NAANAA 31
31
Yakubu bàasina Labãnɛ
1Yakubu yã kũ Labã nɛ́nɔ tɛn o mà kũ ò pì: Yakubu ó de pɔ́nɔ sìa pínki. Ó de aruzɛkɛ gũnn à karanaa lèn. 2Yakubu dɔ̃̀ Labã wɛ́a, kũ a yã kú a nɛ̀sɛn lán yã bà doro. 3Akũ Dikiri pìnɛ: Ǹ ɛra ǹ tá n dizi bùsun n danɛnɔ bɛa, manigɔ̃ kú kũnwo. 4Akũ Yakubu Rahila kũ Leaoo sìsi ò mɔ́ a pɔ́nɔ kĩnaa sɛ̃̀n. 5À pìńnɛ: Ma dɔ̃̀ á de wɛ́a kũ ma yã kú a nɛ̀sɛn lán yã bà doro. Bee kũ abireo ma de Luda kú kũmao. 6Á dɔ̃ á zĩdanɛ kũ ma zĩ kɛ̀ á denɛ ma gbãna lɛ́mmɛ. 7Á de ɔ̃ndɔ̃ kɛ̀mɛnɛ, à ma làadaa lìtɛ gɛ̃̀n kuri, akũ Luda dí tó à yãke kɛ̀mɛnɛro. 8Tó à pì sã bakibakinɔmɛ ma baka ũ, sãnɔ dìgɔ̃ nɛ́ bakibakinɔ i. Tó à pì a wãnzãndenɔmɛ ma baka ũ, sãnɔ dìgɔ̃ nɛ́ wãnzãndenɔ i. 9Luda á de sãnɔ sìa à kpàma.
10Gɔrɔ kũ blènɔ tɛn kpákpa o, ma nana ò, akũ nana gũn ma è blèkofĩni kũ òtɛn kpákpa onɔ bi blè wãnzãndenɔmɛ kũ a bakibakinɔ kũ a totontotonnɔo. 11Akũ Luda Malaikaa pìmɛnɛ nana pìi gũn: Yakubu! Akũ ma wea ma pì: Makũ di! 12À pì: Ǹ wɛ́ sɛ́ ǹ gwa. Blèkofĩni kũ òtɛn kpákpa onɔ pínki blè wãnzãndenɔmɛ kũ a bakibakinɔ kũ a totontotonnɔo, zaakũ ma yã kũ Labã kɛ̀nnɛ è pínki. 13Makũmɛ Luda kũ à bò à sùnyĩ Bɛtɛli ũ, gu kũ n gbɛ̀ɛ pɛ̀tɛn n nísi kùa n lɛ́ kɛ̀ma. Tera sà ǹ futɛ ǹ bo bùsu dín ǹ tá n bùsun. 14Akũ Rahila kũ Leaoo pìnɛ: Ó túbi vĩ ó de bɛa dɔ yá? 15Adi ó ditɛ gbɛ̃ zĩ̀tɔnɔ ũnloo? A ó yíamma, akũ à a ɔgɔ blè pínki. 16Aruzɛkɛ kũ Luda sì ó dea gɔ̃̀ ó pɔ́ ũ pínkimɛ kũ ó nɛ́nɔ. Ǹ yã kũ Luda ònnɛ kɛ pínki sà.
17Akũ Yakubu fùtɛ à a nɛ́nɔ kũ a nɔnɔ dì lakuminɔ kpɛ. 18À a pɔ́kãdenɔ kũ aruzɛkɛ kũ à lè Mɛsɔpɔtamianɔ sɛ̀tɛ pínki, akũ à dà zɛ́n àtɛn tá a de kĩnaa Kanaanɔ bùsun. 19Kũ Labã gɛ̀ɛ a sãnɔ kã zɔ̃zɔ̃, akũ Rahila a tãnanɔ sɛ̀ kpãni a kpɛ. 20Yakubu sɔ̃ à ɔ̃ndɔ̃ kɛ̀ Siria buri Labãnɛ adi lɛ́ zaaro. 21À fùtɛ à bàa lɛ̀ kũ a pɔ́nɔ pínki à bikũ̀ Yuflatia, akũ à mìi pɛ̀ Giliada gusĩsĩdea.
