MARKUS 3
3
Enakaato Gane Bokata Me Beu Jaawii
1Jesus sembahjang owaa duba wadoujo kijake enakaato gane bokata me idaana toojogo.
2Me ka edoutou, Sabbat naago kodo me kidi beu jaawiipagi, mee? ijeije etaine tijake.
3Tijake enakaato gane bokata me kidiipa Jesus eteete mana, „Me jupi kiija joonidoke tai,” etii.
4Tijake Jesus meido kodoopa eteete mana, „Sabbat naago enaa agijo kei tai pijo, mee? peu agijo kei tai pijo. Ija eewii, mee? wagimakai,” etii. Tijake okei utoma gabo tou.
5Jesus emoge ma meido edoumigijake, okeija kegepa bida kouja gaagaa tijake, me kidiipa eteete mana, „Akija gane mapido ti.” Etijake me kidi gane mapido atijake bida kidoke tai.
6Parisi bagee podomijake Herodes eepe-tai bagee ma mana wegai; kawe danite wagimakija mana kodo amo wegai joko wegai tai.
Me Wedaba Peku Watija Kotuu
7Tijake Jesus ma etope-taido ma iteida uwija ke me wedaba eepei, Galilea ka ma, Judea ka ma,
8Jerusalim ka ma, Idumea ka ma, Jarden onee auwaato ka ma, Sur ma Sidon makijo ka ma. Me wedaba okaija dou beu agijo kei tei tita kodo juwijake okaapa mei.
9Okai etope-taido mijo koma ena naapomakai etii, me ka tipi tipi te ete-tijake.
10Didi me wedaba beu jaawijake kouja, didi jago bagee okaapa tipi tipi etai, ewinikidoune tijake.
11Enija maija Jesus edojake, okai jumaapa mijouga kai; okei emeeme teete mana, „Aki ki Ugatame Joka,” etii.
12Okai maida make mana ugo te uwikume-tijake bida peu etimakai.
Etope-tai Wija ma Gaati Ewitokita
13Tijake Jesus dimiida patikijake ide egata bagee manaatijake okaapa mei.
14Okai me ida wija ma gaati ewitoki-motii; okai ma enaimo to-tijake, daana mana wude-tijake ebadikumiine.
15Enija jaemigimake-tijake bida boko jaduwajawii.
16Me ida wija ma gaati kede boko duwajawita kede ke, Simon kidi, kii ke okai Peterus eebatita kidi,
17daana Zabdi joka Jakub ma, kenekame Jahja ma; okejai Buanergis eebatita, me manaida awi-toojogo, gekamugu dani bagee.
18Andereas ma, Pilipus ma, Bartolomius ma, Matius ma, Tomas ma, Alpius jokame Jakub ma, Tadius ma, Kanani ka me Simon ma,
19Judas Iskariot ma, Jesus eekegajawita me kidi.
Akaije Akaate Uguwo te Tomake
20Okai owaapa wadoujo kijake me wedaba okaapa kotuu timakai, tijake okei nai ma peu.
21Jesus ma imee bagee kou mana kodo juwijake, te kei tai etiine uwii, me ka wegai, „Okai enijaanija” wegaigai kouja.
22Kapogeije epi bagee maija Jerusalim makijoopa make mejake kei teete mana, „Okai duba Baalzebul awidoke tijake enija ukauto kodaa okai enijaido jaemigimakeegi kou ko,” wegai.
23Tijake Jesus meido utoma manaa-tijake ena dani awe-tai mana eteete mana, „Kawe dani tijake Teege ka Teege jaemigimakija?
24Kou danite jakimakita makijo akaato akaije ti-toojogo, kou makijo kodo te tomake.
25Daana me uguwoona akaato akaije ti-toojogo, kou uguwo te tomake.
26Daana Teege akaato akaije tijake dimi akawude ti-toojogo enaa te tomake, kodeja kou ko momogiida kodo.
27Me idaana ka bida jago me ka owaa wadoujo te kimake, edepedeido jamo-motiine tijake, kodeja bida jago me buda egadimai tiga tijake to, okaija agijo jamo-motii.
Rohulkudus Eduwai
28Beu maa kou ani kitii, me jokaaneido ka peu awita tuma tumaija ipa ejaikija; daana okeija akaduwa tai manaido maija.
29Okai kou kodeja meija Rohulkudus eduwapi, okai ipa te ejaikijake kii kidi imo to togoo; kodeja peu awita kodo imo to togoo.”
30Kou dani tijake Jesus wo etita, okeija ka etii ko, okai enija jago etita kouja.
Jesus Ukame ma Kenekaane ma
31Jesus ukame ma kenekaane ma mejake juwouda toojogo. Me idaana mana nijaetei etijake ebadikumii.
32Me wedaba okai watija animaki-toojogo. Me wija wido ka eteete mana, „Edododou, akuukai ma aki kenekaane ma juwouda make kaubaate,” etii.
33Tijake Jesus wo eteete mana, „Meime noukai ko, daana ani keneka ke?” etii.
34Tijake okai watija bagee Jesus edoumigijake eteete mana, „Edowei, noukai ma ani kenekaane ma.
35Meija Ugatameja gata dimi kei tipi ko, okai kii ke ani keneka ma, ani paneka ma, noukai ma,” etii.
ที่ได้เลือกล่าสุด:
MARKUS 3: EKG
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
