Chukusakị 4
4
Ken Ḅe Na Ebẹl Ḅe Na
1Adam ḅe ọ̀ tarọ ma na gbolomamẹ, seni á furamẹ. Á gbọrị owutọkụ yimẹ, seni á nwọ ḅẹmẹ, “Nyanaḅọ Ḅe ḅarachụa ḅụ, à gbọrị owutọkụ nyanasam.” Anịgose Ken á nwọ seni ọ̀ chịnmẹ. 2Anịeso á pịkịna jịn owutọkụ yimẹ anị Ebẹl ḅe-ẹ. Ebẹl ḅe ori anana ḍikiḍiki ḅọ-ẹ, ọkụma Ken ḅe ozukọrị ḅọ-ẹ. 3Sịkị kele ḅọrọ sịkị, Ken ḅe oria ozu ḅie ò soku ḅoaye ḅie daye nwọse ḅo ḍiepịrịaye agbamịẹ seni Nyanaḅọ Ḅe pịrịmẹ. 4Ebẹl ḅe sọnị oria ananama ḅie gbọrị anana tatarị yi ayamburama anana tọkụ ọkịpakụmaḅo ḅaa, seni ọ̀ ḅụ ḅẹlẹkịma seni agba mịẹmẹ. Nyanaḅọ Ḅe Ebẹl ḅe na ọ̀ mịẹ agba mị na ò ḅieḅẹlẹmamẹ, 5ọkụma Ken ḅe na oria agba mị na ọ̀ sịkịmẹ, Ken ḅe anị ò ḅụo sọ so ọkụma ḍikiḅụnwọnwọ ḅụ ori ò kuḅie ọlọkẹ. 6Anị Nyanaḅọ Ḅe nwọse Ken ḅe ḅẹye-ẹ, “Cheye gose ị́ ịganị-ao? Cheye gose ị́ tọrụfụrụma-ao? 7Ị́ ḅọrọ iḅiye mịẹ ọkụma, ị́yaye sọnị àrị ọkị ḅịa; ọkụma ị́ ḅụ ọbịka ọkụma, si ị́ya warịḅọkọ ḅọị ị́ koruaḅẹ. Anị ḅẹrẹtọn ị́ pịrị ḅiaḅẹ, ọkụma ọrị na ị́ ḅẹrẹtọn anị pịrịmẹ.”
8Anị Ken ḅe nwọse numbireowu Ebẹl ḅe ḅẹye-ẹ, “Ye wa paka eleogbo mun.” Ini paka eleogbo mun sịkị, Ken ḅe, ò vinpịkị numbireowu ḅe dapaka se ọ̀ ḅaamẹ.
9Nyanaḅọ Ḅe Ken ḅe gbelamẹ, “Ị́ mbire Ebẹl ḅe nde ori?”
Ọ̀ nwọ pẹkẹrẹmẹ, “À nemikẹ. Àrị ị̀ mbire ḅe koruḅọ sọḅe?”
10Anị Nyanaḅọ Ḅe nwọ ḅẹye-ẹ, “Mịn che opu siye ị́ nwọ mịẹsa? Ị́ mbire ḅe ḅụ pakaḅo pulo mị kiriḅie anị owu pakaḅo ị̀ la aḅẹ, gbẹịn fịye fị owu anị nwọ kọn aḅẹ. 11Worinime ị́ lasam, mịn kiri mị ḅụ, ị́ pịkị ḅarị anịa ḅie fịrịnwẹngị ẹkẹ. Anị ḅịpị finji ị́ mbire ḅe ḅụ pakaḅo pulo mị ọkị mịnị kiri mị ị́ ḅara ḅụ. 12Ị́ fịaye ḍipi ḍọkị ḅịa sịkị, kiri mị gbọrịye sọnị anị pakụmaḅo ẹkẹ, ị́ papa warị nyanakaḅọ ḅara nwọse sẹkiri ḅie gelegele ḅụ nwẹngịma ḅọrọḅịa.”
