YUHANA 3

Yesu kũ Nikodɛmuo

1Farisi ke kun kũ òdi pinɛ Nikodɛmu. Yuda gbãnadenɔ domɛ. 2À sù Yesu kĩnaa gwãani à pìnɛ: Rabi, ó dɔ̃ kũ mɔkɔ̃n dannɛri kũ à bò Luda kĩnaa ũ, zaakũ gbɛ̃ke ni fɔ̃ à daboyã kũ ndì kɛnɔ kɛro, sé Luda kú kãao. 3Akũ Yesu pìnɛ: Yãpuran matɛn onnɛ, tó adi kɛ ò ɛ̀ra ò gbɛ̃ ì dɔ baasiro, ani fɔ̃ àgɔ̃ kpata kũ à bò Luda kĩnaa dɔ̃ro.

4Akũ Nikodɛmu Yesu là à pì: Oni gbɛ̃ kũ à zĩ kũ̀ i deramɛɛ? Ani ɛra à gɛ̃ a da nɛ̀sɛɛ gũn de à a i dɔn yá? 5Akũ Yesu wèa à pì: Yãpuran matɛn onnɛ, tó adi kɛ ò gbɛ̃ ì kũ ío kũ Luda Ninio baasiro, ani fɔ̃ à gɛ̃ kpata kũ à bò Luda kĩnaa gũnlo. 6Bisãsiri nɛ́'ina bi mɛ̀ yãmɛ, Luda Nini nɛ́'ina bi nini yãmɛ. 7Ǹsun tó yã kũ ma ònnɛ bo n sarɛro, séde ò ɛra ò á i dɔ. 8Ĩa dì káka gu kũ à yein. Ndì a kĩni ma, ń dɔ̃ gu kũ à bòn ke gu kũ àtɛn gɛ́nlo. Lɛn àdigɔ̃ de lɛ kũ gbɛ̃ kũ Luda Nini a ìio.

9Akũ Nikodɛmu a là à pì: Yã bire ni sí kɛ yá? 10Yesu wèa à pì: Mɔkɔ̃n Isarailanɔ yãdannɛri ina akũ ń abirekũ dɔ̃roo? 11Yãpuran matɛn onnɛ, yã kũ ó dɔ̃n ótɛn o. Yã kũ o èe sèedaan ótɛn kpá, akũ átɛn gí ó yã síi. 12Lákũ ma andunia yã òárɛ nà, akũ a gi síi, tó ma ludambɛ yã òárɛ, áni sí yá? 13Gbɛ̃ke dí gɛ́ ludambɛ yãro, tó adi kɛ Bisãsiri Nɛ́ kũ à bò gwe baasiro. 14Lákũ Musa mlɛ̃̀ɛ sɛ̀ à dɔ̀ musu gbárannan nà, lɛn oni Bisãsiri Nɛ́ sɛ́ ò dɔ musu lɛ, 15de gbɛ̃ kũ àtɛni a náani kɛ gɔ̃ wɛ̃̀ndi kũ àdi lákaro vĩ. 16Zaakũ Luda ye anduniai à kɛ̀ zɔ̃kɔ̃, akũ à a Nɛ́ mɛ̀n do légelege kpà, de gbɛ̃ kũ àtɛni a náani kɛ sún garo, séde àgɔ̃ wɛ̃̀ndi kũ àdi lákaro vĩ. 17Luda dí a Nɛ́ zĩ andunia gũn de à yã vutɛ anduniaa yãinlo, de à andunia sura ba a gãi yãimɛ. 18Yã ni vutɛ a náanikɛriiaro. Yã gĩnakɛ à vùtɛ a náanikɛrisaria kɔ̀, kũ adi Luda Nɛ́ mɛ̀n do légelege pì náani kɛro yãi. 19Pɔ́ kũ à tò yã vùtɛ gbɛ̃nɔaan dí: Gupura sù andunia gũn, akũ gbɛ̃nɔ ye gusirai de gupura pìla, kũ ń yãkɛnanɔn vãni yãi. 20Zaakũ yãvãnikɛri sĩnda pínki dì zã gupurammɛ, àdi su gupura kĩnaaro, de a yãkɛnanɔ sún bo gupuranlo yãi. 21Gbɛ̃ kũ àdi zĩ kɛ yãpuraa, àkũ mɛ́ àdi su gupura kĩnaa, de ògɔ̃ dɔ̃ kũ kunna Luda gũnn à yã pìnɔ kɛ̀n.