Labã pɛtɛna Yakubui
22A gɔrɔ aakɔ̃de zĩ ò pì Labãnɛ Yakubu bàa lɛ̀. 23À a gbɛ̃nɔ kàkara, akũ à pɛ̀tɛi. À táa ò gɔrɔ suppla, akũ à a lè Giliada gusĩsĩden. 24Akũ Luda bò à sùa gwãani nana gũn à pìnɛ: Ǹ laakari kɛ yã kũ ĩni o Yakubunɛi a mana ke a vãni.
25Labã Yakubu bùra lè katɛna Giliada gusĩsĩden, akũ à bùra kàtɛ gwe kũ a gbɛ̃nɔo se. 26Akũ Labã gɛ̀ɛ à pì Yakubunɛ: Bɔ́yãi n ɔ̃ndɔ̃ kɛ̀mɛnɛ n ma nɛ́nɔ sɛ̀tɛ n ta kũńwo lán zĩ̀zɔnɔ bàa? 27Bɔ́yãi n ɔ̃ndɔ̃ kɛ̀mɛnɛ n woto kpãni ńdi lɛ́ zamaro, de ma gɛ zɛnnɛ kũ pɔnnakɛnaao kũ lɛ̀sinaao kũ gã̀gãao kũ mɔrɔɔo. 28Ńdi tó ma lɛ́ zà ma nɛ́nɔ kũ ma daikorenɔaro. N yɔ̃nkɔyã kɛ̀. 29Ma gbãna kà mà yã vãni kɛárɛ, akũ n de Luda yã òmɛnɛ gwãani à pì mà laakari kɛ yã kũ mani onnɛi a mana ke a vãni. 30Ntɛn tá sà, kũ ntɛni n de bɛ bɛgɛ kɛ yãi. À kɛ̀ dera n ma tãnanɔ sɛ̀ kpãnii? 31Yakubu wèa à pì: Ma vĩna kɛ̀, matɛn da ĩni n nɛ́nɔ símamɛ. 32Gbɛ̃ kũ n n tãnanɔ lè a kĩnaa, ò a dɛ. Ǹ ma pɔ́nɔ gwagwa ó gbɛ̃nɔ wára. Tó n n pɔ́ lè, ǹ sɛ́. Yakubu sɔ̃, à dɔ̃ kũ Rahila Labã pɔ́ sɛ̀ kpãniro. 33Labã gɛ̃̀ Yakubu bizakutan à gɛ̃̀ Lea kutan à gɛ̃̀ nɔgbɛ̃ zĩkɛri mɛ̀n pla pìnɔ kutan, adi pɔ́ke lero. Kũ à bò Lea kutan, à gɛ̃̀ Rahila kutan. 34Rahila tãna pìnɔ sɛ̀ à ùtɛ lakumi gàarii gũmmɛ, akũ à vùtɛa. Labã a kuta gũn gwàgwa pínki, adi pɔ́ke lero. 35Rahila pì a denɛ: Baa, ǹsun pɔ fɛ̃mairo, zaakũ mádi le mà futɛro kũ má ɔ kũna yãi. Lɛmɛ Labã a tãnanɔ wɛ̀tɛ lɛ adi lero. 36Akũ Yakubu pɔ pà à lɛ́fɔtɔ kà Labãi à pì: Bɔ́ dàan ma kɛ̀ɛ? Bɔ́ durunnan ma kɛ̀ akũ n pɛtɛmai wãnawãna lán dí bàa? 37Kũ n ma pɔ́nɔ gwàgwa pínki, n n bɛ pɔ́nɔ lè gwe yá? Ǹ boo gupuraa ma gbɛ̃nɔ kũ n gbɛ̃nɔ wára, ò yã nna kpá gbɛ̃ kũ a yã nnaa. 38Ma kɛ n bɛ wɛ̃̀ baro. N sãnɔ kũ n blènɔ dí nɔ̀ bɔtɛro, mádi n sã ke sóro. 39Mádi sunnɛ kũ pɔ́ kũ nɔ̀bɔ pãsĩnɔ kũ̀ keoro, madì a fĩna bonnɛ ma zĩdamɛ. Ndì pɔ́ kũ ò a kpãni ò gwãani ke fãnantɛ̃ fĩna lama. 40Ifãntɛ̃ dì ma lɛ fãnantɛ̃, ĩa dì ma dɛ gwãani, madì itɛ̃ kɛ. 41Lɛn ma kɛ n bɛa lɛ ari wɛ̃̀ baro. Wɛ̃̀ gɛ̃ro donsari ma zĩ kɛ̀nnɛ n nɛ́nɔgbɛ̃ gbɛ̃nɔn planɔ yãi. Ma wɛ̃̀ suddo kɛ̀ n kpàsa yã musu. N ma làadaa lìtɛ gɛ̃̀n kuri. 42Tó adi kɛ ma dizi Ibrahĩ Luda kũ ma de Isaaku a vĩna vĩ zɛ̀ kũmao baasiro, de n ma gbarɛ ɔkori. Luda zĩ kũ ma kɛ̀ kũ warioo è, akũ à kpã̀kɛ̃nyĩ gĩa gwãani.
