JENESIS 6
6
1Go e pakilina, ragi waina naatam̃oli eu atulake nalaapaana narae ni natano, go natuda nagoroi maga eu madeada pakilina, 2Naga Sup̃e natuna naanoai maga eu punusi naatam̃oli natuda nagoroi maga naga eu pei raewia; go eu piragi nagoroi maga kaka ni tea mamau puti waina eu matadoa ra. 3Go Yehovah e noa, Naatagu ega wo da pululu ki naatam̃oli pa pa ega tu du po du mau du mau, nalakena nae ma e pei nap̃okasi: ma naaleatia aneana maga euga wo pei natau p̃onotia sikai rualima takuna dua. 4Go pule maga eu doko maramana naaleatia maga wanogoe, go ragi edaku, ragi waina Sup̃e natuna naanoai maga eu rumai punusi naatam̃oli natuda nagoroi maga, go eu madeada dape natuda maga: nara eu pei tea marimatua maga waina eu doko tuai, naatam̃oli maga ni narogoana. 5Go Yehovah e punusi naga nasigisigileoana ki naatam̃oli e p̃arua maramana, go naga sara naleo ni namidodoaana ni nap̃op̃oda eu sa mau sa sara naaleatia. 6Go Yehovah e midoakipiri naga e mari naatam̃oli doko maramana, go nap̃op̃ona e dogokitesa asa. 7Go Yehovah e noa, Aga wo kasi lua naatam̃oli maga waina a dawona ki da, m̃elu dua ki narae ni natano; naatam̃oli maga, go nalo tuavati maga, go tea kakaravi maga, go manu maga ni namalopa; nalakena a midoakipiri naga a mari ra. 8Ma Noah e pap̃ai nasaup̃iaana namata maga ni Yehovah.
9Tea maga waia eu pei navakilinaana maga ni Noah. Noah e pei naatam̃oli leana, tea wia lua tagona aneana maga: Noah e surata sikoti Sup̃e. 10Go Noah e pesi natuna naanoai dolu, Shem, Ham, go Yafeth. 11Go maramana e p̃oa narae ni Sup̃e, go maramana e pura ki namaripavakotoana. 12Go Sup̃e e punusi maramana, go p̃a leo, e p̃oa; nalakena sara nap̃okasi eu mari sa ki napua adeada maramana.
13Go Sup̃e e noa ki Noah, e naga, Nanopuana ni sara nap̃okasi e po umai paki naraegu; nalakena maramana e pura ki namaripavakotoana nalakena nara; go p̃a leo, aga wo mari sa ki da, nara ma maramana. 14P̃a manigo mari areka sikai ni nakau kofer; p̃a mari em̃ago maga areka, go p̃a vuluti a ekopu go katama ki napulu. 15Go p̃a mari a ega tapala waia: navarauana ni areka kubit p̃onotia dolu, naweleweleana kakana kubit rualima lima, go navakilagiana kakana kubit rualima dolu. 16P̃a mari namata leoduru sikai areka, go p̃a mari nasu ega vakilagi kubit sikai; go namata ni areka p̃a lawo ki nia taleva kakana; p̃a mari a ega vei tagona ni etano, go kerua, go ketolu. 17Go kinau, p̃a leo, kinau aga viragi natave ni noai maga umai paki maramana, naga ega maripunuvunue sara nap̃okasi, waina namero ni namauriana e doko ara, m̃elu dua ki etano ni nakoroatelagi; sara naleo waina eu doko navanua euga wo mate. 18Ma aga wo mari navasasokiana aginau ega toko ako; go p̃a wo umai paki ekopu ni areka, nimu ma natum̃a naanoai maga, go am̃agoroi, go sulim̃a maga, kuga mamau puti. 19Go sara nalo mauri ni sara nap̃okasi, p̃a viragi tea ruarua kakada paki ekopu ni areka, naga p̃a mauti ra euga mauri sikoti ko; euga vei tea anoai go tea goroi. 20Manu visarasara, go nalo tuavati visarasara, sara nalo kakaravi visarasara ni natano, tea ruarua kakada euga umai punusi ko, naga p̃a mauti ra euga mauri. 21Go p̃a tape sara navinaga seara waina e pei tea kaniana, go p̃a saisai ki nia paki ekopu; go ega wo pei navinaga anigo, go adeada. 22Noah e mari dapala nogoe; e mari pataka ni tea mamau puti waina Sup̃e e dip̃aki nia asa.
ที่ได้เลือกล่าสุด:
JENESIS 6: NTB
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bible Society of the South Pacific