John 2
2
Cana, vila uva laeape hurae
1Hare 3 karia leilai. Cana Galilee kakikara, ere uva laeaki hurae leivahaeape. Iesu ve lou kara leia hoaupe. 2Ere Iesu i kilea haela ila laeaki hurae ve itavavahaeape. 3Ere wine ikivere leipe la hoa, Iesu ve lou arero maeape, Ereve wine karia. 4Iesu arero maeape, Ara v'ila learia leive ha? Arave hoa are. 5Areve lou — horova haela maeaeape, Are ero maeaeaki la horova, lari leivahaeaki. 6Hahu ehoaha 6 leia apeape, ehovea Iudea haela ve veveroro leiki pupu hovea — Hahu aeva heloekoa iele ma gallon 20 hovea. 7Iesu uvi horova haela maeaeape, Hahu are hihiuka heheloekoavaki. Ere ma hihiukape, hahu heheloe koavape. 8Are erero maeaeape, Au kaitavaila, hurai ve amua ve aiaukive. Ere erero aiaupe. 9Hurai ve amua wine koelaripe la ma maea hovave leipe la hoa (Ere avape maea hovea haveva, aka hihiukape la haela hiki ore) la hurai amua laeaki vila itavape — 10Are kai arero maeape, Hurai leilula haela ve mai maria — ma veveke oropa avarakive — haela va oropa ma oaria larilai, aireaki perehekai veveke la wine avarakive. Aka, a va wine veveke kiva laleila ikiki mahau. 11Ma areve oropa ihova veveke — Iesu Cana Galilee karikara leipe, areve haharika hihika amoeape. Areve kilea haela arero iki kelavape.
12Are va aireaki Capernaum hoaupe. Are areve lou i apavara i kilea haela ila hareho. Ere leia hare haroapo haroapo apeape.
Hehe Uvi lei veveroro leipe hari
13Jew haela ve Passover hurai hoa maea iele; Iesu Jerusalem pekape. 14Are va Hehe Uvi ureve boromakau i mamoe i huva ila ilaea leilula haela eavape — Moni kakavae leilula haela kara leia avai apearoape. 15Are merove peroka hovea hahai haela oaria i boromakau i mamoe ila Hehe Uvi mahokaea ve haruapape: Are kakavae leivahaeroape la haela ve moni oaria hakaitapai ereve haha kara haivarukapape. 16Huva ilaea leivahaeroape la haela are mari maeaeape, Ma eharu aiauila, arave Oa ve uvi ilaea leiki uvi kalailue. 17Areve kilea haela overa hape la buka oharo iki kelavape, Ave la Hehe Uvi ve horova ara ikivere havahu leikilai. 18Laelave Jew haela arero kavale maeape, A va ma eharu leivila iele ve ihova elaro amoeakive, heroe. 19Iesu erero kavale oharo maeaeape, Ma hehe uvi kopararapa, ara va hare ilehoila arero aeka urapakilai. 20Jew haela mari ape, Ma Hehe Uvi kupe hoa hitolo oaria 46 ila. A va hare ilehoila arero learia aeka urapakilai ha? 21Aka are areve maea ve oharo la hehe uvi rare maeape. 22Laelave are api kai uroupe la hoa areve kilea haela ma oharo iki le kelavape. Ere buka ve oharo i Iesu maeaeape la oharo ila iapai kelavape.
23Are Jerusalem Passover hurai ve aeaveape la hoa, haela oaria areve rare iki kelavape, ehovea are leivahaeape la ihova oaria ve. 24Aka Iesu erero iki au kekelaila, ehovea are haela oaria ore overa leipe. 25Aeka are ikivere ka haela ae haela ae v'ila vavavakive: ehovea are havahu haela ve iki ureve la eharu are havahu mea oaria ore.
ที่ได้เลือกล่าสุด:
John 2: ORO
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Published by the British and Foreign Bible Society 1963-1972
