John 7
7
1Neħ' noˑnă̱h' shaħˑga'at nă̱ˑgă̱ă̱ no̱ħˑo'iˑoħ'dă̱ħˑsho̱ħ, deˑot'taah'gwă̱h ne Jeˑsus, Gaˑliˑlee' heˑaˑweeˑno̱o̱; neħ să̱ħˑă̱h ne tă̱ħ'ă̱h naeh deˑoˑgaˑyă̱s ne' neħˑhuh' aa'at haˑdiˑno̱ˑgeħ' ne Jews, neħ gaˑiˑo̱ˑnih hoˑnih'saˑgo̱h' ne Jews na'o̱ˑwa̱ˑnyòħ.
2Da neħ' ne Jews he'niˑă̱ˑno̱nˑdek'hweˑo'ees noˑnă̱h gă̱ă̱s waˑă̱'no̱hˑhniˑgăˑo̱sˑsyòˑdo̱o̱ħ oˑnă̱h' hwaħˑo'eˑaˑdyeħ.
3Neħ dih' ga'iˑo̱ˑnih ho̱ˑwă̱'o̱hˑsee ne deˑă̱ˑno̱nˑdă̱'no̱nˑdeeħ, Satˑhăˑdaat' nĕkˑhò'o̱ˑweh, neħˑhuh' hoħˑseeh' ne Juˑdea; neħ na'ă̱ˑno̱nt'gatˑhòħ' iˑgă̱ă̱' ha'eħˑgwah ne she'iˑo̱ˑnyaˑnih heˑniˑgaˑiˑoħ'dasˑyòħ'dă̱ă̱s ne saˑdi'wahˑdă̱n'dyehˑdo̱h.
4Neħ să̱ħˑă̱h' waeh, neˑtă̱ħˑă̱h' deħˑso̱o̱ˑgaaħ' no̱'gweh naˑdah'sehˑdo̱ħ'gĕh haħˑgwĭs'dă̱ħ no̱'o̱nˑdyeħ, neħ kuh ne do̱nˑdaa'wihˑsa'go̱ˑo̱o̱k ne'aˑo̱hˑhwa̱ħ ne gwaħ' taa'gaˑaħk' a'o̱ˑwa̱ˑyă̱nˑde'iˑaak. Neħ' giħˑshă̱h niis' neħˑhuh' nihˑsyeˑhaħ' nă̱ˑgă̱ă̱' no̱ħˑo'iˑoħ'dă̱ħˑsho̱ħ, saˑda'dyaħˑdo'dahˑsih nă̱ˑgă̱ă̱ he'yo̱ˑă̱nˑjaˑdeħ.
5(Neħ să̱ħ'ă̱h ne tă̱ħ'ă̱h ha'eħˑgwah ne de'ă̱ˑno̱nˑdă̱'no̱nˑdeeħ deˑo̱ˑwa̱'iˑwaˑgwă̱nˑniˑyòs'taħ.)
6Oˑnă̱h ne Jeˑsus' haˑgo̱'yă̱ˑo̱h'seeh, Tă̱ħˑă̱h' ahˑso̱h' teħˑo'ee heˑniˑwak'no̱kˑdòòt; neħ gwa' niis heˑniˑswa'no̱kˑdòòt dya'wă̱ħˑo̱h sho̱' naeh' oˑdeh'saħˑo̱h.
7Neħ he'yo̱ˑă̱nˑjaˑdeħ' tă̱ħˑă̱h' deħˑo'gweˑnyo̱o̱' naˑe'swasˑswaˑă̱h, neħ gwa' niiħ naˑges'swaˑă̱s, neħ gaˑi'o̱ˑnih' heˑgi'waˑgwa'ihˑso̱s heˑniˑyòħ'dă̱ă̱, waˑeet'gă̱ħ' ne' neħˑhuh waˑdo̱o̱ˑnih' ne gaˑi'oħˑdas'hăħ.
