Mbete Matiye 6
6
1Í ru̧ ke mun woiri rɔkɔ í laɓ suki ke riŋ Ŋgerzah ké nun nzukri ɓay hi̧ riŋ woiri ɓá mgbe. I laɓ ɓay hi̧ nzukri ɓá ko fe laɓna suki woiri le, i ta ziŋ kpaŋndɔk ké ta̧w bah woiri ké nunmbam ra ya. 2Gelke i laɓ law in ziŋ nzuk sehri dale, ká-kah-u ɓá ta-a. Nzuk-mu̧h ketinari mí ƴo laɓ kaŋ ké vul misoŋ, ké mahful mgboŋ pi hi̧ riŋ ɗina woyri mgbe ké nzak nzukri. Ɓa ketina, mí-i ƴo ɓah ɓayay hi̧ wuri, kpaŋndɔk woyri le ku ziŋ keɗ da. 3A wo ba, gelke mu laɓ law in ziŋ nzuk sehri le, mú hi̧ ndɔk kperu wo ɓá tu fe ké ndɔk lakna laɓ ra ya 4ɓay hi̧ ɓo law in ké mu laɓ ra ɓá laɓ ké gel a mu̧h-u dale, bah wo ké ƴo ko suki ké mu laɓ ké gel a mu̧h-u ra ɓay el hi̧ mu ɓáy.
5Gelke i ƴo ɓah ɓay ziŋ Ŋgerzah le, i láɓ kandɔk nzuk-mu̧h ketinari ƴo laɓu ya ɓay fe le, ku ƴo síɓa mí ku goŋ Ŋgerzah ké vul misoŋ, ké ndiseŋe pi hi̧ nzukri ɓá ko góŋ Ŋgerzah woyri mí kona-aw ɓa fe law rihna woyri. Ɓa ketina, mi ƴo ɓah ɓayay hi̧ wuri, kpaŋndɔk woyri le ku ziŋ keɗ da. 6A wo ba, gelke mu ƴo ɓah ɓay ziŋ Ŋgerzah le, mú mu̧h mun wo ké ti̧w gel, mú tuh nzakful ɓu tul wo, mí mú ɓah ɓay ziŋ bah wo ké ƴo gel a mu̧h-u ra dale, bah wo ké ƴo ko mu ké gel a mu̧h-u ra ɓay hi̧ suki ye ɓá gi ziŋ mu. 7Mu ƴo ɓah ɓay ziŋ Ŋgerzah le, mú ro ɓay raɓ raɓ kandɔk sa̧wnzuk a ɓoruri ya. Ku ker ɓahri se, tumbɔl ró ɓay woyri mí Ŋgerzah ɓay lah niri. 8Dale í ndɔl fe laɓna woyri ya ɓayu ké bah woiri tu fe ké i na ɗaka-u pol dara mí i vbi ni ɓayu-aw ɓáy. 9Mí í ɓah ɓay ziŋ ni kandɔkay :
Bah wah ké nunmbam,
riŋ ɗina wo mbew yaŋ ɓá mgbe ké nzak nzukri ɓahri,
mu ɓa záh woyri.
10Lák mbay wo ɓá ya̧ gel.
Fe ké mu yih laɓu ɓá ti̧h ké tusiɓa kandɔk a nunmbam.
11Mú hi̧ na fe su̧na a namu-aw, náh su̧ guri.
12Mú lu salɓay suya ké mgba tul wah kandɔk a wah, nah sel nzukri ké laɓ na suya.
13Le mú hi̧ fe-leh law ɓá ziŋ na ya. Wara le mú sel na ɓil ndɔk záh law a pipiri-u.
14Gelke i sel nzukri ké laɓ wuri suya le, bah woiri a nunmbam ɓay lu salɓay suya ké tul woiri. 15Gelke i sa sel nzukri ké laɓ wuri suya ya le, bah woiri ɓay poŋ salɓay suya sa tul woiri.
16Í ru̧ ke mun woiri rɔkɔ í saŋ mbih kandɔk nzuk-mu̧h ketinari. Ku haw nzakpol woyri. Ku ŋga̧h nun woyri hi̧ nzukri ɓá ko saŋmbih woyri. Ɓa ketina, mi ƴo ɓah ɓayay hi̧ wuri, kpaŋndɔk woyri le ku ziŋ keɗ da. 17-18A wo ba, nam ké mu saŋ mbih le, mú wɔk nun wo, mú nu̧h num tul wo ɓa suki rɔkɔ nzukri ɓá tu saŋmbih wo. Dale bah wo ké mu̧h mun ye ké nun nzukri ra ƴo ko fe ké mu laɓ ké gel a mu̧h-u, mí ke ɓay hi̧ suki ye ɓá gi ziŋ mu.
