John 4
4
Iesu i Samaria uamari ila
1Amua ore lei Pharisee haela iapape Iesu haela oaria kileavahaeai bapatiso leivahaeape, John va oaria ka. 2(Aka Iesu havahu bapatiso horova au leila, areve kilea haela hiki leivahaeape.) 3Are Judea harepai Galilee aupe. 4Areve aupe okiharo Samaria ve. 5Are Samaria karikara ae va ekepe, rare Sychar, Jacob areve akore Joseph avarape la kekele maea maea ve — Jacob ve ma koru leia vea. 6Iesu hahi heaikiapo ve maea kakare lei ma karu poe ve haiavape — la hare hare hihi hovea.
7Samaria uamari ekepe ehovea ma hivakive. Iesu arero maeape, Araro hela ma perehekai avikiara, ara larive. 8Ehovea areve kilea haela karikara eapai ilaea leikive loape. 9Samaria uamari arero maeape, Ehovealeve a va Jew haela araro ma v'ila velavela leive, ara va Samaria uamari. (Ehovea Jew haela i Samaria haela ila hareho apavara hovea leivahaea va ka.) 10Iesu arero kavale maeape, A va Aualari ve meru iele, aeva aro lari ma ve velavela laleila la haela ore va leila, a va arero havahu velavela leikilai — are kara aro ovokake ma le avarakilai. 11Uamari arero maeape, Haelapo, ave ma hivaki eharu karia, ma va karu iele. 12Elave vilali papa Jacob ma ma karu elaro avikiarape, are i akoremari i boromakau oaria ila hareho ma ma lalaroape: A va la haela ve akea ve ha? 13Iesu arero maeape, Ma ma lari haela oaria aeka ma karave koa leivahaeakilai. 14Aka ara avaraki la ma, haela larikilava are ma karave koa lei va ka. Ara arero avaraki la ma areve ureve ma hoho alalaka hovea leikilai, ovokake haiapo avaraki ma va la. 15La uamari arero maeape, Haelapo, la ma araro avikiara, aireaki ara ma karave koa lei va ka, aeka, ara ma oki haiapo ma hivakive heraho lei va ka.
16Iesu arero maeape, Ai ave vila la maeai ekela. 17Uamari kavale maeape, Ara vila karia. Iesu kai arero maeape. Ave oharo iele la, ave vila karia. 18Ehovea a va vilaita 5 ila. A i hareho aeavila la haela kara, are ave vila havahu ka. Ma oharo a va iele laila. 19Uamari arero maeape, Haelapo, ara eavi, a va peroveta haela. 20Elave aualau haela ma kela ve Aualari morapaeape — E kara maria maeaelula morapaeaki ivaiva ita iele va Jerusalem la. 21Iesu arero maeape, Uamari e, arave oharo iapa — hare ae — e va ma kela i Jerusalem ila Oa morapai ivaiva lei va ka. 22E va momorapulula la eharu e haveva. Ela va ore leipe eharu momorapulula, ehovea ovokake Jew haela v'ila kihorerape. 23Aka hoa maia iele, mave kihorerave, momorapulula haela iele ove i iele ila Aualari la momorapukilai, ehovea Oa va laria haela arero morapaeakive haropovahaevila. 24Aualari va Ove: arero momorapulula haela arero ove i iele ila momorapukive heroe. 25Uamari arero maeape, Ara va ore Messiah ekekilai (rare itavape rare va Keriso) Are elave maia kihoreraki la hoa are eharu oaria ela v'ila hihika kileavahaeakilai. 26Iesu arero maeape, Aro oharo la maeavila — ara va area.
27La hoa areve kilea haela ekevahaeape. Ere va horahora leivahaeape ehovea are uamari i oharo hukavape: aka hae laae va au maeaila, A va le la haropave, aka are i oharo hukavavila ehovealeve? 28Laelave uamari hahu hakorepai karikara hoai haela maeaeape, 29Ekeila, haela ae ovohae eavakive; are ara leivahaeape horova oaria araro hihika lakimaeaila. Ma va Keriso iele ha? 30Ere karikara mahokaea ve hoakukai areve leia auvahaeape.
31Ere lari laila areve kilea haela arero maeape, Rabbi — eapai larive? 32Aka are erero maeaeape, Arave larive eapai me aeave, e va haveva. 33Kilea haela elarelare kelavi mari avahaeape, Haela ae areve eapai overa avileikila ha? 34Iesu erero maeaeape, Arave eapai iele ma — araro kiparaeape la haela ve ikivere mai leikive, kai areve horova hovea hovea leikive. 35E mari arula la, Papare 4 aiai wheat hae hovare le leikilai, Iapai, ara ero maeaeaive, Ovohae iupei, oru ovohae eavaila, ere va houhuka iele, hae hovare kara maea iele. 36Hae hovare hoa haerapaki haela kavale avi ovokake haiapo ve hae veveke korukaiaki kavale le avakilai. Laelave puravai velariki haela i hae haerapaki haela ila hareho ikiveveke leivahaeakilai. 37Ma oharo iele havahu, Hae puravai — velariki haela ka lahua, hae haerapaki haela kara lahua. 38Ara ero paparaehape e horova au leila la eharu ve iele haerapakive. Haela ae oropa horova leipe — e va areve horova ve kavale veveke le avi.
39La karikara ve Samaria haela uku areve rare kekelape ehovea la uamari ve oharo, ehovea are mariape ‘Ara overa leivahaeape la eharu oaria are araro hihika kimaeape.’ 40Laelave Samaria haela iki areve leia arero apevelavela leipe — are ereve ita perehekai aeakive. Are leia hare orahokaila aeape. 41Aeva haela oaria kara areve rare kelavape. 42Ere la uamari maeape “Ela iki — kelavalula iele ehovea a v'ila la oharo ka, aka ehovea ela areve oharo iapai ore leipe are va meahaiapo ve lei makukuriki haela.”
Iesu Cana Amua haela ve akore lei makuripe
43Hare orakokaila kari lei are leia harepai Galilee aupe. 44Ehovea Iesu havahu mari vavavape, Peroveta haela elare ita haela morapaea va ka. 45Laelave are ai Galilee leia Galilee haela arero auhohi leipe — ehovea are Jerusalem hurai hoa leipe la horova ere overa eavape — ehovea ere kara hurai ve auvahaeape.
46Are kai Cana Galilee karikara le ekepe — Are overa ma wine hovea koelaripe la ita. Leia amua haela ae ve akore Capernaum maea kakare eapapo koaraila aeaveape. 47Are iapape Iesu Judea harepai Galilee la ekepe — are areve leia hoai velavela leipe — areve akore lei veveke leikive ekekive, ehovea are apaki va maia iele. 48Iesu arero maeape, Eva ihova i horahora leiki horova eavaki aue la leikilava e iki kelava va ka. 49La Amua haela maeape, A hela ekeki, arave akore apaki ave. 50Iesu arero maeape, Elare ita aula ave la akore ovokake leive. 51Are aupe hoa areve horova kiva haela uku arero oki koarai arero maeape — areve akore ovokake le lei. 52Laelave are erero velavela leipe — are veveke le la hoa laleila. Ere arero maeape — Hailaea hare one o'clock hovea areve maea heaha le laparaeaila. 53Laelave la oa are va ore — la hoa havahu Iesu maeape, Ave akore ovokake leive. Are i areve lalava haela ila hareho iki le kelavape. 54Hoa orakohaila ma Iesu Judea hakorepai kihoai Galilee ihova veveke leipe.
ที่ได้เลือกล่าสุด:
John 4: ORO
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Published by the British and Foreign Bible Society 1963-1972
