YOHANES 9
9
I Yesus nukoa tau ko wuta nakawua
1Su tempo ngi Yesus kal᷊al᷊enge, I Sie nakawua tau ko wuta ko mborong bou gandongang. 2Manga tumatuhu I Yesus nukina si Yesus, “Tuang Guru, nakurawe taumata i'i nipahinding ko wuta? Apa ual᷊ingu dosange sisane arako dosa ngi ma yamange?”
3I Yesus nusumimbahi, “I sie nawuta wal᷊inge ual᷊ingu dosange arako dosa ngu ghaghurange, kateho tadeau taumata makawua kawasa ngu Mawu Ruata nuhal᷊i su l᷊al᷊ung u watangenge. 4Pariwe mborong l᷊ou i kite mambeng mukoa hal᷊i I Sie ko nundoi u Ia. Sarung mahuwi dang takoae ko sarang singkatau makapuhal᷊i. 5#Mat. 5:14; Yoh. 8:12Tintal᷊a Ia ene su dunia i'i, ko Ia kasasua ngu dunia.”
6Suapang bou nangul᷊i kere'e I Yesus nanguru su tana, dang nul᷊au ru-Nge e'e dingang u tana. Bou e'e I Sie namuha ngu tana e'e su mata ngu tau e'e. 7Bou e'e nangul᷊i si sie, “Tamaite pamursi pahesiu su kuaghe Siloam.” (Siloam mangal᷊enge ‘Niroi’) kuteu tau e'e natamai nanguhau pahesie. Su tempo i sie nusul᷊e, i sie seng nakawua.
8Manga l᷊ampunge l᷊au manga taumata ko l᷊inau horo nakawua si sie mundando kakindaghi, kaul᷊ie nangul᷊i, “I sie i'i wal᷊ingewe taumata ko hambaki mangkate kakangiang kitang mundo kakindaghi?”
9Pia ko nangul᷊i, “Ore ko mang i sie.” Kateho pia l᷊ai ko nangul᷊i, “Wal᷊inge, i sie kitang masandighi musul᷊ung u tau e'e.”
Kateho tau e'e sisane nangul᷊i, “Ko ia i sie.”
10I sire nangul᷊i si sie, “Kirapa sarang i kau nakawua?”
11I sie nusumimbahi, “Taumata ko arenge I Yesus e'e nukoa l᷊ota singkodo, bou e'e namuha ngu e'e su mataku dang nangul᷊i, ‘Tamaiko pamursi pahesiu su Kuaghe Siloam.’ Bou e'e ia natamai. Dang suapang ia mbuae nanguhau, ia seng nakawua.”
12I sire nukina, su apawe tau e'e?
I sie nusumimbahi, “Ia wugha.”
Tau Farisi nundea l᷊ahe u kal᷊aul᷊e e'e
13-14Silou e'e ko l᷊ou ngu Sabati su tempo ngi Yesus nul᷊au ru-Nge dingang u tana nipukoa tau ko wuta e'e nakawua. Kuteu tau l᷊inau ko wuta e'e niwawa sarang tau Farisi 15I sire mang l᷊ai nukina si sie minsang kirapa sarang i sie nakawua. I sie nusumimbahi, “I Sie namuha ngu l᷊ota su mataku, bou e'e ia nanguhau dang ia turusi nakawua.”
16I sire pirangkatau bou tal᷊oara u tau Farisi e'e nangul᷊i, “Ta mariadi taumata ko nukoa i'i asal᷊ie bou Mawu Ruata, watu'u I Sie ta nangindakang u l᷊ou ngu Sabati.”
Kateho taumata ko wal᷊inge nangul᷊i, “Tumaniewe taumata ko bardosa mukoa ko makal᷊aherang kiri'i?” Bou e'e nariadi purarendehi su tal᷊oara i sire.
17Kuteu manga tau Farisi e'e sau nukina su tau e'e, “Kirapa tumuhu titongu su hal᷊i I Sie ko nukoa si kau nakawua?”
Tau e'e nusumimbahi, “I Sie nabi.”
18Kateho manga pangaha u tau Yahudi e'e ta mangimang himoneu taumata e'e ko mang tingari l᷊inau ko wuta dang su orasi i'i seng nakawua. Ual᷊ingu e'e i sire nukui ghaghurange, 19dang nukina, “Tingari i'i ana u ko angkungu nipahinding ko wuta? Kirapa sarang i sie nakawua orasi i'i?”
