Luk 7

Yesu naakiza omuheereza w'omukuru w'amahe

(Mat 8:5-13)

1Yesu obu yamazire kugambira abantu ebi byona, yagenda Kafaranaumu. 2Hakaba haroho omukuru w'ab'amahe ow'akaba aina omuheereza we omwesigwa muno. Ogu akaba arwaire, ali haihi n'okufa. 3Omukuru w'ab'amahe obu yahuliire nibabazaaho Yesu, yamutumira abakuru b'Abayudaaya, naamusaba aije akize omuheereza we. 4Obu baahikire hali Yesu baamwesengereza muno bati: “Omuntu ogu osemeriire kumukoonyera, 5habwokuba agonza ihanga lyaitu, kandi akatwombekera isorrokaniro.” 6Nukwo Yesu kugenda nabo. Obu akaba alihaihi kuhika ha nju, mukuru w'ab'amahe yatuma banywani be bamugambe bati: “MUKAMA wange, leka kwejwahiza busa, habwokuba tinsemeriire kukutaahya omwange; 7kandi nyerozire nkooku ntasemeriire kwija nambere oli. Gamba ekigambo kyonka, omuheereza wange araakira. 8Habwokuba na nyowe ndi muntu arukulemwa, kandi nyina abaserikale aba ndukulema. Obu ngambira omu nti: ‘Genda’, agenda; n'ondi nti: ‘Ija’ aija; n'omuheereza wange nti: ‘Kora kinu’, akikora.” 9Yesu obu yahuliire ebigambo ebi yahunirra, yahinduka yagambira ekitebe ky'abantu abamuhondiire ati: “Nimbagambira nti: Tinkabonaga okwikiriza nka kunu, noobu haakubaire omu Isirairi”. 10Abakaba batumirwe, obu bagarukire omu ka, bakasanga omuheereza akizire.

Yesu naahumbuura mutabani w'omufaakati

11Obu haahingwireho akasumi kake, Yesu yagenda omu rubuga Naini aina abeegesebwa be n'ekitebe ky'abantu baingi. 12Obu akaba nairirra irembo ly'orubuga, yatangaana abahimbire omutumbi gw'omutabani w'omufaakati, kandi nuwe mwana we omu wenka. Abantu baingi ab'omu rubuga bakaba nibagenda nawe. 13MUKAMA Yesu obu yamurozire, yamukwatirwa embabazi, yamugambira ati: “Leka kurra.” 14Yairra haihi, yakwata ha ruhinyo, abakaba bahimbire omutumbi baayemerra. Yagamba ati: Musigazi iwe, ninkugamba nti: “Imuka.” 15Ow'akaba afiire yaikarra, yatandika kubaza. Yesu yamugarurra nyina. 16Aho boona baakwatwa obutiini, kandi baakugiza Ruhanga nibagamba bati: “Omuli itwe haimukiremu omurangi mukuru!” Kandi bati: “Ruhanga aizire kujuna abantu be!” 17Amakuru ganu hali Yesu gaararanga omu Buyudaaya yoona n'ensi eziherraineho.

Abaatumirwe Yohaana Omubatiza nibakaguza Yesu

(Mat 11:2-19)

18Abeegesebwa ba Yohaana bakamusubirra ebi byona. Nawe nukwo kweta babiri hali bo, yabatuma hali MUKAMA Yesu 19bamukaguze bati: “Niiwe arukugenda kwija, rundi tutegereze ondi?” 20Obu baahikire hali Yesu baamugambira bati: “Yohaana Omubatiza atutumire okukukaguza ngu: ‘Niiwe ogu arukugenda kwija, rundi tutegereze ondi?’” 21Omu kasumi ako Yesu akakiza endwara za buli mulingo nk'ebidanda, emyoyo emibi, kandi abafu b'amaiso yabaigura amaiso. 22#Is 35:5,6; Is 61:1.Nukwo kugarukamu abeegesebwa ba Yohaana ati: “Mugarukeyo, mugambire Yohaana ebi murozire n'ebi muhuliire ngu, abafu b'amaiso nibarora, abalema nibarubata, abagenge bakiziibwe, abafu b'amatu nibahurra, abaafiire nibahumbuurwa, n'abaseege nibarangirirwa Amakuru Amarungi. 23W'omugisa ogu atarukunyesiitaraho.”

24Abaatumirwe Yohaana obu baagarukireyo, Yesu yatandika kusoborra ebitebe by'abantu hali Yohaana ati: “Omu irungu mukagenda kurorayo ki? Orubingo orurukutengesebwa omuyaga? 25Obu, mukagenda kurorayoki? Omuntu ajwaire engoye ezirukunekaneka? Ningira abo abajwara bati kandi abaikara nibasemererwa, basangwa omu bikaali by'abakama! 26Obu, mukagenda kurorayoki? Omurangi? Ego, nimbagambira nti: Naakira n'omurangi.

