LUKA 22
22
1Go nasaisaiana ni bred waina leven e dika asa e pei m̃aladigi, waina e pei tea sosoana ki Navakalauana. 2Go tea viri warua maga go tea midiri maga eu laaga dapala waina euga mari punue a nalakena eu matauki narei.
3Go Satan e sili Yuda waina e pei tea sosoana ki Iskariote, e pei sikai ni tea rualima sikai tamate dua. 4Go e pano, po pusum̃aki sikoti tea viri warua maga go nawota maga ni tea vavai maga, dapala waina ega vitua ki nia paki da. 5Go eu laelaea, po saisai ki navasaana naga euga tua e m̃ane. 6Go e suasua, po laaga ragi wia naga ega vitua ki nia paki da asa, taua ni naatam̃oli maga euga vuoli.
7Go naaleatia ni bred waina leven e dika asa e umai sua, waina e one asa one naga navakalauana ega vei tea maripunueana asa. 8Go e dip̃aki lua Petero go Yoane, po naga, Koroga vano po manigida marim̃ataki navakalauana, naga tuga kanikani. 9Go ero noa ki nia, ero naga, Ku masauna naga aroga marim̃ataki esava? 10Go e noa ki da, e naga, Koroga leo, ragi waina koroga wo sili sua natokoana, naatam̃oli sikai waina e dapetape noai ni naruku sikai ni noai ega wo sua mu: koroga rausi a paki ekopu ni nasum̃a waina ega wo sili asa. 11Go koroga noa ki talakea ni nasum̃a, naga Tea Vasapiseiki e noa ki‐go, e naga, Em̃ago ni nam̃enakiana wai, waina aga kani navakalauana asa, kinami ma tea vasapiseikiana aginau maga auga mamau? 12Go nae ega wo piseiki mu em̃ago warua ni elagi sikai waina sara naleo eu doko asa: tokora wanogoe koroga marim̃ataki asa. 13Go ero pano, po pap̃ai dapala waina e noa ki da asa: go ero marim̃ataki navakalauana.
14Go ragi waina e pei aura kakana, e kere one, nara ma apostolo maga eu mamau. 15Go e noa ki da, A po masau ki namasauana naga aga kani sikoti mu navakalauana waia ega vea ki aga sua navitinumateana: nalakena a noa ki mu, 16naga Aga wo da moro gani a mau pa pa ega wo pei tea vakavuroana namarakiana ki Sup̃e. 17Go eu duae e dape lasa munu sikai, go ragi waina e pasadodom̃ataki sua, e naga, Kuga tape tea waia, po dum̃amu p̃otae dua mu asa: 18nalakena a noa ki mu, naga Aga wo da edaku ki ragi waia munu nawa ni vaine seara kakana mau, pa pa namarakiana ki Sup̃e ega wo umai. 19Go e dape bred sikai, go ragi waina e pasadodom̃ataki sua, e dova p̃orae a, po dua ra, po naga, Tea waia e pei nap̃atokogu waina e manimu pei tea vituakiana: kuga mari tea waia naga kuga midoaki nau asa. 20Go dapala nogoe lasa munu edaku ki nakaniana, po naga, Lasa munu waia e pei navasasokiana vau ni nadagu, waina e manimu pei tea takiana. 21Ma kuga leo, nam̃elearu ni tea waina e pitua ki nau e sikoti au doko wede. 22Nalakena naatam̃oli Natuna e pano lomau dapala waina e pei tea tawonakiana asa: ma ai ki naatam̃oli waina e pei tea vituakiana pae asa! 23Go eu pae asa dum̃ada pusuusu paki da ki sei kakada e pei tea waina e naga ega mari tea wanogoe.
