Ləwke 4

Gətəli kadzeghe Yɛsə

(MAT 4.1-11; MRK 1.12-13)

1Pa Yɛsə zhɛnakame geva same kwa Zhəwrdɛŋe. Nahe ŋkɛ kenza bətə mbe Sefəa Shala. Pa Sefəa Shala keleghe ŋkɛ kadzete ɓerama. 2Pa gətəli dzeghakɛ ŋkɛ kahɛ wəfaɗemsə. Wəsə shɛ kezehwe Yɛsə mbe hɛa shɛhɛ we. Ma kwa kiɗi hɛa shɛhɛ ne, pa ma zhɛte nda. 3Tagha gɛ, ma ke gətəli shɛ: «Ma kenza ŋkɛ Wəzege ta Shala na ne, geze nda ke pelɛ nya kezha zhɛrenyɛ ŋkɛ kaɗafa.» 4Ma ke Yɛsə shɛ: «Ma ke rafete geva mbe Ghena ta shala: Deke ɗafa nde ve ŋkwa teghweme we.»

5Pa gətəli keleghe ŋkɛ kadzeme ŋkwa nya biya ma. Taghanyɛ ne, pa ncɛte nda pɛtɛa hɛɗi meghe nyi te hɛɗi lema. 6Ma ke shɛ: «Kateve ŋa pɛtɛa berete ba'a mcɛləa hɛɗi meghea shɛhɛ 'ya. Kwa nza ŋkɛ nahe ŋkɛ kendeke ɗa geva, wərə 'ya kandeke nda ŋkɛ ke wəndə nya ɗe 'ya. 7Vatse gɛ, gwəɗəŋə ŋa kwa kema ta ɗa, katenza pɛtɛa wəshia shɛhɛ kaŋa ŋa.» 8Ma ke Yɛsə shɛ: «Ma ke rafete geva mbe Ghena ta Shala: Mahwətə Shala ta ŋa yahi na kahawe ve, deke gheŋkɛ yagwəɗəŋə na kwa kema ta ŋkɛ.»

9Pa gətəli keleghe ŋkɛ kadzeme Zhɛrəzalɛm, veyi ŋkɛ kwa ghəa ghɛa Shala. Ma ke shɛ: «Ma kenza ŋkɛ Wəzege ta Shala na ne, neghaghe ghəa ŋa kadzawa, 10kwa nza ŋkɛ ma ke rafete geva mbe Ghena ta Shala: Kategeze nda Shala ke ka ghwene ta ŋkɛ kaya ŋa. 11Zhɛne ne, katekele ŋa hɛ te dzeve ta nci kezha ɗema seɗa ta ŋa kampə nda geva ke pelɛ.» 12Ma ke Yɛsə zhɛnete nda: «Ma ke rafete geva mbe Ghena ta Shala: Dzeghema Mahwətə Shala ta ŋa na ma.» 13Ma kwa kiɗimte dzeghe Yɛsə gətəli le mama ta ntsehwele ne, pa slənyɛ yite hwa'a te və nya kesləyi geva.

Yɛsə kagha slene ta ŋkɛ kwa Galilɛ

(MAT 4.12-17; MRK 1.14-15)

14Pa Yɛsə zhɛneghe geva kadzawa Galilɛ, viɗi va berete ta Sefəa Shala. Pɛtɛ mbeli kageze ghena ta ŋkɛ te hɛɗia shɛ. 15Kateke nda wəshi ŋkɛ ke mbeli mbe yɛ cɛ kesəkwə ghə ta ka Zhəwif, pɛtɛ mbeli kageze zləvəa ŋkɛ.

Kayɛ Yɛsə ka Nazarɛt we

(MAT 13.53-58; MRK 6.1-6)

16Cape Yɛsə kadzawa Nazarɛt, te ŋkwa nya kele ŋkɛ. Ma te veci kezhɛne mpi ne, pa dzembe cɛ kesəkwə ghə kala nya seneve ŋkɛ. Pa ŋkɛ sate kajaŋga ghena ta Shala. 17Pa mbeli ndeke nda palepa ta nde mɛ ŋkwa Ɛzayi. Pa ŋkɛ pelemte ba'a sepate kwete ŋkwa, ma ke rafete geva te ŋkwa shɛ:

18«Nahe Sefəa Shala kenza kənəa 'ya.

