Ima̍tiyu 4

Otu̍tū yī Iji̍sɔ̄ɔsi

(Ima̍aki 1:12-13; Ilu̍uku 4:1-13)

1Bɛ̍ɛ̄nɛ̄, Uhu yī Ɔwɔ bī Iji̍sɔ̄ɔsi pīya ga lipu̍ a̍chi̍ chukuru nīi Ɔngūwɛ̄gā ge̍ē tu̍ ɔ̄ tū. 2Iji̍sɔ̄ɔsi hɔ̄ abɔ̍ɔ otu̍ ohu ɛpa, yɛnɔ ohu ɛpa. Yɛ̄grāa ɔla̍ā wa̍a̍, o̍ i̍ re̍ ɔjɔ̄jā ni̍. Lɛmiyɛ wā ge̍ ya̍ ɔ̄ bɛ̍ɛ̄nɛ̄. 3Ɔngūwɛ̄gā gāa dikpo̍ba̍ ɔ̄ ge̍ da ɔ̍ hīka, “A ge̍ - Ɔyi̍ yī Ɔwɔ, ɔ̍lɔma̍ ka nīi lɛchɔ̄ nūma̍ ge̍ de pīya ojōre̍ we̍ e̍ē!”

4Iji̍sɔ̄ɔsi hīya anu̍ ɔkɔ hīka, “Īpū yī Ɔwɔ ka hīka, ɔ̄chɛ ɔ̍lɔ i̍ ē lɛ ɔhɔ̄leyī bū la ojōre̍ ojōre̍ ke̍e̍ mɛ ni̍. Lɛlā nīi ē bū la oko̍o yī Ɔwɔ ma̍ nīi ɔ̄chɛ ē lɛ ɔhɔ̄leyī la anu̍ a̍nɛ.”

5Ɔngūwɛ̄gā bī ɔ̄ pīya ga Ijɛru̍sālɛm nīi re̍ka Ipwo̍gra Ɔnɛ̄ɛhɛhi ma̍. O̍ bī ɔ̄ ge̍ che la ogō yī u̍nu̍ yī Ɔwɔ hwɛɛ ga ichō. 6O̍ da Iji̍sɔ̄ɔsi hīka, “A ge̍ - Ɔyi̍ yī Ɔwɔ, ɔ̍lɔma̍ wi̍bi bū ma̍ ga ajɛ we̍ e̍ē! Wu̍chē oji̍ nɛ, Īpū yī Ɔwɔ ka hīka, Ɔwɔ ɔ̍lɔ ge̍ē ka ē de ayɛ̍ɛ̄chɛ̄rɔ̄ yī ɔ̍lɔ nīi ɛ̍lɛ ē deyīrɛ aɔ̍lɔ. Ɛ̍lɛ ge̍ē de abɔ̄ ku̍ aɔ̍lɔ ē bī gāa ichō ke̍e̍, hɛ̄ɛbɛ nīi aɔ̍lɔ i̍ ē bī ikpo̍ ge̍ē dra̍ la achɔ̄ ni̍.”

7Iji̍sɔ̄ɔsi da Ɔngūwɛ̄gā bɛ̍ɛ̄nɛ̄ hīka, “Īpū yī Ɔwɔ titi ka hīka ko̍ō! ‘Ādā nīi - Ɔwɔ yī ala̍ ma̍ ala̍ e̍e tu̍ ɔ̄ tū ni̍.’”

8Ɔngūwɛ̄gā gba̍a wā ge̍ bī ɔ̄ pīya bɛ̍ɛ̄nɛ̄ ga ichō yī yɛwu ɔha̍ nīi lichīichō gba̍a̍ ma̍. O̍ chabɔ̄ yī ajɛ yī ɔchwɔ̄lɛ̍ yī yɛchɛ wa̍a̍ hu̍ Iji̍sɔ̄ɔsi. O̍ chabɔ̄ yī rīgā yī wā hu̍ ɔ̄ wa̍a̍. 9O̍ da Iji̍sɔ̄ɔsi bɛ̍ɛ̄nɛ̄ hīka, “A ge̍ pu̍ kpɛ̍ɛ̍, de ūnōowu tū ajɛ ya̍ otūlichō de u, ɔ̍lɔma̍ n ge̍ē de ɛjā nūma̍ wa̍a̍ ē kɔ̄ de wɔ.”

