Matie 6

Zozii paa sä wa 'nyɛmʋ lä ŋäzönyɔ nä

1A kä ‑nʋ nä, a luë! Anyɩa' ‑Laagɔ‑lebhee 'mnö nä, a 'nä tlaa ‑lä a yëku nyɩkpa! A kä tään nynä nyɩkpa 'kanyɩ 'kʋ wloo nä, a 'Bäɔ ‑ɔ ‑kʋ lä ‑mɔɔ ‑Laagɔɔ' nä, ɔ nö'anyɩ lä bɔɔ 'pä. 2Nä, ‑n gä ŋäzönyɔ lʋʋ 'nyɛ nä, ‑naa tään lä nynä nyɩkpa 'kä 'fɩa 'sɔɔ yibhë. 'Kʋ wloowloogbɩɩ' nʋnyʋa, sɔɔ wa nʋ lä ‑mɔɔ Laagɔ‑bhitii 'mnö. Sɔɔ wa nʋ lä 'sɩɩ ‑mɔɔ 'tli 'kʋ. Kä wa nʋ lä sɔɔ ‑yä nyɩkpa 'kwa 'yikʋ 'ŋʋʋ ‑yä wa 'kwa 'ŋnu fään. ‑Nʋawlɛɛ', n sonö'anyɩ nynä ‑mä, bɔɔpälɩɩ wa tään lä nä, wa yɩ wɛzä 'ni. 3‑Mä ‑mɔɔ nä, ‑naa lüüklä‑sɔɔ kä ŋäzönyɔ nyɛɛ‑ nä, ‑naa mëëcü‑sɔɔ' yibhë ‑lä 'sɔɔ. 4‑Lʋʋ ‑n nyɛ lä ŋäzönyɔ nä, ʋʋ' wälɩ zizio 'kʋ, ‑mä ‑n 'Bä Laagɔɔ‑ ni lä zizioda 'yi nä, ɔ yi‑i bɔɔ 'pä.

Bhibhielɩɩ' yëkuu' wälɩ

5A kä bhibhie nä, a 'nä nʋ ‑lä nynä 'kʋ wloo wloogbɩɩ' nʋnyʋa! Wamä nä, wa ‑waa ‑mɔɔ Laagɔ‑bhutuu 'mnö 'kʋ 'nynigodää' bhibhielɩɩ. 'Nɩ wa ‑waa 'sɩɩ 'tlii 'kʋʋ bhibhielɩ ‑yä nyɩkpa 'kwa 'yikʋ 'ŋʋʋ. ‑Nʋawlɛɛ', n sonö'anyɩ nynä ‑mä, bɔɔpälɩɩ wa tään bhlä nä, wa yɩɩ wɛzä 'ni. 6‑Mä ‑mɔɔ nä, ‑n gä cii nynä ‑n gä bhibhie nä, ‑bhutuklëa ‑n pu lä 'mnö nä, n pla 'mnö, ɩyä n tʋʋ ‑n yëku 'yi, ɩyä ‑n bhibhie ‑n 'Bä Laagɔ ‑ɔ ni lä ziziodää 'yi nä. Laagɔ ni‑i 'yi ‑mɔɔ ‑naa ziziodää nä, ʋ yi ‑naa bhibhie 'nu, 'nɩ sä ‑n ylä lä nä, ʋ yi‑i sɔɔ 'nyɛ.

7'Nɩ Zozii yi bʋkʋ ci, ɔ lä a kä bhibhiedä ‑kʋ nä, a 'nä cii ‑lä däbhlo ‑däbhlo nynä nyɩkpaa' lʋä ‑waa ‑wʋ lä Laagɔ ‑yi. Wa bhobho nynä wa kä wälɩ ‑bhutukpä cii‑ nä, ‑lɔɔ Laagɔ 'kä waa' bhibhie 'nu. 8A 'nä nʋ ‑lä wamä 'bhisäkʋ ‑mä 'Bäɔ nä, 'fɩa ‑yä a 'kä bhibhie 'kʋ cie nä, wälɩklëa' ‑laa ‑a känö'anyɩ lä yëkuu nä, ɔ ‑yia wɛzä.

Zozii cɩa ɔɔ' 'kʋgënyʋa bhibhielɩ

(Lukö 11.2‑4)

9A ni sä a 'kä lä bhibhie nä, a ci nynä ‑mä,

‑A 'Bäɔ ‑kʋ lä ‑mɔɔ ‑laagɔɔ' nä,

‑Naa 'ŋnöö kplɔɔ!

10‑Naa 'tɛtɩɩ kwli!

‑Naa pɔlösa nʋɔ ‑yä, sɩ ‑kʋ lä ‑mɔɔ Laagɔduu' nä,

Ɩ kʋ 'sɔɔ ‑mää ‑dʋdʋkʋ!

11‑N 'nyɩ‑anyɩ ‑anyɩa ‑zɩkää' ylʋʋ' lülülʋʋ!

