Zaŋ 21
21
Zezu ta' tu rum ne kə sum ta zə rum mə seɗa'a
1Kəki rum, Zezu ta' tu rum ne kə sum ta zə rum kərem wə vun ya mbi Tiberiyadə. Kwa rum gi ndəni na'a: 2Simoŋ Piyer kə Tomas sôwâ wə um ɗe kə «Nyerwa» ɓay Nataniyel swə məni car mbə so Kana nya Galile kə daw Zebede ɓay sum ta zə Zezu məsin hoɓ ɓa kuni hana. 3Simoŋ Piyer la' ne ndaya: «Na də lam mbi.» Handay ɗam vun rumu: «Namba də kə ru ta'a.» Zə rum, handay 'ya ɓay ur ta rawti da, handay lam mbi kə dukri rum hâ bəka, ama handay cu fe kwa məsin mi#Luk 5.5. 4Kəri məni fəta wə dam zu, Zezu mbə car vun dapa ya mbi, ama sum ta zə rum cu we i mum Zezu na mi. 5Kəri rum, Zezu ci vun ndaya: «Daw jiɗ kwa, hi fe keve si su?» Handay ɗam vun rumu: «Cu mi.» 6Mum la' ne ndaya: «I ɗâ ziw də ga' ɓa fun hay' da, ɓay hi də za' keve hana.» Zə rum, handay ɗâ ziw, ɓay handay tum keve dle tu si hâ handay cu gak dlam ziw rum mbə rawti da mi. 7Bə ta zə Zezu məni Zezu bə nə la' ne kə Piyer: «Bârî na!» Kəri məni Simoŋ Piyer mun i Bârî, mum ge mbraw zə mum ke kə tu uray ɓay mum dam ta du mbi. 8Sum ta zə Zezu məsin faŋ mbə day vun dapa kə da. Handay dlam ziw məni nyen kə keve na. Handay ke seŋ kə vun dapa i sa sem kisi. 9Kəri məni handay dam ta nya, handay we ku nyen wə han kə keve njay wa rum kə vun tləpe' fun. 10Zezu la' ne ndaya: «I da' keve məsin wə du keve məni hi ke tum nə mbə kə ndi.» 11Simoŋ Piyer ur ta rawti da, ɓay mum dlam ziw məni nyen kə keve mə rôwâ nə mbə nya kə ndi. Handay in keve rum ɓay za' kis kə guvatl wa hinji'i. Ɓay kə ndi nə daŋ', ziw nə cu ŋgâr mi. 12Zezu la' ne nday: «I mbə ti ye.» Ko swə ɗaw wə du sum ta zə rum cu gak ci vun rumu: «Ha sa su mi?» Zə handay we si: Mum nə Bârî na. 13Zezu jik ta hay' ku. Mum tle vun tləpe' fun ɓay ne nday, ɓay ndəna' ta' mum ne nday keve. 14Mum nə sem hinji' rum məni Zezu ta' tu rum ne kə sum ta zə rum daka ri məni Ifray par num mbə mara.
Zezu kə Piyer
15Kəki məni handay ti kwati, Zezu ci vun Piyer: «Simoŋ, vay Zaŋ, ha wə man bə pâ məni sôwâ məni kuni wə man bə nə si su?» Mum ɗam vun rumu: «Awo, Bârî, ha we si na wə wû ba.» Zezu la' ne numu: «A ur daw cime mana.» 16Mum faŋ ci vun rum sem hoɓ rumu: «Simoŋ, vay Zaŋ, ha bə nan si su?» Mum ɗam vun rumu: «Awo, Bârî, ha we si na wə wû ba.» Zezu la' ne numu: «A ji cime mana.» 17Mum faŋ ci vun rum sem hinji' rumu: «Simoŋ, vay Zaŋ, ha bə nan si su?» Piyer faŋ ɗik dan juk zə Zezu ci vun rum sem hinji'i: «Ha wə man bə su?» Ɓay mum ɗam vun rumu: «Bârî, ha we kwa daŋ', ha we si na wə wû ba!» Zezu la' ne numu: «A ur cime mana. 18Kəzin', kəri məni ha vay jiɗ ɓo, ha ge mbraw kə tu ru, ɓay ha gaŋ wə ri daŋ' məni ha wə wa'a. Ama kəri məni ha də faŋ kəsa', ha də hom ɓa ɓay də ar tu ru ne kə swə məsin kədan mum ge mbraw wû ne, ɓay mum də kə ru wə ri məni ha cu wa' də han mi.» 19Kə dan rum, Zezu ta' mar məni Piyer wə də mar, ɓay də gi mbra' ne kə Ifraya. Kəki rum, Zezu la' ne numu: «A ta zə rini.»
Zezu kə bə ta zə rum məni mum ba
20Piyer faŋ i ɓay we bə ta zə Zezu məni Zezu bə nə kəki nday, mum nə swə məni gun vun ta hay' Zezu kəri məni handay ke ti kwati, ɓay ci vun rumu: «Bârî, sa nə swə məni wə də wû ar də ɓa sôwâ nə su#Zaŋ 13.25?» 21Kəri məni Piyer we num, mum ci vun Zezu: «Bârî, mi nə də gi wa swə məni nə su?» 22Zezu ɗam vun rumu: «Na la' wa' i nə ke kə i hâ na də faŋ gewa si, dan rum tap nu ma su? Mə ha, a ta zə rini.» 23Zə rum, dan rum pla' ndap wə du sôwâ məni wə ta zə Zezu i bə ta zə Zezu nə cu də mar mi. Ama Zezu cu in ne kə Piyer i mum cu də mar mi mi, ama mum in ne numu: «Na la' wa' i nə ke kə i hâ na də faŋ gewa si, dan rum tap nu ma su?»
24Bə ta zə Zezu məni nə, mum kə məni in dan wa kwa rum, ɓay wây' dan rum wə ɗerwa, ɓay namba we si dan məni mum in nə kəzini.
Ndo' vun dan rumu
25Zezu gi sin məsin juku: Sôwâ la' wây' dan sin rum kə buwa kə buwa daŋ' si, na ɗik i wa nya kə mbri rum daŋ', ri njay ɗerwa rum cu gak ke han mi.
ที่ได้เลือกล่าสุด:
Zaŋ 21: KMN
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Le Nouveau Testament et Psaumes en Peve © Alliance Biblique du Tchad, 2014.
