YOANE 6
6
1Edaku ki naleo maga wanogoe Yesu e duagoto pano paki taleva kerua ni natasi ni Calilea, waina e pei natasi ni Tiberia. 2Go taua warua sikai ni naatam̃oli maga eu dausi a, nalakena eu punusi navaivaiana maga waina e mari ra nalo ni tea sasana maga. 3Go Yesu e sake paki tava pano, go e do natano tokora wanogoe sikoti tea vasapiseikiana aneana maga. 4Go navakalauana, nasaisaiana ki naka ni Yudea, e pei m̃aladigi. 5Nalakena tea wanogoe, ragi waina Yesu e sike namatana, po punusi naga taua warua sikai ni naatam̃oli maga eu rumai punusi a, e noa ki Filipo, e naga, Tuga vakotovi bred esava, naga tea maga wanana euga kanikani? 6Ma e noa tea wanogoe naga ega mari dogo e: nalakena nae e dum̃ana atae tea waina e naga ega mari a. 7Filipo e pasa dara e, e naga, Bred ni denario p̃onotia dua e da patakada mau, naga sara naata euga tape tea kiki. 8Tea vasapiseikiana aneana maga sikai kakada, Anderea, Simon Petero taina, e noa ki nia, 9e naga, Natureai kiki sikai e doko nea, waina e peani bred ni barle elima, go naika dua: ma tea wanogoe eu magi tea laapa waina eu doko pei nasava? 10Yesu e naga, Kuga mari naatam̃oli maga euga to natano. Go nam̃enau laapa e doko tokora wanogoe. Go naanoai maga eu do natano, naveveana kakada e alagoro pei manu lima. 11Go Yesu e dape bred maga wanogoe; go ragi waina e dapasavasa dodom̃ataki sua, e duri dua tea maga waina eu do natano; go dapala nogoe e duri dua ra naika maga pa pa eu karai. 12Go ragi waina eu puka e noa ki tea vasapiseikiana aneana maga, e naga, Kuga vila daua ki matele maga waina eu dupele, naga te seara ega ta pei tea tape puolikiana mau. 13Nalakena tea wanogoe eu pila daua ki da, po pakavuro nala rualima sikai tamate dua ki matele maga ni bred ni barle elima wanogoe, waina eu magi tea maga waina eu ganikani dupele. 14Nalakena tea wanogoe ragi waina naatam̃oli maga wanogoe eu punusi navaivaiana waina e mari a, eu naga, Tea waia e pei profeta lomau waina ega wo umai paki maramana.
15Nalakena tea wanogoe ragi waina Yesu e atae naga eu naga euga umai, po puati pavakoto asa, naga euga mari a ega vei nawota, e moro m̃elu paki tava pano nae e sikina.
16Go ragi waina e pei ragi melu, tea vasapiseikiana aneana maga eu siwo paki natasi pano; 17go eu pagi rarua sikai, po do porau duagoto natasi paki Kapernaum pano. Go e maligo sua, go Yesu e ko da umai punusi ra mau. 18Go natasi e do p̃arua nalakena nalagi warua waina e sau. 19Go ragi waina eu paluse sua e alagoro pei maile dolu kite pati, eu leopunusi Yesu e surata natasi, po do umai paki m̃aladigi ki rarua: go eu mataku. 20Ma e noa ki da, e naga, E pei kinau; kuga ta mataku mau. 21Nalakena tea wanogoe eu masauna naga euga viragi a paki rarua; go m̃araverave rarua e paki navanua waina eu naga euga vaki asa.
