John 2
2
1Da neħ' neh, să̱h waˑdo̱ħ'taħ wă̱ˑnĭs'hăˑdeħ, neħ nă̱ˑno̱n'dekˑho̱'nyaˑneħ neh goˑnyaakˑtaħ, ne' Caˑna, Gaˑliˑlee dyo̱ˑă̱n'jaˑdeħ; neħ' no'noħ'ă̱h ne Jeˑsus' neħˑhuh' heˑye'yaħˑdaˑaħk;
2Neħ' ne deˑjaaˑo̱h' ne' Jeˑsus' heˑo̱'wă̱ˑno̱o̱ˑgo̱h', kuh naaˑgo̱ˑiˑo̱ˑnyaˑnih, ă̱ˑo̱ˑdiˑyo̱ħ' he'o̱ˑweh' ă̱'no̱nˑdekˑho̱ˑnih neh' goˑnyaakˑtaħ.
3Da neħ' dih noˑnă̱h' oħˑwa'doħkˑdă̱ħ neh noˑnyo̱'gwiħˑsăăˑgiħ', (wine,) neħ nooˑnoħ'ă̱h ne Jeˑsus' ho̱ˑwă̱ˑo̱hˑseeh, Tă̱ħˑă̱h' deˑoˑdiˑyă̱ħ' noˑnyo̱'gwiħˑsăăˑgiħ', (wine.)
4Neħ ne' shaˑgaˑwă̱ˑo̱h'seeh ne Jeˑsus, Siˑo̱h, aˑnaħˑot niiħ' aˑga'diˑwaaˑdeħ' heh, syaħˑdaaˑdeħ? Ah'so̱h neˑgă̱ħ' teħˑo'eeh heˑniˑyò'isˑdaaħˑeeh niiħ' he'gyaħˑdaaˑdeħ.
5Oˑnă̱h' no'noħ'ă̱h ho̱ˑwă̱ˑnă̱ˑo̱h'seeh naˑdih'haħˑshăħ, Neħ na'diħˑgwa'naħˑot' ă̱sˑhe'swă̱ˑo̱s', neħˑhuh no̱ħ'swaaˑyeeh.
6Da neħ' ne' neħˑhuh gaˑge'o̱h, yeeˑiħ' niˑyo̱o̱' ne' yeˑneˑgăăh'gwaħ, gaħˑsgwa'aħ naħˑot', dyosˑheh'dahˑgo̱h' gă̱ă̱s' heˑniˑyòħ'dă̱ă̱h, nă̱ˑno̱n'dyaħˑda'gă̱hˑsaħ'tak ne Jews; wasˑhă̱ă̱ deˑgyo̱ħ' sgaˑeħ; neħ giħˑshă̱h deˑwasˑhă̱ă̱ jaˑdʋk' sgaˑeħ neh geˑih niˑgas'heħˑdi'aˑdyeħ niˑyò'dyeħˑni'aˑdyeħ.
7Jeˑsus' haˑgo̱ˑyă̱ˑo̱h'seeh, Oˑneˑgaˑnos' swaˑno̱o̱ˑhet' ne' yeˑneˑgăăh'gwaħ. Oˑnă̱h hoˑdi'no̱ˑheh'daaˑno̱ħ, aˑgwʋs' neħˑhuh' no̱ħˑga'no̱hˑheħ'syo̱o̱ħ he'nitˑgaħ'sohˑgo̱nˑdo̱ħ.
8Oˑnă̱h' haˑgo̱ˑyă̱ˑa̱h'seeh, Oˑnă̱h' jiˑneeˑgăăˑgòh, neħˑhuh' hohˑswa'ah he'tă̱ħˑdyo̱ħ ne tă̱ˑno̱h'do̱ˑo̱ħ he'gakˑhwe'oˑo̱h. Oˑnă̱h' neħˑhuh' heˑo'diˑaah.