12Ɩyä ‑n cienö‑anyɩ nyenyi,

Sä ‑anyɩ ‑mä 'sɩɩ ‑a cie lä ‑a lünyɩkpa nä!

13‑Naa ‑tanö‑anyɩ ‑lä 'yi ‑a 'gä ‑zɔɔpälɩɩ' bhlüü,

‑Mä ‑n ‑sanyɩ Gbenyenyinyɔɔ nëë'!

[‑Mɔɔ ‑kä lä 'päwaa, ɩyä 'tɛtɩɩ ‑yä 'klʋagba 'kɔɔkɔɔ ‑za!

Ɩ kʋ sɔɔ!]

14A ni, a ka ‑liesɩ cie nä, a 'Bäɔ ‑kʋ lä ‑mɔɔ ‑Laagɔɔ' nä, ɔ yi'anyɩ 'sɩɩ cie. 15‑Mä a 'nö a ‑liesɩ cie nä, gbenyenyii a nʋ lä nä, a 'Bä Laagɔ nö'anyɩmɩ ‑lä 'sɩɩ cie.

Zozii paa sä wa goo lä ‑gbugbe nä

16A kä ‑gbugbe goo nä, a 'nä nyɔnʋä ‑lä 'klʋ nynä ‑wa ‑waa lä 'kʋ wloo wloogbɩɩ nä. ‑Wa nʋ lä 'kʋ wloo wloogbɩɩ nä, wa kä ‑gbugbe goo nä, kä wa nyɔnʋä 'klʋ ‑yä nyɩkpa 'kä sɔɔ yibhë nynä ‑mä ‑gbugbe‑ wa goo. Kä n mʋ'anyɩ yɩ soo ‑kä nynä wa bɔɔpälɩɩ 'fɩɔ wa nii‑ lä. 17‑Mä ‑mɔɔ nä, ‑n gä ‑gbugbe goo nä, n wɔɔ 'klʋ 'nägäsä ‑yä ‑n 'pä ‑daŋwɩɩ, 18nyɩkpaa' kä ‑kä sɔɔ yibhë nynä ‑mä ‑gbugbe‑ ‑n goo. ‑Mä ‑n 'Bä Laagɔɔ 'mɔɔ ‑lä yibhë sɔɔ ‑yä, ɔmɔɔ‑ ni lä ziziodää' wälɩɩ 'fɩɩn 'yi nä, ɔ 'kä‑ä bɔɔ 'pä.

'Ylʋzɔɔ' leylü ‑yä Laagɔduu' leylü

(Lukö 12.33‑34)

19A 'nä guguë ‑lä ‑mää 'ylʋzɔɔ leylü ‑mä, kä gʋgwlɩzälɩ ‑yä ŋnɔ 'sɔ nyimii. 'Nɩ 'ghüghünyʋä 'wäta kplii 'nɩ wa ghlii. 20‑Mä, ‑mɔɔ Laagɔduu', ‑mɔɔ a la 'wlää anyɩa' leylü 'wlu! Gʋgwlɩzälɩ ‑yä ŋnɔ sɔɔ' ‑wʋ ‑mɔɔ ‑kʋ ‑yä ɩ 'kɩ bhusuë. 'Nɩ 'ghüghünyʋää' ‑wʋ 'sɩɩ ‑mɔɔ ‑kʋ ‑yä wa 'kä kpli 'wäta wa 'kɩ ghlü. 21‑Mä dä ‑naa gbʋ‑käälʋʋ ‑kʋ lä nä, ‑lɔɔ ‑naa plɛ kʋ lä 'sɩɩ.

'Yi 'mɛɛ‑ plöö‑ lä 'yɛkɛɛ' 'näpɛ

22A ni nyɩkpɔ nä, ɔɔ' 'yi, ɛmɛɛ‑ plöö‑ lä ɔɔ' 'yɛkɛɛ' 'näpɛ. Nä, ‑naa 'yi kä 'nää sä 'ni nä, kɛ ŋänɩä ‑naa 'yɛkɛɛ 'fɩɩn 'kʋ. 23‑Mä ‑naa 'yi 'nö 'nää sä 'ni nä, kä ‑naa 'yɛkö‑bhëa kʋ 'cucukpää'. Nä, ‑naa 'mnö zëlüü kä 'cucu ‑kä nä, ‑amʋʋ‑ ‑yi ‑mɔɔ sä ‑lɔɔ' 'cucukpa 'kä 'mʋ klää nä!

Laagɔ 'nɩ monii

(Lukö 16.13)

24Nyɩkpɔɔ' ‑lä käänyʋä 'sɔ ‑gänʋlɩ mii. Ɔ yi ‑bhlo zɔbhlɛmä, 'nɩ ɔ yi ‑bhlo wamä. Ɔ ‑yä ‑bhlo 'sɔ yi 'jɛnyɩ, 'nɩ ɔ yi ‑bhlo cɛɛ. Nä, aa' ‑lä mii, 'nɩ a 'kä Laagɔ ‑gä nʋ, 'nɩ a 'kä monii ‑zuzu ‑gä nʋ.

