Yohanes 1
1
Yesus Jeiba Taterisi Uwa Sanbagirmana.
1Gwanan-gwanansus jes jepserem, nalef ogiri aaiserem jam eyebayan, Taterisi Uwa Sanbagirmana Jei maa, gwanan. Taterisi Uwa Sanbagirmana Jei Uwa Sanbagirfar ge nwin, ane Taterisi Uwa Sanbagirmana Jeiba Uwa Sanbagirsam. 2Gwanan-gwanansus jes jepserem, Jei Uwa Sanbagirfar ge nwin. 3Uwa Sanbagiri Jei Jes baftal seyafter gam eyebaabif. Apgal jigala afa Jam orolyan. 4Gwela angtanefe Jeyam golmini, ane gwela jeiserem jeiba nafa gamserem angtanefe. 5#1Yohanes 1:1-5Nafa jeiserem gwini ga jei nafola, ane gwini jam motolsiyen nafa jeiserem.
6Uwa Sanbagiri Jei angtanes baftana. Angtane jeiserem bosna jemna ga Yohanes. 7Jei enggalf fortya angtane gam towas-towastababif nafa jeiserem jem temawer, jega angtane seyafter jeter sene sarbana, ane ga sene tebana. 8Yohanes gam ke nafabara. Jei enggalf fortya nafa jeiserem gam nasbif. 9Nafa bunarsusfer jeiserem Jeiba Yesusam, ane Jei angtane seyafter gemerserem ini jemna ga jei naftabaipmini. Nunu Jena aa jem gwertanaram angtane ogirmanaiserem jemnibe, nunu jeiserem mes gwetmanswel.
10Yesus Jeiba Taterisi Uwa Sanbagirmana, ane Uwa Sanbagiri Jei Yesus baftannul enggalfe ogiri gam eyebaf. Ogiri aaiserem Jam eyebalabe taban, Jei ogiri aaiserem jep ga fortyant. Jei aa galap fortyantam, angtane ogiri aaiserem jam ge towaswebiyen Angtane jeiserem Jei nansa. 11Jei Jelem tamnabam fortya, jengga anggwabura Jelemana jam ne tebayan. 12Jengga afwer Jei mes ne tebana, jei mes ne tebana waakenfer. Jei angtane jeiserem ga balbabili, “Aamei angtane Uwa Sanbagirmanf isa gwena.” 13Jei angtane Uwa Sanbagirmanf jei se naawena, aam temawer jei Uwa Sanbagirminiwer ge surubisint. Jei Uwa Sanbagirem angtanefe jam naaweyan, aam temawer jei iye yo uwa jemniwenefener ge surubisint.
14Taterisi Uwa Sanbagirmana Jei angtanef etamwenant, ane Jei nebar neya nwini. Nei baabeta Jemna nemsa domolbana, aam temawer Tane Uwa Sanbagirmana Jeiba Jenfentowayam, ane Uwa Sanbagiri Jeiba Jem Jetam. Jei waakena Jelemanaiserem angtanef golmini, ane Jei angtanes towas-towastababili taterisi seyafter Uwa Sanbagirmana bunarsusfer jeiserem.
15Yohanes angtane towas-towastababilint Jem temawer. Jame aa galap towas-towastababilintim, jei ga ol dagam nasowena enggame, “Gwanan ai jela aafe isa gam towas-towastababif, ane Jei jewer gase fortya. Ai enggam ai gunu, ‘Jei sanbagiri, ai sanbakyan Jei galserem, aam temawer ai nalef ajam suruyon, gwanan-gwanansus Jeyam gwel.’ ”
16Jei waakena Jelemanaiserem nep nes mes golmini. Jei Jam tikweyan waakena Jelemanaiserem nep nes jam golmife. 17Hukumu Uwa Sanbagiri aa jes bilim, Nabi Musa ga tulistababil ane asal-asala amnaiserem jep ga towas-towasulmil. Jengga Yesus Kristus enggalf fortyant nes gam ge saamisif enggame Uwa Sanbagiri Jei waakena Jelemanaiserem angtanefe mesam golmini. Ane Jeiba nes mes towas-towastababili taterisi seyafter Uwa Sanbagirmana jeiba bunaram. 18Angtane afa fas Uwa Sanbagiri jam damtayan. Jengga Tane Jemnaiserem Jetam tarnabe ga Jei gwena, ane Jei Jeta gam gweretana angtanefe.
Yohanes Pembaptis ga gunu, “Ai Kristusyon.”
