YOHANES 7
7
I Yesus dingang u manga ana u simbau-E
1Bou e'e I Yesus nakoa sarang apang tampa su Galilea. I Sie mandiri makoa sarang Yudea watu'u manga mangangawasa ngu tau Yahudi pai se'e pia pandung mamate si Sie
2 #
Im. 23:34; Sau. 16:13 Su tempo e'e seng masandighi l᷊ou ko l᷊abo putatinaungang L᷊ou ngu Selo Raung. 3Kuteu manga ana u simbau I Yesus nangul᷊i si Sie, “Tintangte tampa i'i dang dakoe tamai sarang Yudea, tadeau manga tumatuhu-U l᷊ai makawua hal᷊i-U. 4Takoae taumata ko mamuni ngu barang ko koatenge, boko i sie mo makoa ko tumeleng. Boko I Kau mo mukoa hal᷊i ko kere'e, mambeng katitonang u kaul᷊i u dunia!” 5(Watu'u manga ana u simbau-E sisane l᷊ai ta mangimang si Sie.)
6I Yesus nudidato si sire, “Mborong wal᷊inge temponge si Sia, arawe si kumu, sintinia tempo kaul᷊ie botonge. 7Dunia i'i ta mariadi mubinsi ngi kumu. Arawe Ia mang seng nipubinsi u dunia, watu'u sintinia Ia mangul᷊i su dunia kakakoae ko dal᷊ai. 8Dakoe i kumu ha tamai sarang sal᷊iwang e'e. Ia ta matamai#7:8: Ia ta natamai: pira mbau wohe horo: Ia tangkeng natamai. watu'u mborong tangkeng temponge si Sia.” 9Kere'e didato Ngi Yesus su manga ana u simbaue, dang I Sie mang nutingkatintang su Galilea.
I Yesus su sal᷊iwang u Selo Raung
10Suapang manga ana u simbau-E nakoa tamai sarang sal᷊iwang e'e, I Yesus maruma-rumasi ta nikatitonang u taumata natamai sisane. 11Su kanandu sal᷊iwang e'e, manga mangangawasa ngu tau Yahudi nundea si Sie dang nukakina, “Ko su apa I Sie?”
12Maul᷊i taumata nanita kapuwawurunge hal᷊i I Sie. Pia ko nangul᷊i: “I Sie taumata ko mapia.” Pia ko l᷊ai nangul᷊i: “Ta I Sie mupakapal᷊iri u taumata maul᷊i.” 13Kateho takoae sarang singkatau ko wahani mudidato mal᷊ahe hal᷊i I Sie watu'u i sire mataku su manga mangangawasa ngu tau Yahudi.
14Su tal᷊oara u sal᷊iwang, I Yesus nusumu su Wal᷊e ngu Mawu, bou e'e nanita nanintiro. 15Apang mangangawasa ngu tau Yahudi mangkate naherang dang nangul᷊i, “Kirapa taumata i'i matitong u kaul᷊i u e'e, sumbal᷊i I Sie ta nusikol᷊a?”
16I Yesus nusumimbahi, “Ko Daku nitintiro i'i wal᷊ingewe tintiro-Ku, kateho tintiro ngi Sie ko nundoi u Ia. 17Taumata ko mo tumuhu kao u Mawu Ruata, sarung matitong minsang tintiro-Ku i'i ko bou Mawu Ruata arako bou Watangeng-Ku sisane. 18Taumata ko manintiro ngu titonge sisane i sie mundea arenge sisane. Arawe taumata ko mundea areng guna ngi Sie ko nundoi I Sie, taumata e'e matul᷊iri, takoae l᷊eo si sie. 19Wal᷊ingewe i Musa seng mbuae nangonggo u manga parenta ngu Mawu Ruata si kumu? Kateho su tal᷊oara i kumu takoae ko nutumuhu apang parenta e'e. Nakurawe i kumu mo mamate si Sia?”
20Taumata maul᷊i e'e nusumimbahi, “I kau mang ko dong! I sai mo mamate si Kau?”