22Matamai ki nia taua ni naatam̃oli maga waina eu lawodu taleva kerua ni natasi eu punusi naga rarua p̃ota sikai e da doko tokora wanogoe mau, ma tea sikai maau, go naga Yesu e da sikoti tea vasapiseikiana aneana maga paki rarua mau, ma naga tea vasapiseikiana aneana maga eu sikida pano 23(ma rarua seara eu pae Tiberia umai paki m̃aladigi ki tokora waina eu gani bred asa ragi waina e dapasavasa dodom̃ataki sua): 24nalakena tea wanogoe ragi waina taua ni naatam̃oli maga eu punusi naga Yesu e da doko tokoro wanogoe mau, go naga tea vasapiseikiana aneana maga eu da doko asa mau, nara ma eu pagi rarua maga, po umai paki Kapernaum, eu do laaga Yesu. 25Go ragi waina eu pap̃ai a taleva kerua ni natasi, eu noa ki nia, eu naga, Rabbi, ku umai paki nea seve ragi? 26Yesu e pasa dara ra po naga, Lomau, lomau, a noa ki mu, naga Ku da laaga au mau nalakena ku punusi navaivaiana maga, ma ku laaga au nalakena ku gani bred seara po puka asa. 27Kuga ta p̃osiwosi mau raki navinaga waina e do sa puoli, ma kuga wosiwosi raki navinaga waina e doko pa pa paki namauriana waina e du mau du, waina naatam̃oli Natuna ega wo dua mu asa, nalakena nae wanogoe Tamana, Sup̃e, e pulusoki a. 28Nalakena tea wanogoe eu noa ki nia, eu naga, Auga mari nasava, naga auga wosiwosi ki nawosiana maga ki Sup̃e? 29Yesu e pasa dara po noa ki da, e naga, Tea waia e pei nawosiana ki Sup̃e, naga kuga saralomau tea waina nae e dip̃aki lua e umai. 30Nalakena tea wanogoe eu noa ki nia, eu naga, Nigo ku mari nasava ega vei navaivaiana, naga auga vunusi a po saralomau navasaana anigo? Ku do p̃osiwosi ki nasava? 31Tamagami maga eu gani manna masop̃alo; dapala waina e pei tea midiriana, naga E dua ra navinaga waina e pae nakoroatelagi umai naga euga kani a. 32Nalakena tea wanogoe Yesu e noa ki da, e naga Lomau, lomau, a noa ki mu, naga E da pei Moses mau waina e dua mu navinaga waina e pae nakoroatelagi umai; ma Tamagu e dua mu navinaga lomau waina e pae nakoroatelagi umai. 33Nalakena navinaga ki Sup̃e e pei tea waina e pae nakoroatelagi siwo umai, po dua maramana namauriana. 34Nalakena tea wanogoe eu noa ki nia, en naga, Nawota, p̃a tua gami navinaga wanogoe sara ragi. 35Yesu e noa ki da, e naga, Kinau a pei navinaga ni namauriana: tea waina e umai punusi au ega wo da pitolo mau, go tea waina e saralomau au ega wo da madou mau te ragi. 36Ma a noa ki sua mu, naga ku po punusi au, go ku da saralomau au mau. 37Tea mamau waina Tamagu e dua au asa ega wo umai punusi au, go tea waina e umai punusi au aga wo da nadi ki nia paki etaku mau. 38Nalakena a pae nakoroatelagi siwo umai naga aga ta mari namasauana aginau mau, ma naga aga mari namasauana ki tea waina e dip̃aki lua au umai. 39Go tea waia e pei namasauana ki tea waina e dip̃aki lua au umai, naga tea mamau waina e dua au asa aga wo da dape puoli ki te navatuna kakana mau, ma aga wo sike a ega wo duleana naaleatia edaku mau. 40Nalakena tea waia e pei namasauana ki Tamagu, naga sara naata waina eu leopunusi Natuna, po saralomau asa, euga veani namauriana waina e du mau du; go kinau aga wo sike ra euga wo duleana naaleatia edaku mau.
41Nalakena tea wanogoe navarapule maga ni Yudea eu dauruuru nalo kakana, nalakena e naga, Kinau a pei navinaga waina e pae nakoroatelagi siwo umai. 42Go eu naga, Tea waia e da pei Yesu natu ni Yosef, waina nigida tu atae tamana go p̃ilana kite? Ekasana e noa ragi waia, A po pae nakoroatelagi siwo umai? 43Yesu e pasa dara po noa ki da, e naga, Kuga ta dauruuru dum̃amu paki mu mau. 44Te naata, Tamagu waina e dip̃aki lua au umai e pe ta puati a mau, e pe ta mari atae umai punusi au mau: go kinau aga wo sike a ega tuleana naaleatia edaku mau. 45E pei tea midiriana profeta maga, e naga, Go euga wo mamau puti pei tea vasapiseikiana ki Sup̃e. Sara naata waina eu dogo ki Tamagu, po ataedogo, eu do umai punusi au. 46E da pei naga te naata e punusi sua Tamagu mau, ma tea waina e m̃elu Sup̃e umai, nae e punusi sua Tamagu. 47Lomau, lomau, a noa ki mu, naga Tea waina e saralomau e peani namauriana waina e du mau du. 48Kinau a pei navinaga ni namauriana. 49Tamamu maga eu gani manna masop̃alo, go teu mate. 50Tea waia e pei navinaga waina e pae nakoroatelagi siwo umai, naga naatam̃oli euga kani seara kakana, po da mate mau. 51Kinau a pei navinaga mauri waina e pae nakoroatelagi siwo umai: te naata e pe kani navinaga waia seara kakana, e pe wo mauri pa pa e pe tu mau du: ioro go navinaga waina aga wo magi namauriana ni maramana pitua ki nia e pei nap̃okasigu.