8Neħˑhuh' hoħˑswee he'o̱ˑweħ' dwaˑdek'hwe'oˑo̱h; tă̱ħˑă̱h niiħ' ahˑso̱h' neħˑhuh' taaˑgee he'o̱ˑweh dwaˑdekˑhwe'oˑo̱h; neħ să̱ħ'ă̱h nah'so̱h deħ'oˑgweeˑgo̱h' deħˑoˑyo̱o̱' heˑniˑwak'no̱kˑdòòt.
9Da neħ' noˑnă̱h' neħ' shaˑgo̱'yă̱ˑo̱s nă̱ˑgă̱ă̱ niˑyò'wă̱ˑno̱ˑgee, ahˑso̱h' neħˑhuh' sho̱ hă̱ħˑdyo̱ħ' ne Gaˑliˑlee.
10Neħ gwa', noˑnă̱h ne' deˑă̱ˑno̱nˑdă̱'no̱nˑdeeħ neħˑhuh' chiˑoˑneˑno̱o̱', oˑnă̱h' ha'eħˑgwah neħ'huh heˑa'weeˑno̱o̱ he'o̱ˑweh' dwaˑdekˑhweˑo'o̱h, tă̱ħˑă̱h deħˑneeħ' na'oˑda'dyaħˑdo'dahˑso̱n'dyeħ, neħ gwa' naˑdah'sehˑdo̱ħ'gĕh heˑniˑyòħ'dă̱ˑa̱nˑdyeħ.
11Oˑnă̱h ne Jews ho̱ˑwa̱'yaħˑdih'saˑgo̱h he'o̱ˑweh' waˑdekˑhwe'oˑo̱h, neħ kuh ne'oˑnă̱ă̱', Gaˑă̱ neˑgă̱ħ' niˑeħs'?
12Neħ ne weeˑsòħ' hoˑdiˑwă̱ˑnòh'daˑnyo̱ˑnyo̱h' ne gă̱nˑdyòh'gwaħˑgĕh, haˑdi'was'hă̱ˑnyo̱'gwaˑo̱h haaˑyaħ'daˑdeħ; neħ să̱ħ'ă̱h gyee nă̱'no̱nˑdo̱h', Neħ neˑhuh no̱ˑgweħ'diˑyòò; oˑyaħ'sho̱ħˑo̱h' kuh nă̱'no̱nˑdo̱h', Tă̱ħ'ă̱h; haˑgo̱ħ'niˑgo̱h'ho̱ħˑdaˑnih' ne'huh ne gă̱nˑdyòh'gwaħˑgĕh.
13Neħˑhuh gwa' naeh, tă̱ħˑă̱h' deħˑso̱ˑgaaħ' no̱ˑgweh' ne gwaħ' ta'aˑdwă̱ˑno̱ˑă̱ħ neħ aˑotˑhyòˑwiħ, neħ să̱ħˑă̱h no̱ˑwa̱n'disˑha'nis ne Jews.
14Da neħ dih, noˑnă̱h' no̱o̱ haħˑde'wahˑsă̱ˑno̱h chiˑgaa'wiħs hoˑno̱n'dekˑhwe'oˑo̱h, neħˑhuh' heˑaˑweˑno̱o̱' heˑo'yo̱sˑo̱h hoˑno̱h'saˑdo'gă̱hˑdiħ ne Jeˑsus, wa'diˑo̱ˑnyă̱ħ' kuh.
15Neħ ne waˑoˑdi'waˑnăă'gòħ ne Jews, hoˑnă̱ă̱, A niˑyòħ'dă̱ă̱ haa'yă̱nˑdeˑih' ne gaˑya'no̱ħˑdaħˑsho̱ħˑo̱h nă̱ˑgă̱ă̱' ho̱ˑgweeh', heh tă̱ħˑă̱h naeh deˑwă̱nˑdo̱h' deˑoˑde'yă̱sˑdo̱h'?
16Desˑhaˑgo̱ˑwă̱'no̱ħˑsăˑgwă̱h' ne Jeˑsus', haˑwă̱ă̱, Neħ heˑniˑgiˑòħ'dă̱ă̱ tă̱ħˑă̱h' deħˑiiħ' deħ'aˑgaˑwă̱h, neħ gwaa' ne taˑgeh'haħˑo̱h.
