Dibandu 3
3
Dibaala na mugetu bamabingu o nungi Eden
1Nyoga amajaba usoga diela ne uviolila bibulu biotsu bimusiru abi Fumu Nsambi amavaga. Amawivula mugetu rie: Dingensa Nsambi amavosa rie: Duyaji milunda mimiri miotsu minungi.
2Mugetu amawagulu nyoga rie: Tuna musuga uji milunda mimiri minungi. 3Tumba milunda mimuiri aguvu o gari nungi, Nsambi amagandisa rie: Duyamiji na duyamibemba mu mbari dukefu.
4Mbana nyoga amatsingula mugetu rie: Ufura efuri dugofu. 5Tumba Nsambi ejabi: Yika duimiji dujaba mambu nana mavu, duba nderi nsambi oyijabi maboti na mabi.
6Mugetu amalaba yiri milunda mimuiri mimaba miboti ugengila noji na amagulu nsala umidokula nodila dujabu kabogu amabonga mulunda umuiri eni na amaji na amaguvega ombu mulumi andi wandi, na jandi amaji. 7Yiotsu yina botsu babeji bamajaba yiri bavu penyi na bamaneka magaji maneni uvaga misobi.
8Dibaala na mugetu banogulu mikindi miFumu Nsambi ava amalingila o nungi tsisiga, bamasuema Fumu Nsambi va gari miri minungi. 9Tumba Fumu Nsambi amanengila dibaala na amamuwivula rie: Aguʼ guvu?
10Amawagula rie: Nyimagugulu o nungi. Nyimalaba goma mu mbari nyivu penyi kabogu nyimasuema. 11Fumu Nsambi amawivula rie: Anyi amagulonsa yiri guvu penyi? Je gumaji mulunda agu nyimagugandisa?
12Dibaala amawagula rie: Mugetu agu ndeʼ gumapega uba muwamusi ami amakwakisa mulunda umuiri eni na nyimaguji.
13Fumu Nsambi amawivula mugetu rie: Dibandu yi gumavayila nana? Mugetu amawagula rie: Nyoga amansoga diela na nyimaguji.
14Mbana Fumu Nsambi amatsingula nyoga rie: Gunovaga nana kabogu nyuguloga; yika ndeʼ va gari biruitsi biotsu na bibulu biotsu bimusiru guwendanga na tulu agu na yika ndeʼ gujanganga difufundu te na yitsingu yiagu yiotsu. 15Nyuvaga yikenganyi va gari jenu na mugetu na va gari bategula bagu na bategula bandi: jogu bodudimbanga va miuru na jenu dubagakanga va bisonginyi.
16Amatsingula mugetu rie: Nyufimisa misongu ava guburilanga. Diuleba guburanga na maguga ne nana guba na nsala mulumi agu na gurumungu nandi.
17Amatsingula Adam rie: Gunogululu diufi dimugatsi agu noji mulunda umuiri agu nyimagugandisa na diruma diedidi guyaguji!
Kabogu mu diambu diagu
Nyuloga butamba
Gutsoganga udila biguji biagu te na mutubu rie:
18Butamba bugubendisila matsiendi na kengitsi.
Gujanganga abi gumavara.
19Gusala tindi usalanga
udila biguji biagu
te na vana gugabuga
o butamba abu gumabongulu
mu mbari gumaruyila mu butamba
gumuegabuga muna butamba.
20Adam amaluga mugatsi andi Eve: mu mbari amaba nguji jibatu botsu. 21Fumu Nsambi amavayila Adam na mugatsi andi biduaru bimikata na amabaduisa bionyi. 22Fumu Nsambi amavosa rie: Laba mutu amakaluga nderi nsambi ujabanga motsu. Tsie tumugubitsianu yiri agodokula milunda mimuiri umonyu nomiji nobanganga monyu umutubu. 23La dibandu amamubingila o nungi Eden uyesala butamba abu amabongulu. 24Anana amabingila Adam; amasunsa biansa bimangolu o yiari ayi wisi epalili yinungi Eden na dijenga dimuji ukelisa nsila jimuiri umonyu.
ที่ได้เลือกล่าสุด:
Dibandu 3: PUU1992
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
La sainte Bible en langue Yipunu © Alliance Biblique du Cameroun, 1992.