Kut 3
3
1Enjoka akaba eri enyabwengye okukira enyamaishwa zoona ezi Mukama Ruhanga yaahangire. Egyo njoka ekabuuza ogwo mukazi, eti: N'ekya buzima Ruhanga akabagira ngu mutarirya ebijuma by'aha muti gwona ogw'omuri eki kibanja? 2Omukazi yaagarukamu enjoka, ati: Nitwikirizibwa kurya ebijuma by'aha miti y'omuri ogu musiri; 3kwonka Ruhanga akagira ati: Mutarirya ebijuma by'omuti oguri ahagati y'ogu musiri, nobu kwakuba okubikoraho, mutakaafa. 4Enjoka yaagira omukazi eti: Timurikwija kufa. 5Manya Ruhanga naamanya ngu ku muraabiryeho, amaisho gaanyu nigaija kuhumuuka mube nka Ruhanga, mumanye ekirungi n'ekibi. 6Mbwenu ogwo mukazi ku yaareebire ogwo muti guri murungi kuriibwa, niguhuzya owaagureeba kandi nigwetengwa kuhaisa omuntu obwengye, atyo yaacwa aha bijuma byagwo, yaabirya; kandi yaabihaho iba, nawe yaabirya. 7Ahonaaho amaisho gaabo bombi gaahweza, baamanya ku bajwaire busha. Batyo baabaziira amababi g'omutiini, baayekoreramu enkyeetero.
Ruhanga okufubira Adamu na Eva n'enjoka
8Omu mabeho g'omwabazyo, omushaija n'omukazi we bakahurira Mukama Ruhanga naagyendagyenda omu musiri. Omushaija n'omukazi we baayeshereka Mukama Ruhanga omu miti y'omu musiri. 9Kwonka Mukama Ruhanga yaayeta ogwo mushaija, naamugira ati: Ori nkahi? 10Onu yaamugarukamu ati: Ku naahurira noogyendagyenda omu musiri naatiina, ahabw'okuba naaba njwaire busha; ntyo naayeshereka. 11N'onu amubuuza ati: N'oha owaakugira ngu ojwaire busha? Waarya aha muti ogu naakuzibiire kuryaho? 12Ogwo mushaija ati: Omukazi ou wampaire kuguma naanye, niwe yampa ekijuma ky'ogwo muti, naanye nkakirya. 13Mukama Ruhanga agira omukazi ati: Mbwenu ekyo, iwe waakora ki? Omukazi agarukamu ati: Enjoka niyo yambeihabeiha, naanye nkarya. 14Mukama Ruhanga nikwo kugira enjoka, ati:
Ahabw'okukora ekyo,
waakyeenwa okukira amatungo
goona n'enyamaishwa z'omu ishwa zoona.
Oryaguma ogyendese enda,
orye omucuucu ebiro by'amagara gaawe byona.
15Ndyakwanganisa n'omukazi,
oruzaaro rwawe n'orwe bibeerane abazigu.
Orwo ruzaaro rukuhondahonde omutwe,
naiwe orurume ekitsintsiino. 16Atyo akubuukana omukazi amugira ati:
Ndyakukanyisiza obusaasi noozaara,
ozaare abaana nooshaasha.
Ebyo nobu biriba bityo,
oryaguma oyetengye baro,
haza akutegyekye. 17Bwanyima yaagira Adamu ati:
Ahabw'okuhurikiza ebi omukazi
waawe yaakugambira okarya
ahari ogu muti gu naakuzibiire,
nti: Otariguryaho; eitaka ryakyeenwa.
Oryaguma orye ebyamwo obihendekyeire
ebiro by'amagara gaawe goona.
18Riryakumereza amahwa n'amatojo,
kandi orye ebimezire omu ishwa.
19Oryarya ebyokurya ebi otuutukiire;
okuhitsya obu origaruka omu itaka;
ahabw'okuba niryo waihirwemu.
Ori omucuucu,
kandi omuri ogwo mucuucu nimwo origaruka. 20Ogwo mushaija atyo ayeta omukazi we eiziina Eva, ahabw'okuba akaba nyina w'abaine amagara boona. 21Mukama Ruhanga yaakorera Adamu n'omukazi we ebijwaro by'empu, yaabajweka.
Ruhanga okubinga Adamu omuri Edeni
22Bwanyima Mukama Ruhanga yaagira ati: Reeba omuntu ahindukire nk'omwe ahariitwe, yaamanya ekirungi n'ekibi. Mbwenu nu, atakaagorora omukono, akacwa ebijuma aha muti gw'amagara, akabirya, haza akagumaho ebiro byona. 23N'ahabw'ekyo Mukama Ruhanga yaamubinga omu musiri gwa Edeni, kuhinga eitaka eri yaihirwemu. 24Yaabinga ogwo mushaija; kandi aha rubaju rwa burugwa-izooba bw'omusiri gwa Edeni, yaataho baakerubi na rurara erikutyankana, kandi erikuhindukira oku n'oku, kurinda omuhanda gurikuza aha muti gw'amagara.
Kaini na Abeeli
ที่ได้เลือกล่าสุด:
Kut 3: RKK2008
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
The Bible with Apocrypha in Runyankore-Rukiga, new revised joint translation © The Bible Society of Uganda, 2008.