17Neħ giħˑshă̱h neh, so̱n'diħˑgwa'naħˑot ne'o̱ˑgweh, ă̱ntˑhoˑgaˑyă̱h'seek neħˑhuh' nă̱ˑo̱ˑyeeħ' he'nitˑhoħ'niˑgooħ'dă̱ă̱, neħ nă̱'a̱ˑyă̱nˑdeeħ he'niˑgaˑiˑòħ'dă̱ă̱, neħ na'diħˑgwah Haˑwĕnˑni'yòħˑgĕh dya'weehˑdo̱h; neħ giħˑshă̱h' neh, a'diħˑgwah iiħ' sho̱ akˑni'go̱ˑă̱ħ heˑniˑgyeeˑhaħ' gesˑnyeħs.
18Neħ waeh ne'aˑo̱hˑhwa̱ħ' hoħˑni'go̱ˑă̱ħ heˑniˑaˑyeˑhaħ' haas'nyeħs, neħ haˑwih'saˑgo̱h ne' aˑo̱hˑhwa̱ħ' a'ohˑsă̱ˑniˑyò'aak; neħ gwaa' haaˑyaħ'daˑdeħ ne neħ' iˑgă̱ă̱' haˑwih'saˑgo̱h na'òhˑsă̱ˑniˑyò'aak ne to̱ˑwa̱h'ha̱ħˑo̱h, neħ shaħˑgaat' ne' neħ ne ga'iˑwaˑgwĕnˑni'yòħ, tă̱ħˑă̱h' kuh deħˑwaat' haaˑyaħ'daˑdeħ ne tă̱ħ'ă̱h deħˑga'iˑwi'yòs'do̱s'hăħ.
19Neħ' gă̱h ne tă̱h'ă̱h ne Moˑses deħˑshe'swaˑwii ne gaˑya'nesˑhăħ, neħ' dih ne tă̱ħ'ă̱h deħˑgaatˑgaaħ he'niˑswaˑdiih' deħˑswas'deˑisˑdo̱h' ne gaˑya'nesˑhăħ? A'naˑehˑgoˑwaa' neħ' swih'saˑgo̱o̱h' naas'gwaˑnyòòħ'?
20Detˑho'disˑnyeħ'o̱h ne gă̱nˑdyòh'gwaħˑgĕh, hoˑnă̱ă̱', Neħ naˑnis'heˑoˑno̱ħ' hya'dyă̱ˑniih'; so̱ ne gă̱ħ' naħˑot' neħ gaˑwih'saˑgo̱h' na'yeˑsaˑnyòòħ'?
21Jeˑsus do̱ˑsa'go̱ˑwă̱ˑno̱ħ'săˑgòħ, haˑgo̱ˑyă̱ˑo̱h'see, neħ ne sgaˑi'òħˑdas'hăăt aˑgaˑdyòħ'daˑdo̱h, neħ ne gaˑgweeˑgo̱h' eˑswaˑiˑwa'năˑăˑgòħ neħ' dyoˑi'waħ.
22Neħ dih' waeh ne Moˑses' she'swaˑwii neh, gaˑyaˑno̱ħˑdah'go̱ħ, [cirˑcumˑciˑsion gaˑya'so̱h,] (tă̱ħˑă̱h' neħ deħˑga'iˑo̱ˑnih he' neħˑhuh' niˑdya'weˑno̱o̱ haaˑyaħ'daˑdeħ' ne Moˑses, neħ gwaa' haaˑdi'yaħˑdaˑdeħ' nechˑhiħ'nisˑho̱ħ'gă̱ˑo̱o̱ħ;) da neħ' dih gă̱ă̱s ne sheˑswa'yaˑno̱ħ'taħ no̱o̱'gweh naˑwă̱nˑdaˑdo'gă̱hˑdo̱ħ'gĕh.