24Go navululuana ma e pakilina m̃aleoputo kakada, ki sei kakada e alagoro pei tea warua liu. 25Go e noa ki da, e naga, Nawota ni nalauna p̃ota maga eu maramara dap̃au ra; go tea maga waina eu peani naveinawotaana dap̃au ra eu pei tea sosoana ki Tea Marim̃ataki maga. 26Ma nimu kuga ta dapala nogoe mau: ma tea waina e p̃arua m̃aleoputo kakamu, ega vei tea mariana ega tapala tea takariki; go tea waina e maraki, ega tapala tea waina e suasua. 27Nalakena sei e p̃arua, tea waina e kere one ganikani, kite tea waina e suasua? E da pei tea waina e kere one ganikani kite? 28Ma kinau a doko m̃aleoputo kakamu a dakiusi tea waina e suasua. Ma nimu ku pei tea waina ku sikoti au doko namaridogo‐au‐ana maga; 29go kinau a manimu dawona ki namarakiana sikai, dakiusi waina Tamagu e maginau dawona ki nia, 30naga kuga kanikani po munu tea ni wede aginau namarakiana aginau; go kuga wo dasake malo tasake maga po do pasap̃otae naworawora ni Israel rualima sikai tamate dua. 31Simon, Simon, p̃a leo, Satan e datago mu, naga ega nuanua ki mu dapala whiit: 32ma kinau a manigo pavara naga nasaralomauana anigo ega ta makoto mau: go nigo, ragi waina p̃a wo moro maradoa, p̃a mari taim̃a maga euga kasua. 33Go e noa ki nia, Nawota, a marim̃ata sua naga aga sikoti ko paki nasum̃a ni navavaiana go paki namateana pano. 34Go e naga, A noa ki‐go, Petero, toa ega ko da dare masoso mau, ma p̃a wo paka tolu pasagoro naga ku atae au.
35Go e noa ki da, e naga, Ragi waina a dip̃aki lua mu, go ku p̃alo ki nala ni m̃ane, go nala ni nakaniana, go nam̃elevasiana maga, ku dika ki te navatuna kite? Go eu naga, Au da dika ki te navatuna mau. 36Go e noa ki da, e naga, Ma ragi waia, tea waina e peani nala ni m̃ane sikai, ega tape a, go ega tape nala ni nakaniana sikai: go tea waina e da peani mau, ega sori sugoro aneana po pakotovi lova sikai. 37Nalakena a noa ki mu, naga tea waia waina e pei tea midiriana e one asa one naga ega vei tea marisuaana au, Go e pei tea veveana sikoti tea tapiri maga: nalakena tea waina e pei tea midiriana nalo kakagu e peani namarisuaana. 38Go eu naga, Nawota, p̃a leo, lova dua nea. Go e noa ki da, e naga, E pei te lapa.
39Go e dave umai, po paki tava ni Oliva pano, pae natomariana aneana; go tea vasapiseikiana aneana maga ma eu dausi a. 40Go ragi waina e pakilina tokora wanogoe, e noa ki da, e naga, Kuga tapasavasa naga kuga ta paki namaridogoana mau. 41Go e pa dua ki da namalopa dapala waina eu nadi ki vatu; go e ditip̃atua po dapasavasa, po naga, 42Mama, ku pe suasua, p̃a tape lua lasa munu waia kiagu: ma tea waina ega vei tea mariana ega ta pei namasauana aginau mau, ma ega vei tea anigo. 43Go agelo sikai, waina e pae nakoroatelagi umai, e pakilina ki nia, po mari a e kasua. 44Go e dogo kite sa p̃arua liu, po dapasavasa kasukasua: go toro kakana e po dakiusi natuturu warua maga ni nada waina eu do dowo paki natano. 45Go ragi waina e duleana pa dua ki natapasavasaana, e umai punusi tea vasapiseikiana maga, po pap̃ai ra eu maturu nalakena nasusueana, go e noa ki da, Ekasana ku maturu? 46Kuga tuleana po dapasavasa, naga kuga ta paki namaridogoana mau.
