John 9
9
1Neħ' dih he'no̱ħˑweeh hoˑăh'doˑo̱nˑdyeħ', waˑoˑgă̱ħ' ne'o̱ˑgweh deˑa'gahˑgweeˑgo̱h, chiˑyòħ'dă̱ă̱' sho̱ shaˑă̱'no̱ˑgăăt.
2Oˑnă̱h neh, haˑgo̱ˑiˑo̱ˑnyaˑnih' ho̱ˑwa̱n'do̱s'o̱h, hoˑnă̱ă̱', Saˑdi'o̱ˑnyaˑnih, so̱'naħˑot' goˑiˑwaˑneħ'akˑheħˑo̱h', nă̱ˑgă̱ă̱' ho̱ˑgweh, o̱ˑgii', neħ no̱ˑwa̱n'deħˑdo̱ħ, heh, deˑa'gahˑgwe'go̱ˑo̱nˑdyeħ shaˑă̱ˑno̱ˑgăăt'?
3Detˑhòs'nyeħˑo̱h ne Jeˑsus, Tă̱ħ'ă̱h nă̱ˑgă̱ă̱' ho̱'gweh deˑò'iˑwa'neħˑak'heħˑo̱h, tă̱ħˑă̱h kuh ha'eħˑgwah no̱ˑwa̱n'deħˑdo̱ħ; neħ gwaa' sho̱ naˑyòˑdo'gaħˑteħt noˑi'òħˑdas'hăħ Na'wĕnˑniˑyòħ haaˑyaħ'daˑdeħ.
4Neħ să̱ħ'ă̱h ne' tgaˑgo̱nt neħ' ă̱ˑgaˑdyòòħ'daat no'i'oħˑdas'hăħ haaˑyaħ'daˑdeħ ne taˑgeh'haħˑo̱h heˑnă̱ˑyo̱'nisˑheħt ă̱ˑwă̱ˑnĭsˑhăˑdeek; neħ ne daaˑweħ' nă̱ˑyòħ'găă, noˑnă̱h' deħˑso̱o̱ˑgaaħ' no̱ˑgweh' deħˑjòˑgweˑnyo̱o̱ o̱ˑsaˑyo̱nˑdyòòħ'daat.
5Neħ' heˑnă̱ˑyo̱'nisˑheħt yo̱ˑă̱n'jaħˑgĕh ă̱ˑgeħ'seek, neħ deˑyòh'hatˑhes'dahˑgo̱h he'yo̱ˑă̱n'jaˑdeħ he'gyaħˑdaaˑdeħ.
6Da neħ' noˑnă̱h' neħˑhuh' shaˑaˑyeeħ' he waas'nyeħt, yo̱ˑă̱n'jaħˑgĕh hoˑnis'gyo̱nˑdyo̱o̱h, oˑgaħ'sdăăħ' waˑo̱ˑniħ' nòs'găħ, da neħ' waˑòh'gaaħ naaˑgaaħ'gĕh ne deˑa'gahˑgweeˑgo̱h' noˑgaħˑsdăăħ,
7Neħ naˑwă̱'o̱hˑseeh, Sahˑdă̱nˑdih, hoħˑsno'aˑeh ne seˑgaaħ'sho̱ħ heˑdyòˑdo̱o̱s'hòòt' ne Siˑloˑam, (neħ gă̱nˑdo̱h' noˑnă̱h' deˑga'wĕnˑno̱ˑdeˑnyo̱o̱h', Dwaˑdă̱'nyehˑdo̱h.) Neħˑhuh niˑya'wă̱ħˑo̱h hohˑdă̱n'dyo̱sˑo̱h, heˑot'gaˑo'eh kuh, detˑhòh'da̱nˑdyo̱o̱h' kuh, shaˑdok'haˑdyeħ.
8Neħ' dih ne deˑă̱ˑnă̱ˑno̱h'saˑne'gă̱sˑyo̱ħ, neħ kuh haaˑdi'yaħˑdaaˑdeħ ne toˑwa̱'gă̱ă̱ˑneħ'sgwaħ neħ neh, deˑa'gahˑgweeˑgo̱h', hoˑnă̱ă̱', Tă̱ħˑă̱h' gă̱h deħˑneeħ' nă̱ˑgă̱ă̱' haaˑyaħ'daˑdeħ, nă̱ă̱ħ'dyo̱nˑdak', haħˑneeħˑhak' kuh?