52Nalakena tea wanogoe navarapule maga ni Yudea eu dum̃ada pululu ki da, eu naga, Naatam̃oli waia e mari atae dua gida nap̃okasina tuga kani a dapale sava? 53Nalakena tea wanogoe Yesu e noa ki da, e naga, Lomau, lomau, a noa ki mu, naga Ku pe ta gani nap̃okasi ni naatam̃oli Natuna po da munu nadana mau, ku pe ta peani namauriana doko nap̃alaumu mau. 54Tea waina e gani nap̃okasigu po munu nadagu e peani namauriana waina e du mau du; go kinau aga wo sike a ega tuleana naaleatia edaku mau. 55Nalakena nap̃okasigu e pei navinaga kaniana lomau, go nadagu e pei noai munuana lomau. 56Tea waina e gani nap̃okasigu po munu nadagu e doko au doko, go kinau a doko asa doko. 57Dapala waina Tamagu waina e mauri e dip̃aki lua au umai, go kinau a mauri nalakena Tamagu, dapala nogoe tea waina e gani au, nae ma ega wo mauri nalakena kinau. 58Tea waia e pei navinaga waina e pae nakoroatelagi siwo umai: e da dapala waina tamamu maga eu ganikani, po mate: tea waina e gani navinaga waia ega wo mauri pa pa ega tu mau du. 59E noa tea maga wanogoe ekopu ni nasum̃a ni nasaisaiana ragi waina e do pasa piseiki Kapernaum.
60Nalakena tea wanogoe tea vasapiseikiana aneana maga tea laapa kakada ragi waina eu dogo e, eu naga, Navasaana wanogoe e kasua; sei e mari atae dogo e? 61Ma Yesu, waina e dum̃ana atae naga tea vasapiseikiana aneana maga eu dauruuru nalo ni tea wanogoe, e noa ki da, e naga, Tea wanogoe e mari mu ku dapilagona kite? 62Mase ku pe leopunusi naatam̃oli Natuna e pe to sake paki tokora waina e doko asa sala vea? 63Naatana e pei tea waina e pakamauri; nap̃okasi e da silae kiki ki nia mau: navasaana maga waina kinau a po noa ki mu ara eu pei naatana, go eu pei namauriana. 64Ma te seara kakamu eu doko waina eu da saralomau mau. Nalakena Yesu e atae pae naatulakeana pa pa sei maga eu doko waina eu da saralomau mau, go sei e doko waina ega wo pitua ki nia. 65Go e naga, Nalakena tea wanogoe a noa ki sua mu, naga te naata sikai, e pe ta pei tea vituakiana paki nia pae Tamagu mau, e pe ta mari atae umai punusi au mau.
66Pae ragi wanogoe tea vasapiseikiana aneana maga tea laapa kakada eu liliu pano, po da moro surata sikoti a mau. 67Nalakena tea wanogoe Yesu e noa ki tea rualima sikai tamate dua, e naga, Nimu ma ku masauna naga kuga vano kite? 68Simon Petero e pasa dara e, e naga, Nawota, auga va punusi sei? Nigo ku peani navasaana maga ni namauriana waina e du mau du. 69Go kinami au saralomau sua, go au atae sua naga nigo ku pei Tea Tapu ki Sup̃e. 70Yesu e pasa dara ra, e naga, Kinau a da matadoa mu tea rualima sikai tamate dua, go sikai kakamu e pei diabolo sikai kite? 71Ma e noa Yuda natu ni Simon Iskariote, nalakena nae e pei tea waina ega wo pitua ki nia, e pei sikai ni tea rualima sikai tamate dua.
ที่ได้เลือกล่าสุด:
YOANE 6: NTB
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bible Society of the South Pacific