Nahe ŋkɛ kentave ɗa kezha zlape nda

Ghena kwatenca nya ganyɛ ke ka titikwəa kɛfi,

keghwenakɛ ɗa kezha geze pele ta ka daŋgayɛ waɗe

ba'a pele ta ntsə ta ka ghwələa kɛfi,

kezha mbele mbeli nyi sa nda yaka kweci mbeli ke hɛ,

19kezha geze va nya tezlaɓa Mahwətə le mbeli te.»

20Pa Yɛsə peɗete palepa shɛ, ndeke nda ŋkɛ ke nde mene slene ba'a ntishɛnyɛ. Pɛtɛ mbeli nyi mbe cɛa shɛ kavereghe ŋkɛ. 21Tagha gɛ, ma ke sha hɛ: «Nahe ghena nya gezete nya Ghena ta Shala kemenete geva ɓeshi kaŋa ŋayɛ, gheyɛ nyi kefa ghena ta ɗa.» 22Zlama yazlama pɛtɛa mbeli nyi kefave ghena ta ŋkɛ. Hehake hɛ va ghena ganyɛ nya geze ŋkɛ. Ma ke hɛ: «Ashɛ wəzege ta Zhozɛf ŋkɛ wəka?» 23Ma ke Yɛsə sha hɛ: «Ghəpə yite we, ma pe yɛ sha tegeze ɗa ghena ŋela nya: Dakwəterə, mbete ghəa ŋa le ghəa ŋa gɛ gi! Ma pe yɛ tegeze ɗa zhɛkwa: Nahe n'yɛ kefave pɛtɛa wəshi nyi kemenete geva kwa Kapɛrnawəm, menete kala nyagha teke mbe meleme ta ŋa gi ga!» 24Ma ke Yɛsə sha hɛ zhɛkwa: «Kaganda ne, ma 'ya sha gheyɛ: Nde mɛ ŋkwa shɛ kayɛ ghena ta ŋkɛ mbeli mbe meleme ta ŋkɛ we. 25Kaganda ne, ma 'ya sha gheyɛ: ghəpə yite we, ka wedidi ya shɛ kwele kwele hwa ka Israyɛl vəa ŋkwa nya nza Ɛli teghweme. Te vecia shɛ ne, pa va ɗema me kava mahekene ba'a tere ŋkwaŋe. Kwele kwele ma menete geva te yayata ŋkwa. 26Ndagwara keghwenakɛ Ɛli Shala kalə sha kwete wəndəa nci we, ama deke ke male wede nya mbe Sarɛpta, te hɛɗia ka Sidon. 27Ka derena ya shɛ kwele kwele hwa ka Israyɛl te vəa Ɛlizɛ, nde mɛ ŋkwa, ama kwete wəndəa nci shɛ kekiɗinyɛ derena wɛŋe te we, ama deke Na'aman nde Siri.

28Kwele kwele hwepete wənə mbeli nyi mbe cɛa shɛ kwa fave ghena shɛ hɛ. 29Pepelɛhetɛme hɛ sate te ŋkwa, pa hɛ kesakave ŋkɛ mbe meleme ba'a keleghe ŋkɛ kadzeme ghəa ghweme nya nza meleme ta nci pelɛ, yitea tsəkwə ŋkɛ kadzawa. 30Ama seɗakwe ŋkɛ shavenyɛ kwelɛ tepe ta nci ba'a dzeghwanyɛ.