23Neħ' giħˑshă̱h' no̱'gweh aˑwă̱nˑdaˑdo'gă̱hˑdo̱ħ'gĕh a'aˑgòħ na'o̱ˑwa̱ˑyaˑno̱ħt, neħ' iˑgă̱ă̱ na'gă̱ˑa̱a̱k daħ'deˑyòˑdyaħ'go̱o̱ħ no'ya'nesˑhăħ ne Moˑses; neħ dih gă̱h dyòˑi'waħ swaˑno̱ħ'kwă̱ħˑo̱h he'gyaħˑdaaˑdeħ, heh, haˑyaħ'daˑgweeˑgo̱h' no̱'gweh saˑgeeˑjă̱ħt' naˑwĕnˑdaˑdo'gă̱hˑdo̱h' wă̱ˑnĭsˑhăˑdeħ?
24Să̱ˑno̱h' neħ dă̱ˑswa'yaħˑdo'wehˑdah'gwaak heˑniˑyòħ'dă̱ă̱ ne waħˑo̱nt'gatˑhòħ', neħ gwaa' swaˑye'ăħˑdah'gwaak heˑdă̱ˑswa'yaħˑdo'wetˑhaak nòħˑdye'yaħˑdo'wehˑdaħ'jih.
25Oˑnă̱h gyee hoˑnă̱ă̱' ne Jeˑruˑsaˑlem haˑdiˑno̱ˑgeħ', tă̱ħˑă̱h gă̱h' deħˑneeħ' nă̱ˑgă̱ă̱ ne'ă̱ˑnee' ă̱s'haˑgwaˑnyòħ?
26Neħ gwaa' ne' jatˑgă̱'ă̱ˑo̱h, oħˑhaasˑdeħ' ă̱ă̱ħ hot'haaħ, neh gă̱nˑdyòh'gwaˑă̱h, neħ kuh neh, deħˑtaħ'gwĭsˑdă̱ħ' deˑo̱ˑwă̱'o̱hˑseh. Neħ' gă̱h noˑdo'gă̱ħˑo̱o̱ħ hoˑnă̱'no̱hˑdo̱ħ ne tă̱ˑnă̱'no̱hˑdo̱'o̱ħ, he neħ' doˑgă̱s' nă̱ˑgă̱ă̱ ne Christ?
27Neħ' gwaa' naeh haˑyaħ'daˑdeħ nă̱ˑgă̱ă̱ ho̱ˑgweh, dwa'yă̱nˑdee'ih he'o̱ˑweh nitˑha'weˑno̱o̱; Neħ gwaa' noˑnă̱h' naeh ă̱ntˑheħ' ne' Christ, ă̱ˑgă̱'a̱a̱k deħˑso̱ˑgaaħ' no̱ˑgweh deħˑa'goˑno̱h'do̱ħ he'o̱ˑweh no̱nˑda'eeħ.
28Oˑnă̱h' deˑoh'să̱ntˑhwaħ'o̱h ne Jeˑsus noˑno̱h'saˑdo'gă̱hˑdiħ'gĕh, he'no̱ħˑweeħ haˑdi'o̱ˑnyaˑnih, haˑwă̱ă̱', Neħ' ne deˑjaaˑo̱h' sgwa'yă̱nˑdeeˑih, kuh he'o̱ˑweh' dwa'geehˑdo̱h; neħ ne tă̱ħ'ă̱h deħˑiiħ' deħˑak'niˑgo̱'ă̱ħ he'neħˑhuh aˑgyo̱o̱', neħ gwaa', haˑyaħ'daˑdeħ ne taˑgeh'haħˑo̱h gaˑi''waˑgwă̱nˑniˑyòħ, neħ kuh' naeh ne tă̱ħ'ă̱h deħ'sheˑswa'yă̱nˑdeeˑih.
29Neħ gwaa' ne'yă̱nˑdeˑih; neħ să̱ħ'ă̱h ne' neħˑhuh dwaˑgeehˑdo̱h' heˑtaˑyaħ'daˑdeħ, neħ' kuh taˑgeh'haħˑo̱h.