43Akũ Labã wè Yakubua: Nɔgbɛ̃ díkĩnanɔ bi ma nɛ́nɔmɛ. Nɛ́ díkĩnanɔ sɔ̃ ma daikorenɔmɛ. Pɔ́kãde díkĩnanɔ sɔ̃ ma pɔ́kãdenɔmɛ. Pɔ́ kũ n è la pínki ma pɔ́mɛ. Bɔ́n mani kɛ ma nɛ́nɔgbɛ̃nɔ kũ nɛ́ kũ ò ìnɔnɛ gbãraa? 44Ǹ tó ò lɛ́dokɔ̃nɔ kɛ àgɔ̃ de sèeda ũ ó dagura. 45Akũ Yakubu gbɛ̀ɛ sɛ̀ à pɛ̀tɛ yã pì dɔngupɔ ũ. 46À pì a gbɛ̃nɔnɛ ò gbɛ̀nɔ sɛ́tɛ, akũ ò sɛ̀tɛ ò dìdikɔ̃a, akũ ò pɔ́ blè a sarɛ. 47Akũ Labã tɔ́ kpà gbɛ̀didikɔ̃anaa pìinɛ Yega Saduta. Yakubu tɔ́ kpànɛ Galɛdi. 48Labã pì: Gbɛ̀didikɔ̃ana díkĩnamɛ sèeda ũ ó dagura gbãra. Abire yãi ò tɔ́ kpànɛ Galɛdi. 49Òdi pi dɔ Mizipa, zaakũ Labã pì: Dikiri ó dãkpã ó kɛ̃kɔ̃anaa gbɛra de òsun zãkɔ̃nlo yãi. 50Tó n wari dɔ̀ ma nɛ́nɔgbɛ̃nɔa ke tó n nɔ pãndenɔ sɛ̀ dɔ, bee tó ó kú kɔ̃ kĩnaaro, ǹgɔ̃ dɔ̃ sãnsãn kũ Ludan ó yã pìi sèedade ũ. 51Akũ Labã pìnɛ dɔ: Ǹ gbɛ̀didikɔ̃ana díkĩna gwa kũ gbɛ̀ kũ ma pɛ̀tɛ ó dagurao. 52Anigɔ̃ de sèeda ũ kũ mani vĩala mà su mà a vãni kɛnnɛro, mɔkɔ̃n sɔ̃ ĩni vĩala ǹ su ǹ a vãni kɛmɛnɛro. 53Ibrahĩ kũ Naoo kũ ń deo Ludamɛ ó yãkpatɛkɛri ũ.
Akũ Yakubu la dà kũ Luda kũ a de Isaaku a vĩna vĩ tɔ́o. 54À sa ò gusĩsĩden gwe, akũ à a gbɛ̃nɔ sìsi ò pɔ́ ble. Kũ ò pɔ́ blè, akũ ò ì gwe. 55Labã fùtɛ kɔnkɔkɔnkɔ, à lɛ́ zà a daikorenɔa kũ a nɛ́nɔ à sa mana òńnɛ, akũ à ɛ̀ra à tà a bɛa.
ที่ได้เลือกล่าสุด:
NAANAA 31: BB2005
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bisã Bible © SIM International, 2005.
