Luka 7
7
Yesu lawaalmoó geeraharusmoó askaári gwaa hungu/uús
(Mt 8:5-13)
1Axweesantós sleémeero dír múk i ooaro ngiwa hhe'eés, iri tláy ay Kapernaumu. 2Lawaalmoó geeraharusmooko askaári i tiiq, i afkwá bohóngw i dirii'. Askaarmoodá' lawaalmoowós kudá' gu ló'wa slaa'. 3Iidíguú Yesu nguwa axaás, bariisér múk Yahudi gari amoorós i ya/aáw, Yesu kuwa firin lawaalmoowós nguwa hungu/uusár ay. 4Inooín tawa dír Yésú i hardáh, kuri ló'wa harhheehhe'eés tari oó', “I hariín heewí adór i kaahi kawa tlehh, 5asma xooroorén ga ló'wa slaa'. Nee inós a kudá' atén taa doó saalíngw i tleehh.”
6Yesu nee inooín tiri koné'. Iwa dír bihhaá dó' i tseewúy, geeraharusmooduú askaári mulqeerós gari amoorós i ya/aáw, kuri báy, “Aáko, ma tawó daawitaar, asma aníng a hariimaaká kuúng tawa baraá dooeé' dat. 7Gawaá adoorihe sleeme ana ár gídaabá a hariimaaká niwa amoorók kaw. Ala /aymu na ooang, lawaalmooeé' i hunguu/. 8Asma aníng sleeme múk i baliít i deer, slám askaárír án ni baliit i deer. Kwí bura báw, ‘Tláw!’ aqo in tláy, nee kwí bura báw, ‘Qwaláng!’ aqo nin hardah. Nee lawaalmooeé' bura báw, ‘Adoorí tleehheek,’ aqo gan tleehh.”
9Yesu tí ngiwa axaás, heedaádá' guri waa/oó/, iri warqáy amór boo/aydá' ngwa eehaar, iri oó', “Án a kah, tam baraá múk Israeliwo haratlintaaór ur ar adór tí aga baloó ariiká.”
10Nee mukdá' taa ya/aáw iwa kií/ amór do', tawa hardáh naxés lawaalmoodá' aa hunguú/.
Yesu garmoó kwaalo'ór Naini gwa waaslee/atís
11Aluudae iri tláy dír gixsarka ta babay Naini. Nee eeharuuseerós tina koné', nee boo/oó úr oo muu. 12Dír dahmuú gixsa kuwa áy, tuuarka kana didí áy, kingi tsee/áy loohiis. Inós a na/oó garma oo wák aayoorose, slám aayoorós a kwaalo'o. Múk yaariír oo baraá gixsa nee inós ti koná'. 13Aako ngiwa ár, gari gurtláy, gari báy, “Ma /aa/amiimaar.” 14Iri tseewúy, xaaiidá' kingir gagarin giri kwatiít, mukdaádá' ga loohiís tari sihhiít. Iri oó', “Gárma, án a kah, kuúng tlawáng.” 15Heedaáduú tuuaa iri tláy, iri iwiít, iri ilawaáts. Guri aayoorós i haniís.
16Muu sleémeero dae guri eér, Mungú kuri xirfayeemiís ta kaahi, “Aarusmoó úr naa ayaarén wa ti'iít,” nee “Mungú naa mukós ba/amisár áy.”
17Tí Yesu aa tleéhh iri xu'utít yaamaá Yudea sleémeerowo, nee baraá yaamu sleémeero awa inslaawaydá'.
Múk Yohana aa ya/aáw
(Mt 11:2-19)
18Eeharuusér Yohana iidíguú kaangwí sleémeero guri amór Yohání húp. Eeharuuseerós ar tsár gari ateét, 19gari ya/aáw amór Yesu, kuwa yaahasi gídaabá, “Kuúng an kudá' hardáha, laqaá heé hatlá' un daamaán?”
20Inooín tawa dirós i hardáh tari oó', “Yohánudá' Baatimaamiís taa amoorók i ya/aáw i kaahi, ‘Kuúng an kudá' hardáha, laqaá heé hatlá' un daamaán?’”
21Nee hamtidár kilae múk yaariír oo tiqtuuse nee oo slahhahhaá' guna hungu/uús, nee oo neetlaame aa eér, nee taampaá yaariir niri qaytsitiyé'. 22Iri oó' dír mukdá' tinda ya/aáw, “Tlawsé', tí taa aandé' nee taa axasé' Yohana ti beere', gídaabá taampu i xumiisiyá', taqooraay i hii'imiit, múk tiqtír tsatmit ku hheehhe'eemiis, múk iawásl i axamiis, tu'u ki waaslee/atimis, nee liitlakuuse ka Ya/abtór hhó' i alki/iit. 23Heé amohhoó' a kudá' insarehhmoó koomaaká daanduueene.”
24Mukdá' Yohana aa ya/aáw iwa tláy, Yesu kángw Yohana guri alki/iít dír boo/ayduú múk i alé iri oó', “Tawa baraá darmuú keeré', maga qaytsuú eeré'? Gár taa qaytsuú eeré' a gitsoóro, tidá' fur'a i dingimis? 25Bar gitsorooká, ala a milá? A heé taa inqwaruú hhohhó' ar tsiitísi? Kuungá' a xuá' gídaabá múk inqwaruú xiríf gu koóm, nee kudá' diihhoár /aáy, ala baré dír i dirii'i a baraá maraá waawitá. 26Ala maga qaytsuú eeré'? Ana aarusmoó artá eerí'i? A ló', án a kah, slám a kudá' úr ta aarusmowo. 27Kwí an kudá' tí kasa gooín,
‘Ga/aaweek, aníng ya/abusmooeé' u ya/aáw geeraawók wa ale,
oo loohirók ga amohhe'eés geeraawoge.’
