KAJADIAN 2
2
1Lantas ilapasmo na nompotimbali songko-songko na dunia ka' iwi-iwi' na isinyo. 2#Ibr. 4:4, 10 #Kel. 20:11 Sinaa anu ko popitu'nyo Tumpu Allah nompomingkotmo kalaja-Nyo aijo', lantas Ia nilawemo. 3Lantas binalakatan-Nyomo na sinaa ko popitu'nyo aijo' ka' pinotimbali-Nyomo sinaa anu susi', kalana i sinaa aijo' Tumpu Allah nilawemo, salatan iningkotmo na kalaja-Nyo. 4Sumo aijo' na sisikonnyo nompotimbali dunia ka' iwi-iwi' na isinyo.
Taman Eden
Tempo'nyo Tumpu Allah nompotimbali songko-songko na dunia, 5ma'isa ko anu tinumuu' ka' ma'isa ko sosu'anon i tano', kalana Tumpu ma'isa nontudunakon ujan ka' ma'isa ko mian monggunakon tano' aijo'. 6Panyo uee nontampu'unimo nintambulalak lengkat mae i uno nu tano' ka' nohumpisimo tudunyo nu tano'.
7 #
1Kor. 15:45
Lapas aijo' Tumpu Allah nongalamo sangkiding na tano', lantas kinompon-Nyomo ka' tinimbalimo samian na manusia, lantas pinuhakon-Nyomo na sawo anu mompotumuu' i uno nu bolo' nu sungnyo; sahingga tinumuu'mo na manusia aijo'.
8Lapas aijo' Tumpu Allah nombaumo taman kiijo' i Eden, i sasu kabete'an, ka' pinojoong-Nyomo ikiijo' na manusia anu kinompon-Nyomo aijo'. 9#Why. 2:7, 22:2, 14 Tumpu Allah nompotumuu'mo iwi-iwi' na ngahan nu kau' anu ma'ima', anu mohasinakon to bua-bua'nyo anu ma'ima'. I totonga' nu taman tinumuu'mo na kau' anu mombee'i kantumuu'an, ka' kau' anu mombee'i ilimu' da monsumbu' han anu ma'ima' ka' han anu ma'idek.
10Kaunyo sa'angu' mo ili lengkat mae i Eden monguei taman aijo'; ka' i sambiha'nyo nu Eden kaunyo aijo' nobagimo tinimbali opat na sopa'nyo. 11Anu momona osanggohi Pison; kaunyo aijo' mo ili montotonga'i tano' Hawila. 12Ikiijo' ko mosoni'nyo anu madi' ko galo'nyo apa-apaa, ka' suele to bala-balang anu toto noho-nohong anu mahan hondo na o humpak, tiba mule' ko to batu-batu anu timbali bau mainan. 13Kaunyo ko ohu'nyo osanggohi Gihon; ueenyo mo ili montotonga'i tano' nu Kus. 14Kaunyo anu ko totolu'nyo osanggohi Tigris ka' mo ili mamba i sasu kabete'an Asyur. Kaunyo anu ko opatnyo osanggohi Efrat.
15Lapas aijo' Tumpu Allah nompojoongmo manusia aijo' i taman Eden da mompalakai ka' monjagai taman aijo'. 16Tumpu notatae hi manusia aijo', “Beleyum timbali mongkaan iwi-iwi' na bua' nu kau' i taman aiya. 17Panyo kau' anu mombee'i ilimu' da monsumbu' han anu ma'ima' ka' han anu ma'idek boli. Bua'nyo madi' timbali beleyum mongkaan; de beleyum mongkaan, beleyum silakamo i sinaa aijo'.”
18Lantas Tumpu Allah notataemo, “Madi' ma'ima' na manusia tumuu' sausa'nyo. Ku-bauje na anu timbali sangalunyo anu mompahakona ka' montulungi ia.” 19Lantas Ia nongala tano' sangkiding ka' nongkompon binau-Nyo iwi-iwi' na ngahan nu binatang i katano'an ka' binatang aita' i langa. Iwi-iwi' binee' nu Tumpu Allah hi manusia aijo' da montoa apaa na ponsanggohinyo binatang haha aijo'. Aijo'mo na tampu'unannyo binatang i katano'an ka' aita' i langa nohumpak sanggonyo toto sa'angu'. 20Sumo aijo'mo na manusia monsanggohi iwi-iwi' na binatang i katano'an ka' aita' i langa. Panyo madi' ko sa'angu' pe'e aijo' hi aha na timbali bau sangalu anu mompahakona montulungi ia.
21Lantas Tumpu Allah nompihoyotimo manusia, i hoyotmo binobogon, ka' hau-haunyo ia daagi' hoyo-hoyot, Tumpu Allah nombubutmo sala'sa'angu' na buku nu has i butong nu manusia aijo', lantas tampatnyo aijo' po'ule' ingisian-Nyo nu antok. 22Buku nu has aijo' binontukmo nu Tumpu Allah tinimbali samian na boune, lantas binee'nyomo hi manusia aijo'. 23Sahingga notatae na manusia aijo',
“Aiya ia, mian anu pokakana tiba aku –
buku lengkat i bukungku, ka' antok lengkat i antok-ku.
Ku sanggohimo na ia boune, kalana ia ingala lengkat i mo'ane.” 24#Mat. 19:5, Mrk. 10:7-8, 1Kor. 6:16, Ef. 5:31 Mokonyo aijo' mo'ane mompala'imo tuuma ka' tinanyo ka' mosa'angu'mo tiba bengkele'nyo, lantas ua-ua'aha timbalimo sa'asa'angu'.
25Mo' ane ka' boune aijo' langgo-langgo', panyo aha madi' ma'ambang.
ที่ได้เลือกล่าสุด:
KAJADIAN 2: LAILOE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้