21I Yesus nusumimbahi, “Kitang simbau hal᷊i ko daku nikoa su l᷊ou ngu Sabati, dang i kumu seng naherang. 22#Kar. 17:10; Im. 12:3I Musa nangonggo atorang u sunati – maneng tuhu hinonge asal᷊i u sunati e'e wal᷊inge bo i Musa, kateho bou manga i upung ko mborong suhoro i Musa. Ual᷊ingu e'e su l᷊ou ngu Sabati i kumu l᷊ai manunati taumata. 23#Yoh. 5:9Boko i kumu mukoa tamai e'e tadeau kumbahang l᷊umawang atorang i Musa hal᷊i u sunati, nakurawe i kumu muwawal᷊uang si Sia ual᷊ingu Ia nupakaul᷊e ngu taumata su l᷊ou ngu Sabati? 24Kumbahang muhukung u taumata ual᷊ingu hal᷊i ko ikawua, kateho ko kitang ual᷊ingu kal᷊aadili.”
Apa tingari I Yesus Ratu Mananal᷊amati?
25Bou e'e pia i sire tau Yerusalem pirangkatau nangul᷊i, “Wal᷊ingewe i'i taumata ko kate purariakeng pateng? 26Tuhungete kere kawahaninge I Sie nudidato su tingo ngu hape, dang takoae ko nakapudidato ngu manga apa si Sie! Apa mangangawasa ngi kite arako i sire seng nakatitong ko I Sie i'i Ratu Mananal᷊amati? 27Kateho boko Ratu Mananal᷊amati e'e nusumongo, takoae sarang singkatau matitong ko bou apa asal᷊i-E! Sumbal᷊i i kite matitong bou apa asal᷊i u taumata i'i.”
28Bou e'e, su tempo ngi Yesus mborong kapanintironge su Wal᷊e ngu Mawu, I Sie nudidato mauha, “Inau i kumu matitong ko i sai Ia i'i, dang bou apa asal᷊i-Ku? Ia ta nusumongo bou kao-Ku sisane. Ia niroi I Sie ko pia haki mundoi u Ia, dang I Sie kapangimaneng. Kateho i kumu wugha ngi Sie. 29Ia matitong I Sie, watu'u asal᷊i-Ku bo I Sie, dang I Sie nundoi u Ia.”
30Su tempo e'e i sire mo maname si Yesus, kateho takoae ko wahani muhinggo si Sie, watu'u mborong ta nurating temponge. 31Maul᷊i taumata su tal᷊oara i sire nanita mangimang si Sie dang nangul᷊i, “Boko Ratu Mananal᷊amati e'e masongo apa I Sie makakoa lebe maul᷊i ko makal᷊aherang bou taumata i'i?”
Mundea l᷊al᷊eng maname si Yesus
32I sire tau Farisi nakaringihi kirapa taumata maul᷊i e'e kapuwawurung u hal᷊i I Yesus. Ual᷊ingu e'e, i sire nusingkanaung dingang u manga tumbonang u imam, i sire nuparenta manga pirangkatau mundadiaga Wal᷊e ngu Mawu natamai paname si Yesus. 33I Yesus nangul᷊i su taumata maul᷊i su l᷊al᷊ung u Wal᷊e ngu Mawu, “Kate singkodo l᷊ai temponge Ia mborong dingang i kumu. Bou e'e Ia sarung musul᷊e sarang ko nundoi u Ia. 34I kumu sarung mundea si Sia, kateho i kumu ta makarea si Sia, watu'u i kumu ta makarating u tampa ko Ia ene su se'e.”
35Bou e'e i sire manga mangangawasa ngu tau Yahudi nangul᷊i singkatau dingang ko wal᷊inge, “Taumata i'i mo makoa sarang apa hakiu i kite ta makarea si Sie? Apa I Sie mo matamai sarang manga taumata ngu Yahudi ko su l᷊al᷊al᷊engang ko su tal᷊oara u tau Yunani, dang manintiro si sire tau Yunani? 36Apa pandung-E I Sie nangul᷊i uare i kite sarung mundea si Sie kateho ta makarea si Sie dang i kite ta makarating u tampa ko I Sie ene su se'e?”
