Matio 2
2
Ka kitci kiskeritakik e pe natawapamatcik Cecoca
1 Bethléemik ki taci nitawikiw Cecoc, Judée askik ici takoniw aniheriw otenariw. Hérode mekwata okimawikopan neta. Ka ickwa nitawikitc Cecoc, atita iriniwok ka nahi kiskeritakik, atcikoca ka nanto kiskerimawakopanen, ki pe takociniwok Jérusalem otenak, nte wapanok e pe ototetcik, 2e kokwetcikemotcik: “Tante anahwe awacic ka ki nitawikitc, cota iriniwok ke okimamitcik? Ni ki wapamanan otatcikocima, wapanok ka pe nokosiritci. Ni ki tca pe icanan kitci ki pe nta kicterimakitc.”
3Ka petaketc aniheriw okimaw Hérode, ki micta arimeritam. Kaie wirawaw ka taciketcik Jérusalem otenak ki micta arimeritamok. 4Kaskina tca Hérode ki mawotcihew cota makatewokorewa ka tiperitamiritci kirika ka kiskinohamakeritci cota aiamihe irakonikewiniw, e kokwetcimatc: “Tante ke ici nitawikiritci anihi Kice Manito ka ki itetc kitci pe iciticohwatc kitci akwacimiweritci?”
5Ki naskamowok e itetcik: “Bethléemik, Judée askik itekera. Enko ohweriw ka ki masinahak peikw ka ki pe nikan tipatcimotc Kice Manitowa otci, e itemakanik:
6‘Kir, Bethléem otenaw, Juda askik ka ici takok,
namaiew ni kir mawotci aka ka kicteritakok e tatiki otenawa neta Juda askik;
Ekota nta ke otcitc anahwe ke okimawitc,
anahwe ke tiperimatc nitirinima, Israël iriniwa.’” Michée 5.1(2)
7Aci kimotc ki wicamew anahweriw ka kitci kiskeritamiritci Hérode, e wi natowi kiskeritak apitc mia ka otci nokosiritci anihi atcikoca. 8Ka ickwa witamakotc, minawatc ki iciticahwew Bethléem otenak, e itatc: “Icakw neta Bethléemik, wewerita kitci nanto kiskerimekw anahwe awacic. Ickwa tca miskawekwe, pe nta witamacikw, kaie nin kitci ki nta kicterimak.”
9Ka ickwa itikotcik aniheriw kice okimawa, ki matcawok. Ki wapamewok tca anihi atcikoca ka ki pe nanakatcihatcik wapanok itekera, e nikanickaritci nte e icatcik. Kek nokickaw anahwe atcikoc nte ka ici taritci anihi awaca. 10Micta kice mireritamok aci e wapamatcik anihi atcikoca e ki nokickaritci neta. 11Ekoni e ici pitaketcik mikiwamik. Wapamewok awaca kirika okawiriw, Mari. Nipiskoctawewok anihi awaca e kicterimatcik. Ekoni e ici apikonakik otirapatcitcikaniwaw ka ki petatcik, e cawerimatcik: osawo coriariw, aiamihe pikiwa ka miromakosiritci, kaie sakatakaniw ka akwapiterik, “la myrrhe” ka icinikaterik. 12Minawatc Kice Manitowa ki witamakowok aniki ka kitci kiskeritakik e wecipapatakik, aka awocamec kitci natawapamatcik anihi okimawa Hérode. Kotakeriw tca meskanariw ki apatcitawok kitci ki kiwetcik.
Ka ocimotcik Sosep, Mari kirika onitcaniciwawa, Égypte askik e icatcik
13Ka ickwa matcatcik aniki ka kitci kiskeritakik, peikw aceriwa ki wecipamew Sosep, Teperitciketc otacerima, e tca itikotc: “Pasiko! Matcewirik aniki awacic kirika okawiwa. Nte tca ocimohik Égypte askik. Ekote nte tacikekw, nac minawatc kitci witamatan apitc ke pe kiweiekw. Hérode meka kata nantowapamew awaca kitci nipahakaniwiritci.”
14Ki tca pasiko Sosep, e tca matcewiratc anihi awaca kaie okawiriw e mekwa tipiskarik, e ocimohatc Égypte askik. 15Ekote nete ka taciketcik, nac ka niporitci Hérode. Kaskina anihe ki iciwepan tapwe kitci ki otcitciparinik aniheriw weckatc ka ki iteritci Teperitcikeritci, e ki witamawaritci anihi ka ki pe nikan tipatcimoritci, Osée ka ki icinikasoritci:
“Ni ki wicamaw nikosis kitci orowitc Égypte askik.” Osée 11.1
Awacak ka nipahakaniwitcik
16Kotc ka kiskeritak Hérode e ki wecimikotc anahweriw ka kitci kiskeritamiritci, ki micta kiciwasiw. Ki tca irakonikew kitci nipahakaniwiritci kaskina ockinikicica ka ocki nitawikiritci nac ka nicwo piponesiritci neta Bethléem otenak ka tacikeritci kaie nakewara askiwa Bethléemik ka takoki, kotc ka ki ici itikotc ka kitci kiskeritamiritci apitc mia ka ki otci nokosiritci anihi atcikoca. 17Ekoni ka ki isparinik kotc ka ki itespan anahwe ka ki pe nikan tipatcimotc, Jérémie ka icinikasospan:
18“Ki petcikatew e nanotakosinaniwok Rama askik,
kaie e matonaniwok e micta nekaterimonaniwok.
Enko na Rachel ka moskwatatc onitcanica.
Nama ki kakitcihakaniwiw. Kaskina meka ki niporiwa.” Jérémie 31.15
Israël askik ka pe kiwetcik Sosep, Mari kirika onitcaniciwaw
19Ka ickwa nipotc Hérode, mekwata nete Égypte askik e tacikewaspan, Sosep ki wecipamew peikw aceriwa, Teperitciketc otacerima. 20Ki itiko: “Pasiko. Kiwe tca aci nete Israël askik, kitci tca matcewiratcik anahwe awacic kirika okawiwa. Aci meka anahweriw ka wi nipahikospan ki ickwa niporiwa.”
21Ki pasiko Sosep. Ki matcewirew anihi awaca acitc okawiriw e tca kiwetcik Israël askik. 22Aric ka petaketc Sosep aci Héroda e ki tapickakoritci okosiriw, Archélaos e icinikasoritci, e okimawiritci Judée askik, aci ki sekisiw Sosep kitci ki nta taciketc neta askik. Kiapatc minawatc peikwaw e tipiskarik ka wecipapatak, ki icinam e witamawakaniwitc minawatc ke itotisketc. Galilée askik tca ki ici matcaw. 23Ki nta tacikew otenak Nazareth ka icinikaterik. Ekoni ka ki isparinik, kotc ka ki itetcik ka nikan tipatcimowaspan Kice Manitowa otci: “Kata icinikatakaniwiw ‘Nazareth iriniw.’”
ที่ได้เลือกล่าสุด:
Matio 2: ATMK
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Canadian Bible Society, 2014