Plɛɛ' beliolɩ

(Lukö 12.22‑31)

25'Ɩzä n sonö'anyɩ lä nynä a 'nä bhʋtʋ ‑lä anyɩa' zëkpëa' ‑za. A 'nä bhʋtʋ ‑lä 'nɩ a 'kä ci nynä ‑mä 'nɩ dä ‑a yi bhä lülülʋʋ ‑sä 'nɩ ‑a yi bhä lüü? A 'nä bhʋtʋ ‑lä 'sɩɩ 'yɛkɛɛ ‑za 'nɩ a 'kä ci nynä‑mä 'nɩ dä ‑a yi bhä 'kotu ‑sä 'nɩ ‑a yi bhä plää? Nyɩkpɔɔ' zëkpë kään gbʋ 'nɩ ‑a zi lülülɩɩ. 'Nɩ nyɩkpɔɔ' 'yɛkɛ kään gbʋ 'nɩ ɛ zi 'kotu. Yio ‑a?

26A wloo yɩɔ ŋɔkʋʋ' nümnüü ‑nä! Ɩɩ' goo ‑wʋ lülülɩɩ, 'nɩ ɩɩ' ‑wʋ 'sɩɩ wolu ‑kä ‑yä ɩ 'kä ‑mɔɔ 'nää klää. ‑Mä sɔɔ ɩ ‑kʋ 'nɩ a 'Bäɔ ‑kʋ lä ‑mɔɔ ‑Laagɔɔ' nä, ɔ nyɩɩ 'nɩ ɩ lü! ‑Bhlɛ anyɩ‑ kään lä gbʋ 'nɩ ‑ɔ zi lä nümnü. 27Anyɩa' lɔɔ ‑sä yi bhä mii 'nɩ ɔɔ' bhʋtʋlɩɩ 'mnö ɔ yi bhä ɔɔ' zëkpëë' 'tänyɩ 'kʋ pään? 28‑Mänɩ ‑ɔnözä 'nɩ a bhʋtʋ bhä 'kwëtii' ‑za? A wloo ‑wʋ saa ‑pitii' 'jaa ‑nä! ‑Pitii' 'kplä ‑wʋ 'kwëti, 'nɩ ɩɩ' bhlä ‑wʋ 'sɩɩ lokwü. 29‑Mä n sonö'anyɩ nynä sä Laagɔ plɩɩ lä 'mʋ nä, 'loyo Salomɔɔ 'titi ‑ɔ ‑kä bhlä gbʋʋsä leylüü nä, ɔɔ' ‑wʋ 'kɔɔkɔ sɔɔ 'kotuu ‑plä. 30'Nɩ ‑pitii nä, Laagɔ plɩɩ ‑zɩkä 'mʋ ‑bhlɛ sɔɔ ɩ ‑kʋ 'nɩ ‑zekü, nyɩkpa yii ‑kosuu' 'pä. Nä, sɩ ‑kʋ bhä 'nɩ anyɩ‑ Laagɔ 'kä bhä sɔɔ tëë? Ka anyɩa' pɔlötɛtɛɛ' ‑wʋ lä 'ghlü! 31A 'nä bhʋtʋ ‑lä nynä 'nɩ dä ‑a yi bhä lülülʋʋ 'nii, 'nɩ ‑a yi bhä lüü? Dä ‑a yi bhä 'nyu 'nii 'nɩ a yi bhä 'mnää? 'Nɩ dä ‑a yi bhä 'kotu ‑sä 'nɩ ‑a yi bhä 'mʋ plää? 32‑Lɔɔ ‑lɩyɩ 'fɩɩn nä, ‑waa ‑wʋ lä Laagɔ ‑yi nä, wamää‑ tänɩ lä. ‑Mä anyɩ nä, a 'Bäɔ ‑kʋ lä ‑mɔɔ ‑Laagɔɔ' nä, ‑lʋʋ ‑ʋnö gbʋʋ‑ bhla'anyɩ lä nä, ɔ ‑yiu. 33Nä, Laagɔɔ' 'Leyiduu yëkuu' wälɩɩ, ɩyä saa‑ gëë‑ lä 'yii nä, sɔɔ a la tään 'fɩa ‑mä, ‑lɩɩ 'fɩɩn‑ ‑nö gbʋʋ‑ bhla'anyɩ lä nä, Laagɔ yi'anyɩmɩ 'nyɛ. 34A 'nä bhʋtʋ ‑lä ‑zeküü' ‑za! ‑Mä ‑zekü 'titi yi ɔ yëku 'kʋ wloo. Ylʋʋ ylʋʋ ‑bhɩä ʋʋ' nyäkälɩ nëë'.

ที่ได้เลือกล่าสุด:

Matie 6: god

เน้นข้อความ

แบ่งปัน

คัดลอก