Ake ko mangonggo u puwawiahi
37 #
Im. 23:36
Su l᷊ou panginsuenge bou sal᷊iwang e'e, su l᷊ou ko kal᷊abokange, I Yesus nurumarisi su l᷊al᷊ung u Wal᷊e ngu Mawu bou e'e nudidato mauha, “Taumata ko narou maite songo panginung su koa-Ku. 38#Yeh. 47:1; Za. 14:8Bou hal᷊i u taumata ko mangimang si Sia, seng mawawohe su l᷊al᷊ung u Buki Susi: ‘Bou l᷊al᷊ung u naunge sumuwang manga ansehi u ake ko mangonggo u puwawiahi.’ ”#7:38: Manga didato Ngi Yesus su l᷊al᷊ung u manga ayeti 37-38 botonge isaleng: “taumata ko narou kenang songo si Sia, dang taumata ko mangimang si Sia kenangte panginung. Musul᷊ung ko niul᷊i u buki Susi: Bou l᷊al᷊ung u naunge naansehi manga ansehi u ake mangonggo wiahi.” (39I Yesus kapudidato ngu hal᷊i u Roh u Mawu Ruata, ko sarung itarima u apang taumata ko mangimang si Sie. Watu'u su tempo e'e Roh u Mawu Ruata mborong ta nionggo; watu'u I Yesus mborong ta nipakawantughi su l᷊al᷊ung u papate-Nge).
40Maul᷊i taumata nakaringihi apang ko niul᷊i I Yesus, dang su tal᷊oara i sire pia ko nangul᷊i, “Taumata i'i nal᷊ahe ko nabi e'e!”#7:40: Nabi e'e: putuhung 1:21
41Singga nangul᷊i, “I'i Ratu Mananal᷊amati!”
Kateho pia ko l᷊ai nangul᷊i, “Ha, ko l᷊eo u apa Ratu Mananal᷊amati sumongo bou Galilea? 42#2Sam. 7:12; Mi. 5:1Su l᷊al᷊ung u Buki Susi mawawohe himoneu Ratu Mananal᷊amati ko hintou ngi Daud dang sarung sumongo bou Betlehem, bou soa ngi Daud.” 43Panginsuenge manga taumata nanita nurarendehi bou hal᷊i I Yesus. 44Pia ko mo maname si Yesus, kateho takoae sarang singkatau muhinggo si Sie.
Manga mangangawasa ngu tau Yahudi ta mangimang
45Su tempo ngu manga mundadiaga Wal᷊e ngu Mawu ko niroi tamai paname si Yesus seng sau nusul᷊e, manga tumbonang u imam l᷊au manga tau Farisi e'e nukina si Sie, “Nakurawe i kumu ta numbawa si Sie simai sarang i'i?”
46Manga mundadiaga e'e nusumimbahi, “Ha, borong takoae taumata nudidato kere I Sie!”
47“Apa i kumu l᷊ai seng nipakapal᷊iri-E?” angkung i sire tau Farisi e'e. 48“Apa seng pia bou mangangawasa ngi kite arako tau Farisi ko mangimang si Sie? 49Arawe taumata maul᷊i i'i, i sire wugha ngu atorang i Musa, dang maning kirapa l᷊ai i sire seng nianeng.”
50 #
Yoh. 3:1-2
Singkatau bou tal᷊oara i sire tau Farisi e'e ko i Nikodemus ko l᷊inau mbuae nusumongo si Yesus. I Nikodemus nangul᷊i su manga tau Farisi ko wal᷊inge. 51“Tumuhu atorang, singkatau ta botonge ihukung suhoro u parkara e'e raringihang dang kakanoae ipariksang.”
52Sasimbahi sire, “Apa i kau l᷊ai asal᷊ie bou Galilea? Mangkate reake su l᷊al᷊ung u Buki Susi! I kau sarung makabasa himoneu ko takoae nabi asal᷊i#7:52: takoae nabi asal᷊i: simbau wohe horo: nabi e'e ta sarung pia asal᷊i. bou Galilea!”
Tau kowawine ko nikatangka nawuang
[53Bou e'e, apang taumata kaul᷊ie napul᷊e sarang wal᷊e ngi sire.
ที่ได้เลือกล่าสุด:
YOHANES 7: PLT
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
