MARKUS 5
5
Gadara Makijo ka Enija Jago Me
1Okei peku auwaato adijake, Gadara bagee ka makijo dakii.
2Jesus komaida make mijouwe kijake okai kou gaa kodo maija enija jago me idaana me okaapa make mejake okai ma akado tai.
3Okaija touda ko me okaapa to. Me idaana ka ma te egadimimakija, pute ka keetigo maija.
4Kigi inoudo pute buda ka bado egadimimake-tai; umina bida egadimimakai kodeja, pute buda kodo okai duwamigetai. Umina bida egadimimakita buda maija juwagii te-jamo. Tijake me idaana ka ma daba taawija.
5Agapi beu wanee beu me okaapa ma, dimiida ma, emeeme to te-tai. Okai akaato mogo ka dedomai ma.
6Kodeja Jesus poto make edojake tibigi mejake migaakobe etai.
7Kuutakaa emeeme teete mana, „Ei, Jesus, Monika Ugatame Jokaibo, aki ma ani ma má imee? Ugatame pekaida baita makii, ani peu te naawii,” etii.
8Jesusja, „Enija, me kidi duba make podomi,” etijake kouja.
9Tijake Jesus egaado teete mana, „Akeeka meime?” Etijake „Aneeka ko Legion. Inii wedaba kodaa,” etii.
10Tijake okai Jesus bida peu ediimai, kou makiida make te ebakikume-tijake.
11Kotuuda kodaa ekina ibo imouto kigi nootigo.
12Enijaido kodaa Jesuspa ediimeete mana, „Inii ekina duba amoujo kaine no,” etii.
13Tijake okai ejaikai. Enijaido kodo podomijake ekina duba amoujo kai. Ekina imouto kodo egoudaiga begakapu tidaa tijake pekuuda gootidaa, ekina muto muto to ko jokagaati. Tijake okei uwo duba kodaa kenapune tijake bokai.
14Ekina ooto-tai bagee kede tibigi uwijake kou maki okogo ma, kou maki dokoo ma mana kodo wegakumii. Meido kede kei tidoke tipa mana doune tijake mei.
15Meido Jesuspa mejake enija jago me kidi kagaba makijake dimi enaa kijake animaki-toojogo edou; te gakimake enija ka awidaa tita me kidi ki. Tijake okei weda gai.
16Edopai bagee kodaa enija jago me jakei tijawita mana kodo eti-menii, daana ekina maida make ka mana maija.
17Tijake meido kodaa iniija makiida nijajaikai ediimai.
18Jesus koma matakijake enija awidaa tita me kidaa ediimai, okai ma enaimo kaine tijake.
19Kodeja Jesus beu etii. Tijake eteete mana, „Akija owaapa ma, akoogeimaapa ma uwijake Ugatameja ibo kakei teegi mana kodo eti-menii, daana okaija umina ipa kagaagi kodo maija,” etii.
20Okai uwijake Dekapolis maki dokoo kodo Jesusja ibo jakei tijawipi mana kodo wegaate go-motii. Tijake meido utoma ego takuu-takuu umina.
Jairus Jokame Maida Make Ediimai
21Jesus metaato komaiga joko adijake me wedaba okaapa kotuu timakai, peku watija kodaa.
22Sembahjang owaa douto-tai me idaana eka Jairus mei. Okai Jesus edojake okai jumaapa mijouga kai.
23Okai ediimai umina eteete mana, „Anija jagamo joka bokaine dani teete. Gane okai maida jamakiine mei kadiimai, beu kijake ija ke-tita,” etii.
24Tijake okai ma enaimo uwijake me wedaba eepeete tipi-tipi etai.
Jagamo Idaana Kagaba Jawinikidou
25Jagamo idaana emo to ume-ume teete didi taun wija ma gaati umita toojogo.
26Doktoda wedaba ka gaduwai umina etijawii, daana kou maida make okaija agijo utoma mapugajawii kodeja, beu te kijake didi kodo abuma kidaa.
27Jesus maida make mana jagamo kodo juwijake okai meido kodo nemouga mejake Jesusja kagaba jawinikidou.
28Okai kii dani gajake, okaija kagaba jawinikidopa ko ani didi beu kaipiga kouja, dimi gajake.
29Okai kou gaa kodaa okaija emo ume-tai kodo duwadoke tai. Okaija má maida didi beu keega gai.
30Okai kou gaa kodo maija Jesus duba make bida agijo podomeega gajake meidoopa wouga wakouga tijake eteete mana, „Meime anija kagaba nawinikidooga?” etii.
31Tijake etope-taido ka eteete mana, „Meido tipi-tipi kateete aki edooge kouja, kawe dani tijake ’Meime nawinikidooga?’ eneege kou ko,” etii.
32Jesus kou watija doumigii, kei tipa me edoune tijake.
33Tijake jagamo kodo okai duba kei tidoke tipa mana kodo gajake weda ma totome ma Jesuspa mejake okai jumaapa mijouga kai. Tijake akaato mana kodo epeepite eti-menii.
34Tijake Jesusja, „Ani joka,” etii. „Akija maakodo gai kodaa didi kodo beu keege. Kojáá na ka uwii, daana didi kodo beu keege,” etii.
Jairus Jokame Eenigojawita
35Okai mana wegaatigo gaa kodaa sembahjang owaa doutotai me ka owaapa make me wija wido mejake eteete mana, „Aki joka bokaaga. Magijo taine Kuduu dimi gaagaa etijawii kodo?” etii.
36Kodeja Jesus kou mana dimi te gajake sembahjang owaa douto-tai meepa eteete mana, „Weda te gai. Maakodo gai to,” etii.
37Jesus me idaana ma eepe-tijake ejaikai beu, kodeja Peterus ma, Jakub ma, Jahja ma, Jakub kenekame kidi to.
38Me ibo kidaa owaapa dakii tijake nogee umina teetigo edou. Daana me wedaba jege ma, jiijii ma teetigo.
39Jesus wadoujo kijake eteete mana, „Magijo ka jiijii ma, jege ma teete? Joka kodo bokai beu, kodeja uno umeete,” etii.
40Tijake okei ewidogeete odijai etai. Meido kodo juwouda epodomijawijake nakame ma ukame ma okai ma enaimo meido ma ouwijake joka kodo bokapaida jokoujo kai.
41Joka kodo gane ejakijake eteete mana, „Talita kumi” etii. Me manaida awi-toojogo ko, „Joka dabaa, ani katii, anigodou,” etita mana.
42Okai kou gaa kodaa okai anigojake uwina tai. Okai epajake ko taun wija ma gaati umita kodaa. Me utoma umina maa kou ego takuu-takuu timakai.
43Tijake Jesus umina bida peu kidi kou mana kodo ugo te uwe-tijake etimakai. Tijake joka kodo naija agijo menii etii.
ที่ได้เลือกล่าสุด:
MARKUS 5: EKG
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