10Iji̍sɔ̄ɔsi da ɔ̍ hīka, “Chi̍i, ku̍ pīya, Isa̍tan! Īpū yī Ɔwɔ ka hīka, ‘Ala̍ ā ya̍ otūlichō yī Ādā nīi - Ɔwɔ yī ala̍ ma̍. Anu̍ lōri̍īnū nīi ala̍ ge̍ē hɔ̍chɛ̍ yī nū a̍nɛ.’ ”

11Bū la ɛbɛ ɔla̍ā Ɔngūwɛ̄gā ku̍ pīya hī Iji̍sɔ̄ɔsi bɛ̍ɛ̄nɛ̄. Ayɛ̍ɛ̄chɛ̄rɔ̄ yī Ɔwɔ gāa ge̍ tū ɔ̄ wɔbɔ̄.

Iji̍sɔ̄ɔsi wu̍tu yī u̍ku̍rɔ̍ yī nū la Iga̍līli

(Ima̍aki 1:14-15; Ilu̍uku 4:14-15)

12Iji̍sɔ̄ɔsi po̍ hīka ɛ̍lɛ de Ijɔ̍ɔn ku̍ tū la igbakɔbɔ mɛ̍ ma̍, o̍ wā ge̍ pīya ga Iga̍līli. 13O̍ i̍ jī hɔ̄ la Ina̍jārɛ̄ɛti ni̍; o̍ pīya ge̍ hɔ̄ la Ikapa̍num. Ipwo̍gra ɔla̍ā hɔ̄ la oko̍o yī Li̍hu yī Iga̍līli, abɔ̍ɔ la ajɛ yī Ijɛ̍būlɔn ba̍la Ina̍fu̍tāli. 14Onūma̍ ya̍ lɛbɛ nīi lɛlā nīi Ayisa̍ya ɔ̄chɛ ɔkɛrɔ̄ yī Ɔwɔ mwɔ̍ɔmu ma̍ ge̍ē de ē pīya ichɛ̄ɛhi. O̍ ka hīka,

15“Ajɛ yī Ijɛ̍būlɔn ba̍la ajɛ yī Ina̍fu̍tāli,

nīi hɔ̄ aa̍ ga wāā yī li̍hu ma̍;

nīi hɔ̄ la oe̍ ɔla̍nū yī Ɔkpa̍ yī Ijɔ̍dan ma̍!

Iga̍līli yī Ɛchɛkɔcha be̍e!

16Āchɛ nīi gblāa la ɛbɛ odobū ma̍,

e̍ ge̍ē ma̍ ɛbɛ ɔlɛgēdēgēdē ɔnɔ̄kɔ̄kū ɔha̍.

Aa̍ ɛla̍ā nīi gblāa la ɛbɛ odobū yī ayekū ɔla̍ā ma̍,

ɛbɛ ɔlɛgēdēgēdē ɔla̍ā ge̍ē fi̍yajɛ ē de wa̍.”

17Bū yɛ̄grāa ɔla̍ā, Iji̍sɔ̄ɔsi kū la ɛrɔ̄ yī nū la ɔkɔ̄kā de āchɛ hīka, “Ala̍ ā pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ yī ala̍ gɛ! Yɛ̄grāa yī Ɔchwɔ̄lɛ̍ Oro̍ōre̍ yī Ɔwɔ de lɛ kurɛkurɛ mɛ̍!”

