DIKETSO 26
26
1Jwale, Agripa a re ho Pauluse: O ka ikarabela. Yaba Pauluse o otlolla letsoho la hae, a ikarabela, a re: 2Morena Agripa, ke re ke lehlohonolo ha ke tla ikarabela kajeno pela hao, hodima tsohle tseo Bajuda ba nqosang ka tsona; 3haholo kahobane o tseba mekgwa yohle ya Bajuda, le ditaba tsohle tse tsekwang hara bona; ke a o rapela ke hona, ke re, o nkutlwe ka sebete.
4Haele tsa bophelo ba ka, haesale le botjheng ba ka, kahobane ke bo phetse hara setjhaba sa heso, hona hae, Jerusalema, Bajuda kaofela ba di tseba. 5Erekaha e le kgale ba ntseba, ha ba rata ho bolela nnete, ba ka bolela hobane ke phetse ka mokgwa wa bafarisi oo e leng wona mokgwa o nepehileng ka ho fetisa thutong ya rona. 6Mme jwale ke eme mona, ke tle ke ahlolwe ka baka la ho tshepa pallo e baletsweng bontata rona ke Modimo, 7eo meloko ya rona e leshome le metso e mmedi e lebeletseng ho etsahala ha yona, e ntse e sebeletsa Modimo, bosiu le motshehare; ke ka baka la tshepo eo, morena Agripa, ke qoswang ke Bajuda. 8Hleka le re, ke ntho e ke keng ya ba ya dumeleha ho rona, hoba Modimo o tsosa bafu na?
9Haele nna, efela ke ne ke lekantse hore ke tshwanetse ho etsa ho hongata ho lwantsha lebitso la Jesu wa Nasaretha ka hona. 10Ka fela ka etsa jwalo Jerusalema, ka kwalla bahalaledi ba bangata teronkong, ka matla ao ke neng ke a neilwe ke baprista ba baholo; le mohla ba neng ba bolawa, le nna ke ne ke dumela. 11Masinagogeng wohle hangata ka ba tsohela matla, ka ba otla, ka ba qophella hore ba nyefole; mme kahobane ke ne ke ba halefetse haholoholo, ka ba hlorisa le ho isa metseng ya ditjhaba.
12Yare ha ke ntse ke hopotse tseo, ke ya Damaseka ka matla le ka taelo ya baprista ba baholo, 13hela! morena, e le motshehare, ha ke le tseleng, ka bona lesedi le tswang lehodimong, le fetisang la letsatsi ka ho kganya, le nteela hare le bao ke tsamayang le bona. 14Yaba re wela fatshe kaofela, mme ka utlwa lentswe le re ho nna, ka puo ya Seheberu: Saule, Saule, o ntlhorisetsang na? Ho thata ho wena ho raha ditsenene. 15Ka re: O mang, Morena? A re: Ke nna Jesu, eo o mo hlorisang. 16Empa tsoha, o eme ka maoto; hobane ke itlhahisitse ho wena, hore ke tle ke o bee mohlanka le paki ya ditaba tseo o di boneng le ya tseo ke tla itsebisa ho wena ka tsona. 17Ke tla o lwela setjhabeng sena, le ditjhabeng tseo ke o romelang ho tsona jwale, 18o tle o tutubolle mahlo a bona, hore ba tlohe lefifing ho kena leseding, ba tlohe le matleng a Satane ho sokolohela ho Modimo, mme ba bone tshwarelo ya dibe tsa bona le lefa hara bahalaledi ka ho dumela ho nna.
19Jwale, wena morena Agripa, ha ke a ka ka hana pontsho eo ya lehodimo; 20empa ka qala ho bolella ba Damaseka, le ba Jerusalema, le ba Judea bohle, ka ntoo bolella ditjhaba tse ding, hore bohle ba bake, ba sokolohele ho Modimo, ba ntse ba etsa mesebetsi e tshwanelang pako. 21Ke tsona ditaba tseo Bajuda ba ntshwereng ka baka la tsona tempeleng, tseo ba batlileng ho mpolaya ka baka la tsona. 22Empa ka hobane ke bone thuso ho Modimo, ke tiiseditse ho fihlela la kajeno ho bolella ba banyenyane le ba baholo, mme ha ke a ka ka bolela ditaba tse ding, haese tseo Moshe le baporofeta ba itseng, di tla hlaha; 23kamoo ho itsweng kateng, Kreste o tla bolawa, e be yena ya tsohang pele bafung, a tle a bolele lesedi ho setjhaba sena le ho ditjhaba tse ding.
24A re a sa ikarabela ka taba tseo, Festuse a phahamisa lentswe, a re ho yena: O a hlanya, Pauluse, tsebo e kgolo ya hao e o fetohetse bohlanya.
25Pauluse a mpa a re: Ha ke hlanye, Festuse ya kgabane, empa ke bolela ditaba tsa nnete le tsa hlalefo. 26Hobane le yena morena o a di tseba taba tseo, mme ke di bolela ho yena phatlalatsa, kahobane ke a kgolwa hore ha ho e nngwe ya tsona e mo siretseng; hobane ha ho letho tabeng tseo le entsweng sephiring. 27Morena Agripa, na o dumela baporofeta na? Ke a tseba hobane o a ba dumela!
28Agripa a re ho Pauluse: O batla ho ntlhola hore ke be mokreste. 29Pauluse a re: Hoja Modimo o ka etsa, kapa haufi, kapa kgale, hore, e seng wena feela, empa le bohle ba mmamelang kajeno, le be jwaloka nna, feela e seng ka ditlamo tsena.
30Yare hobane a bolele taba tseo, morena a tloha, le mmusisi, le Berenise, le ba dutseng le bona. 31Yare ha ba le kathoko, ba bolellana, ba re: Motho eo ha a ka a etsa letho le tshwanelang lefu, leha e le teronko. 32Agripa a re ho Festuse: Motho eo a ka be a lokollwa, hoja a se ke a ipea ho Sesare.
ที่ได้เลือกล่าสุด:
DIKETSO 26: SSO61-SO
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© Bible Society of South Africa 1961. Used with permission. All rights reserved.