9Neħˑhuh noˑnă̱h', ne' tă̱ˑno̱h'do̱ˑo̱ħ' heˑgakˑhwe'oˑo̱h, waˑaakˑdo̱o̱ħ no'neˑgaˑnòs', ne wine oˑdo̱ħ'o̱h, neħ ne tă̱ħ'ă̱h deˑo'no̱hˑdo̱ħ he'no̱nˑdaaˑweeħ', (neħ' sho̱ naaˑdih'haħˑshăħ hoˑnă̱'no̱hˑdo̱ħ neh hoˑdii'neˑgo'jă̱hˑdo̱h,) oˑnă̱h neh, tă̱ˑno̱h'do̱ˑo̱ħ' he'gakˑhwe'oˑo̱h heˑo'no̱ˑgo̱s'o̱h no'nyaˑkeh,
10Neħ naˑwă̱'o̱hˑseeh, haˑdiˑgweˑgo̱h nă̱'no̱ˑgweh noˑnă̱h' daˑwah'saˑwă̱ħ neħ gă̱ă̱s daˑwaˑdyeˑă̱nt, no'neˑgiˑyòò ne wine wa'aˑneˑgaˑyă̱ă̱ħ; da neħ' no̱ˑgweh' noˑnă̱h neħˑhuh'jih no̱n'diˑne'geˑăħ, da oˑnă̱h' neħ neˑwaħ neh dyoˑdoħk' heh niˑyo'neˑgiˑyòòh; neħ gwa niis ne' sahˑsă̱ˑno̱o̱ˑnii sho̱ ne wiˑyòò ne wine nă̱ˑgă̱ ne'waħ niˑyòòˑweħ.
11Da neħ ne Caˑna ne Galˑiˑlee neħˑhuh' dyo̱ˑă̱nˑjaˑdeħ' tohˑsaaħ' ne Jeˑsus noˑi'oħˑdasˑhăˑnăăˑgwat hoˑdyòòħ'daaˑdo̱h; neħˑhuh' kuh haˑo'dahˑso̱o̱h, ne daˑa'ă̱hˑsă̱'o̱hˑgo̱h, da neħ' no̱ˑwa̱'iˑwaˑgwĕnˑni'yosˑdo̱h naˑgo̱'iˑo̱ˑnyaˑnih.
12Neħ noˑnă̱h' shaħˑga'at nă̱ˑgă̱, Caˑperˑnaˑum heˑa'weeˑno̱o̱, neħ ne'aˑo̱ˑhwa̱ħ', kuh noˑnoħ'ă̱h, kuh ne' deˑă̱ˑno̱nˑdă̱ă̱'no̱nˑdeeħ, kuh, naˑgo̱'iˑo̱ˑnyaˑnih; tă̱ħˑă̱h gwʋs' deħˑo'dă̱ˑnĭs'hăˑgaħ'deħ neħˑhuh' hă̱ˑniħ'dyo̱ħ.
13Oˑnă̱h' ne Jews he'niˑă̱ˑno̱nˑdek'hweˑo'ees, neh passˑoˑver [gaˑyaˑso̱h,] dosˑgă̱'o̱h niˑgaaˑwiħs, neħ ne Jeˑruˑsaˑlem heˑa'weeˑno̱o̱' ne Jeˑsus.
14Neħ' naaˑgo̱'gă̱sˑo̱h noˑno̱h'saˑdo'gă̱hˑdiħ'gĕh ne dyoh'hosˑgwaaˑo̱nt' hă̱ˑno̱n'dă̱ˑniˑno̱h, kuh ne deˑyòˑdiˑno̱ħˑgă̱ˑo̱nt, kuh neh jăăh'goˑwaaħ' gasˑheeˑnă̱ħ, neħ kuh noˑwĭs'daħ deˑă̱ˑno̱nˑda'daˑwis', hă̱ˑniħˑdyo̱ħ.
15Neħ' noˑnă̱h' oħˑtaħ'ă̱ˑnoˑgăăˑdaˑseˑo̱o̱ħ niˑgă̱'o̱hˑgăăħ'a'ah gaˑjo̱h'dyaħ waˑo̱ˑniħ, saˑgo̱'yaˑdoˑwiħ' saˑgo̱ˑyaħ'ditˑgă̱h' noˑno̱h'saˑdo'gă̱hˑdiħ'gĕh, haˑeħˑgwak huh ne deˑyo'diˑno̱ħ'gă̱ˑo̱nt, kuh noˑno̱ħ'gaˑeˑso̱s; neħ kuh nehˑdaħ'gĕh waˑă̱'o̱nˑtòħ, noˑdii'wĭsˑdaħ', noˑwĭs'daħ deˑă̱ˑno̱nˑda'daˑwis', neħ kuh ne waa'gahˑhat'hwahˑso̱o̱ħ' naˑdekˑhwaah'gwaħˑsho̱ħ'o̱h;
16Neħ' kuh naˑgo̱ˑyă̱ˑo̱h'seeh, nă̱ˑno̱n'dă̱ă̱ˑniˑno̱h' ne jăăh'goˑwaaħ gasˑheeˑnă̱ħ, Jo̱ħˑneek' nă̱ˑgă̱ă̱' no̱ħˑoˑiˑoħ'dă̱ħˑsho̱ħ; să̱ă̱ˑno̱h' neeħ ă̱ˑjo̱'niˑaak hooˑno̱h'soot Naaħ'nih ne yo̱nˑdă̱'niˑno̱ħ'dahˑgwaħ.