30Oˑnă̱h' waˑă̱'nihˑsaak' heˑno̱'daˑdiˑye'ăħˑdak' a'o̱ˑwă̱ˑyeˑno̱o̱ħ'; neħ' dih ne' deħˑso̱o̱ˑgaaħ' no̱ˑgweħ' deˑo̱ˑwă̱ˑnĭs'ohˑdaˑeeħ, neħ gaiˑo̱ˑnih heh ahˑso̱h' teħˑo'eeh heˑniˑdyo'isˑdaaħˑeeh deˑyo'doˑgă̱h'do̱h haˑyaħ'daˑdeħ.
31Da neħ' ne' gòtˑgaħ'deħ no̱ˑgweh' waˑo̱ˑwa̱'iˑwaˑgwĕnˑniˑyòs, neħ' kuh ne'oˑnă̱ă̱, Neħ noˑnă̱h' ă̱ntˑheħ ne Christ, neħ' gă̱ neh, si'gwaa heˑniˑyò'iˑòħ'dasˑhă'năˑăˑgwat' nă̱ˑa̱nˑdyeeħ, naeh' heˑniˑyòħ'dă̱ă̱, nă̱ˑgă̱ă̱' ho̱ˑgweh' hoˑdye'òħˑdaaˑdo̱h?
32Neħ ne waˑă̱ˑno̱ˑo̱o̱k ne Phaˑriˑsees, heh, hoˑdiˑwă̱ˑnòh'daˑno̱o̱ˑnyo̱h' ne gă̱nˑdyòh'gwaħˑgĕh ne no̱ħˑoˑiˑòħ'dă̱ħˑsho̱ħ' oˑdi'waˑdeħ' haˑyaħ'daˑdeħ; Oˑnă̱h naˑdih'să̱ˑnoˑwaˑnă̱s' haˑdi'yaħˑdo̱nˑtwʋs', kuh ne Phaˑriˑsees, dasˑhaˑgoˑdih'haħˑsyo̱o̱ħ' neh' shaˑgoˑdiˑyeˑno̱o̱s nă̱ˑo̱ˑwa̱ˑyeeˑno̱o̱ħ.
33Oˑnă̱h ne' Jeˑsus' haˑgo̱ˑyă̱ˑo̱h'seeh, Neħ ne' daħˑji'ah sho̱ nah'so̱h neħˑhuh' ă̱ˑgeħ'seek heˑswaˑyaħ'daˑdeħ, oˑnă̱h' neħˑhuh' hă̱sˑgeeħ heˑtaˑyaħ'daˑdeħ ne taˑgeh'haħˑo̱h.
34Neħ nă̱sˑgwa'yaħˑdih'saak, tă̱ħˑă̱h gwaa' taas'gwaˑgă̱h, neħ kuh he'o̱ˑweh nă̱ˑgeħ'seek deħˑaaˑo̱h' neħˑhuh' a'eˑswaˑyo̱ħ'.
35Oˑnă̱h ne Jews' deˑoˑno̱nˑdaˑdă̱ˑo̱h'seeh, Ga'ă̱ˑo̱ˑweh' no̱o̱ neˑgă̱ħ' hă̱ˑeeħ', nă̱ˑgaˑgweˑniħ' taas'heˑdwaˑgă̱h'? neħˑhuh gă̱'no̱o̱ hă̱ˑeeħ' he'o̱ˑweh niˑa'diˑno̱ˑgeˑnyo̱ħ' ne' deˑo'no̱nˑdooˑgwă̱h, haaˑdi'yaħˑdaaˑdeħ' nooħ'toˑno̱ˑă̱'jòħˑdă̱ħ'sho̱ħ, ne neħ' iˑgă̱ă̱' ă̱ˑo̱ˑgo̱'iˑo̱ˑnyă̱ħ' ne Genˑtiles?
36Aˑnaħˑot' no̱o̱ ne gă̱ħ' gă̱nˑdo̱h' he'aˑdo̱h', Neħ' naeh nă̱sˑgwa'yaħˑdih'saak, tă̱ħˑă̱h gwaa' deħˑaaˑo̱h' aas'gwaˑgă̱ħ; neħ kuh he'o̱ˑweh nă̱ntˑgiħ'dyo̱nˑdaħk, tă̱ħˑă̱h' deħˑo'gweˑnyo̱o̱' neħˑhuh' no̱nˑdeˑsweeħ?
