LUKA 20
20
Nzinya yakwe Yesu ivijwa
(Mat. 21:23-27; Mrk. 11:27-33)
1Igheri msi mmwe aho ekicheja vantu uko he nyumba ya mtaso na kubirikira Mburi Yedi, akafumiwa ni vabaha va vatasi na vaandiki, hamwe na vaghosi; 2vakateta naye vekiti, “Tuvwire, ivyo uvironga kwa nzinya ani, kangi ni ani ekunkie iyo nzinya?” 3Akagharusha, akavati, “Nami nienda kumuvwija unywi kiteto kimwe; nivwirani ki itio: 4‘M’batizo wakwe Yohane, wefumie uko wanga kana ni he vantu?’” 5Vakagharusha venye kwa venye, vekiti, “Kakicha twekiti wefumie uko wanga, eneti, ‘Hanini mwekisamwitikija?’ 6Na twekiti wefumie he vantu, vantu vose venetubigha mabwe, ambu vekoneshe iti Yohane ni mroti.” 7Vakagharusha iti, “Tetumanyije hantu wefuma.” 8Yesu akavati, “Nami sikamuvwire, ni kwa nzinya ani neronga ivyo.”
Mfwanano wa mghunda wa mizabibu
(Mat. 21:33-46; Mrk. 12:1-12)
9Akavoka kuvavwira vantu mfwanano uu, “Mntu mmwe ekihandie mghunda wa mizabibu; akavika vaimi; akatonga akaikaa he isanga lingi igheri ieza. 10Igheri la lufindikia, akatuma mzoro wakwe he vala vaimi, nesa vamunke ntunda kumwe ja mizabibu. Vaimi vakam’bigha vakamngasha mikono mituhu. 11Akatuma wa mzoro ungi. Hata yye vakam’bigha, vakamsonisha, vakamngasha mikono mituhu. 12Akamtuma wa katatu; hata ye vakamvinya, vakamshukuma na uko nze. 13Mzuri wa mghunda wa mizabibu akati, ‘Nikete ze? Ninemtuma mwanangu mkunde wangu, usiche ye venemshimia.’ 14Mira vala vaimi vekiramvona, vakavwirana venye, vekiti, ‘Uu niye m’pali; herikoni tumkome, nesa vupali vuoke vwetu.’ 15Vakamshukuma na uko nze ya mghunda wa mizabibu, vakamkoma. Hamao, mzuri wa nghunda wa mizabibu enevaketaze? 16Eneza na kuvabunta vala vaimi; na ula mghunda wa mizabibu eneuinkija he vangi.” Vekirasikia ivyo vakati, “Hai, visireoka huvo.” 17Akavatunkulila meso, akati, “Kila kiteto cheandikwe kuti:
‘Ibwe ledaiwe ni vajengi,
Ilo laoka ibwe ibaha la he pembe,’ nikwo kuti ze? 18Kila mntu enegwia ilo ibwe, enebekabeka; na ula lenemgwia, linemrughunya rughu.”
Ivwijo la kodi
(Mat. 22:15-22; Mrk. 12:13-17)
19Vaandiki na vabaha va vatasi vakaenda kumgura saa ila ila, vakafoleka vantu, ambu vamanya iti uo mfwanano nivo evateta. 20Vakaoka vemrindija, vakatuma vazighani vekughoshije iti ni vantu va kitea, vamgure kwa viteto vyakwe, nesa vaidime kumgera he nzinya ya mlao. 21Vakamvwija vekiti, “Mcheji, twemanyije iti uteta na kucheja vya kitea, neri tufoleka vubaha vwa mntu, mira ucheja nzia ya Mrungu he idi. 22H’ii, ni chedi tumunke Kaisari kodi kana hai?” 23Mira ye akamanya kiavia chavo, akavati, 24“Nivonyani dinari. Ina fwwani na maandiko akwe ni?” Vakamgharusha, “Ni vya Kaisari.” 25Akavati, “Haya ra, vyakwe Kaisari, munkeni Kaisari; na vyakwe Mrungu, munkeni Mrungu.” 26Neri teveidime kumsitaka kwa viteto vyakwe he vantu; vakakugha vuntu egharushe, vakahuja.
Ivwijo la kuvuka he vefwie
(Mat. 22:23-33; Mrk. 12:18-27)
27Niho Vasadukayo vala veti tehena kuvuka kwa vefwie, kumwe vakamswia, vakamvwija, 28vekiti, “Mcheji, Mose etuandikie iti, mntu ekifwiwa ni kjinawe ena mche, mira esina mwana, am’pale uo mche, amketie mjinawe mbereko. 29Heicho, hekina vandughu mfungate. Wa kuvoka akaghuha mche, akafwa esina mwana; 30na ula wa keri akam’pala ula mche, akafwa esina mwana; 31hata wa katatu akam’pala, nirehuvo vose mfungate, vakafwa vesishighie vana. 32Uko nyuma ula mche naye akafwa. 33He kuvuka kwa vefwie eneoka mche wa uhi, ambu vose mfungate vemghuhie?” 34Yesu akavati, “Vana va si ii veghuha na kughuhwa; 35mira vala vetarwa iti kivafwenye kuingia he lila isanga, na kula kuvuka he vefwie, teveghuha neri teveghuhwa; 36neri teveidima kufwa kangi; ambu veneoka sa vamalaika, navo ni vana va Mrungu, kila vo e vana va kuvuka he vefwie. 37Mira cha iti vefwie vevushwa, hata Mose erevonyesha he ifungu la Mburi ya he Izungo, aho ekimlanga Mfumwa iti ni Mrungu wa Abrahamu, na Mrungu wa Isaki, na Mrungu wa Yakobo. 38Ye si Mrungu wa vefwie; mira ni Mrungu wa veho moo; ambu hakwe vose vekalama.” 39Vaandiki kumwezu vakamgharusha, vakamti, “Mcheji, wetetie nezo;” 40neri teveidime kumvwija wa kintu.
Kristo ni Mwana Davidi?
(Mat. 22:41-46; Mrk. 12:35-37)
41Akavati, “Vantu veti ze iti Kristo ni Mwana Davidi? 42Ambu Davidi mwenye eteta he kitabu cha mazumo:
‘MFUMWA emvwirire Mfumwa wangu:
Ikaa mkono wangu wa kume,
43Mhaka nenevika vanzo vako vaoke kagonti kavikia maghu ako.’ 44Ana ra, aho Davidi emwitange Mfumwa, aoka wa ze mwana wakwe?”
Kukucheia he vaandiki
(Mat. 23:1-36; Mrk. 12:38-40; Luk. 11:37-54)
45Aho vantu vose vekimsikija, akavati varateri vakwe, 46“Kucheieni he vaandiki, vekundie kutonga vedokie suke ndeza, na kukeziwa he viete, na kiukaa mozya he mbao. 47Vela nyumba ja vache vefwiiwe ni vome, na he kilung’ong’o, veomba lunde. Avo venelahwa mlaho m’baha.
ที่ได้เลือกล่าสุด:
LUKA 20: CHSUNT67
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chasu New Testament © Bible Society of Tanzania, 1967.
