LUKA 20
20
1Go e pakilina, naaleatia maga sikai kakada, ragi waina e do pasapisei ki narei roara ni nasum̃a tapu, po do dogorogo ki narogorogoana wia, tea viri warua maga eu rumai punusi a nara ma tea midiri maga go tea matua maga; 2go eu pasa, po noa ki nia, eu naga, P̃a noa ki gami: Ku mari tea maga waia pae seve naveinawotaana? Kite naata waina e dua ko naveinawotaana wanogoe e pei sei? 3Go e pasa dara po noa ki da, e naga, Kinau ma aga vusuusu paki mu ki navasaana sikai; go kuga noa ki nua asa: 4Nabapetisoana ki Yoane, e pei tea ni nakoroatelagi, kite tea ni naatam̃oli? 5Go eu dum̃ada pusum̃aki paki da, po naga, Tu pe naga, E pei tea ni nakoroatelagi; e pe wo naga, Ekasana ku da saralomau navasaana aneana mau? 6Ma tu pe naga, E pei tea ni naatam̃oli; narei mamau eu pe wo nadi gida ki vatu: nalakena eu saralomau kasua naga Yoane e pei profeta sikai. 7Go eu pasa dara, naga eu da atae a mau. 8Go Yesu e noa ki da, e naga, Go kinau aga ta noa ki mu mau naveinawotaana waina a mari tea maga waia asa.
9Go e pae asa noa ki narei naluluakia waia: Naatam̃oli sikai e lawo roara ni vaine sikai, po suasua ki nia paki tea wosiwosi natano maga, po paki navanua p̃ota pano ragi varau. 10Go ragi ni p̃aunarago e dip̃aki lua tea suasua sikai e pa punusi tea wosiwosi natano maga, naga euga tua e nawa ni nakau ni roara ni vaine seara kakada: ma tea wosiwosi natano maga eu parati a, po dip̃aki lua p̃alo ki nia. 11Go e moro dip̃aki lua tea suasua p̃ota sikai: go nae ma eu parati a, po maridao asa, po dip̃aki lua p̃alo ki nia. 12Go e moro dip̃aki lua tea ketolu: go nae ma eu mari a e pei wotu, po nadi ki nia paki etaku. 13Go nawota ni roara ni vaine e naga, Aga wo mari nasava? Aga wo dip̃aki lua natugu tea dodomiana aginau: mase nae euga wo dodomadagani a. 14Ma ragi waina tea wosiwosi natano maga eu punusi a, eu dum̃ada pusum̃aki paki da, po naga, Tea waia e pei talakea ni p̃aumaso ki tamana: tuga mari punue a, naga p̃aumaso ega vei tea anigida. 15Go eu nadi ki nia paki etaku m̃elu dua ki roara ni vaine, po mari punue a. Nalakena tea wanogoe talakea ni roara ni vaine ega wo mari nasava paki da? 16Ega wo umai po mari punue tea wosiwosi natano maga wanogoe, po pitua ki roara ni vaine paki tea p̃ota maga. Go ragi waina eu dogo e, eu naga, Ega ta dapala nogoe mau. 17Ma e leo punusi ra, po naga, Go tea waia waina e pei tea midiriana e pei nasava?
Vatu waina tea tavagi maga eu leodoa e.
Nae e pei tea mariana e pei nap̃au ni naweluki.
18Sara naata waina eu dowo paki vatu wanogoe euga wo maworawora; ma nae e pe rowo paki te naata sikai, e pe wo marip̃oroworosi a e pe vei nam̃otam̃ota.
