Sini 1
1
Zezu kawvun kə sum sin kədan mum nday ne Simbeɗ mə Kəleŋe
1Teyofil, wə du ɗerwa man mə vun kofo, na wây' dan kwa daŋ' məni Zezu gi ɓay ta' daka təŋ zu sin um#Luk 1.1-4 , 2hâ day bəka məni Ifray tle num ta wafraya. Kəri məni Ifray cu tle num ta wafray məto', mum ta' kwa kə gbəgboŋ Simbeɗ mə Kəleŋ ne kə sum sin məni mum da' ndaya. 3Kəki mar um, mum ta' tu rum ne nday kə vari cem cem kədan handay we i mum kəta' kə i kəki boni məni mum ce. Wə du bəka gufəɗi', mum mbə du nday ɓay in dan wa dan vari məni Ifray wə də suk jwə wa sôwâ um ne ndaya. 4Fəta məsin, kəri məni mum ɓa ri mə ɗaw kə nday, mum in dan məni nə ne ndaya: «I ar so Jeruzalem mi, ama i ji kwa məni Ba man kawvun wa rum kədan mum mi ne, kwane məni na in dan wa rum ne ni ɓa' si#Luk 24.49. 5Zə Zaŋ gi baptem ne kə sôwâ kə mbi, ama kofo bəka cep, hi də fe baptem kə Simbeɗ mə Kəleŋe#Mat 3.11; Mak 1.8; Luk 3.16; Zaŋ 1.33.»
Ifray tle Zezu ta wafraya
6Kəri məni sum sin ɓa kə Zezu, handay ci vun rumu: «Bârî, ha də ne gbəgboŋ jwə ne kə sôwâ Israyel mgbaŋ ni kərem su?» 7Zezu ɗam vun ndaya: «Cu tap ni kədan hi we ri məni wə də mbə, ko bəka rum mi, zə Ba man kə məni par bəka rum kə gbəgboŋ umu. 8Ama hi də fe gbəgboŋ kəri məni Simbeɗ mə Kəleŋ də dam mbə wa ri, ɓay hi də faŋ sum in njeŋ dan wa rin wə so Jeruzalem, kə nya Zude kə Samari, ɓay hâ vun ndo' nya.» 9Kəki məni Zezu in dan rum, mum ur ta wafray, kəri məni handay wə um kar, dləmbur mbə kəmbo' num i ndaya#Mak 16.19; Luk 24.50-51. 10Kəri məni handay wə kar ri də wafray wə ri məni Zezu pâ han, kəkor sar, sôwâ hoɓ ge mbraw mə ɓu mbə gay' həre' kə nday 11ɓay ci vun ndaya: «Hi sôwâ nya Galile, zə mi hi gay' kar ri də wafray su? Zezu, məni ur ta wafray, mum də faŋ gewa mbə ce' ndə məni hi we num 'ya də wafray ta'a.»
Daw sin par swə məsin tan Zudas
12Kəri rum, sum sin dam mbə wa igway' mə ɗe kə "igway' gu olivə" ɓay handay faŋ ta so Jeruzalem. Ri rum seŋ i ta mə fəta pemâya. 13Kəri məni handay mbə day so Jeruzalem, handay ur cok ta rawti tak i so mə fray, wə ri məni handay wə gay' han ɓa'a. Sôwâ rum ni na: Piyer, Zaŋ, Zakə, Andre, Filip, Tomas, Bartelemi, Matiye, Zakə mə vay Alfe, Simoŋ, swə mə nyen peɗ kə sây' zə nya um, kə Zudə mə vay Zakə. 14Handay daŋ' wə ɓa ri mə ɗaw bəka daŋ' kədan handay in dan kə Ifray wanji kə Mari mə ya Zezu, kə rawkwa məsin ɓay daw ya Zezu ɓa kuni han ta'a.
15Fəta məsin, kəri məni sôwâ məni ve Kris ɓa wə han, raw nday ke i kis kə guhoɓ, Piyer car fray du nday ɓay la' ne ndaya: 16«Daw ba man, say dan məni Simbeɗ mə Kəleŋ pla' David kədan mum wây' cop wə du ɗerwa um wa Yudas, swə məni ta' vari ne kə sôwâ məni kaw Zezu nə gi. 17Zudas ke du mba ɓay gi sin kə mba ta'a.»
18Zudas coɓ sine kə səlay məni mum fe zə sin mə bro' məni mum gi. Mum faŋ nde kap wa ta nya du sine rumu. Rawti rum kə daw rawti njul' ta rəka. 19Sôwâ məni gay' wə so Jeruzalem daŋ' mun dan kwa məni gi. Zə rum, handay ɗe sine rum kə vun nday «Hakeldama», məni wa' dan in kə vun mba «sine vəswa».
20Zə David wây' dan məni nə wə du ɗerwa Nyeme:
So um nə də faŋ vri,
swə ɗaw nə suk han mi.
Ɓay mum wây' wə ri məsini:
Swə məsin nə faŋ bə ji zə sin umu.
21-22«Zə rum, say swə məsin nə ɓa kə mba ce' ndə swə mə in njeŋ dan wa pâ mbə mar Zezu. Say bə rum nə ke swə ɗaw mə du sôwâ məni ke gaŋ kə mba kə ri daŋ' məni Bârî Zezu ke gaŋ wa nya kə mba, daka kəri məni Zaŋ gi baptem wa rum, hâ day bəka məni Ifray tle num du mba ta wafraya.» 23Zə rum, handay ra' sôwâ hoɓ njaya: Zozef mə ɗe kə Barsabas. Sôwâ um ɗe kə Zustus ta', ɓay Matiyas. 24Handay faŋ in dan kə Ifray kə dan məni na: «Bârî, ha we vunduk sôwâ daŋ', a ta' swə məni ha par wə du sôwâ mə hoɓ mə ni kuni 25kədan mum suk tan Yudas ce' ndə vay sin ne mba, zə Yudas ar sin rum ɓay mum ta ri mə mumu.» 26Handay faŋ pe za du nday kədan handay par swə ɗaw, handay par za Matiyas ɓay handay faŋ in num ta du sum sin mə guɓ wa ɗawa.
ที่ได้เลือกล่าสุด:
Sini 1: KMN
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Le Nouveau Testament et Psaumes en Peve © Alliance Biblique du Tchad, 2014.