9Neħ'gyee ne'ooˑnă̱ă̱, Neħ ă̱ă̱ħ' nă̱ˑgă̱ă̱; oˑyaħ'sho̱ħˑo̱h hă̱ˑno̱o̱ˑdo̱h', Neħ ă̱ă̱ħ' desˑhya'dyeeˑă̱h; neħ gwa ne'aaˑwă̱ă̱h' ne'aˑo̱hˑhwa̱ħ', Iiħ' ne'huh.
10Neħˑhuh' no̱nˑda'wehˑdak ho̱ˑwă̱'o̱hˑsee, Aˑniˑyaˑwă̱ħˑo̱o̱h' heh oˑdeh'hoˑdo̱'gwaˑo̱ħ neh seˑgaaħ'sho̱o̱ħ'?
11Detˑhòs'nyeħˑo̱h haˑwă̱ă̱', Neħ no̱o̱'gweh Jeˑsus' ho̱ˑwa̱a̱ˑyaas, hoˑgaħ'sdă̱ˑo̱ˑnii, neħ haˑòh'gaa ne geˑgaaħ'gĕh, haˑgă̱'o̱hˑseeh' kuh, Neħˑhuh' hòħˑseeh' he'dyoˑdo̱o̱sˑhoot' ne Siˑloˑam, hoħˑsno'aˑeh ne seˑgaaħˑsho̱ħ; neħ naˑgah'dă̱nˑdyo̱s'o̱h oħˑgat'gaˑo'eħ kuh; daˑneħ' neh, aˑge'gă̱sˑo̱h.
12Oˑnă̱h' ho̱ˑwă̱'o̱hˑsee, Ga'ă̱ˑo̱ˑweh' nitˑheħs'? Haˑwă̱ă̱' deħˑa'gă̱ˑno̱h'do̱ħ.
13Neħ oˑnă̱h' neħˑhuh ho̱ˑwa̱'yaħˑtee haaˑdi'yaħˑdaaˑdeħ ne Phaˑriˑsees, heˑno̱nˑda'gă̱ˑo̱nˑdyeħ' deˑa'gahˑgweeˑgo̱h.
14Da neħ naˑwĕnˑdaˑdo'gă̱hˑdo̱ħ'gĕh ne shaa'gaħˑsdă̱ˑo̱ˑniħ' ne Jeˑsus, noˑnăh' shaħˑto'gahˑgwa'ihˑsiħ.
15Oˑna'eħ ne Phaˑriˑsees' sho̱ˑwa̱nˑdo̱s'o̱h, heˑniˑdya'wă̱sˑdah'go̱h shoˑdok'haħˑheħ'o̱h. Haˑgo̱ˑyă̱ˑo̱hˑsee, Neħ' noˑgaħ'sdăăħ waa'o̱o̱ħ ne geˑgaaħ'ges'ho̱ħ; da neħ' ne swakˑno'aˑeh, sgeˑgă̱h' kuh doˑgă̱s.
16Neħˑhuh' niˑya'wă̱ħˑo̱h oˑnă̱h gyee' hoˑnă̱ă̱ ne Phaˑriˑsees, Neħ nă̱ă̱ˑgă̱ă̱' ho̱ˑgweh, tă̱ħˑă̱h Haˑwĕnˑni'yòħˑgĕh deħˑta'wehˑdah'go̱h, neħ gaˑiˑo̱ˑnih' he tă̱ħˑă̱h deˑot'gaˑaˑo̱ħ naˑwă̱nˑdaˑdo'gă̱hˑdo̱h wă̱ˑnĭs'hăˑdeħ. Oˑyaħ'sho̱ħ kuh ne oˑnă̱ă̱', Aˑno̱ˑyaˑwă̱h' neħˑhuh niˑyò'iˑòħ'dasˑhă'năˑăˑgwat no̱'o̱nˑdyeeħ' naˑo'iˑwaˑneħˑa'go̱ˑo̱o̱k'? Oˑnă̱h' oħˑto'diħˑni'go̱ˑă̱nˑdiˑaˑno̱o̱ħ he'niˑă̱ˑno̱nˑdiih.
17Oˑna'eħ sho̱ˑwă̱'o̱hˑsee, ne deˑa'gahˑgweeˑgo̱h', Aˑnaħˑot niis' ă̱hˑsiħ' haaˑyaħ'daˑdeħ', heh' desˑhya'gahˑgwa'ihˑso̱o̱h'? Neħ ne'aˑwă̱ă̱h, Neħ noˑdo'gă̱sˑdaaˑnih.