27 # Mara 3:1. Habwokuba Yohaana ogu nuwe ayahandiikirweho ngu:

‘Dora nintuma omukwenda wange akwebembere,

nuwe akusemereze omuhanda.’ 28Nimbagambira nti: Omu bantu abaazairwe abakazi, busamu n'omu arukukira Yohaana ekitiinisa; baitu omuto omu bukama bwa Ruhanga naamukira.” 29#Mat 21:32; Luk 3:12.(Abantu boona, hamu n'abasorooza b'omusoro abakaba babatiziibwe Yohaana, obu baahuliire ebigambo ebi, baakugiza Ruhanga habw'entegeka ye. 30Baitu Abafalisaayo n'abeegesa b'ebiragiro abataraikirize bukatizibwa Yohaana, bakanga entegeka Ruhanga ei yabategekiire.)

31“Hati nu, abantu ab'ebiro binu ndabalengesaniza na ki? Kandi nibasisana bata? 32Nibasisana abaana abaikaliire omu katale nibeetangana bati:

‘Tukabaterra endere, timwazina!

Twateera empamo, timwarra!’ 33Yohaana Omubatiza akaija atarukulya byokulya kandi atarukunywa marwa; inywe mwagamba ngu: ‘Aroho omwoyo omubi!’ 34Baitu Omwana w'omuntu, uwe akaija naalya kandi naanywa; mwagamba ngu: ‘Dora omukoizi kandi omutamiizi, nganjani y'abasorooza b'omusoro n'abasiisi!’ 35Baitu amagezi ga Ruhanga gamanyirwa ha bikorwa byago.”

Engonzi z'omukazi omusiisi ayaganyirwe

36Omu ha Bafalisaayo akeeta Yesu okulya nawe. Yesu yataaha omunju ye, yaikarra kulya. 37#Mat 26:7; Mar 14:3; Yoh 12:3.Omu rubuga oru hakaba harumu omukazi omusiisi. Obu yamanyire Yesu nkooku arukulya omunju y'Omufalisaayo, yaleeta orusale rw'amagita agarukuboya kurungi. 38Yamwemerra enyuma narra. Amaizi ag'omu maiso ge gaajubya ebigere bya Yesu, yabiragaza n'isoke rye, yabinywegera, yabisiiga amagita ago.

39Omufalisaayo ow'akaba araaliize Yesu obu yakirozire, yateekereza omunda ye ati “Omuntu onu kakuba abaire ali murangi, yakumanyire omukazi onu arukumukwataho nkooku ali musiisi!” 40Yesu nukwo kumugarukamu ati: “Simooni, nyina eki ndukugonza kukugambira.” Nawe yagarukamu ati: “Mwegesa, kingambire.” 41Nandiki Yesu ati: “Hakaba haroho abanyamabanja babiri abaatongwaga omuntu. Omu akaba naatongwa siringi rukumi, ondi siringi kikumi. 42Obu baabuzirwe eky'okusasura, bombi yabaganyira. Hali abo bombi nooha alikira kumugonza?” 43Simooni yamugarukamu ati: “Ninteekereza oli ou yaganyiire enyingi.” Yesu yagamba ati: “Ocwiremu kurungi.”

44Nubwo yahindukira omukazi, yagambira Simooni ati: “Omukazi ogu omuboine? Obu ntaahire omunju yaawe, tompaire amaizi g'okunaba ebigere, baitu onu ajubize ebigere byange n'amaizi ag'omu maiso ge, yabiragaza n'isoke rye. 45Kandi obu ontangiriire tonnywegiirege, baitu omwanya gwona ogu nakamara hanu, omukazi onu takalekiire kunywegera ebigere byange. 46Iwe tonseesire amagita ha mutwe, baitu uwe asiigire ebigere byange amagita agarukuboya kurungi. 47Nahabweki ninkugambira nti: Habw'okugonza kwe okwingi, ebibi bye ebingi bimuganyiirwe; baitu anyakuganyirwa ebike, agonza kake.” 48Nubwo Yesu yagambira omukazi ati: “Oganyirwe ebibi byawe.” 49Abo abakaba baikaliire nibalya nawe baatandika kukaguzangana bati: “Onu nuwe oha arukuganyira ebibi?” 50Baitu Yesu yagambira omukazi ati: “Okwikiriza kwawe kukujunire; genda n'obusinge.”

ที่ได้เลือกล่าสุด:

Luk 7: BRR2008

เน้นข้อความ

แบ่งปัน

คัดลอก