Yahaya Da'itɛkɛri Yesu sèedakɛnaa

22Abire gbɛra Yesu gɛ̀ɛ Yudea bùsun kũ a ìbanɔ. À gɔrɔ pla kɛ̀ kũńwo gwe, àtɛn gbɛ̃nɔ da'itɛ kɛ. 23Yahaya tɛn gbɛ̃nɔ da'itɛ kɛ se zaa Ainɔ, Salimu sarɛ, zaakũ í di gwe. Òdigɔ̃ su a kĩnaa, akũ àdi ń da'itɛ kɛ. 24Zaakũ odi Yahaya da kpɛ́siran kɔ̀ro. 25Gɔrɔ birea Yahaya ìba kenɔ nà ledikpakɛnaaa kũ Yuda gbãnade keo gbã̀bona yã musu. 26Akũ ò nà Yahayai ò pì: Rabi, gbɛ̃ kũ à kú kũnwo yã Yoda bara dire, kũ n a yã òwɛrɛ mɛ́ àtɛn gbɛ̃nɔ da'itɛ kɛ tera, baadi tɛn gɛ́ a kĩnaa. 27Yahaya pìńnɛ: Gbɛ̃ke dì fɔ̃ à pɔ́ke le à síro, tó adi kɛ Luda a gbà baasiro. 28Ákɔ̃nɔ mɛ́ á ma sèedadenɔ ũ kũ ma pì makũmɛ Arumasihu ũro. Ma pì Luda ma zĩ mà donɛ arɛmɛ. 29Nɔsɛri mɛ́ à nɔ vĩ. Nɔsɛri gbɛ̃nna sɔ̃ àdigɔ̃ zɛ a sarɛ àdi sã kpá a yãi, nɔsɛri kòtoo dì a pɔ kɛ nna. Lɛn sɔ̃ ma pɔnna kɛ̀ zɔ̃kɔ̃ lɛ. 30Séde àpii gɔ̃ kara makũ sɔ̃ màgɔ̃ lago.

Gbɛ̃ kũ à bò musu

31Gbɛ̃ kũ à bò musu de gbɛ̃ sĩnda pínkila. Gbɛ̃ kũ à bò zĩtɛ bi andunia gbɛ̃mɛ, andunia yãn àdi o. Gbɛ̃ kũ à bò ludambɛ sɔ̃ de gbɛ̃ sĩnda pínkila, 32àdigɔ̃ pɔ́ kũ à è kũ yã kũ à màaoo sèeda kɛ, akũ gbɛ̃ke tɛni a yã síro. 33Gbɛ̃ kũ à a yã sì zɛ̀o kũ Luda bi yãpurademɛ. 34Gbɛ̃ kũ Luda a zĩ̀i pìi dì Luda yã o, zaakũ Luda a Nini kpàa papanamɛ. 35De Luda ye a Nɛ́i, akũ à pɔ́ sĩnda pínki nànɛ a ɔĩ. 36Gbɛ̃ kũ àtɛn Nɛ́ pì náani kɛ wɛ̃̀ndi kũ àdi lákaro vĩ. Gbɛ̃ kũ àtɛn gí a yã mai ni wɛ̃̀ndii pì lero, Luda pɔfɛ̃ kpɛ́ kúamɛ.

ที่ได้เลือกล่าสุด:

YUHANA 3: BB2005

เน้นข้อความ

แบ่งปัน

คัดลอก