19Í mbu̧h fe ziŋna woiri ké tusiɓa ya. Tusiɓa ra ɓa gel ké si̧niri ƴo ɓeɓ fe ké ri, fe a ɓoruri ba, ƴo ko gay. Riɓari ƴo haw nzak vul si rih feri ɓilu pi. 20Mí í ka̧y fe ziŋna woiri tul hani ké nunmbam. Ké nunmbam ra ndereri nde fe ké ri ya, feri ko gay ké ri ya, riɓari haw nzak vul fa̧h fe ké ri ya. 21Gel a a̧y ké fe ziŋna wo ku̧ ri ra, sa gelaw mí law wo te sa sari. 22Lampe ké mun wo mí ɓa nun wo. Kaŋaw mí nun wo te-teh le, gel ɓay na ɓa teh-u ké mun wo gbam. 23Gelke nun wo teh gel ya le, mun wo gbam na ɓil tirim. Nun wo hi̧ gel tehna ké mun wo na ɓa tirima le, tirima-aw na nduŋ gaŋ. 24Mgbal ké hi̧ tul ye hi̧ bahgaŋri seɗe ta-a. Mgbal ra ɓay fu̧y nzuk a mbewu, ke él sa nzuk a ɓoru. Ke ɓay ƴo ke nzuk a mbewu ke law mbew, bahgaŋ a ɓoru ba, ke él kpȩhr ni. Kandɔkaw mí mahful ɓay mú mbu̧h fe ziŋna tukala ke Ŋgerzah ta-a.
25Sa̧wu mí-i ƴo ɓah hi̧ wuri ɓahri se, í hi̧ law woiri ɓá tehre ya, ɓa ra kerɓay fe su̧na, ɓa ra kerɓay gar ndohna. Uwa, nzuk pirmatul mba tul fe su̧na mba-mba, mun nzuk mba tul gar ndohna mba-mba, kaŋ ya le ? 26Í ko gundoyri. Gundoyri ruh fe ya, vbeh fe pay ya, mbu̧h fe payri ku̧ pul ya. Bah woiri a nunmbam ƴo hɔl gundoyri-aw. A woiri ba, i mba tul gundoyri mba-mba, kaŋ ya le ? 27Ké sakra woiri-ay ra wa, nzuk a suŋ mí law ye tehre ni le, mah laɓ sa̧wseh ndi̧ dɔm tul nam ye le wo ? 28Ɓay gar ndohna ba, ɓay fe mí i hi̧ kerɓay ra tehre law woiri le ? Í ko funa feri ɓil kpah-aw, í hi̧ kona-u ɓá guh law woiri. Funa feri su ɓa gama, fe-uri laɓ pihna ya, kaŋ gar ya. 29Mí-i ƴo ɓah hi̧ wuri ɓahri se, Salomoŋ mbay a luki ké lewsa̧ ke va̧na ye gbam, ke ndoh gar ké ndɔh mah ke funa fe kpahri-aw ya dih. 30A ké gay feri ɓil kpah ké Ŋgerzah ndoh funa ɓa gar ndohna, pele le, hɔrɔ se ra wa, ani ɓáy mí ke a woiri le ? I mba tul fe-uri mba-mba, kaŋ ya le ? Uwa, a woiri nzukri ké law woiri kehr seɗe. 31Kaŋ dale kerɓay feri ké i ƴo ɓahri, “a fe mí-i sú̧-u le”, “a fe mí-i nzó-u le”, “gar fe mí-i ndóh-u le” ɓá tehre law woiri ya. 32Ɓayu ké sa̧wnzuk a ɓoruri mí ƴo ɗuk fal feri-aw. Mí bah woiri ké nunmbam tu feri riw ké mah mun woiri tu-tu. 33Dale í poŋ mun woiri hi̧ Ŋgerzah ɓá lak mbay tulu, í hi̧ mun woiri ɓá tu Ŋgerzah ɓa záh woiri dara mí fe a ɓoruri-aw le, ke ndár hi̧ wuri ɓáy. 34Kaŋaw mí í hi̧ kerɓay ɓá tehre law woiri tul nam a pele ya. Fe zɔklɔ nam a pele na ɓay pele. Fe zɔklɔ nam a suŋ suŋ na ɓay namu-aw.
ที่ได้เลือกล่าสุด:
Mbete Matiye 6: SIAFNK
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© Wycliffe Bible Translators, Inc. All rights reserved.