Iji̍sɔ̄ɔsi Hī Ala̍bagalā Āchɛ Ɛnɛ Ɛra̍

(Ima̍aki 1:16-20; Ilu̍uku 5:1-11)

18Iji̍sɔ̄ɔsi yɛ ē ga la oko̍o yī Li̍hu yī Iga̍līli ma̍, o̍ ma̍ alwɔtɛ̍ yī ɛbɛ̍yēenyi āchɛ ɛpa ɛha̍ nīi - aɛ̍nɛ̍ ma̍. Isa̍yi̍mɔ̄ɔn nīi re̍ka Ipi̍ta ma̍ ba̍la A̍ndru ɔɔ̍nɛ̍ yī nū nɛ. E̍ yɛ ē ta̍ a̍bagalā ku̍ ɛbɛ̍yēenyi abɔ̍ɔ li̍hu. 19Iji̍sɔ̄ɔsi da wa̍ bɛ̍ɛ̄nɛ̄ hīka, “Ala̍ ā pīya wā ba̍la ami; ma̍a n ge̍ē ngū ala̍ nīi ala̍ de ē pīya āchɛ ɔtwɔ̍tɛ̍ yī āchɛ̄ɛchɛ.” 20Ɔpɔ̄ɔpɛ̄ Isa̍yi̍mɔ̄ɔn ba̍la A̍ndru tu̍labɔ̄ hī a̍bagalā yī wā pīya ku Iji̍sɔ̄ɔsi.

21Iji̍sɔ̄ɔsi gba̍a yɛ chi̍i̍ ga iyɔ̄bū ge̍ ma̍ aɛ̍nɛ̍ āchɛ ɛpa ɛha̍. Ije̍mēehi ba̍la Ijɔ̍ɔn nīi - ayi̍ Ijɛ̍bɛ̄di ma̍ nɛ. E̍ tū abɔ̍ɔ la wɔwu̍ ba̍la Ijɛ̍bɛ̄di a̍dā yī wā, yɛ ē gbla̍a a̍bagalā yī wā. Iji̍sɔ̄ɔsi hī wā ɛra̍. 22Ɔpɔ̄ɔpɛ̄, e̍ pīya hī wɔwu̍ ba̍la a̍dā yī wā, gāa ge̍ yɛ ba̍la Iji̍sɔ̄ɔsi.

Iji̍sɔ̄ɔsi tū āchɛ yɛ̄mɛ̄mɛ̄ wɔbɔ̄

(Ilu̍uku 6:17-19)

23Iji̍sɔ̄ɔsi ga i̍ngɔ̍ɔ wa̍a̍ la ajɛ yī Iga̍līli ngū āchɛ lɛlā la u̍nu̍ ogrēeyī yī wā, kā Wɔ̄kā Ɔlwɔnyɛ yī Ɔchwɔ̄lɛ̍ Oro̍ōre̍ yī Ɔwɔ de wa̍. Āchɛ okwi̍īyē ba̍la iyē oko̍ōku̍ ita ɔha̍lɔha̍ wa̍a̍, o̍ de wa̍ nyiya. 24Ohu yī Iji̍sɔ̄ɔsi mīyanya ta̍ ɛbɛbɛ ta̍ wa̍a̍ abɔ̍ɔ la ɔcha yī Isi̍riya. Bū la ɛbɛ ɔla̍ā, āchɛ bī aliyē oko̍ōku̍ ita ɔha̍lɔha̍ wa̍a̍ ba̍la lɛlā olichi̍chi̍ ita ɔha̍lɔha̍ wa̍a̍ nīi hɔ̄ de wa̍ ma̍ ge̍ de ɔ̍. E̍ bī alyapri̍ija, alo̍yi, ba̍la eku̍ku ɛha̍lɛha̍ ji wa̍a̍ ge̍ de ɔ̍. Iji̍sɔ̄ɔsi de wa̍ nyiya i̍ngɔ̍ɔ cha̍cha̍. 25Āchɛ pɛ̍ ku ɔ̍ kpɛ̍ɛ ɛbɛ̍bɛ̍-ɛbɛ̍bɛ̍, bū la Iga̍līli, ba̍la ipwo̍gra Ogblīigwo̍, ba̍la Ijɛru̍sālɛm, ba̍la Ijudi̍ya, ba̍la ajɛ yī oe̍ ɔla̍nū yī Ɔkpa̍ yī Ijɔ̍dan.

ที่ได้เลือกล่าสุด:

Ima̍tiyu 4: YBASR

เน้นข้อความ

แบ่งปัน

คัดลอก