(Matius 3:1-12; Markus 1:1-8; Lukas 3:1-18)
19Angtane sanbaka Yahudimana kota Yerusalem je, jei angtane Jena Uwa Sanbagirmanaiserem awelna jep aa jei ne gwebilirim, ane angtane Lewimanaiserem ga aane baftabili jam ge sofobif Yohanesminibe enggalfe gam ne tenebaf, ane jei ga aane tenebana, “Aam je nansa?” Taterisi Yohanes aa jes nasipminirim jebe jeiba bunaram. 20Jei bai taterisi bunarsusfer jeiserem jam syawulsife, jengga jei jelem temawer bunarsusfer nasouna enggame, “Ai Mesiasyan, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif.”
21Jei jes ne tenebana, “Gam ga aamei nansa? Afa aamke Nabi Eliya, nabi fwatermana jeiserem?”
Yohanes ga tamawola, “Fas, ai jeiyan.”
Jei gamjon ga aane tenebana, “Aamke Nabi Uwa Sanbagiri fwater aa jes balam Jei jam baftannufe?”
Jei tamawola, “Fas.”
22Jei umwef ga aane tenebana, “Aam ga nansa? Ai asim tamawolbaabi, jega fwainfe jeiserem gam asa gwirinmifele angtane ai as jei ne baftabitnentem jebe. Aamei in inis bala, aam jei nansa?”
23 #
Yesaya 40:3
Yohanes ga tamawolbaabili enggame, taterisi Nabi Yesaya fwater aa jes nasbilim:
“Aiba angtanesam ajei jenjenwenaram ona dwisgiribe.
Nele nornorsusfer isa eyebabana Tuhanfe!”
24Angtane kota Yerusalemwer aa jes ne baftabilirim, jep jegme angtane safna Farisimana jes mese, 25jei Yohanes ga aane tenebana, “Afa aamei Kristusyon, ane Eliyayan, ane nabiyen, gam jega angtane ga ibaf baptistababili?”
26Yohanes jei ga tamawolbaabili, “Ai isa ajam baptistababili fom, jengga Angtane aa Jei finaram im nenennabe, aamei Jei ijama towaswebayan. 27Gwanan ai agam fortyaram, ane galap Angtane sanbaksusu se fortya. Jei sanbagiri, ai bastantouya, ai tofgol newa Jemna ajam fersobaasiyen.”
28Seyafter aaiserem mes etamwena tamna Betanya je, Fona Yordan jimwer, Yohanes angtane ga jep baptistababili.
Yesus Jeiba Uwa Sanbagirem Domba Tanesam.
29Jem gwirmer ga Yohanes jei Yesus ga damtana Jama fortyaram. Ane ga balbabili, “Gasa damta, Domba Tane Uwa Sanbagirmana Jei Jam fortya! Jei etam-etama kapka angtane ogirmanaiserem Jei gam wirulmif. 30Aaba Jesam, gwanan isa ajes nasbaminintim. Ai enggam ai gununt, ‘Gwanan ai jela aafe isa gam towas-towastababif, Angtane jeiserem jewer gase fortya.’ Ai enggam ai gunu, ‘Jei sanbagiri, ai sanbakyan Jei galserem, aam temawer ai nalef ajam suruyon, gwanan-gwanansus Jeyam gwel.’ 31Ai anfentowai ajam towasweyan Kristus Jei nansa. Jengga ai amsam fortya angtane fom jam baptistababife enggalfe, ai angtane Israelmanfe Kristus agam gweretaamif.”
32Jepga Yohanes jei bunarsusfer nasipmini enggame, “Ai Mafnana Uwa Sanbagirmana ai domola, junu senaya galserem ga gam iritya winsiwer, ane Jemnip ga nwintetya. 33Jes jepserem ai gemerje ajam towasweyan Jei nansa. Jengga Uwa Sanbagiri ai as Jei baftanantam angtane fom baptistababife, Jei ai ga as Jei balant, ‘Aamei Mafnana Uwa Sanbagirmana is domolfa se iritya winsiwer, ane gase nwintetya Angtanem sagabe, ga Jemnip se nwintetya. Angtane aa Jemnip nwintetyaram, Angtane jeiserem angtane ga Jei se baptistababili Mafnana Uwa Sanbagirmanaiserem Jeme.’ 34Bunar ai amesam domola jeiserem, ane ai isa bunarsusfer nasipmini, aaiserem Jeiba Tane Uwa Sanbagirmanam.”
Yesus angtane Jei aa jei ne tikwebaatinennerem Jei jes jenbebili.