Wəndə nya nza 'yi'yɛghwə yitea ghə ve

(MRK 1.21-28)

31Pa Yɛsə dzawa Kapɛrnawəm, meleme ta ka Galilɛ. Kateke nda wəshi ŋkɛ ke mbeli te veci kezhɛne mpi. 32Heheɓake hɛ kwele kwele va ntsehwelea ŋkɛ kateke nda wəshi ke mbeli, kwa nza ŋkɛ le berete ta Shala geze nda ghena ŋkɛ ke hɛ. 33Ma mbe cɛ kesəkwə ghə ne, kwete wəndə nya nza 'yi'yɛghwə yitea ghə ve ya shɛ. Ma ke tsate lewela le berete: 34A! Wa yaɗe na va ghen'yɛ wa Yɛsə nde Nazarɛt? Gha se kezha za sebe te ghen'yɛ na? Nahe 'ya keɗepe ŋa, wəndə nya keveyi geva tekeleke nya ghweneke Shala na.» 35Ma ke Yɛsə shɛ le ghyana: «Nza divə, shave ŋa mbe wəndə nya.» Pa 'yi'yɛghwəa shɛ neghate wəndəa shɛ te ŋkwa kwa kema ta pɛtɛa mbeli nyi tagha. Pa nde shavenyɛ mbe kaɗema kemenete nda wəsə kwa ndiremi. 36Heheɓake mbeli pɛtɛ ve, ma ke hɛ kwelɛ ghəa nci: «Wa nya wəsə wa? Kantsə nda ghyana wəndəa shɛ ke yɛ 'yi'yɛghwə le berete, tagha gɛ, kashave hɛ.» 37Ntake mbeli kageze ghena ta Yɛsə te yayata ŋkwa te hɛɗia shɛ.

Yɛsə kambe ka zereghwe kwele kwele

(MAT 8.14-17; MRK 1.29-34)

38Cape Yɛsə shave mbe cɛ kesəkwə ghə kalə kadzeki ghɛa Simon. Shewə kwa hawe ta Simon va ɗawa kwele kwele, pa mbeli 'yɛwakɛ va Yɛsə kezha mbe malea shɛ ŋkɛ. 39Vəkwə Yɛsə kənəa malea shɛ, pa ŋkɛ ntsehete nda ŋzle ke ɗawa. Pa ɗawa ta nta kiɗinyɛ, te ŋkwa shɛnyɛ ne, pelɛhetɛme nde. Pa nde takɛ nda wəsə kezeme ke hɛ.

40Yipə le pəkwə veci ne, pɛtɛ mbeli nyi nza mama ta ka zereghwe va hɛ ki ghɛa nci fəke nda hɛ ke Yɛsə. Pa ŋkɛ dapaghe dzeve kənəa yayata wəndəa nci ba'a mbete hɛ. 41Kashave 'yi'yɛghwə mbe kweci ka zereghwe kwele kwele le lewela, ma ke sha tsa lewela: «Gha ya kaWəzege ta Shala.» Ama pa Yɛsə ŋelete hɛ ba'a fɛake hɛ kegeze ghena, kwa nza ŋkɛ nahe hɛ keɗepe gheŋkɛ ya kaMɛsi.

Yɛsə kazlape ghena mbe Zhəwdɛ

(MRK 1.35-39)

42Ma peslema ta ŋkwa ne, cape Yɛsə shave mbe meleme kalə te ŋkwa nya ɗema mbeli te. Ntake mbeli kwele kwele kazele ŋkɛ. Ma kwa ntsate ŋkɛ hɛ ne, pa hɛ ɗehwe kezha keseyi ŋkɛ kezha ɗema ŋkɛ kaslə yitea hɛ. 43Ma ke Yɛsə sha hɛ: «Nda 'ya kalə kageze nda Ghena kwatenca nya ganyɛ ta Meghea Shala ke kweci meleme perə, kwa nza ŋkɛ kezha gheŋkɛ ghweneke ɗa Shala.» 44Pa ŋkɛ zlapete ghena shɛ mbe cɛ kesəkwə ghə ta ka Zhəwdɛ.

ที่ได้เลือกล่าสุด:

Ləwke 4: BEKDC12

เน้นข้อความ

แบ่งปัน

คัดลอก