37Neħ neeˑswă̱'nĭsˑhăˑgo̱nt, ne wă̱ˑnĭs'yòˑwaˑnă̱h' oˑdo̱ħ'o̱h heˑwaˑdek'hwe'oˑo̱h, deˑo'daħˑo̱h ne Jeˑsus, deˑoh'să̱ntˑhwaħ'o̱h, haˑwă̱ă̱', Neħ' giħˑshă̱h ne so̱n'diħˑgwa'naħˑot ă̱ˑa̱'aħˑdaatˑhă̱h neħˑhuh' sho̱ nitˑheeh' he'gyaħˑdaaˑdeħ, haaˑne'geˑăh.
38Neħ haaˑyaħ'daˑdeħ nă̱ˑo̱ˑgiˑwaˑgwă̱nˑniˑyòs', ă̱ntˑgaˑyeˑih' heˑniˑgaˑwă̱ˑnòħ'dă̱ă̱ noˑya'do̱sˑhăˑdoˑgă̱h'diħ; ne waaˑdo̱h', neħ heh taˑwă̱n'nyah'saat ă̱nˑdyòˑyaˑgă̱ħ'o̱ˑo̱o̱k, nă̱ˑyò'dihˑhah'dă̱nˑdyo̱'gwaˑo̱o̱k' ne' yo̱hˑheħ'o̱ˑweh' no'neˑgaˑnòs.
39Neħ gwaa' waas'nyehˑdak Not'hwaˑiħ, neħ haaˑdi'yaħˑdaaˑdeħ' nă̱ˑa̱nˑdii'waˑgwĕnˑniˑyòs' iˑgă̱ă̱ ă̱ˑa̱n'diˑyeeˑno̱o̱ħ' ne'neħ; neħ să̱ħ'ă̱h' nah'so̱h deħˑdwat'gaħˑwă̱ˑno̱ħ' Notˑhwa'isˑhăˑdoˑgă̱h'diħ, neħ să̱ħˑă̱h nah'so̱h deˑgaˑă̱hˑsaaˑo̱ħ' deħˑo'do̱ħˑo̱h haaˑyaħ'daˑdeħ ne Jeˑsus.
40Neħ ne' gòtˑgaħ'deħ no̱o̱ˑgweh noˑnă̱h' shaˑă̱'no̱ˑo̱o̱k' nă̱ˑgă̱ă̱' he'naˑoˑwă̱ˑno̱ˑwă̱h', ho̱ˑnă̱ă̱', Doˑgă̱s' gaˑi'waˑgwĕnˑniˑyòħ' neħ Noˑdo'gă̱sˑdaaˑnih nă̱ˑgă̱ă̱.
41Oˑyaħ'sho̱ħˑo̱h gyee hă̱ˑno̱o̱ˑdo̱h', Christ' neˑgă̱ħ' nă̱ˑgă̱ă̱. Neħ gwaa' gyee nă̱'no̱nˑdo̱h, Neħˑhuh gă̱ˑneh' Galˑiˑlee' ă̱ntˑhaˑyaˑgă̱ħt' neˑChrist?
42Tă̱ħ'ă̱h gă̱h deħˑwaaˑdo̱h' noˑya'do̱sˑhăˑdoˑgă̱h'diħ, neħˑhuh' ă̱ntˑhaˑyaˑgă̱ħt' ne Christ hoˑno̱h'gwă̱ˑo̱ˑgo̱o̱ ne Daˑvid, neħˑhuh' kuh he'o̱ˑweh niˑga'no̱nˑdaaˑyă̱ħ' ne Bethˑleˑhem, heˑo̱ˑweh niˑă̱ħ'dyo̱nˑdak' ne Daˑvid?
43Da neħ' dih noħ'tă̱ˑno̱nˑdyaħk' ne gă̱nˑdyòh'gwaħˑgĕh, neħ dyòˑi'waħ haaˑyaħ'daˑdeħ.