17Neħ ne shoˑno̱s'hăăħ'o̱h naaˑgo̱ˑiˑo̱ˑnyaˑnih, heˑniˑgaˑyeeˑă̱h' gaˑyaaˑdo̱ħ', Neħ he'niˑgi'waħˑhasˑdeħ giˑwaˑno'o̱hˑgwaħ heˑsaˑno̱h'sòòt neħ aˑgyaħ'dasˑas.
18Oˑnă̱h ne Jews' toˑdis'nyeħˑo̱h' ho̱ˑwă̱'o̱hˑseeh, Aˑnaħ'ot oˑyă̱n'dehˑdahˑgo̱o̱' noħˑsgyò'dahˑsaaħs, heˑneħˑhuh no̱ħˑsyeeħ' nă̱ˑgă̱ă̱' no̱ħˑoˑiˑoħ'dă̱ħˑso̱o̱ħ?
19Neħ neh detˑhosˑnyeħˑo̱h neh Jeˑsus haˑgo̱'yă̱ˑo̱hˑseeh, Swai'wahˑdo̱ħt nă̱ˑgă̱ oˑno̱h'saˑdo'gă̱hˑdiħ, neħ neh, să̱h nă̱ˑyòˑdaaħ oˑnă̱h' ă̱sˑge'gesˑgòħ.
20Oˑnă̱h' hoˑnă̱ă̱' ne Jews, Geˑih' niˑwas'hă̱ă̱ yeeˑiħ' kuh sgaˑeħ niˑyòsˑhăˑgee no̱ħˑo̱'nisˑheħt haˑdi'no̱hˑso̱ˑnih; da neħ gă̱h niis neh, să̱h sho̱ na̱'yòòˑdaaħ o̱o̱'sasˑno̱h'sisˑaaħ'?
21Neħ gwaa' naeh waˑas'nyehˑdak neh haˑo̱ˑhwa̱ħ' haaˑyaħ'daˑdeħ, otˑha'yă̱ˑo̱nˑdăăk' noˑno̱h'saˑdo'gă̱hˑdiħ.
22Neħˑhuh dih' niˑyòòˑweħ noˑnă̱h' shaħˑdet'hotˑgă̱ˑo̱h heh haˑwe'eˑyo̱'no̱ħ neħ ne saˑo'no̱sˑhaˑaħt naˑgo̱'iˑo̱ˑnyaˑnih' hee' neeħ haˑgo̱'yă̱ˑa̱h'seeh nă̱ˑgă̱ă̱; neħ ne waˑaˑdi'waˑgwĕnˑniˑyòs noˑya'do̱sˑhăˑdoˑgă̱h'diħ, neħ kuh noˑwă̱ă̱ˑna̱ħ nosˑnyeħ'o̱h ne Jeˑsus.
23Da neħ' dih noˑnă̱h' Jeˑruˑsaˑlem heˑeħs', he'o̱ˑweh dwaˑdek'hweˑoˑo̱h ne Passˑoˑver, gotˑgaħ'deħ waˑaˑdii'waˑgwĕnˑniˑyòs' heˑniˑoh'să̱ˑnoħ'dă̱ă̱, noˑnă̱h' waˑă̱'no̱ntˑgaaˑtòh' heˑniˑoˑiˑoħ'dasˑhă'năˑăˑgwat waˑaˑdyòħ'daat.
24Neħ gwa' ne tă̱ħˑă̱h deˑaˑgo̱ˑyo'dahˑsaħˑseeħ ne Jeˑsus, neħ gaˑi'o̱ˑnih' heˑgaˑgweeˑgo̱h' he'aˑyă̱nˑdeeˑih' no̱o̱ˑgweh,
25Tă̱ħˑă̱h kuh daħˑdeˑo'do̱ˑă̱nˑjo'nisˑo̱o̱ħ neh' so̱o̱ˑgaaħ aˑoˑwa̱'iˑwaˑgwa'ihˑsaħs' haaˑdi'yaħ'daˑdeħ no̱o̱'gweh; neħ să̱ħˑă̱h' naˑeh noˑno̱h'do̱ħ ne' naħˑot' iˑwaat haaˑyaħ'daˑdeħ' no̱o̱ˑgweh.
ที่ได้เลือกล่าสุด:
John 2: SEE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Gospels published by the American Bible Society in 1872, Psalms in 1892.