18Neħ gwaa' ne Jews, tă̱ħ'ă̱h deˑoˑdii'waˑgwĕnˑniˑyòs'do̱o̱ħ haaˑyaħ'daˑdeħ, ne da'aˑgah'gweˑgo̱'no̱ħ, o̱ˑsa'dòkˑhaak kuh, heˑniˑyòòˑweħ' noˑnă̱h' neeħ hwaˑo̱ˑwă̱ˑni'no̱o̱k no̱ˑwa̱n'deħˑdo̱ħ ne' desˑho̱ˑwa̱ˑgah'gwaˑih'so̱o̱h.
19Oˑnă̱h' ho̱ˑwă̱ˑno̱n'do̱sˑo̱h, hoˑnă̱ă̱', Iis' gă̱h ne gă̱ħ' sheˑji'aˑwak, neħ' ne jaˑdo̱h' deˑa'gahˑgwe'go̱ˑo̱nˑdyeħ' sha'ă̱ˑno̱nˑgăăt? Aˑdih niˑya'wă̱ħˑo̱o̱h heh oˑnă̱h neˑwaħ shaˑgă̱ă̱h?
20Toˑdis'nyeħˑo̱h' noˑwa̱n'deħˑdo̱ħ, waaˑniħ', Neħ no̱ˑgyă̱'no̱hˑdo̱ħ heħ iiħ' shaˑgi'aˑwak nă̱ˑgă̱ă̱, deˑa'gahˑgwe'go̱ˑo̱nˑdyeħ' kuh shaˑă̱ˑno̱ˑgăăt'.
21Neħ gwaa' heˑno̱ˑdaˑgaˑye'ăħˑdak oˑnă̱h ne'waħ sha'dòòkˑhaħ, tă̱ħ'ă̱h deħˑo̱ˑgyă̱ˑno̱h'do̱ħ; neħ' giħˑshă̱h neh so̱n'diħˑgwa'naħˑot desˑsho̱ˑwa̱ˑgahˑgwaˑih'so̱o̱h tă̱ħˑă̱h deħˑo̱ˑgyă̱ˑno̱h'do̱ħ; oˑnă̱h' naˑeh' hoˑdooˑdyă̱h; sheˑja'o̱nˑdo̱o̱h; tgaˑgo̱nt' naˑeh haˑo̱ˑhwa̱ħ' ă̱ntˑhaˑdaˑdes'nyeħs.
22Neħˑhuh nă̱ˑgă̱ă̱ niˑyòˑwă̱ˑno̱ˑgeeh' no̱nˑda'isˑnyeħt no̱ˑwa̱n'deħˑdo̱ħ; neħ gaˑi'o̱ˑnih heh shaˑgo'disˑhaa'nis ne Jews', neħ să̱ħ'ă̱h ne Jews oˑnă̱h' toˑdiˑyă̱ˑnă̱n'daħˑo̱h hoˑno̱n'diˑwih'saħˑo̱h neh, so̱o̱ˑgaaħ' giħˑshă̱h ne'o̱ˑgweh oˑyă̱nˑdeet' ă̱ˑo̱ˑniħ haˑi'waˑgwĕnˑniˑyòsˑtaħ kuh heh doˑgă̱s neeħ ne Christ, neħ nă̱s'ho̱ˑwa̱ˑyaħ'ditˑgă̱h' heˑă̱ˑno̱nt'gă̱ˑnĭs'atˑhaħ.
23Neħ dyòˑi'waħ waaˑniħ' no̱ˑwa̱n'deħˑdo̱ħ, oˑnă̱h' naˑeh hoˑdoo'dyă̱h; neeħ' sheˑja'o̱nˑdo̱o̱h.
24Oˑna'eħ hesˑho̱'wă̱ˑno̱'go̱sˑo̱h ne'o̱ˑgweh ne de'aˑgahˑgwe'go̱ˑno̱ħ, neħ no̱ˑwă̱'o̱hˑseeh, Neħ Na'wĕnˑniˑyòħ' dee''să̱hˑsă̱ˑo̱ˑnyo̱o̱h; o̱ˑgwă̱'no̱hˑdo̱ħ heh hoˑi'waˑneħ'aˑgo̱h nă̱ˑgă̱ă̱' ho̱ˑgweh.
