MATIUS 4
4
Tuhan Jesus Egaado Tita
1Tijake Jesus Roh ka me beuda ouwii, Teege ka egaado te-tijake.
2Okai naago mepiija uno mepiija nai beu tijake naidi gai.
3Kii egaado te-tai kidi okaapa mejake eteete mana, „Kou danite aki ki Ugatame Joka keetigo ko, kei mogoudo kei goti kidaa tei eti,” etii.
4Kodeja okai wo eteete mana, „Kapogeije ebijamakita no:
Goti ka to me tuma umi-tou te tija,
Kodeja e mana te mana Ugatameja ebeidaiga godajawita kodo ka,” etii.
5Tijake Teege kidaa jimubeu makijoopa ouwijake Ugatameja owaa ka wado tí titaida kodaa emakijawii.
6Eteete mana, „Kou danite aki Ugatame Joka keetigo ko, mijo gootidodou. Kapogeije ebijamakita kouja:
Okai jaetigo-tai bagee kaaetiipagi,
Gane wado kakatagi-toupigai,
Bado mogouto tokoo tidoke na kojoka.”
7Tijake Jesus eteete mana, „Kapogeije ebijamakita kodo ko: Akija Tuhan Ugatame egaado te tai,” etii.
8Kigeena ma Teege kidaa wado tí tita bagouda ouwijake uwoje makije ka jakimakita makiido ma ajiipi agijo ma emuwakai.
9Eteete mana, „Kei utoma kaniita, kou danite aki mijouga kijake migaakobe natipe ko,” etii.
10Tijake Jesus eteete mana, „Ka! Teege! kapogeije ebijamakita kouja:
Akija Tuhan Ugatame migaakobe etai,
Daana okai to dijo jadou,” etii.
11Tijake Teege kidi wo godoke tai. Ugatameja jaetigo-tai bagee mejake eedadai.
Jesus Meido Etopai Go-motii
12Jahja ejakimakita mana Jesus juwijake, Galilea dokoo wo uwii.
13Nazaret makijo jaikidokijake Kapernaum makiida tou, peku watija ka makiida, Zebulon ma Naftali ma ka dokoo kodo.
14Tikauwa ka gokobaki tijawiidaiga wegai tita me Jesaja kidaa wegata mana koba-tijake, kou ko:
15Zebulon ka makiida ma, Naftali ka makiida ma,
Peku uwe-tai watija, Jarden amouwe jato;
Kou ko Galilea dokoo, ojaa bagee ka makiida.
16Bunita duba ka to-tai bagee
Awe peijo domakita.
Boka ka apumita makiida ka tota bageepa
Aweida jaganimakita.
17Kou gaa kodaa make wado Jesus mana wudii go-motii, eteete mana, „Ikii tedemiwei, epaawado ka jakimakita makiida kapa keega no,” etii.
Binei Muga-tai Bagee Manaa-tai
18Galilea iteida ita uwina uwina teetigo me keneka wija edou. Kii ko Simon, Peterus eebatita me kidi ma, kenekame Andereas kidi ma ebai peku duba mijouwe aaweetigo gaa; okejai binei aamuga-tai bagee kouja.
19Tijake Jesus eteete mana, „Aamewei, aanaapewei, ani me mugai kijaikaita no,” etii.
20Okai kou gaa kodaa okejai ebai aajaikidokijake aepei.
21Kouda kodaa make uwijake joko ka keneka wija maija edou; kii ko Zabdi joka Jakub ma, kenekame Jahja ma, komaida nakame Zabdi ma enaimo, ebai puumeetigo. Tijake Jesus manaa-tai.
22Okai kou gaa kodaa maija koma ma, nakame ma aajaikidokijake Jesus aepei.
Jesus Mana Wudina Tai
23Jesus Galilea dokoo bobi-motii. Okeija sembahjang owaido duba meido etopai, daana Ugatameja jakimakita makiida ka ajii mana wegakumii, daana me ka didi tuma tumaija ma, okeija debuu agijo utoma beu jaawii.
24Tijake okai maida make mana Sjam dokoo ugo uwidoke tai. Didi jago bagee utoma, didi ma gaduwai ma tuma tumaija ka tagi atita bagee kede me ka oomei. Enija jago bagee ma, enijaanija bagee ma, bado ekogadaa tita bagee ma, utoma okai beu jaawii.
25Tijake Galilea ka ma, Dekapolis ka ma, Jerusalim ka ma, Judea ka ma, Jarden onee auwaato ka ma me wedaba okai to eepei.
ที่ได้เลือกล่าสุด:
MATIUS 4: EKG
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
