MATIUS 2
2
Dimi Jago Bagee
1Judea dokoo ka Baitlahim makijo make Jesus pajake, Herodes maki jakimake-tai me toojogo gaa, awii jato make dimi jago bagee Jerusalim makijo mei,
2eteete mana, „Jahudi ejakimake-tai me kaija make pata? Inii awii jato ijapu jadojake migaakobe etaine meege,” etii.
3Kou mana muto maki jakimake-tai me Herodes juwijake gootoki umina, okai ma Jerusalim maki utoma.
4Tijake imam iboudo ma kapogeije epi bagee ma kotuu etijawijake, kaija make Keristus paitagi mana egaado tai.
5Tijake okei eteete mana, „Judea dokoo ka Baitlahim makijo make. Tikauwa ka gokobaki tijawiidaiga wegai tita me ka kapogeije ebijamakita kouja:
6Ei, Baitlahim, Judea dokoo,
Aki ki mijo ko beu
Jahuda ka ibo jupi,
Aki dubaiga Monika Me podomaitagi kouja,
Anija bagee Israil ejakimake-tijake.”
7Tijake Herodes dimi jago bagee kede gabo gabo manaa-tijake ijapu ewaa kita mana epeepite egaado tai.
8Tijake Baitlahim makijo ebadikumijake eteete mana, „Ikii uwijake joka kidi epeepite eubai. Ikii edomakipa ko mana joko natii; ani maija migaakobe ete-uwiine kojoka,” etii.
9Maki jakimake-tai me kidaa mana kodo juwijake okei uwii. Awii jato ka dota ijapu maija migougu oomakii, tijake joka kidi tota wado wedoke tai.
10Ijapu kidi dojake kegepa bego-bego tijake umina maa kou ideide timakai.
11Okei owaa duba wadoujo kijake joka kidi ma ukame Marjam ma edojake mijouga kijake migaakobe etai. Okeija ka poto kebajawijake menija agijoudo menii; kou ko, mege ma, unu enaa utóú ma. unu enaa odijo ma.
12Ugatameja bagumeidaiga Herodespa amo te uwii etijake joko ka itaiga okeija ka makiida uwii
Masir Makijo Okita
13Dimi jago bagee uwijake bagumeidaiga Tuhan jaetigo-tai me idaana Jusufpa ewaa kijake eteete mana, „Anigou, joka ki ma, ukame ma Masir makijoopa ouwii. Kouda kodaa tou, ani mana katigoutaida to. Herodes joka ki wagiine tijake eubaitagi kouja,” etii.
14Tijake okai anigojake joka kidi ma ukame ma wanee Masir makijo ouwii.
15Okai kouda kodaa Herodes bokaitagiida to tou, Tuhanja tikauwa ka gokobaki tijawiidaiga wegai tita me kidiidaiga wegata mana koba-tijake kou ko: Masir makijoopa make anija joka manaa-tita mana.
Jokaido Wagimakita
16Wadoutouga dimi jago bagee ka puja naukita kodo Herodes gajake okai emoge umina. Tijake jame jokaido utoma Baitlahim makijo ma, kou watija dokoo ma ka jokaido wage-tijake me ebadikumii; epajake taun wija umii beu jokaido kede. Dimi jago bageepa epeepite egaado tita gaa dani.
17Tijake tikauwa ka gokobaki tijawiidaiga wegai tita me Jermia kidi wegata mana kobata, kou ko:
18Rama makijo emeeme juwita,
Jege teete ma jiijii umina teete ma;
Kou ko, Rahil jokaaneido jege eteete;
Okai jege jabudijawii beu,
Jokaane igajake kouja.
Nazaret Makijoopa Wado Mei
19Herodes bokajake Tuhan jaetigo-tai me idaana Masir makiida bagumeidaiga Jusufpa ewaa kijake eteete mana,
20„Anigou, joka ki ma ukame ma Israil ka makijo ouwii; joka ki wagiine tita bageido bokata kouja.”
21Okai anigojake joka kidi ma ukame ma ebukijake Israil ka makijo ouwii.
22Kodeja Archilaus kidi Judea dokoo jakimake-tai me, nakame Herodes komouto kita mana kodo Jusuf juwijake kouda uwii weda gai. Kodeja Ugatame bagumeidaiga etijake, maki katouda Galilea dokoo wo uwii.
23Wadoutouga maki kodoopa dakii tijake kouda kodaa tou, eka Nazaret. Tikauwa ka gokobaki tijawiidaiga wegai tita me ka wegata mana koba-tijake, kou ko: Jesus Nazaret ka me eka eebataitai mana kodo.
ที่ได้เลือกล่าสุด:
MATIUS 2: EKG
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