25Detˑhòs'nyeħˑo̱h haˑwă̱ă̱', Neħ' ne dyă̱ˑgwah' giħˑshă̱h hoˑi'waˑneħ'aˑgo̱h, doˑgaħt' tă̱ħˑă̱h, tă̱ħˑă̱h' naeh niiħ deħˑa'gă̱ˑno̱h'do̱ħ; jòˑi'waat gwaah', naˑgă̱'no̱hˑdo̱ħ, neħ' heˑniˑyòħ'dă̱ă̱ˑna̱ħ deˑge'gahˑgwe'go̱ˑno̱ħ, oˑnă̱h neeˑwaħ sgeˑgă̱h.
26Oˑnaˑeħ sho̱ˑwă'o̱hˑseeh, A'no̱ˑyaˑyeeħ'? a'no̱ˑo̱ˑyeeħ oħˑtyaˑgahˑgwa'ihˑsiħ'?
27Neħ ne shaˑgo̱ˑyă̱ˑo̱h'seeh, Oˑnă̱h waeh' naeh gwaˑoˑwii, da tă̱ħ'ă̱h deħˑswa'o̱ˑgă̱ă̱ħ; a'naeh goˑwaa' iˑswee' ahˑso̱h' ă̱ˑja'gwaˑo̱o̱k? Swaˑgaaˑyă̱s' dih neħ ha'eħˑgwah nă̱ă̱ħ' iis ă̱sˑheˑswa'iˑo̱ˑnya'niˑaak?
28Oˑnă̱h' waˑo̱ˑwa̱ˑno̱h'go̱nˑdă̱ħ; neħ kuh ne'oˑnă̱ă̱', Neħ' niis hehˑsi'wasˑheħ; neħ' niiħ shaˑgwa'iˑwas'heħ ne Moˑses.
29O̱ˑgwă̱'no̱hˑdo̱ħ neħ Na''wĕnˑniˑyòħ, hosˑnyeħˑseeh ne Moˑses; da' oˑnă̱h nă̱ˑgă̱ă̱' ho̱ˑgweh, tă̱ħ'ă̱h'' naeh deħˑo̱'gwă̱ˑno̱h'do̱ħ he''nitˑhaˑweeˑno̱o̱.
30Detˑhòs'nyeħˑo̱h ne'o̱ˑgweh', neħ naˑgo̱ˑyă̱ˑo̱hˑseeh, Aˑniˑyòħˑdă̱ă̱'? aˑyă̱ă̱ħ', ă̱ă̱ħ, oˑi'waˑnăă'gwat nă̱ˑgă̱ă̱, heħ tă̱ħ'ă̱h deħˑswă̱'no̱hˑdo̱ħ he'nitˑhaˑweeˑno̱o̱, neħ gwaa' heh desˑhaˑgeˑgah'gwaˑih'so̱o̱.
31Neħ' waeh no̱ˑgwă̱'no̱hˑdo̱ħ tă̱ħ'ă̱h deħˑsha'gòtˑho̱nˑdeħ' Na'wĕnˑniˑyòħ ne goˑi'waˑneħ'aˑgo̱h; neħ gwaa' giħˑshă̱h neh' so̱ˑgaaħ' ne'o̱ˑgweh neħ' ă̱ˑo'iˑwaˑyă̱ˑniˑaak Na'wĕnˑniˑyòħ, neħˑhuh' kuh nă̱ˑoˑye'a̱nˑdyeħ he'nitˑhoħ'niˑgooħˑdă̱ă̱h neħ ne'huh ne'neħ hotˑho̱nˑdeħ'.
32Neħ he'no̱ħˑo̱'nisˑheħt chiˑdyòh'saaħ he'yo̱ˑă̱nˑjaˑdeħ, deˑwă̱nˑdo̱h' deħˑo̱'gwaˑo̱o̱ˑgă̱h neh' so̱o̱ˑgaaħ' ne'o̱ˑgweh do̱ˑsaˑoˑgahˑgwa'ihˑsiħ neh deˑa'gahˑgwe'go̱ˑo̱nˑdyeħ' iˑgă̱ă̱ ho'no̱ˑgăˑdo̱h.