28Án a kah, baraá múk /ameena naa laqwali, heé úr oo Yohana gu baá/ i kaahh. Ala kudá' niiná baraá waawuti'iimár Munguhe kun úr ta inose.”
29Muu sleémeero nee ohomuusér koódiro adoorí kawa axaás, looeemá Mungú kiri ya/án, asma kiwa baatimiís ar baatiísmoó Yohana. 30Ala múk Farisayo nee intsaahhatuusér hara'ayár Musa sla'aaridár Mungú daanduuine kana sií', asma inooín baatiísmoó Yohana kwa ya/aniká.
31Aako iri oó', “Mukú de'emaaká' slaqsoó ngur qoomees a umós? Nee gár ki slaqamís a milá? 32Nee gár ki slaqamís a na/'aá naa iwiitiye' dír múk yaariír, ti didá' wa ateetiná' ta kaahi,
‘Filimbi ngiwa ufaahhaán, aga neti'iiká,
tawa tsuunqumisaán, aga /aa/i'iiká.’
33Asma Yohánudá' Baatimaamiís niwa hardáh, i mikaátér /ayiiká, tam difaái ga wahahanká, kuungá' a kata', ‘Neetlaame gwaa eér.’ 34Garmoó Hee niwa hardáh, i /ayín nee i wahán, kuungá' a kata', ‘Ga/aawaagáy, hheehhusmoowí nee xuufutusmo, mulqumoó ohomuusér koódi nee tlakuuse.’ 35Ala sagalooár Mungú adór tar ló' kingina laqán nee mukdá' gaa ya/an sleémeero.”
Yesu i dír doó Simonú Farisayo
36Heeko wák oo Farisayo Yesu guna huúw, iwa dír do'ós wa /ayin. Iri dáh baraá doó heedaáduú Farisayo, iri iwiít dír muruú /aymár i alé. 37/Ameenirka wák ar baraá gixsadá' ar tlakuso'o, ngiwa axás gídaabá i dír /aymár i dirii' baraá doó heedaáduú Farisayo, chupiito'ór mooyaangw ar tlaa/anoó miisli ngina húp, 38iri alaá Yesú i sihhít dír ya'aawós, i /aa/amiín. I hhirhheeraá paahhamís gawaá ya'aá Yesu, nee gi se'éngw sagós ar fitsít. I ya'aá Yésú slikiín ar mooyaangw, gi hara ma'amís. 39Heedaáduú Farisayo oo Yesu gwaa dír do'ós i huuw, adoodá' ngiwa ár, ina baraá muunaáwós i oó', “Heewí geera bar aarusmo, /ameenirí gu kwatimiit gaa tsaáhh gídaabá a heemá nee a heé adoomá, asma a tlakuso'o.”
40Yesu iri ilawaáts, iri oó', “Simóni, gár ni kuúng i ooár wa slaa' i deer.”
Iri oó', “Intsaahhatusúmo, ooang.”
41Guri báy, “Heeko wák peésarós kana kiriík nee múk tsár. Oo wák shilíngi tsiire kooán, kuqá' shilíngi mibeeri kooán. 42Inooín sleémeero bu'utuwo kuwa harslaaqaát, tsaraawo giri gurtláy. Baraá mukwí tsare heé inós gu ak slaá' a heemá?”
43Simoni iri oó', “Án ngi slaá' a kudá' taa peésár úr wa gurtláy.”
Guri báy, “Adoosíng taa ó' i ganá'.” 44Iri warqáy amór /ameenidá', Simoni gway báy, “/Ameenirí a ga/eéra? Án nina baraá do'ók i dáh. Kuúng ma'aá ya'aaeé' ngir slawawa/aas ngaa hanisiká, ala /ameenirí ya'aaeé' ngaa hhirhheeriwós i taxamaamís, giri fíts ar se'éngw sagós. 45Án kuúng iga ma'asiká, ala /ameenirí iimír án niwa dáh, ya'aaeé' gina ló'wa ma'amaamís. 46Kuúng sagw'eé' ugwa di/itár slikiká, ala /ameenirí ya'aaeé' gina mooyángw ar slík. 47Gawaá tihe án a kah, sla'aarirós tidaádá' ur gan laqaqaán ar gídaabá tlakweemaawós awa yaariir kaa gurtláy. Ala heé taa tlakweemaá niiná wa gurtláy, sla'aarirós ka niina.”
48/Ameenidá' gari báy, “Tlakweemaawók kaa gurtláy.”
49Mukdá' nee inós taa al iwiit dír muruú /ayma, naxés ta baraá muner'ín i axwees ta kaahi, “Inósuuwí a heemá tam iwa tlakweemaá gurtlatlay?”
50Ala Yesu /ameenidá' gari báy, “Haratlintaaoorók iga ba/amís. Tláw ar wayda.”
ที่ได้เลือกล่าสุด:
Luka 7: IQWNT
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Iraqw New Testament © Bible Society of Tanzania, 1977.