35Nunu jeiserem jem gwirmer Yohanes jei gamjon tampata jeiserem jeber ga aa ge fibitetya ai angtane naura jei ajei ge tikwebaatinennerem abar. 36Yohanes aa galap damtanaram Yesus Jama ayintyerem, jei ga as gitmini enggame, “Ga sege damta, Domba Tane Uwa Sanbagirmana gas ayinyel!”
37Ai agalap ge sarbanaram Yohanes gam aa jes gitminirim, jewer ga ai ge sofwa, Yesus ga ai ge tikwebaatini. 38Yesus ga irfwena, ane ga as domsona angtane ai ajes ge onsobanaram, Jei ai ga as tenaamini, “Aamei ibas ge terelbili?”
Jepga ai ge tamawolbana, “Rabi, Aamei Ifof nwini?” (Rabi jeiba gurusam.)
39Yesus ga as gitmini, “Au igme iner is ge domola.” Jes jepserem jewer ga ai Jebaner ga aya sofwa, ane tampata Jei aa jep nwinirim ga ai ge domolbana. Jes galapserem ona mes dafwena jema ga nawer-naura, ane nunu jeiserem jeme ai Yesusfar seyafter aya nwini.
40Anderyas, Simon Petrusem osona, ane ai taterisi Yohanesmana ai ge saribene, ane ai Yesus ga ai ge tikwebaatini. 41Jes jeberserem Anderyas tatarmer ga sofwa ayanaiserem bosna Simon ga jes terelbene, ane jei ga bala, “Ai Mesias, Angtane Uwa Sanbagiri bunarsus aa Jes balam Jam baftanafe ai Jebar amsa dorwena.” (Mesias Jeiba Kristusam.)
42Jepga Anderyas jei Simon ga aftawena Yesusminibe. Yesus Jei Simon ga aa damtana, ane ga bala, “Aamei Simonsam tane Yohanesmana. Ai isa enggam as bosetana Kefas.” (Kefas jei ga bosna Petrusmana gemerserem Yunani oleme, igi jemna ga ton.)
Yesus Filipuso Natanyel jes jenmini.
43Jem gwirmer ga Yesus ga gunu enggame, “Ai ajam sofwa ona Galileyaminiwer.” Jep ga aa ge dorwena Filipusfar, ane jep ga aa bala, “Au, aamei Amse tikwebaati!”
44Filipus jei tamna Betsaida gwanan jep nwinint. Anderyas ane Petrus jei mese jep ge nwinint. 45Filipus jei Natanyels terelbene, ane ga bala, “Ai Angtanefar ames ge dorwena. Nabi Musa jei mes tulistaabil Jem temawer Hukumu Nabi Musa aa jes tulistababilim jebe. Nabi nensa jes mese mes ne tulistaabil Jem temawer. Angtane jeiserem ga Yesus, angtane tamna Nasaretmana. Jei tane Yusufmana.”
46Jengga Natanyel ga tenebana, “Ai ajam bitbitwena! Angtane waakena ke Nasaretminiwer jela?”
Filipus ga tamawolbana, “Au, se damta!”
47Yesus Jei Natanyel jam aa galap damtanaram Jemnip aa galap jelaram, Jei Natanyelem temawer ga aa gunu, “Angtane aaiserem bunarsusfer ba angtane Israelmanam. Jemnibe taterisi ol kapkaiserem fas.”
48Natanyel jei Yesus ga tenebana, “Aamei ase fomfom Im towaswebana?”
Jepga Yesus ga aa tamawolbana, “Ai aamei isa Amesam damtana, aamei ara ti gwonap igalap nwinintim, nalefe Filipus aamei is jam jenbeyen.”
49Jepga Natanyel ga aa bala, “Guru, Aameiba Tane Uwa Sanbagirmanam! Aameiba anggwabura Israelmanam ga Ijem Sanbakf nwini!”
50Yesus ga bala, “Aamei ke Ams im tebana, aam temawer Ai enggam Ajewer gutenaram Ai aamei is Ames damtana aamei ara ti gwonap igalap nwinintim? Aamei bwembwema unggwandwasusu galap is domola.” 51Jepga Yesus gamjon ga aa bala, “Ai ibe isa bunarsusferam nasipmini, aamei isa anggana winsi sene bitnewaram, ane malaikata Uwa Sanbagirmana sege tabwili, ane Am tarnap ga sege irebitye, Ai Tane Angtanemana.”
ที่ได้เลือกล่าสุด:
Yohanes 1: LAIBKL
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
