Hosea 8
8
PENNOD VIII.
1At dy enau yr udgorn!
Fel eryr, yn erbyn tŷ yr Arglwydd:#8:1 “Eryr,” nôd o gyflymdra. “Tŷ,” nid y deml, ond pobl Israel, a elwid yn dŷ neu deulu Duw. Dyma yr ystyr, fel y dengys y geiriau a ganlynant.
O herwydd torasant fy nghyfammod,#8:1 Gwel pen. 6:7.
Ac yn erbyn fy neddf y troseddasant.
2Arnaf y gwaeddant, “Fy Nuw,
Adwaenwn ni Israel dydi.”
3Bwriodd Israel ymaith ddaioni;#8:3 Sef gwir grefydd.
Y gelyn a’i hymlidia.
4Hwy a deyrnasasant, ond nid trwof fi;
Llywodraethasant, ond nis gwyddwn:#8:4 Felly yr hen gyfieithiadau oll ond y Targum. Nis “gŵyr” Duw y peth nad yw yn ol ei ewyllys. Tan y fath lywodraeth y tröent eu harian a’u haur i wneuthur delwau.
Eu harian a’u haur a wnaethant iddynt eu hun yn
ddelwau.
Am hyny torir hwynt ymaith.
5Bwria ymaith dy lo, Samaria: —
Poethodd fy nigder i’w herbyn;
Pa hyd ni oddefant lanhâd!
6Yn wir o Israel ydyw, ïe efe;#8:6 Sef y llo a wnaethant i’w addoli. Nid o’r cenedloedd, ond o Israel yr oedd: ei ddechreu oedd yn yr anialwch; Ecsod. 32.
Y celfydd a’i gwnaeth ac nid Duw ydyw:
Dïau yn ddarnau y bydd llo Samaria.
7Yn ddïau gwynt a hauant,
Ond y corwynt a fedant:
Corsen ni bydd iddo;#8:7 Sef i’r hyn a hauent.
Gronyn ni ddwg y dywysen;
Ac os dwg, estroniaid a’u llyncant.
8Llyncir Israel;#8:8 Hyny yw, y meddiannau a berthynent i Israel. “Yn awr,” neu yn fuan: felly ei ystyr yn aml. yn awr byddant yn mysg y cenedloedd,
Fel llestr heb hoffder ynddo:
9Canys hwy — esgynant i Assyria;
Asyn gwyllt yn unig wrtho ei hun y bu Ephraim;
Cyflogasant gariadau.
10Ïe, am y cyflogant yn mysg y cenedloedd,
Yn awr casglaf hwynt, fel eu poener,
Dros ychydig gan faich brenin y tywysogion.#8:10 Cyfeirir yma at eu caethglud: mae eu “casglu” yn dangos hyn. “Brenin y tywysogion” oedd Brenin Assyria.
11Am yr amlhaodd Ephraim allorau er pechu,
Buont iddo allorau fel y pechai.#8:11 Caniatëid iddo y cyfle i bechu: felly y gwna Duw yn aml yn ei ragluniaeth. Pan byddo ewyllys i bechu, rhydd Duw, fel cosb, y rhwyddineb i gyflawni yr ewyllys.
12Ysgrifenais iddo fawrion bethau fy neddf;
Megys peth estronol y cyfrifwyd hwynt.
13Fy aberthau! fy offrymau gwastadol!
Aberthant gig a bwytânt;#8:13 Cyflawnant eu dyledswydd o ran aberthu ac offrymu; ond eu dyben oedd ymborthi ar y cig, a boddloni eu chwant.
Yr Arglwydd nis hoffodd hwynt.
Yn awr y cofia eu hanwiredd,
A gofwya eu pechodau:
Hwy — i’r Aipht y dychwelant.#8:13 Dynoda yr ymadrodd gaethiwed; nid am y byddai iddynt ddychwelyd yn wirioneddol i’r Aipht, gan y dynodir yn pen. 11:7, na chaent ddychwelyd yno, ond myned i Assyria: — “Buoch mewn caethiwed yn yr Aipht, cewch fyned eto i gaethiwed tebyg i’r un y buoch gynt ynddo.”
14Fel yr anghofiodd Israel ei Wneuthurwr,
Ac yr adeiladodd demlau;
Felly Iowda a amlhaodd ddinasoedd caerog:
Ond danfonaf dân i’w ddinasoedd,
Fel y difao ei balasau.
ที่ได้เลือกล่าสุด:
Hosea 8: CJO
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Proffwydi ac Epistolau gan John Owen. Cafodd y testun ei ddigideiddio gan Gymdeithas y Beibl yn 2021.