Matt 24.1-2; Marc 13.1-2)
5Batu bamosi bamasimina Ndagu Nsambi na mamanyi na bima abimavagulu ombu Nsambi. Mbana Jesus amavosa rie: 6O gusu biotsu abi duilabi namunyi dugomuebilaba. Vagosiala ne dimanyi dimosi va julu dimanyi nandi; biotsu biupansiga.
Maguga na makuana
(Matt 24.3-14; Marc 13.3-13)
7Bamamuwivula rie: Mulonsi, mambu meni temu yi mobila? Yilimba yi yiulasa yiri mambu meni mamalabana?
8Jesus amagabusila rie: Kebananu, duyadunsu! Bapuela boruga mu diina diami novosa rie: Nyiji Christ! Temu jika bebeli. Duyabaduka. 9Ava dugululu mavita mamafunanga na nguba tsivu va gari bisi dilongu na bisi dilongu disusu duyalaba keri mu mbari vengu mambu meni moleba. Tumba disukusulu digoba mu temu eni. 10Mbana amabatsingula rie: Bisi dilongu dimosi botoga na bisi dilongu disusu; bakaga botoga na bakaga basusu; 11voba masisana maneni mabutamba mu biari biotsu na bivunga na dungosu dunsala; voba bimaga bineni na bilimba bineni abiruyili o julu.
12Tumba nesi mambu meni makaba bodusikiga o tsugu; bodubega va gusu bakaga na va gusu bivunda bimalongu mu diambu didiina diami. 13Mu motsu mana dudila temu usamuna Musamu Uboti. 14Sunsanu mirima, duyaletasa adi duwagula va temu eni. 15Vana diweru dieni nyuduvega posulu na diela abiukambisa batu abeduvini. 16Bataji na banguji nesi baana banguji nesi biburu bienil nesi bambatsi bodufunda; boduwakisa ombu bango dikasi na boboka bamosi va gari enu. 17Botsu boduvina mu diambu didiina diami. 18Tumba vagotsiemuga ne dunanga dumosi mu miuru mienu. 19Waranu na dudila monyu.
Jesus ubiga ebiyi nana Jerusalem jiupansiyila
(Matt 24.15-21; Marc 13.14-19)
20Ava dulabila yiri mabadi mamakanda Jerusalem, jabanu yiri dubungu duuonyi duka bebeli. 21Mbana aboba o Judee barini o mikongu na aboba va gari Jerusalem bapali na aboba mu misiru bayagabuga o musiengi. 22Mu mbari mukilu ulabana mu temu eni, udugusu motsu amamasonugu mu Bisonu. 23Ka muna maguga ma bagetu aboba na mimi bolaba! Ka muna maguga ma abonuisanga mabenyi bolaba mu temu eni! Bulongu buebubu buba yika maguga na maguga na kabu Nsambi jiulasu ombu batu bebaba. 24Jogu boboku na dijenga na banokotusu o tsugu bobegu o malongu motsu na abagaa baJuif bosumuna Jerusalem te na temu ogu jiusuka.
Durugu duMuana Mutu
(Matt 24.29-31; Marc 13.24-27)
25O julu, wisi na tsungi na bambuelili biulasa bilimba. Va butamba mubu na mualu ubukanyi biulasa malongu masusu goma. 26Babaala bobakama mirima ava bovivila adiuruga va butamba mu mbari mangolu majulu molabana. 27Mbana bolaba Muana Mutu eruyi na mangolu na bundumba va gari mamungi. 28Ava mambu meni molabinina, sungamanu na sangilanu mu mbari dugobutsu duenu duka bebeli.
Nongu jimumanga
(Matt 24.32-35; Marc 13.28-31)
29Mbana Jesus amababuayila nongu ejiji rie: Gengilanu mumanga na miri misusu. 30Yika miwansi duijabi yiri mfula yika utuba. 31Munongu mosi ava duilabili mambu meni, jabanu yiri Durumu duNsambi duka bebeli. 32Ngensa nyidutsinguli rie: Dukula duedudu dugolefu te na motsu mana molabana. 33Julu na butamba biutsiemuga tumba mambu mami magotsiemuga via!
Moganganu
34Lubuganu! Duyatsoga na milambu na malangi na mambu mabulongu buebubu vo yilumbu yieni yiudukambisa. 35Batu bosutusu va yilumbu yieni munongu mosi nana banyama bamamba bosutusulu na mbusa. 36Kabogu moganganu nosambilanga temu tsiotsu yiri duba na mangolu urina motsu amoba na duba na mangolu ulabana na MuanaMutu.
37Bilumbu bieni biotsu Jesus amaviosa nyangu uyenalonsa o Ndagu Nsambi tumba ava mukolu amayesiliminanga o mukongu umiOlive. 38Muna kedi batu bamamurasuna o Ndagu Nsambi.
ที่ได้เลือกล่าสุด:
Luc 21: PUU1992
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
La sainte Bible en langue Yipunu © Alliance Biblique du Cameroun, 1992.