47Go ragi waina e ko do pasa, kuga leo, taua sikai ni naatam̃oli maga, go tea waina e pei tea sosoana ki Yuda, tea sikai ni tea rualima sikai tamate dua, e pea ki da; go e umai paki m̃aladigi ki Yesu naga ega tum̃ili a. 48Ma Yesu e noa ki nia, e naga, Yuda, ku pitua ki naatam̃oli Natuna ki natum̃iliana sikai kite? 49Go ragi waina tea maga waina eu dalivirigoro e eu punusi tea waina ega vakilina, eu naga, Nawota, auga atugi ki lova kite? 50Go sikai kakada e atugi tea suasua ki tea viri warua liu, po dae lua nadaligana ni matua. 51Ma Yesu e pasa dara po naga, Kuga ko du. Go e kisidogo nadaligana, po mari pauri a. 52Go Yesu e noa ki tea viri warua maga, go ki nawota maga ni tea vavai maga ni nasum̃a tapu, go ki tea matua maga, waina eu rumai dip̃a e, e naga, Ku po dave umai dapala ku dip̃a tea tape pavakoto sikai, ku pua lova maga go naap̃e maga kite? 53Ragi waina a sikoti mu doko sara naaleatia roara ni nasum̃a tapu, ku da sai ki nam̃elearumu dip̃a au mau: ma ragi waia e pei aura animu, go nakasuaana ni namaligo.
54Go eu puasoki a, po piragi lua e, po piragi a paki ekopu ni nasum̃a ki tea viri warua liu. Ma Petero e dausi uvea. 55Go ragi waina eu sui nakapu m̃aleoputo ni namasopa ni nasum̃a, po mamau do natano, Petero e do natano m̃aleoputo kakada. 56Go nagoroi atara sikai e punusi a e do natano namarama ni nakapu, go e leosoki a, po naga, Tea waia ma e sikoti a doko. 57Ma e pasagoro, po naga, Koroi, a da atae a mau. 58Go edaku ki ragi kiki tea p̃ota sikai e punusi a, po naga, Nigo ma ku pei tea sikai kakada. Ma Petero e naga, Kanao, a da pei tea sikai kakada mau. 59Go edaku ki namalopa e alagoro pei tea ni aura sikai, tea p̃ota sikai e pasasokisoki kasua, po naga, Lomau tea waia ma e sikoti a doko, nalakena e pei tea ni Calilea. 60Ma Petero e naga, Kanao, a da atae tea waina ku noa e mau. Go m̃araverave, ragi waina e ko do pasa, toa e dare. 61Go Nawota e dum̃ana doa e, po leopunusi Petero. Go Petero e midoaki navasaana ki Nawota, naga e noa ki nia, e naga, Ragi waina toa ega ko da dare masoso mau, p̃a wo paka tolu pasagoro au. 62Go e paki katama po dagi p̃arua.
63Go naatam̃oli maga waina eu puati Yesu eu mari saudoa ki nia, po parati a. 64Go eu p̃augoro namatana, po pusuusu paki nia, po naga, P̃a vasapua, tea waina e p̃okati ko e pei sei? 65Go eu pasa dip̃a e tea p̃ota laapa, po do pasa sa ki nia.
66Go ragi waina e pei aleati, nasaisaiana ni tea matua maga ni narei eu pei tea viragisaisaikiana, tea viri warua maga go tea midiri maga; go eu piragi lua e paki nasaisaiana ni navasap̃otaeana adeada, 67po naga, Nigo ku pe vei Kristo, p̃a noa ki gami asa. Ma e noa ki da, A pe noa ki mu asa, ku pe ta saralomau mau: 68go a pe vusuusu paki mu, ku pe ta pasa dara mau. 69Ma pae ragi waia pa pa naatam̃oli Natuna ega wo dasake doko pisari nam̃elearu ni matua ni nakasuaana ki Sup̃e. 70Go eu mamau puti naga, Go nigo ku pei Sup̃e Natuna kite? 71Go e noa paki da, e naga, Nimu ku noa e, nalakena kinau a pei nae. Go eu naga, Tuga moro kasa ki nanoasokisokiana? Nalakena tu po dum̃agida dogo pae nawokana.
ที่ได้เลือกล่าสุด:
LUKA 22: NTB
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bible Society of the South Pacific