20Ghaghurang u tau e'e nusumimbahi, “Tingari i'i ana i kami, dang tingari i sie ko wuta mangki bou gandongang. 21kateho i kami wugha minsang kirapa sarang i sie nakawua orasi i'i. Dang i sai nakakoa si sie nakawua, e'e i kami mang l᷊ai wugha. Pakinate si sie, i sie seng matilang; i sie sisanenge matitong sumimbahi.” 22I ma yamangu tau e'e nangul᷊i kere'e watu'u i sire mataku su manga pangaha u tau Yahudi; watu'u i sire e'e seng singgighili, tadeau taumata ko mangaku ngi Yesus kere Ratu Mananal᷊amati, ta botonge l᷊ai sumu su wal᷊e pukakal᷊iomanengang. 23E'e sabapie i ma yamangu tau e'e nangul᷊i, “I sie seng matilang, pukinate si sie.”
24Bou e'e i sire sau nukui taumata l᷊inau ko wuta e'e, dang nangul᷊i si sie, “Putewate himoneu i kau sarung mangul᷊i ko nuhino. I kami matitong taumata e'e taumata ko bardosa.”
25Tau e'e nusumimbahi, “Apa I Sie bardosa arako ta,” Ia wugha. “Kateho titongku kitang simbau; ndahuwite ia ko wuta, orasi i'i ia seng nakawua.”
26Bou e'e i sire sau nangul᷊i si sie, “Apa nikoa-E si kau? Kirapa I Sie nukoa si kau sarang nakawua?”
27Tau e'e nusumimbahi, “Seng mbuae daku niwuke si kumu, kateho i kumu mandiri mundaringihi. Nakurawe i kumu sau mo mundaringihi? Arako i kumu mo l᷊ai makoa tumatuhu-E?”
28Bou e'e i sire nundohang si sie dingang nangul᷊i, “Ko i kau tumatuhu-E; i kami wal᷊inge! I kami tumatuhu i Musa. 29I kami matitong Mawu Ruata seng mbuae nudidato ngi Musa. Arawe dingang u taumata e'e, i kami wugha minsang bou apa asal᷊i-E.”
30Tau e'e nusumimbahi, “Mang tingari makaherang himoneu i kumu wugha minsang bou apa asal᷊i-E, sumbal᷊i i sie seng nakakoa si sia sarang nakawua. 31I kite matitong Mawu Ruata ta mundaringihi taumata ko bardosa, kateho kitang su taumata ko mo mangadati Mawu Ruata, dang ko mukoa kao-E. 32Mborong bou tita u dunia takoae ko nikaringihi pia taumata ko nakakoa taumata ko wuta mborong bou gandongang nakawua. 33Boko taumata e'e wal᷊inge bou Mawu Ruata, I Sie ta makakoa apa.”
34“Apa? Nisimbahi i sire. I kau ko napene u dosa mangki bou nipahinding, i kau manintiro si kami?” Kuteu nanita bou e'e i sie nilarang sumu su wal᷊e pukakal᷊iomanengang.
Wuta su pangangimang
35I Yesus nakaringihi himoneu i sire seng nundiaga taumata e'e kumbahang sumu su wal᷊e pukakal᷊iomanengang. I sie nundea tau e'e mbuhue nangul᷊i si sie, “Apa i kau mangimang su Ahusi Taumata?”
36Tau e'e nusumimbahi, “Ko i sai I Sie, Tuang? Tul᷊ung ko habari tadeau ia mangimang si Sie.”
37“I kau seng nakawua si Sie,” nisimbahi Yesus. “Ko I Sie su orasi i'i kapudidatonge dingangu.”
38Angkung tau e'e, “Mawu, ia mangimang,” bou e'e i sie nusuba su saruang I Yesus.
39I Yesus nangul᷊i, “Ia nusumongo su dunia i'i tadeau mupal᷊al᷊eng u kal᷊aadili; tadeau taumata ko wuta makawua, dang taumata ko makawua mawuta.”
40Pira ngkatau i sire tau Farisi ko ene su se'e nakaringihi si Yesus nangul᷊i kere'e, bou e'e i sire nukina si Sie, “Apa pandung-U i kami l᷊ai ko wuta?”
41I Yesus nusumimbahi, “Boko i kumu ko wuta, i kumu ta nubardosa. Kateho ual᷊ing i kumu nangul᷊i, ‘I kami makawua’, e'e mangal᷊enge i kumu mborong pia dosa.”
ที่ได้เลือกล่าสุด:
YOHANES 9: PLT
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
