YOHANES 3
3
I Yesus dingang i Nikodemus
1Pia singkatau tumbonang u agama bou tal᷊oara u tau Farisi arenge i Nikodemus. 2Pia sihuwi i sie nusumongo sarang koa I Yesus dang nangul᷊i, “Tuang Guru i kami matitong I Tuang niroi u Mawu Ruata. Watu'u takoae sarang singkatau ko makakoa ko makal᷊aherang kere ko nikoa I Tuang, boko Mawu Ruata ta mahundingang i sie.”
3I Yesus nusumimbahi, “Pangimangte takoae sarang singkatau ko makoa umati Mawu Ruata, boko i sie ta sau ipahinding.”#3:3: sau ipahinding: arako bou rasie.
4Angkung i Nikodemus si Yesus “Seng tumaniu taumata seng matilang sau ipahinding? Apa botonge i sie sau sumu su kal᷊uwaeng i mamange dang sau ipahinding?”
5I Yesus nusumimbahi, “Mambeng tingari didato-Ku i'i: boko taumata ta sau ipahinding bou ake dingang bou Roh u Mawu Ruata, taumata e'e ta makoa umati Mawu Ruata. 6Taumata ituhu badange nipahinding bou taumata maghurang, arawe ituhu su roh i sie nipahinding bou Roh u Mawu Ruata. 7Ariwe kaherang boko ia mangul᷊i: I kumu kaul᷊ie mambeng sau ipahinding.#3:7: sau ipahinding: arako bou rasie. 8Anging tumiu sarang apa kaoe; i kite makaringihi ruhunge. Arawe i kite wugha bou apa nutumiu dang sarang apa tumiu kere'e l᷊ai taumata ko nipahinding bou Roh u Mawu Ruata.”
9I Nikodemus nukina, “Kirapa hal᷊i e'e botonge mariadi?”
10I Yesus nusumimbahi. “I kau meteri su Israel; tumaniu i kau wugha? 11Pangimangte: i kami kitang mudidato ngu hal᷊i ko nikatitonang i kami, dang i kami mangonggo u kasaksiang u hal᷊i ko seng nikawua ngi kami; kateho i kumu mandiri manarima u kasaksiang i kami. 12I kumu ta mangimang, boko ia muwuke si kumu manga hal᷊i u dunia i'i; Kirapawe i kumu mangimang boko ia muwuke ngu manga hal᷊i u sorga si kumu? 13Takoae sarang singkatau ko seng mbuae naawi su sorga, su l᷊ikuri I Sie ko Ahusi Taumata ko seng nul᷊umintu sarang dunia.
14 #
Rek. 21:9
Musul᷊ung i Musa nundui katoang witu su kau simpoto su tana l᷊inggi. Kere'e l᷊ai Ahusi Taumata mambeng irui, 15tadeau apang taumata ko mangimang si Sie makahombang puwawiahi ko kahingang dang ko kakal.”
16Ual᷊ingu Mawu Ruata kere'e nukumindaghi u taumata su dunia i'i, hakiu I Sie nunggile u Ahus-E mang simbau, tadeau apang taumata ko mangimang si Sie ta mawinasa, kateho makahombang puwawiahi ko kahingang dang ko kakal. 17Watu'u Mawu Ruata nundoho Ahus-E wal᷊inge tadeau puhukung u dunia i'i, kateho tadeau panal᷊amati dunia i'i. 18Taumata ko mangimang si Sie ta ihukung. Arawe taumata ko ta mangimang seng nihukung u Mawu Ruata, watu'u i sie ta mangimang su Ahusi Mawu Ruata ko mang simbau. 19I Sie nituntukang ual᷊ingu hal᷊i i'i: kasasua e'e seng nusumongo su dunia, kateho taumata nangilembo mo u kararundung bou kasasua, watu'u kakanoa i sire ko dal᷊ai. 20Apang taumata ko mukoa ko dal᷊ai, mubinsi u kasasua; i sie mandiri sumongo su kasasua tadeau kumbahang kakanoae ko dal᷊ai e'e ikawua. 21Arawe taumata ko mukoa kao u Mawu Ruata; sumongo sarang kasasua tadeau mal᷊ahe himoneu apang ko nikoae e'e nutumuhu kao u Mawu Ruata.
I Yesus l᷊au i Yohanes Mananahani
22Bou e'e I Yesus l᷊au manga tumatuhu-E natamai sarang Yudea. Pai se'e I Sie natana pira ngkatempo dingang i sire dang nanahani taumata. 23-24#Mat. 14:3; Mrk. 6:17; Luk. 3:19-20Su tempo e'e i Yohanes mborong tangkeng nataho su tutupang. I sie nanahani su Ainon, masandighi u Salim, watu'u pai se'e maul᷊i ake. Manga taumata nusumongo si sie, dang i sie nanahani si sire.
25Pira ngkatau tumatuhu i Yohanes seng nanita nurarendehi dingang u tau Yahudi#3:25 tau Yahudi: pira mbau wohe horo nangul᷊i singkatau tau Yahudi hal᷊i u atorang u kababursi. 26I sire tamai nakoa sarang koa i Yohanes, dang nangul᷊i, “Tuang Guru, apa I Tuang mborong makatinaung taumata ko l᷊inau dingang I Tuang su simbuka ngu sal᷊uhi Yordan e'e, ko nitibo I Tuang kangereng si kami? Orasi i'i i sie l᷊ai nanahani dang apang taumata kaul᷊ie tamai nakoa sarang koa-E!”
27I Yohanes nusumimbahi, “Taumata ta makarea manga apa boko i sie ta onggol᷊ang u Mawu Ruata. 28#Yoh. 1:20I kumu sisane seng nakaringihi si sia nangul᷊i, ‘Ia wal᷊inge Ratu Mananal᷊amati. Ia niroi pangihoro I Sie.’ 29Boroiti e'e ko koa i pardegong. Ghawe ngu pardegong e'e kitang rumarisi manundughi l᷊au mundaringihi, dang i sie l᷊umiaghi boko makaringihi tingihi u pardegong. Kere'e l᷊ai ia. Su orasi i'i ia mal᷊uasi kahingang. 30Ko I Sie mambeng ipangilebe, dang ia seng kaghaghahinge.”
I Sie ko nusumongo bou sorga
31Ko nusumongo bou rasie nangilebe bou kaul᷊ie. Ko nusumongo bou dunia nataho taumata ngu dunia, dang mudidato ngu manga hal᷊i u dunia. I Sie ko nusumongo bou rasie nangilebe bou kaul᷊ie. 32I Sie mudidato ngu apang ko seng nikawua dang nikaringihi-E, kateho takoae sarang singkatau mangimang kasaksiang-E. 33Taumata ko mangimang kasaksiang-E e'e nangaku himoneu Mawu Ruata ko tingari. 34Watu'u taumata ko niroi u Mawu Ruata muhabari apang didato ngu Mawu Ruata, watu'u Roh u Mawu Ruata nasuku nionggo si Sie. 35#Mat. 11:27; Luk. 10:22I Yamang kumindaghi u Ahus-E, dang seng nanarakang kaul᷊i u kawasa si Sie. 36Taumata ko mangimang su Ahusi e'e sarung makahombang puwawiahi ko kahingang dang ko kakal. Arawe taumata ko ta mutumuhu su Ahusi e'e ta makahombang puwawiahi. I sie sarung ihukung u Mawu Ruata sarang kal᷊iwuenge.
ที่ได้เลือกล่าสุด:
YOHANES 3: PLT
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
