Luke 24
24
Kapu ita haroka
1Hepetoma ve oropa hare, mea vitovito hoa, ere overa karikipe la muo veveke muramura eharu kapu ita ve aiauvahaeape. 2Ere okiape ve la have overa avaruraila eavape. 3Ere kapu ve arahavi Iesu ve maea au eavaila. 4Iapaila, ere ikihorahora ila pearoape la hoa, pura mekaka ila haela orahokaila ereve oropa ve epavape. 5Ere oaoka lei oropape mea ve ekaopape la hoa, la haela orahokaila erero maeaeape, Ehovealeve e va ovokake haela apihaeape haela ve ita la haroparo ha? 6Are maia va ka, are le urou. E va ikikekelaila, are Galilee apeape la hoa are ero maeaeape oharo maria: 7Haela ve Akore ere mai heahaha haela avarakilai: ere arero satauro ve harilai kai hare 3 hoa are uroukilai. 8Ere areve oharo iki le kelavape. 9Ere kapu ita hakurepai hoahuka ma eharu oaria kilea haela i haela oaria ila hareho maeaeape. 10Ere va Mary Magdalene i Joanna i Mary James ve lou, ere i hareho auvahaeape la uavila oaria aposetolo haela kara maeaeape. 11Aka ereve ikikekela ma oharo naoaenaoae. Ere la oharo au iapaila. 12Aka Peter urai kapu ita ve leia vivilape. Are ekaopi ure ve ovohae eavi, maea hahape la pura hiki eaeavila eavape. Are elare ita hoai ikihorahora eapapo leipe, ehovea la eharu oaria.
Iesu Emmaus okiharo hihika leipe
13Iapaila, la hare kara ereve haela orahokaila karikara rare Emmaeus ve hahi ve aupe. La karikara aiai Jerusalem 7 mile hovea. 14Erealila auvahaeape la hoa erealila au leivahaeape la eharu oaria v'ila oharo hukavape. 15Iapaila, erealila elare oharo hukavi velavela leivahaeape la hoa, Iesu havahu iki ere i hareho auvahaeape. 16Aka erealila arero ore au leila, ehovea erealilave ovohae oro‐oro leivahaeape. 17Are erealilara velavela leipe, Evalila okiharo ve leari oharo la hukavaro ha? Erealila aupavi oropape ikihuru leivahaeape. 18Haela ae va rare Cleopas arero kavale maeape, A hiki Jerusalem ma hoa ve la leivahaeaila eharu oaria haveva ila aeavila ha? 19Are erealilara maeape, Le eharu? Erealila arero maeape, Iesu Keriso ve la eharu oaria. Are va peroveta haela, horova i ape oharo ila Aualari i haela oaria ila oropa ve mekaka iele. 20Oharo haela i elave akea haela ila arero harive i avarape, arero kai satauro ve le hape. 21Elave ikikekela Israel ve lei makukuriki haela are la. Kaire, oharo aeka ma — la horova leipe ikiki mahau ve hare 3 la. 22Aeva ma, ela va horahora eapapo la leivahaeaila, ehovea elave uavila uku vevelare havahu kapu ita la eavi areve maea va karia. 23Ere iki elaro mari lakimaeaila, ere va angel la eavi aneru erero ma lamaeaila are va ovokake i aeavila. 24Elave haela uku kara kapu ita auvahaeai uavila lamaeaila hoveahovea laeavila, ere kai arero au eavaila. 25Are erealilara maeaeape, E va ikihaveva. E va haiapo iele peroveta haela oaria avahaeape la oharo e auhohi kelava va ka ha? 26Keriso va kakare va koaraila elare haharika veveke iele aire avakilai, hovea va ka ha? 27Are ai Moses ve hoa aiai peroveta haela oaria ve hoa are v'ila la oharo oaria erealila v'ila hihika kileavahaeape.
28Ere auvahaeai karikara pekahavape la hoa are iki erealilara haitapakive. 29Aka erealila arero here leipe maria, Ela i hareho apeaki: ehovea hailaea hoa ma, hare kari le lai. Are erealilara koarai uvi pekape ehovea leia aeakive. 30Iapaila, ere hareho eapai lape la hoa are pai kaivi lei morapaeai haivaelai erealilara le avarape. 31Erealila ovohae ovava lei arero ore le leipe, are elavelave le havoavape. 32Erealila elare oharo mari hukavape, O iele, elare okiharo ve ela i hareho oharo hukavape kai buka oharo elaro hihika kileavahaeape la hoa elavaila ve iki ahea au koaraila ha? 33Erealila va elavelave urai Jerusalem kai pekahavape. Leia erealila haela 11 i ere i hareho korukaiavahaeape la haela oaria eavi erero mari maeaeape, 34O iele havahu, Amua overa urai kai Simon ve oropa ve hihika laleila. 35Erealila okiharo ve leivahaeape la eharu oaria la maeaeape, erealila arero pai haivaelaila eavi ore leipe la oharo kara.
Iesu kilea haela oaria oropa ve hihika leipe
36Erealila ma oharo maeai Iesu ereve aru hihi ve epavi maria maeaeape, E va havila ila apeaki. 37Aka ere oaria oaoka eapapo i horahora leivahaeape, ehovea ereve ikikekela ere ovehahu la eavape. 38Are erero maeaeape, E va iki heraho ehovealeve ha? E va ikihorahora leve leiro ha? 39Arave loa i mai ila eavaila — ma va ara havahu — araro mai pae eavaila, ehovea ovehahu va arave ma aivau i uki ila hovea ka. 40Are ma oharo avi areve mai i loa ila erero aioeape. 41Ere va ikiveveke i mekari au kelavaila la hoa, are erero maeaeape, Eve ita eapai perehekai aeave ha? 42Ere arero au kararukape ekaka uku avarape. 43Are erero kaivi ereve oropa ve le lape.
44Are va erero maeaeape, Ara e i hareho apeape la hoa ara ero maria maeaeape — eharu oaria Moses i peroveta i psalm buka ara v'ila haeape la eharu oaria iele horeavakilai. 45Are ereve iki hapai buka oharo ve iele erero kileavahaeape. 46Are erero maeaeape, Overa mari hape — Keriso kakare lei api kai hare three uroukilai. 47Aeva ikihelariki oharo i mai heaha ve hapururukaki oharo vilaipipi oaria ve areve rare ve iroro oharo iapakilai — Jerusalem oropa la. 48E va ma eharu ve vavavaki haela. 49Iapai — ara arave Oa ve okoare e v'ila paraeakive. Aka e karikara hiki apeapea akea ve la aheke kihoai ero aeravahaeakilai.
Iesu Kaia ve pekape hoa
50Are erero kari ai Bethany maeamaea. Are elare mai urapai erero lei momorapupe. 51Iapai — are erero lei momorapupe la hoa are erero haitapai kaia ve la pekape. 52Ere arero morapaeai helari ai Jerusalem ikiveveke eapapo ila pekahavape. 53Ere va hare oaria Hehe Uvi ve Aualari morapuroape.
ที่ได้เลือกล่าสุด:
Luke 24: ORO
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Published by the British and Foreign Bible Society 1963-1972