44Neħ' dih gyee ne'neħˑhuh naˑă̱'nă̱ħˑniˑgooħ'dă̱s na'o̱ˑwa̱ˑyeˑno̱o̱ħ, tă̱ħˑă̱h dih deħˑso̱o̱ˑgaaħ' no̱ˑgweh' deˑo̱ˑwă̱ˑnĭs'ohˑda'eeħ.
45Oˑnă̱h neh sha'goˑdiˑyeˑno̱o̱s' neħˑhuh' shoˑdi'yo̱sˑo̱h haaˑdi'yaħˑdaaˑdeħ' naˑdih'să̱ˑnoˑwaˑnă̱s' haˑdi'yaħˑdo̱nˑtwʋs', kuh ne Pharˑiˑsees, neħ no̱ˑwă̱ˑnă̱ˑo̱h'seeh, a'naˑeh goˑwaa' deħˑshe'swaˑaˑwiħ'?
46Detˑho'disˑnyeħ'o̱h noˑno̱n'diˑo̱nt, Deˑwă̱nˑdo̱h' no̱o̱ˑgweh' deħˑa'gòsˑnyeħ'o̱h, ne shaħˑda'yòħˑdă̱ˑa̱a̱k nă̱ˑgă̱ă̱ ho̱ˑgweh.
47Oˑnă̱h ne Pharˑiˑsees desˑho̱'wa̱nˑdiˑwă̱ˑno̱ħ'săˑgwă̱h, Oˑnă̱h' gă̱h' nă̱ă̱ħ iis waħˑech'hiħˑni'gooˑdaˑgòħ?
48Neħ gă̱h gyee ne tă̱ˑnă̱'no̱hˑdo̱'o̱ħ, neħ giħˑshă̱h neˑPharˑiˑsees, hoˑwa̱'iˑwaˑgwă̱nˑni'yòsˑdo̱h?
49Neħ gwaa nă̱ˑgă̱ă̱ nă̱'no̱o̱ˑgweh ne tă̱ħ'ă̱h deˑaˑdiˑyă̱nˑdeeˑih' ne gaˑya'nesˑhăħ, naeh' deħˑga'iˑwaħ he'ă̱ˑno̱o̱ˑheħ.
50Neħ ne Niˑcoˑdeˑmus' haˑgo̱ˑyă̱ˑo̱h'seeh, (neħ sha'yaħˑdaat ne' neħˑhuh' niˑtaˑweˑno̱o̱h haˑyaħ'daˑdeħ ne Jeˑsus neh so̱'eh, neħ gyee shaˑyaħ'daat heˑniˑă̱ˑno̱nˑdii,)
51Neħ' gă̱h no̱ˑgwaˑyaˑneesˑhăħ' oˑgweeˑnyo̱o̱' dă̱ˑò'yaħˑdoˑweet so̱ˑgaaħ' ne'o̱ˑgweh' ahˑso̱h ă̱ˑgă̱'a̱a̱k deˑoˑwă̱ˑno̱'a̱ˑgă̱h, ahˑso̱h' kuh ă̱ˑgă̱'a̱a̱k deħˑo'no̱hˑdo̱ħ heˑniˑa'dyehˑhaħ?
52Des ho̱ˑwa̱ˑwă̱'no̱ħˑsăăˑgwă̱h' ho̱ˑwă̱'o̱hˑseeh, Galˑiˑlee gă̱h', nă̱ă̱ħ' iis diˑsah'dă̱nˑdyo̱o̱? Jih'saak, sat'gaatˑhòh' kuh, [a'diħˑgwah neħˑhuh' niˑyòħ'dă̱ă̱h,] neħ' să̱ħˑă̱h ne do̱n'daˑaˑdaħt' noˑdo'gă̱sˑdaˑnih' ne Galˑiˑlee tă̱hˑă̱h' deħˑgat'gaħˑhòh.
53Neħ' ne gaˑgweˑgo̱h nă̱'no̱ˑgweh shoˑno̱h'dă̱nˑdyo̱o̱h neħˑhuh' kuh' naeh gă̱ă̱s ho̱ˑsa'eeħ heh' toˑno̱h'sòòt.
ที่ได้เลือกล่าสุด:
John 7: SEE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Gospels published by the American Bible Society in 1872, Psalms in 1892.