13Anịḅụ Ken ḅe nwọse Nyanaḅọ Ḅe ḅẹmẹ, “Mị fomuḅara mị opuma ḍụḅa ị̀ nẹngịmẹ, àrị ineda anị da ẹkẹ. 14Kiri mị ḅụ na, ị́ tọrụkuḅu na ị́ ị̀ desin aḅẹ, sẹkiri ḅie warị nyanakaḅọ ḅara à nwọse gelegele ḅụ nwẹngịma ḅọrọḅịa, ị̀ ọrịḅọ ọrịḅọ ineda ị̀ ḅaaḅịa.”
15Ọkụma Nyanaḅọ Ḅe nwọ pẹkẹrẹmẹ, “Ẹn-ẹn, ị́ ḅaaḅọ goyegoye sowuḅi ḅụ sọnọmapụ ḍumo faḅịa.” Anịẹrẹchị, Nyanaḅọ Ḅe ori elekima seni Ken ḅe ḅụ chụamẹ, seni ọrụḅọḅọ ḅerijinemẹ na ori ọrịḅọ goyegoye ọ̀ ḅaama-ẹ. 16Anịḅụ, Ken ḅe Nyanaḅọ Ḅe tọrụkuḅu nwẹngịso mun “Nwẹngịmaḅọrọ” nwọ chịn gbọrị ama ḅie angamẹ, anị Idẹn ḅụ ịrụapakapaka nyọ daọrụ ḅụ.
Ken Furo Ḅie Awọ Ma
17Ken ḅe na tarọ ma na gbọrị owutọkụ nwọ yimẹ, ini nwọse ọ̀ chịnmẹ Enọk. Ken ḅe gbọrị opuama ọ̀ nwọ namamẹ, ori anị seni oria tọkụ ḅe korumẹ. 18Enọk ḅe Ịrad nwọ chịn gbọrị owutọkụ ọ̀ nwọ yimẹ, ori anị Mẹhujaẹl ḍa-ẹ, Mẹhujaẹl ḅe anị Mẹtushaẹl ḅe yi ye-ẹ, Mẹtushaẹl ḅe anị Lemẹk ḍa ḅe-ẹ. 19Lemẹk ḅe mama eremeni ọ̀ nwọ simemẹ, Ada ma na, Zila ma na. 20Ada ma Jabal ḅe yimẹ, ori anị ikowarịma ḅie anga, se nama kokokokoapụma inia ḅieju ḍaḅọ-ẹ. 21Numbireowu, anị Jubal ḅe-ẹ, ori anị nime chuchuapụ na farịfarịaye na pịkị ọbọ na ye ofurofuroapụma inia ḅieju ḍaḅọ-ẹ. 22Zila ma Tubal Ken ḅe yimẹ, ori anị alapẹlẹka na ikulele na se kịrịkịrị fịrịnwẹngịaye tẹmẹtẹmẹḅọ-ẹ. Tubal Ken ḅe nụmbụrarọma anị Neama ma-ẹ.
23Lemẹk ḅe nwọse oria erema ḅẹmẹ,
“Ada na Zila na, ómine ị̀ poki:
Gbọrị asẹmẹnị tọkụ à nwọ ḅaasam ò yese ị̀ lamamẹ gose.
24Ken ḅe tịḅị sowu sọnọmapụ ọkịmẹ ḅẹḅẹ,
Ị̀rị̀ Lemẹk ḅe tịḅị sowu tẹrẹfa kịnị-a iniasi anị nwọ ọkị ḅịa.”
Sẹt Ḅe Na Enọs Ḅe Na
25Adam ḅe na tarọ ma na ini pịkịna jịn owutọkụ yimẹ. Á nwọḅẹmẹ, “Tamụnọ Ḅe Ken ḅe ḅaa Ebẹl ḅe tịḅị ḍinmaḅịa jịn owutọkụ ọ̀ nwọse ị̀ pịrịsam.” Anịẹrẹchị Sẹt á nwọse ọ̀ chịnmẹ. 26Sẹt ḅe gbọrị owutọkụ yimẹ se ọ̀ nwọse ọ̀ chịnmẹ Enọs. Anịsịkị mị ḅụ anị tomoni sakị Nyanaḅọ Ḅe fịafịa ẹrẹ mị seni ọ̀ tẹkẹye-ẹ.
ที่ได้เลือกล่าสุด:
Chukusakị 4: OBTP
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
The Bible Society of Nigeria