GÉNESIS 2
2
1Chashnami jahua pachatapash, cai pachatapash, chaicunapi tucui ima tiajcunatapash ruraita tucuchirca. 2Taita Diosca, canchis punllapimi tucui ruranata tucuchirca. Chai canchis punllapimi, tucuita rurajushcamanda samarca. 3Chai canchis punllatami, Taita Diosca bendiciashpa paipajlla cachun shicanyachirca. Tucuita rurashpa callarichishcamanda chai punllapi samashpami, shina shicanyachirca.
Runataca, Edén huertapimi churashca
4Jahua pachata, cai pachata rurai callarishcacunaca cashnami: Cai pachata, jahua pachata, Mandaj Taita Dios rurajui punllapica, 5pambapi tucui ima yurapash, pambapi tucui ima jihuapash cai pachapica nara viñarcachu. Mandaj Taita Diosca, cai pachapica nara tamiachishcachu carca. Alpapi imata rurangapajpash, pipash nara tiarcachu. 6Shina cajpipash alpa ucumanda yacu samai vichai llujshishpami, tucui cai pachapi jicharijurca. 7Shinamandami Mandaj Taita Diosca, runataca ñutu alpamanda rurarca. Chai runapaj singapi fucushpami, causaita cuj samaita curca. Chaimandapachami runaca, causaita callarirca.
8Mandaj Taita Diosca, indi llujshimuj ladomanmi, Edén pushtupi shuj huertara rurashpa tarpurca. Chaipimi, pai rurashca runataca churarca. 9Mandaj Taita Diosca chai alpapimi, munanayai ricurijuj, micungapaj ali tucui yuracunata viñachirca. Shinallata chai huerta chaupipica, causaita cuj yuratapashmi viñachirca. Alita, nalita yachaita cuj yuratapashmi viñachirca.
10Edenmandaca, ashtaca yacumi huertaman jicharijurca. Chai huertamandami, chuscupi chaupirishpa ri callarijurca. 11Shuj yacuca, Pisón shutimi. Chai yacuca, oro tiaj Havila shuti tucuilla llactatami muyujun. 12Chai llactamanda oroca aligupachami. Chaipica, mishquillagu ashnajuj bedelio nishca jambipash, ónice nishca rumicunapashmi tian.
13Ishcaipi chaupirishpa rijuj yacuca, Gihón shutimi. Chai yacumi, Cus shuti tucuilla llactata muyujun. 14Quimsapi chaupirishpa rijuj yacuca, Hidekel shutimi. Chai yacuca, Asiria llactatami indi llujshimuj ladoman rijun. Chuscupi chaupirishpa rijuj yacuca, Eufrates shutimi.
15Mandaj Taita Diosca, Edén huertapi imatapash rurashpa cuidachunmi, runataca apashpa churarca. 16Mandaj Taita Diosca, runataca cashna nishpami mandarca: “Huertapi tiaj tucui yuracunapi fucushcataca micui ushanguimi. 17Ashtahuangarin alita, nalita yachaita cuj yurapi fucushcataca ama micunguichu. Ima punlla cashpapash, chai yuramanda micushpaca huañunguipachami” nircami.
18Chai jipami, Mandaj Taita Diosca cashna nirca: “Jarica, pailla causanaca nalichu. Paita ayudashpa causachun, shuj cumbata rurasha” nircami. 19Shina nishpami Mandaj Taita Diosca, alpamanda rurashca, sachacunapi causaj tucui animalcunata, jahuata rij alasyu tucui animalcunata, Adán ricushpa shutita churachun apamurca. Causaj tucui animalcunaca, Adán shutichijpimi, chai shutihuan quedarca. 20Chashnami Adanga, tucui animalcunata, jahuata rij alasyu animalcunata, pambapi causaj tucui animalcunatapash shutichirca. Ashtahuangarin Adanda cumbashpa paita ayudajca, na tiarcachu. 21Shinamandami Mandaj Taita Diosca, ninan puñuita Adanbajman cachamurca. Pai ninanda puñujpimi, shuj costillasta llujchishpa, chai aichataca cutinllata vicharca. 22Jarimanda llujchishca costillastami, Mandaj Taita Diosca shuj huarmita rurashpa, jaripajman apamurca. 23Chaimandami Adanga, cashna nirca:
“Cunangarimbash, paica ñuca tullumanda rurashca ñuca tullallatami. Ñuca aichamanda rurashca ñuca aichallatami. Shina cashcamanda paica, Huarmi shutimi canga. Paica, jarimanda llujchishcami” nircami.
24Chaimandami jarica, paipaj taitata, paipaj mamata saquishpa, paipaj huarmihuan tandanajushpa, shujlla aicha tucushpa causanajunga.
25Adanbash, paipaj huarmipash ishcandi lluchullacunami carca. Chashna cashpapash, na pingai tucunajurcachu.
ที่ได้เลือกล่าสุด:
GÉNESIS 2: QUII
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Quichua Imbabura Bible © United Bible Societies, 1994.