33Neħ giħˑshă̱h nă̱ˑgă̱ă̱ ho̱ˑgweh aa'gă̱ˑno̱ħ Haˑwă̱ˑni'yòħˑgĕh deħˑta'wehˑdah'go̱h, tă̱ħˑă̱h' deˑoˑgweˑnyo̱o̱h' haħˑgwĭs'dă̱ħ no̱'o̱nˑdyeeħ.
34Desˑho̱ˑwa̱ˑwă̱'no̱ħˑsăăˑgwă̱h, ho̱ˑwă̱'o̱hˑseeh, Neħ noˑgwe'go̱hˑjih gaˑi'waˑneħ'akˑshăˑgo̱o̱ să̱ˑno̱ˑgăˑdo̱h; da neħ' gă̱h nihˑseeh ă̱kˑheˑiˑo̱ˑnyă̱ħ? Oˑnă̱h' asˑdeh ho̱ˑsa'o̱ˑwa̱'yaħˑdòħ'yaak.
35Waˑi'wa'o̱o̱k ne Jeˑsus, heh asˑdeh gwah' hesˑho̱ˑwa̱ˑyaħ'doħˑyaaˑgo̱h; neħˑhuh dih noˑnă̱h' saˑo'yaħˑdas'hă̱ă̱ˑwiħ, haˑwă̱'o̱hˑseeh, Neħ gă̱h neh hehˑsi'waˑgwĕnˑniˑyòs'taħ No'aˑwak' Na'wĕnˑniˑyòħ?
36Detˑhòs'nyeħˑo̱h, haˑwă̱ă̱, Syaħˑdaˑgwĕnˑniˑyòħ', so̱nˑdih' naeh naħˑòt', aˑe'i''waˑgwĕnˑniˑyòs' dih?
37Neħ naˑwă̱'o̱hˑseeh ne Jeˑsus', Neħ' ne deˑjaˑo̱h hehˑse'gă̱sˑo̱h, neħ' gwaħˑhuh haˑo̱ˑhwa̱ħ, ne'waħ ne deˑjiitˑhaaħ.
38Neħ neh' haˑwă̱ă̱', Syaħ'daˑgwĕnˑniˑyòħ', òħˑgi''waˑgwĕnˑniˑyòs. Oˑnă̱h ehˑdaħ'gĕh hoˑdaˑdo̱ˑnyas'o̱h deˑò'yaħˑdaˑno'o̱hˑgwaˑno̱ħ.
39Oˑnă̱h' haˑwă̱ă̱ ne Jeˑsus, Neħ' ne deˑgyaħ'doˑweh'daaˑneħ' he'neħˑhuh aˑgyo̱o̱h nă̱ˑgă̱ă̱ heˑyo̱ˑă̱nˑjaˑdeħ; neħ' dih haaˑdi'yaħˑdaaˑdeħ' neˑtă̱ħ'ă̱h iˑgă̱ă̱' de'aˑdiˑgă̱h, ă̱ˑo̱nˑdiiˑgă̱ħ' ne'neħ; neħ kuh haˑdi'yaħˑdaaˑdeħ' na'diˑgă̱h, iˑgă̱ă̱, dă̱ˑo̱ˑdiˑgah'gweek naˑeh ne'neħ.
40Oˑnă̱h gyee', ne Phaˑriˑsees, ne' shaħˑgaat' hă̱ă̱ˑneħs waˑă̱'no̱ˑo̱o̱k' nă̱ˑgă̱ă̱ heˑno̱ħˑo'wă̱ˑno̱'geħˑheħt, neħ ne waˑo̱'wă̱ˑo̱s, Neħ gă̱ nă̱ă̱ħˑiiħ ne deˑyaˑgwaˑgah'gweˑgo̱h?
41Haˑgo̱'yă̱ˑo̱h'seeh ne Jeˑsus, Neħ' giħˑshă̱h neh' taħˑdeˑswaˑgah'gweˑgo̱h a'gă̱ă̱ˑno̱ħ ne'huh deħˑswaˑyă̱ħ' ne gaˑi'waˑneħ'akˑshăħ; neħ gwaa' nă̱ˑgă̱ă̱ ne'waħ swaˑdo̱h', a'gwaaˑgă̱h; neħˑhuh niˑdyò'aˑwih'dahˑgo̱h' ah'so̱h gaaˑyă̱ħ' ne swaˑi'waˑneħ'akˑshăħ.
ที่ได้เลือกล่าสุด:
John 9: SEE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Gospels published by the American Bible Society in 1872, Psalms in 1892.