19Go tea midiri maga go tea viri warua maga eu laaga naga euga nadi ki nam̃elearuda asa aura wanogoe; go eu matauki narei: nalakena eu atae naga e noa naluluakia wanogoe dip̃a ra. 20Go eu leo paratiki nia, po dip̃aki lua tea leo pavaraka maga, waina eu kokoroki naga eu pei tea leana, naga euga vuati navasaana aneana, dapala waina euga vitua ki nia paki namarakiana go naveinawotaana ki tea maramara. 21Go eu pusuusu paki nia, eu naga, Tea Vasapiseiki, au atae naga ku noa po pasapiseiki leana, po da piragi narae ni te naata mau, ma ku pasapiseiki lomau ki napua ki Sup̃e: 22E pae nawotaeana naga auga tua Kaisar nasautoga, kite ega tika? 23Ma e punusi namarimanumatuaana adeada, po noa ki da, 24e naga, Kuga viseiki nau denario sikai. E pilake nunu ni sei go namidiriana ki sei. Go eu naga, Tea ki Kaisar. 25Go e noa ki da, e naga, Nalakena tea wanogoe kuga tua Kaisar tea ki Kaisar, go kuga tua Sup̃e tea ki Sup̃e. 26Go eu mari sa puati navasaana wanogoe narae ni narei: go eu maga navasadaraana aneana, po punuta.
27Go Sadduki maga seara kakada eu rumai punusi a, nara waina eu noa naga namoroduleanaana e dika; go eu pusuusu paki nia, 28eu naga, Tea Vasapiseiki, Moses e midiri paki gami, naga te naata taina e pe mate, waina e peani nagoroi sikai, go e pei tika natuna, taina ega viragi nagoroi wanogoe, po magi taina mari naworana euga vakilina. 29Go tamataida larua eu doko: go tea vea e piragi nagoroi sikai, po mate natuna e dika; 30go tea kerua; go tea ketolu e piragi a; 31go dapala nogoe tea larua ma eu da doropusi te natuda eu doko mau, go eu mate. 32Sala edaku nagoroi wanogoe ma e mate. 33Nalakena tea wanogoe ragi ni namoroduleanaana nae ega wo pei nagoroi ki sei kakada? Nalakena tea larua eu peani a e pei nagoroi adeada. 34Go Yesu e noa ki da, e naga, Maramana waia natuna maga eu pitawiri, po pei tea vituakiana eu laki: 35ma tea maga waina eu pei tea midoakiana naga eu p̃ia naga euga sua maramana wanogoe, go namoroduleanaana m̃elu dua ki tea mate maga, eu da pitawiri mau, go eu da pei tea vituakiana eu laki mau: 36nalakena eu mari sa moro mate: nalakena eu pataka sikai ma agelo maga; go eu pei Sup̃e natuna maga, nalakena eu pei namoroduleanaana natuna maga. 37Ma waina tea mate maga eu pei tea sikeana eu duleana, Moses e noa sai a tokora ni nakau makalikali, ragi waina e soso Yehovah ki Sup̃e ki Abraham, go Sup̃e ki Isaak, go Sup̃e ki Yakob. 38Ma e da pei Sup̃e ki tea mate maga mau, ma e pei Sup̃e ki tea mauri maga: nalakena tea maga mamau puti eu mauri paki nia. 39Go tea midiri maga seara kakada eu pasadara po naga, Tea Vasapiseiki, ku po noa p̃ia. 40Nalakena eu da moro piviari pusuusu paki nia ki te navatuna mau.
41Go e noa ki da, Ekasana eu noa naga Kristo e pei natu ni David? 42Nalakena David e dum̃ana noa tusi ni Salamo maga, e naga.
Yehovah e noa ki Nawota aginau,
P̃a toko pisari nam̃elearugu ni matua,
43Pa pa aga ko mari tea kokona ki‐go maga euga vei malo vasiana ni nam̃elem̃a maga.
44Nalakena tea wanogoe David e soso e ki Nawota aneana, go e pei natuna dapale sava?
45Go e noa ki tea vasapiseikiana aneana maga, narei mamau eu dogo e, 46e naga, Kuga matamatua ki tea midiri maga, waina eu masauna naga euga suni sugoro varau maga surata, po dodomi navasadodomiana maga malo ni navakokotoana maga, go malo tasake vea maga ni nasum̃a ni nasaisaiana maga, go malo kere one vea maga ni nakaniana maga; 47waina eu gani dinomi nasum̃a ki nagoroi malepu maga, po dapasavasa parau sorosoro: nara euga wo dape natip̃akotoviana warua liu.
ที่ได้เลือกล่าสุด:
LUKA 20: NTB
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bible Society of the South Pacific
